Read Maori Bible 1952 – Te Paipera Tapu Waiata 98 Bible Online

Waiata 98 - Maori Bible 1952 – Te Paipera Tapu bible

Waiata 98

¹He himene. Waiatatia ki a Ihowa he waiata hou; he mahi whakamiharo hoki ana: na tona ringa matau, na tona ringa tapu, i taea ai e ia te whakaora.

²Kua whakakitea e Ihowa tana whakaoranga, kua whakapuakina e ia tona tika ki te aroaro o nga tauiwi.

³Kua mahara ia ki tana mahi tohu, ki tona pono ki te whare o Iharaira; a kua kite nga pito katoa o te whenua i te whakaoranga a to tatou Atua.

⁴Kia hari te hamama, e te whenua katoa, ki a Ihowa: hamama, kia hari, ae ra, himene atu.

⁵Himene ki a Ihowa i runga i te hapa; i runga i te hapa, me te himene ano te reo.

⁶I runga i te tetere, i te tangi ano o te koronete: kia hari te hamama ki te aroaro o Ihowa, o te Kingi.

⁷Kia haruru te moana me nga mea e hua ana i roto, te ao me ona tangata e noho ana i runga.

⁸Kia papaki nga ringa o nga roma, kia hari tahi nga pukepuke.

⁹Ki te aroaro o Ihowa: e haere mai ana hoki ia ki te whakawa mo te whenua: ka whakawa ia mo te ao i runga i te tika, mo nga iwi hoki i runga i te pono.