Read Ngünechen ñi Küme Dungu Mapudungun Matew 14 Bible Online

Matew 14 - Ngünechen ñi Küme Dungu Mapudungun bible

Matew 14

¹Feychi mew müten, Erode,[64] tati gobernadorkülelu ta Galilea mapu mew, allküy ñi nütramyengen ta Jesus.

²Fey feypiyefi kisu tañi werkükeelchi pu che: “Juan tati Fawtisachefe wiñomongepetulay. Feymew ta niey tüfachi afmatufal pepiluwün.”

³Erode am püresufalfilu ta Juan, fey kadena mew trarilen yengey ta karsel mew. Fey tüfa ta femfi Erodia ñi duam, Felipe ñi kure. (Felipe[65] ta Erode ñi peñi ürke.)

⁴Juan feypirkefuy ta Erode: “Ngelay tami kureyeafiel ta Erodia.”

⁵Fey Erode ayülefuy ñi langümafiel ta Juan, welu llükanierkefi tati pu che, kom feyentulelu engün am Juan tañi pelon wentrungen.

⁶Welu Erode nielu kawiñ ñi puwültripantun mew, Erodia tañi domo püñeñ eluwi tañi faylayael tati pu mangel ñi adkiñ mew. Fey ta Erode rume ayüfilu am ti faylan,

⁷eludungurkefi kiñe kuyalltun mew: “chem rume eluen pilmi eluaeyu” pirkefi tati üllchadomo.

⁸Feymew ñi ñuke ñi feypietew mew, feypi tati üllchadomo: —Eluen kiñe rali mew Juan ti Fawtisachefe tañi longko.

⁹Fey tüfachi dungu rume weñangkülkaeyew tati longko ülmen Erode, kisu am wüldungulu kiñe kuyalltun mew tañi pu mangel ñi adkiñ mew.

¹⁰Feymew werküy tañi katrüñmamengeael ñi longko ta Juan karsel mew.

¹¹Fey ta famngechi yelelngey kiñe rali mew ka elungepuy tati üllchadomo, fey kisu elufi tañi ñuke.

¹²Feymew akuyey Juan em tañi inayawülkefetewchi pu kompañ, yeñmangetuy tañi kuerpu ka rüngalmefi engün ta eltun mew. Feymew ka amuy engün tañi kimelafiel ta Jesus ñi langümngen ta Juan.

¹³Feymew Jesus kimlu Juan ti Fawtisachefe ñi lan, konpuy kiñe pichi farku mew ñi amuael kiñe kamapulechi lelfün mew. Welu tati pu che ngüneduami Jesus ñi kañpüle amun, feymew tripay engün ti waria mew ñi inantukuafiel engün chew ñi mülepun ta Jesus.

¹⁴Fey petu nagpulu Jesus tati pichi farku mew, pefi fentren che, fey kisu kutranpiwkeyefi, fey tremolyefi tati pu kutran tañi puwülyeel engün.

¹⁵Fey dew putrafialu am, ñi pu disipulu fülkontueyew ka feypieyew: —Dew putrafiay, ka lelfüntripaleiñ. Feymew chalitufinge tati pu che, ñi amutuael ta waria mew ñi ngillayael ta iyael.

¹⁶Fey Jesus llowdungufi ñi pu disipulu: —Ngelay tañi amutuael engün. Eymün eluafimün ta iyael.

¹⁷Fey kisu engün llowdunguy: —Nielaiñ iyael ta tüfa mew. Kechu kofke ka epu challwa müten nieiñ.

¹⁸Jesus feypifi ñi pu disipulu: —Küpalelmuchi ti kofke ka ti challwa.

¹⁹Feymew feypifi tati pu che ñi anükünuwael ta kachu mew. Feymew müten nüfi ñi kuwü mew tati kechu kofke ka tati epu challwa, fey lelipüray ta wenu mapu, mañumtufi ta Ngünechen ka wükayefi ti kofke, elufi ñi pu disipulu, fey kisu engün eluyefi tati pu che.

²⁰Kom iyey engün fey kom ti pu che weday engün, ka apoyetuy mari epu kanasta tati sofrayechi wükanke kofke ka challwa.

²¹Tati pu che kiñe kechu warangka wentru ürke, welu rakintukungelay tati pu domo ka tati pichikeche no rume.

²²Dew rupalu tüfachi dungu, Jesus werküfi ñi pu disipulu ñi konpuael tati pichi farku mew, femngechi ñi wüne puwael engün nome ti pichi lafken mew. Welu Jesus mekey ñi chalitufiel tati pu che.

²³Dew chalitufilu ti pu che, Jesus pürapuy kiñe wingkul mew, kisu ñi ngillatuael. Fey dew punlu, Jesus kisulewey.

²⁴Tati pichi farku dew amulewiyey alü ponwitu ti pichi lafken mew, fey tati rew rume newentu nengümkamekefi tati farku, trafyeniefilu engün am tati kürüf.

²⁵Fey epe wünlu, Jesus trekalen amuley wente ko kisu engün püle.

²⁶Feymew tañi pu disipulu peetew tañi trekalen ta wente ko, fey rume llükay, ka wirari engün ñi fente llükan mew: —¡Kiñe perimon tati! —pirkey engün.

²⁷Welu Jesus dungufi ñi pu disipulu, feypilen mew: —¡Yafüluwmün! ¡Iñche tati! ¡Llükakilmün!

²⁸Feymew Pedro llowdungueyew: —Ñidol, rüf mew eymingelmi, werkünge iñche ñi trekalen amuael wente ko tañi puwael ta eymi mew.

²⁹—Küpange may —pi ta Jesus. Feymew Pedro tripay ti pichi farku mew, fey llituy ñi trekayael wente ko ñi puwael ta Jesus mew.

³⁰Fey ngüneduamlu ñi rume newenngen tati kürüf, llükay. Ñochingelu am ñi llañnagün ti ko mew, fey wirari: —¡Montulen Ñidol!

³¹Feymew müten, Jesus nüñmafi ñi kuwü ta Pedro ka feypifi: —¡Rume pichin mupiltun nierkeymi! ¿Chumngelu am maneluwlaymi iñche mew?

³²Fey püratulu engu müten tati pichi farku mew, kürüfwetulay.

³³Feymew tati pu disipulu mülelu ti pichi farku mew, lukunagi engün Jesus ñi inafül ka feypi engün: —¡Rüf dungu mew eymi ta Ngünechen ñi Fotüm ürke!

³⁴Feymew katrürumey tati pichi lafken mew ka puwi engün Genesaret[66] pingechi mapu mew.

³⁵Tati pu che müleyelu tiye mew, kimtufi engün ta Jesus, ka kimngey kom ti trokiñ mapu mew ñi puwün. Feymew küpalelngey tati pu kutran,

³⁶ka llellipungey ñi idañmangeael rewall tañi takuwün. Fey kom tati pu kutran idañmaetew ñi wechuñ takuwün, tremolewetuy engün.