Read Maori Bible 1952 – Te Paipera Tapu Waiata 136 Bible Online

Waiata 136 - Maori Bible 1952 – Te Paipera Tapu bible

Waiata 136

¹Whakawhetai ki a Ihowa, he pai hoki ia: he mau tonu hoki tana mahi tohu.

²Whakawhetai ki te Atua o nga atua: he mau tonu hoki tana mahi tohu.

³Whakawhetai ki te Ariki o nga ariki: he mau tonu hoki tana mahi tohu.

⁴E mahi nei tona kotahi i nga merekara nunui: he mau tonu hoki tana mahi tohu.

⁵I tohunga rawa nei ki te hanga i nga rangi: he mau tonu hoki tana mahi tohu.

⁶I whakatakoto nei i te whenua ki runga ki nga wai: he mau tonu hoki tana mahi tohu.

⁷Ki te kaihanga i nga whakamarama nunui: he mau tonu hoki tana mahi tohu;

⁸I te ra hei tohutohu i te awatea: he mau tonu hoki tana mahi tohu;

⁹I te marama me nga whetu hei tohutohu i te po: he mau tonu hoki tana mahi tohu.

¹⁰Ki te kaipatu i Ihipa, ara i a ratou matamua: he mau tonu hoki tana mahi tohu;

¹¹A arahina mai ana a Iharaira i waenganui i a ratou: he mau tonu hoki tana mahi tohu;

¹²Na te ringa kaha me te takakau maro: he mau tonu hoki tana mahi tohu.

¹³I tapahi nei i te Moana Whero a motu rawa: he mau tonu hoki tana mahi tohu;

¹⁴A meinga ana a Iharaira kia haere ra waenganui: he mau tonu hoki tana mahi tohu;

¹⁵A hurihia ana a Parao me ana mano ki te Moana Whero: he mau tonu hoki tana mahi tohu.

¹⁶I arahi nei i tana iwi ra te koraha: he mau tonu hoki tana mahi tohu.

¹⁷I patu nei i nga kingi nunui: he mau tonu hoki tana mahi tohu;

¹⁸I whakamate nei i nga kingi rongo nui: he mau tonu hoki tana mahi tohu;

¹⁹I a Hihona kingi o nga Amori: he mau tonu hoki tana mahi tohu;

²⁰I a Oka kingi o Pahana: he mau tonu hoki tana mahi tohu;

²¹A homai ana to ratou whenua hei kainga pumau: he mau tonu hoki tana mahi tohu;

²²Hei kainga pumau mo Iharaira, mo tana pononga: he mau tonu hoki tana mahi tohu.

²³I mahara nei ki a tatou i to tatou itinga; he mau tonu hoki tana mahi tohu:

²⁴A whakaorangia ana tatou i o tatou hoariri: he mau tonu hoki tana mahi tohu.

²⁵Ko ia te kaihomai i te kai ma nga kikokiko katoa: he mau tonu hoki tana inahi tohu.

²⁶Whakawhetai ki te Atua o te rangi: he mau tonu hoki tana mahi tohu.