Read Yamano Wɛ̀lɛ̀vèlésɔ̃̀ 7 Bible Online

Wɛ̀lɛ̀vèlésɔ̃̀ 7 - Yamano bible

Wɛ̀lɛ̀vèlésɔ̃̀ 7

¹Lɛ̀ e kɛ kília, m Wálà là vɔ-mìà yììsɛ gɛ̃̀ dɔ̀á kpóṹ là góó yììsɛɛ mɔ̀. O kɛ fã̀ã̀ yììsɛ lɛ́ e kpóṹ là zèea kṹpìà, yékɛ̀ à dò nɔ́ɔ fé é die kpóṹ là zèe ɛ̃́ɛ̃́ mɛ̀ĩ́ là, ɛ̃́ɛ̃́ yékɛ̀ é mɛ̀ yílí nɔ́ɔ fé mɔ̀.

²E bɛ̀i, m Wálà là vɔ-mì doó gɛ̃̀ zeĩ́ áà gò nyɛ́nɛ́ wɛ̀lɛ̀pìà. Wálà lɛ́ lɛ ɓea, là pɛ dɔ̀á-kɛ̀-à-mɔ̀ pɛ̀ e kɛ à kɛ̀lɛ̀. E e wè wɛ̀lɛ̀ lɛ̀í, áà gèè Wálà là vɔ-mìà yììsɛ lɛ́ yíkɛ̀ gáàa nɔɔ̀ e kɛá o lɛ̀ɛ kɛɛ ó tã́ã̀ zèe wà mɛ̀ĩ́ o sìèa o lɛ̀ɛ

³weeá kélɛ̀, “Yékɛ̀ ká kpóṹ là zèe, wà mɛ̀ĩ́, e bɛ̀i yílí nì, o lɛ̀ dò sìè nɛ́, yé kòó kò Wálà là yɛɓo-kɛ-mìà dɔ̀á kɛ nɛ́ o pelàa ká.”

⁴Yé e kɛ kília, m mia kù lɛ́ o dɔ̀á kɛɛ̀ e kɛá o mɔ̀ɔ, zi lɛ́ o kɛá gbùòa ma wɔ̃̀ ma. E kɛ mia wáá wũ doó là vũ̀ yììsɛ wɛ́lɛ́ yììsɛ ká. O gó mia sùu doò do lɛ́ e Éézɛ̀lɛ̀-mìà káa bà.

⁵Mia lɛ́ o gó Zúdà sùu là lɛ́ o dɔ̀á kɛɛ̀ e kɛá o mɔ̀ɔ, o kɛ mia wáá vũ̀ doó wɛ́lɛ́ pèèlɛ ká. Ɛ́ɛ̃́ zeĩ́, mia wáá vũ̀ doó wɛ́lɛ́ pèèlɛ o gó zeĩ́ Wúlúbĩ̀ sùu là. E bɛ̀i zeĩ́ mia wáá vũ̀ doó wɛ́lɛ́ pèèlɛ o gó Gáà sùu là.

⁶Ɛ́ɛ̃́ zeĩ́, mia wáá vũ̀ doó wɛ́lɛ́ pèèlɛ o gó Ásà sùu là. E bɛ̀i, mia wáá vũ̀ doó wɛ́lɛ́ pèèlɛ o gó zeĩ́ Nátálè sùu là. Ɛ́ɛ̃́ zeĩ́, mia wáá vũ̀ doó wɛ́lɛ́ pèèlɛ o gó Mànásè sùu là.

⁷Zéniía, mia wáá vũ̀ doó wɛ́lɛ́ pèèlɛ o gó Símíà sùu là. Ɛ́ɛ̃́ mia wáá vũ̀ doó wɛ́lɛ́ pèèlɛ o gó Lííváì sùu là. E bɛ̀i, mia wáá vũ̀ doó wɛ́lɛ́ pèèlɛ o gó Ésíkà sùu là.

⁸Ɛ́ɛ̃́ zeĩ́, mia wáá vũ̀ doó wɛ́lɛ́ pèèlɛ o gó Zɛ́ɓílɔ̀ũ̀ sùu là. E bɛ̀i, mia wáá vũ̀ doó wɛ́lɛ́ pèèlɛ o gó Zósɛ̀ sùu là. Ɛ́ɛ̃́ mia wáá vũ̀ doó wɛ́lɛ́ pèèlɛ o gó Bɛ̃́zímà sùu là nɔ́ kíli.

⁹Lɛ̀ e kɛ kília m lɛ̀ gɛ̃̀. Lɛ̀ ma gɛ̃̀ɛ, m mia gbààlà gbùò zɛ̀ gɛ̃̀. Bɛ̀i lɛ̀ɛ́ gbaa kɛ mi dò mɔ̀ kɛ é o lóní. O gó mia kpóló kɛ-kɔ̀ gbɛɛ̀ gbɛɛ zɛ̀ séĩ́, e bɛ̀i síí séĩ́, ɛ̃́ɛ̃́ sɛ́lɛ́ gbɛɛ̀ gbɛɛ yí-mìà séĩ́, ɛ̃́ɛ̃́ zeĩ́ wè gbɛɛ̀ gbɛɛ gèe-mìà séĩ́ bà. O dɔ dɔ-táŋánáa wà Ƃáá nyɔ̀nɔ́ɔ wɛlɛ mɔ̀. Sɔ púlú dàaà e kɛá o mɔ̀. Tóṹ-lɛ́ɛ́ e kɛ o kɔ̀ lé píé,

¹⁰wáà gèè dóo weeá kélɛ̀, “Ko zì la-ɓoa lɛ́ɛ̀ go kò Wálà lɛ́ lɛ yàá dɔ-táŋáná là, e bɛ̀i Ƃáá nyɔ̀nɔ́ɔ kɛ̀lɛ̀.”

¹¹Wálà là vɔ-mìà séĩ́ o nìɛ̀ dɔ-táŋáná, e bɛ̀i, mia dìè-dìèa ɛ̃́ɛ̃́ pɛ ɓéèe yììsɛɛ o ká. O pèlè o gí là dɔ-táŋánáa wɛlɛ mɔ̀ wáà gbìnì Wálà lɛ̀ɛ

¹²weeá kélɛ̀, “É kɛ kíli. Mi tɛ̀nɛɛ̀, ɛ̃́ɛ̃́ mi tɔ́-ɓɔɔ̀, e bɛ̀i gíkã́ wà zúo ɓo, ɛ̃́ɛ̃́ zeĩ́ ɓɛ̀lɛyà, yíkɛ̀ gáàa ɛ̃́ɛ̃́ mɛ́-kɛ̀-gáàa è kɛ kò Wálà là pɛ ká tòá kíli wɔ́lɔ́-wɔ́lɔ́ ká. É kɛ kíli.”

¹³Yé e kɛ kília, mia dìè-dìè vɔ̀ɔ doó-mì e m wɛ̃́ĩ́-lɔ̀ɔ kɛ weeá kélɛ̀, “Mia lɛ́ sɔ púlú lɛ o mɔ̀ɔ, dé e o ká, ɛ̃́ɛ̃́ mɛ́ɛ lɛ́ ò go yí?”

¹⁴Ma gèe à lɛ̀ɛ kélɛ̀, “M dàa, ɓi lɛ́ ɓà dɔɔ.” A gèe m lɛ̀ɛ kélɛ̀, “Míá o kéa, o lɛ́ waà la sã̀-dɔ yí gbùò zɛ̀ɛ kɛ̀lɛ̀ɛ. O wà sɔ́ɔ pɛ́lɛ́ Ƃáá nyɔ̀nɔ́ɔ léà ká, áà o kɛ̀ púlú.

¹⁵Pɛ́ à kɛ̀ lɛ́ ò dɔ Wálà là táŋáná wɛlɛ mɔ̀ wáà yɛɓo kɛ̀ à mɔ̀ bĩ́á ɛ̃́ɛ̃́ nyɛ́nɛ́ĩ́ à píé kɛ́ìa, lɛ́ ɓɛ. Mi lɛ́ lɛ yàá táŋánáa làa, à zì kɛ̀ yia lɛ́ɛ̀ lo o laà.

¹⁶Lɔ̀ɔ wà yíí-mi-lɔ̀ lɛ̀ɛ́ ló o kɛɛ̀ gbaa gbɛɛ ɓo. Nyɛ́nɛ́ lɛ̀ɛ́ ló o kṹũ̀, ɛ̃́ɛ̃́ tíé wúú nɔ́ɔ fé lɛ̀ɛ́ ló o gélè gbaa.

¹⁷Ƃii Ƃáá nyɔ̀nɔ́ lɛ́ lɛ táŋánáa zèía lɛ́ɛ̀ lo e nyìɛ kɛɛ̀ o mɔ̀, lɛ̀ zí mi è e nyìɛ kɛ̀á ɓáá mɔ̀ɔ lɛ́ ɓe. Lɛ́ɛ̀ lo lóò o ká lɛ̀ lɛ́ kɛ̀ɓe-yìì è go yía mɔ̀. Ɛ́ɛ̃́ Wálà lɛ́ɛ̀ lo o nyìɛ-yíí sòlóò o nyìɛ féfé le.”