Read Yamano Wɛ̀lɛ̀vèlésɔ̃̀ 21 Bible Online

Wɛ̀lɛ̀vèlésɔ̃̀ 21 - Yamano bible

Wɛ̀lɛ̀vèlésɔ̃̀ 21

¹Lɛ̀ e kɛ kília, m lɛ̀í dɛɛ wà kpóṹ là dɛɛ gɛ̃̀. Ƃii lɛ̀í bèĩzɛ̀ wà kpóṹ là bèĩzɛ̀ɛ, o kɔ̃́ o ká. Ɛ́ɛ̃́ mɛ̀ĩ́ e wàà.

²Ɛ́ɛ̃́ m Wálà là Sɛ́lɛ́ lɛ́ e Zùlúsàlɛ̀ dɛɛ káa gɛ̃̀, áà gò lɛ̀í Wálà píé. À pɛ̀ kɛɛ̀ e kɛá lɛ̀ zí léé è nu gɔ̃ síì, lɛ́ waà mɛ́ sí kɛ é nu e dɛ̃ píéa lɛ́ ɓe.

³M bɛ̀i m wéé gágà dò ma áà gò dɔ-táŋánáa là weeá kélɛ̀, “Lɛ̀ gɛ̃̀, Wálà aà e yàlà kṹ gbaa mia bà. Lɛ́ɛ̀ lo kɛɛ̀ o píé ɛ̃́ɛ̃́ o bɛ̃̀ɛ̃ óò lo kɛɛ̀ là mia nì ká. Wálà dìè lɛ́ɛ̀ lo kɛɛ̀ o píé.

⁴Lɛ́ɛ̀ lo o nyìɛ-yíí sòlóò o nyìɛ féfé le. Ga nɔ́ɔ fé dò lɛ̀ɛ́ ló gbaa kɛɛ̀ ɓe. Yà yéĩ̀zɛ̀, ɛ̃́ɛ̃́ gbóó-wè, e bɛ̀i wàa gbɛɛ dò nɔ́ɔ fé lɛ̀ɛ́ ló gbaa kɛɛ̀ ɓe. Pɔɔ̀ zii zii lɛ́ e kɛ ɓea séĩ́ aà die gbaa.”

⁵Mi lɛ́ e kɛ yàá dɔ-táŋánáa làa a gèe kélɛ̀, “M pɛ séĩ́ dɛɛ kɛpìà gbaa.” A gèe zeĩ́ m lɛ̀ɛ kélɛ̀, “Wɔ̃́ e kéa bɛ̃̀ɛ̃, ɓii wéé e kéa lɛ wánà zɛ̀, ɛ̃́ɛ̃́ mi íì bɛ̀i à mɔ̀ í i zò dɔ à mɔ̀.”

⁶A gèe weeá kélɛ̀, “À kɛɛ̀ lɛ gbaa. Ma lɛ́ m Áfà wà Òmégà káa. Ma lɛ́ m wɔ̃́ zi-gbɛ̃̀pìà wà à líé-nyɛ-pìà káa. Mi nɔ́ɔ fé lɛ́ yíí-mi-lɔ̀ à kɛ̀ɛ, ḿm̀ lo mi-yìì lɛ́ è go yíí-to lɛ́ kɛ̀ɓe-yìì è go à píéa nɔɔ̀ à lɛ̀ɛ ɓɔ̀ɔ.

⁷Mi lɛ́ à kɔ̀ diè lɛ gèlè gɔ̃ɔ̀ yía, pɛ dò lɛ́ɛ̀ lo góò m kɛ̀lɛ̀ tó a sɔ̀lɔ̀ ɓo. Pɛ́ e kília lɛ́ e kélɛ̀, ḿm̀ lo kɛɛ̀ là Wálà ká, ɛ̃́ɛ̃́ à bɛ̃̀ɛ̃ lɛ́ɛ̀ lo kɛɛ̀ m gbe ká.

⁸Kɛɛ tùò-mia-wɛlɛ-lɛ̀ɛ mìà, ɛ̃́ɛ̃́ mia lɛ́ zò-dɔ̀à-mɔ̀ wá o yíaò, e bɛ̀i, wɔ̃́ yɔɔ̀ yɔɔ̀ kɛ-mìà, mia zɛ-mìà, ɛ̃́ɛ̃́ zeĩ́ sɔ̃̀ɔ̃ yɔɔ kɛ-mìà, e bɛ̀i, mia lɛ́ ò nyìɛ̀ yɔɔ̀ yɔɔ̀ kɛ̀ɛò, ɛ̃́ɛ̃́ mia lɛ́ ò gbìnì kɛ̀ɛ̀-wɛ́lɛ́ lɛ̀ɛ, e bɛ̀i nɛ̀-kɛ-mìà séĩ́, o pà lɛ́ɛ̀ lo kɛɛ̀ lɛ̀ lɛ́ tíé è kũ yí sɔ́fà mɔ̀, lɛ́ e ga kpolà pèèlɛ zɛ̀ káa lɛ̀ mɔ̀.”

⁹Wálà là vɔ-mìà sálápèèlɛ vɔ̀ lɛ́ kɔ́ɓà sálápèèlɛ, lɛ́ à paà e kɛá mia sã̀-dɔ-pɛ̀ sálápèèlɛɛ líé-nyɛ-mɔ̀ káa e kɛ o kɛ̀lɛ̀ɛ, o doó-mì e nu m píé áà gèè, “Nu zèe. Ma lɛ́ m̀ lo léé lɛ́ Ƃáá nyɔ̀nɔ́ɔ aà sí e na káa zɔ̃̀ɔ̃̀ i lɛ̀ɛ.”

¹⁰Gɛ̀ɛ̀ Púlú e kɛ m là, ɛ̃́ɛ̃́ Wálà là vɔ-mì e ló m ká tɔ̃̀ũ̀ gbèkèni kpó-kpó wĩĩ́. E Wálà là Sɛ́lɛ́ lɛ́ e Zùlúsàlɛ̀ káa zɔ̃̀ɔ̃̀ m lɛ̀ɛ áà gò Wálà píé lɛ̀í.

¹¹E kɛ ɓípìà Wálà là lɛ̀-fɔ̀nɔ-kɔ̀ yí. Sɛ́lɛ́ e kília e kɛ ɓípìà lɛ̀ zí gɛ̀lɛ̀ sɔ̃̀ɔ̃́ gbùò zɛ̀ è ɓiáa lɛ́ ɓe. E kɛ kélɛ̀ zásépà lɛ́ ɓe. E kɛ séŋé-sèŋè lɛ̀ laa-wɛ́lɛ́ lɛ́ ɓe.

¹²Gàlà gbèkèni kpànazɛ̀ dò ɓoò e kɛá à mɔ̀. À lé e kɛ vũ̀ doó wɛ́lɛ́ pèèlɛ. Wálà là vɔ-mìà vũ̀ doó wɛ́lɛ́ pèèlɛ lɛ́ o kɛ yàá píé gàlà e kília lé mɔ̀ɔ. Gàlà e kília lé mɔ̀ɔ Éézɛ̀lɛ̀ là nɔ́ɔ̀ sùu-là-mìà kpolà vũ̀ doó wɛ́lɛ́ pèèlɛɛ, o tɔ́ bɛ̃̀ɛ̃ɛ̃̀ e kɛá gàlà e kília lé mɔ̀ doó doó.

¹³Gàlà e kília lé e kɛ à sɛ̃́ĩ́ doó mɔ̀ yààka. À yààka e kɛ nyɛ́nɛ́ wɛ̀lɛ̀pìà, à yààka e kɛ zeĩ́ nyɛ́nɛ́ dàpìà. À sɛ̃́ĩ́ mɔ̀ pèèlɛ e tóa e kɛ o mɔ̀ yààka yààka.

¹⁴Gàlà lɛ́ à ɓoò lɛ sɛ́lɛ́ e kília mɔ̀ɔ, à gã̀ gbɛ̃̀à-là-pɛ̀ e kɛ vũ̀ doó wɛ́lɛ́ pèèlɛ. Ƃáá nyɔ̀nɔ́ɔ là àpɔ́sɔ̀lɔ̀ vɔ̀ vũ̀ doó wɛ́lɛ́ pèèlɛɛ tɔ́ bɛ̃̀ɛ̃ɛ̃̀ e kɛ à ká gàlà gã̀ gbɛ̃̀à-là-pɛ̀ e kília mɔ̀ doó doó.

¹⁵Wálà là vɔ-mì yé e mɛ́ĩ́ ɓo m lɛ̀ɛ, pɛ-gɔ̃́-yìlì lɛ́ à kɛɛ̀ lɛ góò káa e kɛ à kɛ̀lɛ̀, kɛɛ é sɛ́lɛ́ɛ wà gàlà lɛ́ à ɓoò lɛ à mɔ̀ɔ, é bɛ̀i é gàlà e kília lé gɔ̃́ à ká.

¹⁶Sɛ́lɛ́ e kília góó e kɛ yììsɛ, ɛ̃́ɛ̃́ à kɛ̀-gbèĩ-kɔ̀ lɛ́ e kɛá à kɔ̀ pɔ̃́ũ̀ yììsɛɛ làa, à bɛ̀iì e kɛá e kíe ká. Wálà là vɔ-mì e kília e sɛ́lɛ́ e kília gɔ̃́ là yílía ká. À gɔ̃́ a ɓoa, à zì kɛ̀-gbèĩ-kɔ̀ máà e kɛ wáá doó là wũ sɔ́ɔ́li ká. Zi lɛ́ e kɛá gbèĩ lɛ̀í, ɛ̃́ɛ̃́ zi lɛ́ e kɛá gbèĩ e kpàla yía, e kɛ nɔ́ doó.

¹⁷Wálà là vɔ-mìa e gàlàa gɔ̃́ nɔ́ kíli. À gɔ̃́ a ɓoa à zì dɔ̀-gã̀-mɔ̀ kɛ̀-gbèĩ-kɔ̀ e kɛ yáà vũ̀ sálápèèlɛ wɛ́lɛ́ pèèlɛ ká, mia ɓéèe zì pɛ gɔ̃́-zì lɛ́ e kɛ pɛ gɔ̃́pìà káa kolo là zàá.

¹⁸Gàlà e kília wa kɛ zásépà ká. Sɛ́lɛ́ e kília dìè dɔɔ̀ e kɛá góò kpó-kpó ká. E kɛ zéĩ́-zèĩ̀ lɛ̀ gálásì lɛ́ ɓe.

¹⁹Gàlà lɛ́ e kɛ sɛ́lɛ́ e kília mɔ̀ɔ, gã̀ gbɛ̃̀à-là-pɛ̀ mɛ́ síì e kɛ à ká gɛ̀lɛ̀ sɔ̃̀ɔ̃́ gbùò zɛ̀ doò do ká píé. À bèĩzɛ̀ lé e kɛ zásépà káa. À tò-ko-mɔ̀ lɛ́ ò si sáfàa. À yààka zɛ̀ lɛ́ e ágè káa. À yììsɛ-mìa lɛ́ ò si ɛ́málòa.

²⁰À sɔ́ɔ́li-mìa gɛ̃̀ ò si ɔ́nè ɓɛ. À sáláádo-mìa bɛ̃̀ɛ̃ óò si kànélìà. À sálápèèlɛ-mìa yee óò si kílísóláì. À sálàka-mìa bɛ̃̀ɛ̃ tɔ́ lɛ́ bɛ́lò. À sɛ́lɛ́ìsɛ-mìa yee tɔ́ lɛ́ tópà. À vũ̀ doó mìa tɔ́ lɛ́ kílísòpásì. Óò à vũ̀ doó wɛ́lɛ́ doó mìa si zásɛ̃̀. À líé-nyɛ-mɔ̀ zɛ̀ɛ tɔ́ lɛ́ gbaa ámátè.

²¹Gàlà lé vũ̀ doó wɛ́lɛ́ pèèlɛɛ kɛɛ̀ e kɛá pɛ púlú ɓóŋóló-ɓóŋóló ká. O gàlà e kília lé kɛ pɛ púlú e kília doó ká doó doó. Zi ɓɛ̀lɛ̀ĩ̀-fĩ̀ã̀ lɛ́ e sɛ́lɛ́ e kília yía, kɛɛ̀ e kɛá góò kpó-kpó ká. E kɛ yélé-yèlè lɛ̀ gálásì lɛ́ ɓe.

²²M̀ḿ gbaa Wálà-kà gbɛɛ gɛ̃̀ sɛ́lɛ́ e kília yí. Ƃii à mɔ́ɔ̀ Wálà-kà lɛ́ lɛ ko Dàa-mì Wálà lɛ́ yíkɛ̀ gáàa séĩ́ laa kɛ̀lɛ̀ɛ, wà Ƃáá nyɔ̀nɔ́ɔ o káa.

²³Sɛ́lɛ́ e kília làá naa bɛ̃̀ɛ̃ kɛ nyɛ́nɛ́ wà mɛnɛ ó ɓí bɛ̃̀ɛ̃ à mɔ̀, ɓii Wálà zì lɛ̀-fɔ̀nɔ-kɔ̀ɔ lɛ́ɛ̀ fɔ̀nɔ à là. Ɛ́ɛ̃́ Ƃáá nyɔ̀nɔ́ɔ lɛ́ e à zì nábò káa.

²⁴Sɛ́lɛ́ gbɛɛ̀ gbɛɛ yí-mìà óò lo táà à zì lɛ̀-fɔ̀nɔ-kɔ̀ e kília bĩ́ wì. Ɛ́ɛ̃́ sɛ́lɛ́ líé-sí-mìà lɛ́ o kpóṹ là zèea óò lo nuù o zì dɔ-pɔ̀ɔ̀ ká à yí.

²⁵Sɛ́lɛ́ e kília mɔ́ɔ̀ gàlà lé ɓoò lɛ́ɛ̀ lo kɛɛ̀ à ká làapíé é tóá kíli nyɛ́nɛ́ é ló. À lé lɛ̀ɛ́ ló taà, ɓii bĩ́ gbɛɛ lɛ̀ɛ́ mí yi.

²⁶Óò lo sɛ́lɛ́ gbɛɛ̀ gbɛɛ yí-mìà wà dɔ-pɔ̀ɔ̀, ɛ̃́ɛ̃́ wà pɔɔ̀ kpànazɛ̀ɛ, óò lo nuù o ká sɛ́lɛ́ e kília yí.

²⁷Kɛɛ pɛ mɛ́ lilì kṹã̀a zɛ̀ gbɛɛ lɛ̀ɛ́ ló ɓɔɔ̀ sɛ́lɛ́ e kília yí. E bɛ̀i zeĩ́ mi nɔ́ɔ fé lɛ́ è wɔ̃́ yɔɔ̀ yɔɔ̀ kɛ̀, ɛ̃́ɛ̃́ lɛ́ è nɛ̀ kɛ̀ɛ, òó ló ɓɔɔ̀ yi. Míá nɔ́ o tɔ́ bɛ̃̀ɛ̃ɛ̃̀ lɛ Ƃáá nyɔ̀nɔ́ɔ là kɛ̀ɓe-kiia yía lɛ́ nɔ́ ò lo ɓɔɔ̀ sɛ́lɛ́ e kília yía.