Read Ngünechen ñi Küme Dungu Mapudungun Matew 17 Bible Online

Matew 17 - Ngünechen ñi Küme Dungu Mapudungun bible

Matew 17

¹Fey kayu antü rupalu, Jesus yefi ta Pedro, Santiaw ka Juan (Santiaw tañi peñi), fey püntütripay ñi amuael engün kiñe alü pürachi wingkul mew.

²Fey tiyechi wingkul mew, kisu engün ñi adkiñ mew, kangerumetuy ñi ad ta Jesus. Ñi ange alofi antü reke, ka tañi takuwün rume lingari pire reke.

³Feymew pefi engün ta Moyse ka Elia nütramkamekelu ta Jesus engün.

⁴Fey Pedro feypifi ta Jesus: —Ñidol, ¡rume kümey taiñ mülepan tüfa mew! Pilmi, dewmayafuiñ küla pichike küni ruka: kiñe eymingealu, ka kiñe ta Moysengealu ka kiñe Eliangealu.

⁵Petu dungumekelu ta Pedro, kiñe alofkülechi tromü munulpaeyew kiñe llawfeñ reke, fey tati tromü mew tripay kiñe dungun feypilu: “Fey tüfa iñche tañi sakin Fotüm, iñche tañi dulliel. Allkütuñmafimün ñi dungu.”

⁶Allkülu engün tüfachi dungun, tati pu disipulu lloyünagümkünuy ñi longko engün pülli mew, fente ñi llükan mew.

⁷Jesus fülkonpuy kisu engün mew, fey nükünufi ñi kuwü mew ka feypifi: —Witrapüratumün. Llükakilmün.

⁸Fey adkintulu engün, pefi engün Jesus ñi kisulewetun.

⁹Fey petu nagpatulu engün tati wingkul mew, Jesus feypifi ñi küla pu disipulu: —Iney no rume ta nütramel-layafimün tamün peelchi dungu, wiñomongetule wüla tati Wentrukünuwpalu küpalu ta wenu mapu.

¹⁰Fey tañi pu disipulu ramtueyew: —¿Chumngelu am feypikerkey tati pu kimeltukelu tati ley dungu Elia tañi wüne küpayael tati Cristo mew?

¹¹Fey Jesus llowdungufi ñi pu disipulu: —Feyngey tañi wüne küpayafel ta Elia, kisu ñi kom küme elafiel ta dungu.

¹²Welu iñche ta feypiwayiñ, Elia ta dew küpay, fey tati pu judiu kimwetulafi, welu kisu engün chumünchumfi rume kom tañi wesa ayütuel engün. Ka femngechi, tati Wentrukünuwpalu kutrankaway kisu engün tañi fillmekeafiel mew.

¹³Feymew tati pu disipulu ngüneduami engün Jesus tañi nütramelmekeetew ñi tukulpafiel ta Juan ti Fawtisachefe.

¹⁴Puwlu engün chew tañi mülemum tati pu che, kiñe wentru fülkonpay ta Jesus mew, ka lukutupay kisu tañi fül mew, fey feypieyew:

¹⁵—Ñidol, kutranpiwkeyeñmaen tañi fotüm. Lalatukey ka rume kutrankawkey. Kiñeke mew ütrüfkonkey kütral mew, ko mew kütu.

¹⁶Tüfa mew küpalelpefuiñ tami pu disipulu, welu pepi tremolafi engün.

¹⁷Fey Jesus feypi: —¡Eymün pu ngenofeyentun che ka wesake rakiduam nielu! ¿Tunteñma anta mülerkean ta eymün mew? ¿Tuntepu mew wüla anta fentekünurkean tamün peniewafiel? Küpalelmuchi tati pichiwentru —pirkey.

¹⁸Feymew Jesus werküfi tati weküfü ñi tripatuael tati pichiwentru mew, fey wemünentufi. Feychi mew müten tremolewetuy ti pichiwentru.

¹⁹Fey wüla ñi pu disipulu wichu nütramkaeyew, fey ramtueyew: —¿Chumngelu am iñchiñ pepi wemünentulafiyiñ tati weküfü?

²⁰Fey Jesus llowdungufi ñi pu disipulu: —Eymün am müna pichin mupiltun nielu. Rüf dungu feypiwayiñ niefulmün ta mupiltun, kiñe pichi fün mostasa fenteafuy rume, fey feypifilmün tüfachi wingkul: ‘Tripatunge ta tüfa mew. Kañpüle amutunge’, tati wingkul ta engkef tripayafuy. Chem rume ta kisu ngünewlayafuy.

²¹Welu ta tüfa famngechi weküfü ñi tripatuael, feley tañi ngillatuael ka ayunayael ta che.[74]

²²Petu miyawlu kiñentrür ñi disipulu engün Galilea tañi trokiñ mapu mew, Jesus feypifi ñi pu disipulu: —Iñche tati Wentrukünuwpalu ta chalintukungean tati pu wentru mew.

²³Ka langümaenew engün, welu küla antüalu mew, wiñomongetuan. Tüfa famngechi feypingelu, rume weñangküy engün.

²⁴Feymew Jesus ka tañi pu disipulu puwlu engün ta Kapernaum waria, tati pu kofrakelu impuestu ta ngillatuwe rukangealu amuy engün ñi pemeafiel ta Pedro, ka ramtufi engün: —¿Tami kimeltufe kullikelay ta impuestu tati ngillatuwe rukangealu?[75]

²⁵—May, kullikey ta kisu —llowdunguy ta Pedro. Fey Pedro konputulu ruka mew, Jesus ramtufemeyew: —¿Eymi chumngentufimi kay, Pedro? Kiñe longko ülmen wentru ta tüfachi mapu mew, ¿ineykechi am kofrakefi impuestu: kisu tañi pu yall kam ti kakelu pu che?

²⁶Fey Pedro llowdungufi ta Jesus: —Kofrakefi tati kakelu pu che. Fey Jesus feypi: —Feley tati, Pedro. Kümey tami piel. Chumngechi tati longko ülmen ñi pu yall ngelay ñi kulliael chem impuestu no rume, ka femngechi ngelafuy Ngünechen ñi pu yall ñi kulliael ti impuestu ta Ngünechen ñi ngillatuwe rukangealu.

²⁷Welu iney rume tañi wesaduamnoael, amunge tati pichi lafken mew, ütrüftukupunge tami ansuelu ka witranentufinge tami wüne entuelchi challwa. Fey ti wün challwa mew peaymi kiñe moneda, feymew mür kulliayu tati impuestu. Yefinge ti moneda, fey kullimenge tati impuestu.