Read Ngünechen ñi Küme Dungu Mapudungun Marku 1 Bible Online

Marku 1 - Ngünechen ñi Küme Dungu Mapudungun bible

Marku 1

¹Fey tüfa mew llituy Jesucristo ñi küme dungu, Ngünechen tañi Fotüm.[1]

²Tati pelon wentru Isaia famngechi wirintukuy: “Iñche werkün tañi werken wünelealu eymi mew femngechi tañi kimeltuafiel tati pu che kisu tañi akuael.”[2]

³“Kiñe wirartu dungun allküngey uwe mapu mew: ‘Kiñe nor küme rüpü reke feletupe tamün rakiduam, femngechi tamün llowafiel ta Ñidol.’ ”[3]

⁴Feymew ta Juan pewfaluwi ti uwe mapu mew,[4] fey fawtisamekefi tati pu che, ka feypinieyefi tañi wiñorakiduamtuael engün ta Ngünechen mew ka tañi fawtisangeael, femngechi tañi wiñoduamatuaetew engün ta Ngünechen kom tañi yafkan mew.

⁵Kom ti pu che mülelu Judea trokiñ mapu mew, ka Jerusalen waria mew, tripay engün tañi allkütuael. Feypi engün tañi yafkafengen, fey Juan fawtisaeyew engün Jordan lewfü mew.

⁶Juan tañi tukunieelchi takuwün ngüreley ta re kal kamellu mew, ka trariwtuley kiñe trülke koriwen trariwe mew. Ka ikey chori ka lelfün mew mülechi miel.

⁷Fey tañi wewpin mew ta feypi: “Iñche mew inalepay ta kiñe doy fütra pepiluwünngelu, fey fente tañi yamniefiel mew ta kisu nentupüroñmalayafuiñ rume tañi okota.

⁸Iñche ta fawtisawkeyiñ ta eymün re ko mew müten, welu ta kisu fawtisayaeymünmew ti Lif Küme Püllü mew.”

⁹Feychi mew, Jesus tripapay ta Nasaret waria mew, Galilea trokiñ mapu mew mülelu, fey Juan fawtisaeyew ta Jordan lewfü mew.

¹⁰Feychi lelen mew müten tripatulu ta ko mew, Jesus pefi ñi nülan ta kallfü wenu ka pefi ñi nagpan ta kisu mew tati Lif Küme Püllü kiñe palluma reke.

¹¹Ka kiñe dungun allküngey wenu mapu mew feypilu: “Eymi ta iñche ñi piwkeyen Fotüm, iñche tañi manelnieel.”

¹²Dew rupalu tüfachi dungu, tati Lif Küme Püllü ñi pepiluwün mew, Jesus puwi ti uwe mapu mew.

¹³Fey meli mari antü mülepuy chew ñi miyawentukemum ti wapoke kulliñ ka wültukungey ñi kintukaduamaetew ta Weküfü.[5] Fey ti pu werken püllü poyetunieeyew.

¹⁴Fey tukungelu ta Juan karsel mew,[6] Jesus wiñotuy ta Galilea ñi wewpiafiel Ngünechen ñi küme dungu,

¹⁵feypilen mew: “Akuy ta antü, ka dew mülepay Ngünechen tañi longko ülmenngen. Wiñorakiduamtumün ta Ngünechen mew, ka feyentun mew llowfimün kisu tañi we kimelün dungu.”

¹⁶Jesus ta trekaley Galilea tañi inaltu pichi lafken püle, fey pefi ti epu peñiwen Simon Andre engu. Challwafe ürke engu. Fey petu ütrüftukulu engu tañi challwawe pu lafken,

¹⁷Jesus ta feypifi ti epu wentru: —Inamuchi, tamu challwafengefel, welu tüfa kintuafimu ta che tamu küpalafiel iñche mew.

¹⁸Feychi lelen mew müten elkünuy engu tañi challwawe, fey inaeyew engu.

¹⁹Fey doy üyew püle amulelu, Jesus pefi tati epu peñiwen Santiaw ka Juan, Sefedew ñi epu fotüm, mülelu kiñe farku mew petu raletulu engu tañi challwawe.

²⁰Feymew ka müten mangelfi ñi inayaetew, fey kisu engu elkünuy tañi chaw Sefedew tati farku mew ñi pu kona engün, fey amuy engu ta Jesus engün.

²¹Fey puwi engün ta Kapernaum. Fey ti ürkütun antü[7] mew Jesus konpuy tati sinagoga[8] mew, fey llituy tañi kimeltuael.

²²Fey ti pu che ta afmatuley femngechi tañi kimeltungeel mew engün, fentren pepiluwün mew am kimeltumekelu. Ñi kimeltun trürlay chumngechi ñi kimeltuken tati kimeltukelu ta Moyse ñi ley dungu.[9]

²³Fey tati waria mew mülechi sinagoga mew mülerkey kiñe wentru konweküfülelu, fey tüfeychi wentru ta wirartufi ta Jesus:

²⁴—¿Chem mew anta kontumupaiñ, Jesus Nasaret tuwlu? ¿Küpaymi am taiñ apümkamuafiel? Iñche ta kimnieeyu, ka kimnien tami ineyngen. Eymi ta Ngünechen ñi dullin.

²⁵Fey Jesus ta katrütudungueyew feypilen mew: —¡Feypikilnge tüfeychi dungu ka elkünutufinge ta tüfachi wentru!

²⁶Tati weküfü lalatulfi tati wentru, ka fütra newentu wirarüy, fey tripatuy tati wentru mew.

²⁷Kom ti pu che mülelu sinagoga mew llükay engün, ka welukonkechi ramtuwi engün: “¿Chem dungu anta tüfa? ¡Kimeltuy ta kiñe kangerumechi we kimelün dungu kom rüfkünu dungu mew! ¡Kenü tati weküfü kütu ta werküfi, ka müngeltueyew!”

²⁸Fey müchay müten nütramyengey ta Jesus Galilea tañi kom lof mapu mew.

²⁹Tripapatulu engün tati sinagoga mew, Jesus, Santiaw ka Juan amuy engün ta Simon ka Andre tañi ruka mew.

³⁰Simon tañi llalla rume aling kutrankülerkey fey ngütantuluwkülerkey. Feypingey ta Jesus ñi kutrankülen tati kuse püllü,

³¹fey kisu fülkonpuy, ka nükünufi kuwü mew, fey witrañpüramfi. Feychi lelen mew müten tremotuy ñi aling kutran mew, feymew müten pepikawi tañi poyeafiel ta Jesus.

³²Fey dew konlu ta antü,[10] feymew Jesus yelelngey fentren tati pu kutrankülelu ka ti pu konweküfülelu,

³³ka fentren che mülelu ti waria mew trawüluwpuy engün tati wülngiñ ruka mew.

³⁴Jesus tremolfi rume fentren che epe fill kutran nielu, ka wemünentufi fentren weküfü, welu elulafi tañi dunguael tati pu weküfü, kisu engün am kimnieetew.

³⁵Fente küme puliwen, petu tañi dumdumkülen, Jesus tripay ti waria mew tañi ngillatumeael kiñe uwe lelfün mew ñi ngenomum che.

³⁶Simon ka tañi pu kompañ amuy engün tañi kintuafiel ta Jesus,

³⁷fey pefilu engün feypifi: —Kom che ta kintuyawüleymew.

³⁸Welu ta kisu llowdunguy: —Amuiñ tati fülküleyechi lof che mew taiñ kimelafiel engün kay tati werken dungu. Fey tüfachi dungu mew am ta küpalu ta iñche.

³⁹Fey tüfa famngechi Jesus miyawi Galilea trokiñ mapu mew. Kimelkiyawüli ti werken dungu sinagoga mew müleyelu kake kiñeke lof mapu mew ka wemünentuyefi tati pu weküfü.

⁴⁰Kiñe wentru nielu lepra kutran[11] fülkonpuy ta Jesus mew, fey lukutulen feypifi: —Pifulmi eymi, tremoltuafen tañi kutran mew.

⁴¹Jesus ta kutranduamyeeyew, fey nüñmaeyew ñi kuwü ka feypieyew: —Ayülen tami tremotuael. ¡Tremotunge!

⁴²Feychi lelen mew müten tati wentru tremotuy tañi lepra kutran mew.

⁴³Feymew ka müten Jesus chalitueyew, ka feypieyew:

⁴⁴—Allkütunge. Iney no rume feypikefilnge tüfachi dungu, fey amunge tati saserdote mew tami leliwülaetew tami tremotun. Ka yeaymi tati ofrenda ta mañumtun reke, Moyse tañi werküel, femngechi ta kom che ñi kimael tami dew tremolewetun tami kutran mew.

⁴⁵Welu amuletulu tüfachi wentru, fey eluwi tañi nütramyelafiel ta kom che femngechi dungu mew tañi rupan. Feymew ta Jesus pepi konwelay chem waria mew no rume chumngechi wimtulefuy ñi konpukefel, welu re wekuntu ti waria mülekerkey tati lelfün püle chew ngelay ruka che. Welu fill püle mülechi pu che küpakey tañi pepayaetew.