Read Ngünechen ñi Küme Dungu Mapudungun Marku 2 Bible Online

Marku 2 - Ngünechen ñi Küme Dungu Mapudungun bible

Marku 2

¹Dew rupalu kiñe mufün antü, Jesus ka wiñokonputuy ta Kapernaum. Fey kimngelu müten tañi mülepun ta ruka mew,

²rume fentren che trawüy. Feylay rume engün tati wülngiñ ñi lepün mew, fey kisu kimeltumekefi tati werken dungu.

³Feymew meli wentru yeleleyew ta kiñe kutran lañmalelu ñi kuerpu.

⁴Welu fentren che am mülelu, pepi konpulay engün chew ñi mülemum ta Jesus. Feymew wecharpufi engün tati küpül ruka,[12] fey nagümpufi engün ti ngütantuluwkülechi kutran chew müley ta Jesus.

⁵Feymew Jesus, pefilu tañi nien fentren mupiltun engün, feypifi tati kutrankülelu: —Iñche ñi weni, dew wiñoduamangetuymi tami yafkan mew.

⁶Fey kiñeke tati kimeltukelu Moyse ñi ley dungu anülepulu tiye mew, rakiduami engün:

⁷“¿Chumngechi anta kisu ngünewi tañi femngechi feypiael ta tüfa? Ñi femngechi dungun mew notukafi ta Ngünechen. Ngünechen müten ta wiñoduamachetuafuy ta yafkan mew.”

⁸Welu Jesus müchay müten ngüneduami tañi femngechi rakiduamkülen engün, fey ka ramtufi ti pu kimeltuchefe: —¿Chem mew anta femngechi rakiduamküleymün ta eymün?

⁹¿Chem pin anta doy küdawngelay tañi feypingeael tati lañmalelu tañi kuerpu: ‘Wiñoduamaletuymi tami yafkan mew’, kam ñi feypingeael: ‘Witratunge. Witrañpüramnge tami ngütantu ka trekatunge’?

¹⁰Iñche feypiwayiñ ta fewla ti Wentrukünuwpalu[13] ñi nien ta pepiluwün tüfachi mapu mew ñi wiñoduamachetuael ta yafkan mew. Feymew feypifi tati lañmalelu ñi kuerpu:

¹¹—Eymi ta feypipeeyu: witratunge ka nünge tami ngütantu. Fey amutunge tami ruka mew.

¹²Fey tati kutran feymew müten witratuy, fey nütulu ñi ngütantu, tripapatuy tiye mew fey ñi penieetew itrokom che. Feymew ta itrokom che afmalewey ka püramyefi engün ta Ngünechen feypilen mew: —Chumkawnorume pekelaiñ femngechi dungu.

¹³Feymew Jesus ka amuy ta inaltu pichi lafken, fey ti pu che fülkonpay ta kisu mew, feymew kisu ta kimeltufi engün.

¹⁴Fey Jesus rupalu fey püle, pefi ta Levi, Alfew tañi fotüm, anülelu chew ñi kofrangekemum ta impuestu Romangealu. Jesus feypifi ta Levi: —Inaen. Fey Levi ta witratripay ka inaeyew.

¹⁵Fey mangelngey ta Jesus ñi imeael Levi tañi ruka mew. Fey tüfey mew mülepuy fentren tati pu kofrakelu ta impuestu Romangealu, ka ti kakelu wesake dunguyen pu che. Ka femngechi anülepuy ta mesa mew kiñentrür Jesus ka ñi pu disipulu engün, fey rume fentren che puwyelu am tañi pu inayawületew.

¹⁶Fey ti pu farisew[14] ka tati pu kimeltukelu ta Moyse ñi ley dungu, pefilu ta Jesus ñi imeken kom kiñentrür tüfey engün mew, ramtufi engün tati pu disipulu: —¿Chumngelu am tamün kimeltufe kiñentrür imekey tati pu kofrakelu impuestu ka ti pu yafkafe engün?

¹⁷Jesus ta allküñmaeyew, fey feypingey engün: —Tati pu che külfünkülelu ka tremolkülelu fey engün duamyelay ta lawentuchefe, welu tati pu kutrankülelu may. Iñche küpalan tati pu küme piwkekawünnngelu mew, welu may tati pu yafkafe mew.

¹⁸Kiñe rupachi ayunalerkey Juan tañi pu disipulu[15] ka tati pu farisew ñi inakeetewchi pu che. Fey kiñeke tüfey engün amuy ta Jesus mew ka ramtupufi engün: —Juan tañi pu disipulu ka tati pu farisew tañi inakeetewchi pu che ayunakey engün, fey ¿chumngelu am ayunakelay kay eymi tami pu disipulu?

¹⁹Jesus ta llowdungueyew engün: —¿Chumngelu am kay ayunayafuy tati mangelngelu ta mafün mew, petu tañi mülen tati nofio kisu engün mew? Petu tañi mülen kisu engün mew tati nofio, ngelay tañi ayunayael engün.

²⁰Welu akuay tati antü ñi yengetuael tati nofio. Feychi akule tati antü, fey wülake ta feley ñi ayunayael engün.

²¹“Iney rume ta lapatukelay ta kiñe llud takuwün ka tukulelkelafi ta kiñe we katrün lapan pañu, tati we katrün pañu am trüküfükelu ka wikürelkefi tati llud takuwün, fey doy wesa wikürükey tati takuwün.

²²Ka femngechi ta we pulku rume tukungekelay ta llud kueru mew. Tati we pulku ta pawkülkayafuy tati llud kueru, fey ngünayafuy tati pulku ka ti kueru wikürafuy. Feymew feley tati we pulku tañi wütruntukungeael kiñe we kueru mew.”

²³Kiñe ürkütun antü mew, Jesus trekalen rumey rangi kachilla. Fey tañi pu disipulu, petu rumelu, eluwi engün tañi suchetuafiel tati longko kachilla.

²⁴Fey ti pu farisew ramtueyew: —Fey ¿chumngelu am femngechi femkey tami pu disipulu ñi femnoafel ta che ürkütun antü mew?

²⁵Feymew Jesus llowdungufi ti pu farisew: —¿Kimlaymün am ñi chumün ta David kiñe rupa kisu ka tañi pu kompañ ngüñülelu engün?

²⁶Abiatar ürkefel tati Wünen Longko Saserdote. David konpuy ta Ngünechen ñi ruka mew, fey ipufi tati kofke Ngünechen tañi chalintukulelngeel. Ka femngechi eluyefi tañi kompañ ñi inanieetew, welu tati pu saserdote müten ta felerkefuy tañi iyafel ti kofke.

²⁷Fey Jesus ka amul feypi: —Ürkütun antü ta elngey che tañi duam, welu che ta elngelay ta ürkütun antü ñi duam.

²⁸Feymew ti Wentrukünuwpalu Ñidolküley tati ürkütun antü mew.