Read Maori Bible 1952 – Te Paipera Tapu Waiata 119 Bible Online

Waiata 119 - Maori Bible 1952 – Te Paipera Tapu bible

Waiata 119

¹AREPE Ka hari te hunga he tapatahi nei i te ara, e haere nei i te ture a Ihowa.

²Ka hari te hunga e mau ana ki ana whakaaturanga; e whakapaua ana o ratou ngakau ki te rapu i a ia.

³Ae, e kore ratou e mahi i te kino; e haere ana ratou i ana ara.

⁴Kua oti matou te whakahau ki au akoranga, kia ata puritia e matou.

⁵Aue, me i whakatikaia toku ara ki te pupuri i au akoranga!

⁶Ko reira ahau ka kore ai e whakama: i ahau ka whai whakaaro nei ki au whakahau katoa.

⁷Ka whakamoemiti ahau ki a koe i runga i te ngakau tika, ina ako ahau i au whakaritenga tika.

⁸Ka puritia e ahau au tikanga: kaua ahau e whakarerea rawatia. PETA

⁹He aha te mea e ma ai i te taitamariki tona ara? kia rite ki tau kupu tana whakamaharatanga iho.

¹⁰Kua whakapaua e ahau toku ngakau ki te rapu i a koe: kaua ahau e tukua kia kotiti ke i au whakahau.

¹¹Kua whakatakotoria e ahau tau kupu ki roto ki toku ngakau, kei hara ahau ki a koe.

¹²E Ihowa, ka whakapaingia koe: whakaakona ahau ki au tikanga.

¹³Kua whakapuakina e oku ngutu nga whakaritenga katoa a tou mangai.

¹⁴Ko toku koa i te ara o au whakaaturanga, me te mea mo nga taonga katoa.

¹⁵Ka whakaaroaro ahau ki au ako, a ka whai mahara ki au huarahi.

¹⁶He oranga ngakau ki ahau au tikanga: e kore ahau e wareware ki tau kupu. KIMERE

¹⁷Kia atawhai ki tau pononga, kia ora ai ahau; kia puritia ai hoki tau kupu.

¹⁸Whakatirohia oku kanohi kia kite ai ahau i nga mea whakamiharo i roto i tau ture.

¹⁹He manene ahau i runga i te whenua: kaua au whakahau e huna ki ahau.

²⁰Ka ngawha toku wairua i te matenui atu ki au whakaritenga i nga wa katoa.

²¹Kua riria e koe te hunga whakakake kua oti nei te kanga, e kotiti ke nei i au whakahau.

²²Parea atu i ahau te tawai me te whakahawea: kua mau hoki ahau ki au whakaaturanga.

²³I noho ano hoki nga rangatira ki te korero kino moku: otira e whakaaro ana tau pononga ki au tikanga.

²⁴Ko au whakaaturanga ano toku oranga ngakau, oku hoa whakatakoto whakaaro. TARETE

²⁵Piri tonu toku wairua ki te puehu; whakahauoratia ahau kia rite ki atu kupu.

²⁶I whakaaturia e ahau oku ara, a whakahoki kupu ana koe ki ahau: whakaakona ahau ki au tikanga.

²⁷Meinga ahau kia matau ki te ara o au ako: kia whakaaroaro ai ahau ki au mahi whakamiharo.

²⁸E maturuturu iho ana toku wairua i te pouri: kia rite ki tau kapu tau whakau ake i ahau.

²⁹Whakamataratia atu i ahau te ara o te teka: kia atawhai mai hoki, a homai tau ture.

³⁰Kua whiriwhiria e ahau te ara o te pono: ka waiho e ahau au whakaritenga ki toku aroaro.

³¹Piri tonu ahau ki au whakaaturanga: e Ihowa, kei whakama ahau.

³²Ka oma ahau i te ara o au whakahau, ina whakanuia e koe toku ngakau. HE

³³E Ihowa, whakaakona ahau ki te ara o au tikanga: a ka mau i ahau taea noatia te mutunga.

³⁴Homai he matauranga ki ahau, a ka mau i ahau tau ture; ka whakapaua toku ngakau ki te pupuri.

³⁵Meinga ahau kia haere i te ara o au whakahau; ko taku hoki tena e whakaahuareka nei.

³⁶Whakaangahia toku ngakau ki au whakaaturanga; kaua hoki ki te apo.

³⁷Whakatahuritia ketia oku kanohi kei kite i te horihori: whakahauorangia ahau i tau ara.

³⁸Whakapumautia tau kupu ki tau pononga, e wehi nei ki a koe.

³⁹Parea atu toku tawainga, e wehi nei ahau: he pai hoki au whakaritenga.

⁴⁰Nana, kua matenui ahau ki au ako: whakahauorangia ahau i runga i tou tika. WHAU

⁴¹Kia puta ano au mahi tohu ki ahau, e Ihowa: ara tau whakaoranga, kia rite ki tau kupu.

⁴²Penei ka whai kupu maku ki toku kaitawai; noku ka whakawhirinaki ki tau kupu.

⁴³Kaua e tangohia rawatia i toku mangai te kupu o te pono: e tumanako nei hoki ahau ki au whakaritenga.

⁴⁴Penei ka puritia e ahau tau ture ake ake.

⁴⁵A ka haereere noa ahau; kua rapua hoki e ahau au akoranga.

⁴⁶Ka korerotia ano e ahau au whakaaturanga ki te aroaro o nga kingi, e kore ano e whakama.

⁴⁷A ka waiho e ahau hei oranga ngakau moku au whakahau e aroha nei ahau.

⁴⁸Ka toro atu hoki oku ringa ki au whakahau e aroha nei ahau, ka whakaaroaro ano ki au tikanga. TAINE

⁴⁹Maharatia te kupu ki tau pononga, no te mea kua meinga ahau e koe kia tumanako atu.

⁵⁰Ko toku oranga ngakau tenei i ahau e tangi nei: na tau kupu nei hoki ahau i whakahauora.

⁵¹Nui rawa te whakahi ki ahau o te hunga whakakake: heoi kihai ahau i peka ke i tau ture.

⁵²I mahara ahau ki au whakaritenga, e Ihowa, o tua iho; a marie ana toku ngakau.

⁵³Mau pu ahau i te pawera, mo te hunga kino kua whakarere nei i tau ture.

⁵⁴Ko au tikanga aku e himene ai i te whare i noho manene ai ahau.

⁵⁵I mahara ahau ki tou ingoa i te po, e Ihowa: a puritia ana e ahau tau ture.

⁵⁶I ahau tenei, he mau noku ki au ako. KETE

⁵⁷Ko Ihowa toku wahi: kua mea nei ahau, ka pupuri ahau i au kupu.

⁵⁸I whakapaua toku ngakau ki te inoi ki a koe kia pai mai: kia rite ki tau kupu tau mahi tohu ki ahau.

⁵⁹I whakaaro ahau ki oku ara: a anga ana oku waewae ki au whakaaturanga.

⁶⁰I hohoro ahau, a kihai i whakaroa ki te pupuri i au whakahau.

⁶¹Karapotia putia ana ahau e nga here a te hunga kino: kihai ia ahau i wareware ki tau ture.

⁶²I waenganui po ka ara ahau ki te whakawhetai ki a koe mo au whakaritenga tika.

⁶³He hoa ahau no te hunga katoa e wehi ana i a koe; no te hunga ano e pupuri ana i au ako.

⁶⁴Ki tonu, e Ihowa, te whenua i tau mahi tohu: whakaakona ahau ki au tikanga. TETE

⁶⁵Pai rawa tau hanga ki tau pononga, e Ihowa; rite tonu ki tau kupu.

⁶⁶Whakaakona ahau ki te ngarahu pai, ki te matauranga: kua whakapono hoki ahau ki au whakahau.

⁶⁷I ahau kiano i whakawhiua, i he ahau: tena ko tenei ka puritia e ahau tau kupu.

⁶⁸He pai koe, he pai hoki au mahi: whakaakona ahau ki au tikanga.

⁶⁹Kua titoa e te hunga whakakake he teka moku: ka whakapaua toku ngakau ki te pupuri i au ako.

⁷⁰He ngako rawa to ratou ngakau, koia ano kei te taupa: ko ahau ia, he oranga ngakau ki ahau tau ture.

⁷¹Marie ano ahau kia pehia e te pouri; i ako ai ahau i au tikanga.

⁷²Ko te ture a tou mangai pai ke atu ki ahau i nga mano o te koura, o te hiriwa. IOTA

⁷³Na ou ringa ahau i hanga, i whakawhaiahua: homai he matauranga ki ahau, kia ako ai ahau ki au whakahau.

⁷⁴Ka hari te hunga e wehi ana i a koe ina kite i ahau: noku i tumanako ki tau kupu.

⁷⁵E matau ana ahau, e Ihowa, he tika au whakaritenga; a he pono nou i pehia ai toku ngakau e koe.

⁷⁶Tena ra, waiho tau mahi tohu hei whakamarie moku; kia rite ki tau kupu ki tau pononga.

⁷⁷Kia puta ki ahau au mahi aroha, kia ora ai ahau; ko tau ture hoki toku oranga ngakau.

⁷⁸Kia whakama te hunga whakakake; no te mea kahore he take i he ai ta ratou hanga ki ahau; ko ahau ia ka whakaaroaro ki au akoranga.

⁷⁹Ko te hunga e wehi ana ki a koe me anga ki ahau, a ka mohio ratou ki au whakaaturanga.

⁸⁰Kia tapatahi toku ngakau ki au tikanga; kei whakama ahau. KAPA

⁸¹E matenui ana toku wairua ki tau whakaoranga: otiia ka tumanako ahau ki tau kupu.

⁸²Matawaia ana oku kanohi, he meatanga ki tau kupu, i ahau e mea ana, Ahea koe whakamarie ai i ahau?

⁸³Kua rite nei hoki ahau ki te koki i roto i te paoa: he ahakoa e kore ahau e wareware ki au tikanga.

⁸⁴E hia nga ra o tau pononga? a hea koe whakarite whakawa ai mo te hunga e tukino nei i ahau?

⁸⁵Kua keri poka te hunga whakakake moku; he mea kahore e rite ki tau ture.

⁸⁶Pono tonu au whakahau katoa: e tukino takekore ana ratou i ahau; awhinatia mai ahau.

⁸⁷Wahi iti kua moti ahau i a ratou i runga i te whenua: otira kihai i mahue i ahau au akoranga.

⁸⁸Kia rite ki tou aroha tau whakahauora i ahau: a ka puritia e ahau nga whakaaturanga a tou mangai. RAMERE

⁸⁹Pumau tonu tau kupu, e Ihowa, ake ake i runga i te rangi.

⁹⁰Kei nga whakatupuranga katoa tou pono: whakaungia ana e koe te whenua, a e tu nei ano.

⁹¹E tu nei ano inaianei, pera tonu me tau i whakarite ai, he pononga hoki nga mea katoa nau.

⁹²Me kaua tau ture hei oranga mo toku ngakau, kua ngaro ahau i reira i toku auetanga.

⁹³E kore rawa ahau e wareware ki au ako, he mea whakahauora hoki nau ena i ahau.

⁹⁴Nau ahau, mau ahau e whakaora: kua rapua hoki e ahau au ako.

⁹⁵Kua tatari te hunga kino ki ahau kia whakamatea: ka whakaaro ia ahau ki au whakaaturanga.

⁹⁶Kua kitea e ahau te mutunga o nga mea tino tika katoa: he whanui rawa ia tau whakahau. MEME

⁹⁷Ano toku aroha ki tau ture! Ko taku tena e whakaaroaro ai i te roa o te ra.

⁹⁸Nau i hira ake ai oku whakaaro i o oku hoariri, na au whakahau, e piri tonu nei ki ahau.

⁹⁹Nui atu oku mahara i o oku kaiwhakaako katoa: noku i whakaaroaro tonu ki au whakaaturanga.

¹⁰⁰Tera atu toku mohio i to nga kaumatua, no te mea i pupuri ahau i au ako.

¹⁰¹Kua kaiponuhia mai e ahau oku waewae i nga ara kino katoa, kia pupuri ai ahau i tau kupu.

¹⁰²Kihai ahau i titaha i au whakaritenga; nau hoki ahau i ako.

¹⁰³Ano te reka o au kupu ki toku ngao; ae ra, reka atu i te honi ki toku mangai.

¹⁰⁴Na au ako ahau i whai mohio ai: na reira ahau i kino ai ki nga ara teka katoa. NUNU

¹⁰⁵He rama tau kupu ki oku waewae, he marama ki toku ara.

¹⁰⁶Kua oati ahau, a ka whakamana ano e ahau: kia puritia e ahau au whakaritenga tika.

¹⁰⁷He nui te mamae o toku ngakau: whakahauorangia ahau, e Ihowa, kia rite ki tau kupu.

¹⁰⁸Manakohia, e Ihowa, nga ohaohatanga a toku mangai, whakaakona hoki ahau ki au whakaritenga.

¹⁰⁹Kei toku ringa tonu toku wairua, heoi kahore ahau e wareware ki tau ture.

¹¹⁰Kua whakatakotoria e te hunga kino he mahanga moku: heoi kahore ahau i peka ke i au ako.

¹¹¹Ka waiho e ahau au whakaaturanga hei kainga tupu moku ake ake: ko toku koanga ngakau hoki ena.

¹¹²Kua whakaanga e ahau toku ngakau ki te mahi tonu i au tikanga: a te mutunga ra ano. HAMEKE

¹¹³E kino ana ahau ki te hunga whakaaro ruarua; ko tau ture ia taku e aroha ai.

¹¹⁴Ko toku piringa koe, ko toku whakangungu rakau: e tumanako ana ahau ki tau kupu.

¹¹⁵Mawehe atu i ahau, e te hunga kino; ka whakaritea hoki e ahau nga whakahau a toku Atua.

¹¹⁶Kia rite ki tau kupu tau tautoko ake i ahau, kia ora ai ahau: kaua hoki ahau e tukua kia whakama ki taku e tumanako atu nei.

¹¹⁷Tautokona ake ahau, kia ora ai ahau, a ka whai whakaaro tonu ahau ki au tikanga.

¹¹⁸Kua whakahaweatia e koe te hunga katoa e kotiti ke ana i au tikanga; he horihori hoki to ratou tinihanga.

¹¹⁹Ka whakakahoretia e koe te hunga kino katoa o te whenua, ano he para mata: koia ahau i aroha ai ki au whakaaturanga.

¹²⁰Wiri ana oku kikokiko i te wehi ki a koe; e mataku ana hoki ahau ki au whakaritenga. AINE

¹²¹He whakawa tika, he tika taku mahi: kaua ahau e tukua ki oku kaitukino.

¹²²Ko koe hei tuara mo tau pononga mo te pai: kei tukinotia ahau e te hunga whakakake.

¹²³Matawaia ana oku kanohi i te meatanga ki tau whakaora, ki te kupu hoki o tau tika.

¹²⁴Kia rite ki tou aroha tau mahi ki tau pononga: whakaakona hoki ahau ki au tikanga.

¹²⁵He pononga ahau nau; homai he mahara ki ahau, kia matau ai ki au whakaaturanga.

¹²⁶Kua rite te wa hei mahinga ma Ihowa; kua whakakahoretia hoki e ratou tau ture.

¹²⁷Na reira i arohaina rawatia ai e ahau au whakahau i te koura, ae, i te tino koura.

¹²⁸Na reira tika tonu ki ahau au ako katoa mo nga mea katoa: kino iho ano ahau ki nga ara teka katoa. PE

¹²⁹He mea whakamiharo au whakaaturanga: i mau ai toku wairua ki reira.

¹³⁰Ko te whakapuakanga o au kupu he homai marama; na reira i homai he mahara ki nga kuware.

¹³¹I hamama toku mangai, i kihakiha: he matenui noku ki au whakahau.

¹³²Tahuri mai ki ahau, tohungia hoki ahau: kia rite ki tau hanga ki te hunga e aroha ana ki tou ingoa.

¹³³Whakatikaia oku hikoinga ki runga i tau kupu: kaua hoki tetahi he e tukua hei rangatira moku.

¹³⁴Whakaorangia ahau i te tukino a te tangata: a ka puritia e ahau au ako.

¹³⁵Kia marama mai tou mata ki tau pononga: whakaakona hoki ahau ki au tikanga.

¹³⁶Heke noa nga awa wai o oku kanohi; mo ratou kahore i pupuri i tau ture. TARI

¹³⁷He tika koe, e Ihowa, he tika ano au whakaritenga.

¹³⁸He tika, he pono rawa au whakaaturanga i whakahaua mai e koe.

¹³⁹Ka ngaro ahau i toku ngakau whakapuke, mo au kupu ka wareware nei i oku hoariri.

¹⁴⁰Hore rawa he para o tau kupu: koia i arohaina ai e tau pononga.

¹⁴¹He iti ahau, e whakahaweatia ana: heoi kahore ahau e wareware ki au ako.

¹⁴²He tika pumau tonu tou tika; he pono hoki tau ture.

¹⁴³Kua pa mai ki ahau te pouri me te mamae: ko au whakahau ia toku oranga ngakau.

¹⁴⁴Pumau tonu te tika o au whakaaturanga: homai he mahara ki ahau, a ka ora ahau. KOPO

¹⁴⁵I whakapaua toku ngakau ki te karanga; whakahokia mai he kupu ki ahau, e Ihowa; ka mau i ahau au tikanga.

¹⁴⁶I karanga ahau ki a koe: whakaorangia ahau, a ka puritia e ahau au whakaaturanga.

¹⁴⁷Kiano te ata i puao noa, kua karanga ahau: i tumanako ahau ki au kupu.

¹⁴⁸I hohoro oku kanohi i nga mataaratanga ki te whakaaroaro ki tau kupu.

¹⁴⁹Whakarongo ki toku reo, kia rite ki tou aroha: kia rite, e Ihowa, ki tau i whakarite ai tau whakahauora i ahau.

¹⁵⁰E whakatata mai ana te hunga e whai ana i te whanoke: kei tawhiti atu ratou i tau ture.

¹⁵¹E tata ana mai koe, e Ihowa: he pono katoa au whakahau.

¹⁵²Nonamata ahau i matau ai ki au whakaaturanga, he mea whakapumau nau no tua whakarere. REHE

¹⁵³Whakaaro mai ki toku mate, a whakaorangia ahau: kahore hoki ahau e wareware ki tau ture.

¹⁵⁴Tohea taku tohe, whakaorangia hoki ahau: kia rite ki tau kupu tau whakahauoranga i ahau.

¹⁵⁵Kei tawhiti atu i te hunga kino te whakaoranga: kahore hoki ratou e rapu ki au tikanga.

¹⁵⁶E Ihowa, he nui au mahi tohu: kia rite ki au whakaritenga tau whakahauora i ahau.

¹⁵⁷He tokomaha oku kaitukino, oku hoariri: heoi kahore ahau i peka ke i au whakaaturanga.

¹⁵⁸I kite ahau i nga kaimahi i te kino, a pouri iho: no ratou kahore e pupuri i tau kupu.

¹⁵⁹Tirohia mai toku aroha ki au ako: kia rite ki tou aroha, e Ihowa, tau whakahauora i ahau.

¹⁶⁰Ko te huinga katoatanga o tau kupu he pono; pumau katoa anao au whakaritenga tika ake ake. HINE

¹⁶¹Hore he rawa i tukinotia ai ahau e nga rangatira: otiia e wehi ana toku ngakau i tau kupu.

¹⁶²E hari ana ahau ki tau kupu: ano he tangata kua whiwhi ki te taonga nui.

¹⁶³E kino ana ahau, e whakarihariha ana ki te korero teka: ko tau ture ia taku i aroha ai.

¹⁶⁴Takiwhitu aku whakamoemiti ki a koe i te ra tahi mo au whakaritenga tika.

¹⁶⁵He rangimarie nui to te hunga e aroha ana ki tau ture: e kore hoki o ratou waewae e tutuki.

¹⁶⁶A kua tumanako ahau ki tau whakaora, e Ihowa, kua mahi ahau i au whakahau.

¹⁶⁷Kua puritia e toku wairua au whakaaturanga, ae, e arohaina nuitia ana e ahau.

¹⁶⁸Kua puritia e ahau au ako me au whakaaturanga: kei tou aroaro hoki oku ara katoa. TAU

¹⁶⁹Tukua atu taku tangi kia tata atu ki tou aroaro, e Ihowa: homai he mahara ki ahau, kia rite ki tau kupu.

¹⁷⁰Kia tae atu taku inoi ki tou aroaro: kia rite ki tau kupu whakaora i ahau.

¹⁷¹Kia whakapuaki oku ngutu i te whakamoemiti: e whakaako ana hoki koe i ahau ki au tikanga.

¹⁷²Ma toku arero e korero tau kupu: he tika hoki au whakahau katoa.

¹⁷³Kia rite tou ringa ki te awhina i ahau; kua whiriwhiria hoki e ahau ko au ako.

¹⁷⁴Kua matenui ahau ki tau whakaora, e Ihowa: ko tau ture hoki toku oranga ngakau.

¹⁷⁵Kia ora toku wairua, a ka whakamoemiti ia ki a koe: kia awhinatia hoki ahau e au whakaritenga.

¹⁷⁶Kua kotiti ke ahau me he hipi ngaro: rapua tau pononga, kahore hoki ahau e wareware ki au whakahau.