Read Ngünechen ñi Küme Dungu Mapudungun Matew 19 Bible Online

Matew 19 - Ngünechen ñi Küme Dungu Mapudungun bible

Matew 19

¹Rupan feypilu ta tüfachi dungu, Jesus tripatuy ta Galilea mew, fey puwi Judea trokiñ mapu mew, Jordan tañi tripawe antü püle.

²Rume fentren che inaeyew, ka feymew Jesus tremolyefi tati pu kutrankülelu.

³Kiñeke ti pu farisew fülkonpuyngün ta Jesus mew re ngünen mew tañi ramtuafiel, fey feypieyew: —¿Kümey am kiñe wentru ñi wüdakureael chem dungu mew rume?

⁴Feymew Jesus llowdungufi ti pu farisew: —¿Adümlafimün am tati wirikonkülechi dungu ta llituka mew müten, feychi dewmangelu ta wentru domo engu?

⁵Ka feypi: ‘Feymew ta wentru ta wichuay ñi chaw ka tañi ñuke mew kisu ñi amayewael ñi kure engu, fey mür kiñe che reke ñi feleael engu.’[77]

⁶Feymew ta epu che reke felewetulay engu. Kiñengetuy müten. Feymew ngelay iney rume ñi wüdamentuael Ngünechen ñi trapümel.

⁷Feymew ramtueyew engün: —¿Chem mew ürke am Moyse werküfi ta wentru ñi eluafiel kiñe wirin dungu ñi kure tañi wüdafiel?[78]

⁸Fey Jesus feypifi ti pu farisew: —Re tamün wesa yafü piwkengen mew ta eymün, Moyse elueymünmew tamün wüdayael tamün kure. Llituka mew ta ngelafuy feychi dungu.

⁹Iñche ta feypiwayiñ tati wüdalu tañi kure fey tañi ñiwañpenoetew rume, fey ka domo kureyetule, fey ta ñiwaldomofengey. Fey kureyefilu ti wüdakünuelchi domo, ka femngechi ñiwaldomofengey.[79]

¹⁰Fey Jesus tañi pu disipulu feypieyew: —Feychi dungu felele ñi femael ta wentru ñi kure mew, kümelay ta kurengen.

¹¹Fey Jesus llowdungufi ñi pu disipulu: —Kom che ta pepi ngüneduamlayay ta tüfachi dungu, tiyechi pu che müten ta Ngünechen ñi eluetew ñi ngüneduamafiel.

¹²Müley epe fill dungu ñi katrütunieetew ta pu wentru ñi kurengeael: kiñekentu dew felen choyüngekey ñi pepi kurengenoael, ka kiñeke wentru femkünungekey tañi pepi kurengenoael, ka kiñeke re ñi pinon mew kurengekelay femngechi tañi küme poyeafiel ta Ngünechen. Tati ayülu ñi llowael ta tüfachi dungu, llowpe müten.

¹³Yelelngey ta Jesus kiñeke pichikeche, tañi fampuwülael ñi kuwü ta kisu engün mew, fey ñi ngillatuñmayafiel, welu tati pu disipulu eluwi tañi katrütuafiel tati yeniefilu ti pichikeche.

¹⁴Feymew Jesus feypifi ñi pu disipulu: —Elufimün ti pichikeche ñi küpayael iñche mew. Katrütukefilmün. Ngünechen ñi ülmen mülewe mew koneltuley tati kisu engün reke femngelu.

¹⁵Fey fampuwülelfi ñi kuwü ti pichikeche, fey ngillatuñmafi, feymew wüla kañpüle amutuy.

¹⁶Kiñe weche wentru amuy ñi pemeafiel ta Jesus, fey ka ramtupufi: —Küme piwke kimeltufe, ¿chem küme dungu am feman tañi nieael rumel mongen?

¹⁷Jesus llowdungueyew: —¿Chem mew anta küme piwke kimeltufe pien? Kiñeley müten tati küme piwkengelu. Welu ayülmi tami nieael tati rumel mongen, müngeltuafimi tati werkün dungu.

¹⁸—¿Chuchi werkün dungu am? —ramtuy tati weche wentru. Fey Jesus llowdungueyew: —‘Langümchekilnge, ñiwaldomokilnge, weñekilnge, üñfitukefilnge koyla dungu mew ta kangelu,

¹⁹yamafimi tami chaw ñuke engu,[80] ka piwkeyeafimi tami chafche chumngechi piwkeyewimi eymi kisutu.’[81]

²⁰—Femken ta kom feychi dungu. ¿Ka chem am petu faltay? —pi tati weche wentru.

²¹Jesus llowdungueyew: —Ayülmi tami nieael nor mongen, amunge, fendenge tami nieel ka elufinge tati pu nienolu chem no rume. Femngechi fütra küme felen nieaymi ta wenu mapu mew. Fey küpange ka inaen.

²²Feymew tati weche wentru, allkülu tüfachi dungu, rume weñangkülen amutuy, rume rikulerkelu am.

²³Feymew Jesus feypifi tañi pu disipulu: —Rüf dungu feypian rume küdawngey kiñe riku ñi konpuael Ngünechen ñi ülmen mülewe mew.

²⁴Ka feypiwayiñ doy küdawngelay ta kiñe kamellu ñi rumeael ti longko akucha mew,[82] fey kiñe riku ñi konael Ngünechen ñi ülmen mülewe mew.

²⁵Fey allküñmaetew tañi pu disipulu, doy afmalewey engün ka feypi engün: —Fey, ¿iney am pepi monturkeay?

²⁶Jesus adkintufi ñi pu disipulu ka llowdungufi: —Che ñi pepilnoel, Ngünechen ta pepilniey.

²⁷Feymew feypieyew ta Pedro: —Iñchiñ elkünuiñ kom taiñ niekefel fey ka inawiyiñ. ¿Chem am llowaiñ?

²⁸Fey Jesus llowdungufi ñi pu disipulu: —Rüf dungu feypiwayiñ, puwle tati antü kom tañi wengetuael, feychi mew tati Wentrukünuwpalu mapu mew anüle tañi afmafalchi ülmen mülewe mew, eymün am feyentumufiel feymew ka femngechi anüaymün ta mari epu ülmen mülewe mew tamün ramtukadunguafiel Israel tañi mari epu trokiñche.

²⁹Fey iñche tañi duam iney rume elkünule ñi ruka, peñi, kam lamngen, kam chaw, kam ñuke, kam domo,[83] kam fotüm, kam mapu rume, llowtuay doy pataka rupachi, ka lloway tati rumel mongen.

³⁰Welu tüfa fentren tati wünenküleyelu, inaleyetuay. Ka pütrün ta tüfa inaleyelu, wüneleyetuay.