Read Ngünechen ñi Küme Dungu Mapudungun Marku 3 Bible Online

Marku 3 - Ngünechen ñi Küme Dungu Mapudungun bible

Marku 3

¹Jesus ka konpuy ta kiñe sinagoga[16] mew. Tüfey mew mülerkey ta kiñe wentru lañmalelu tañi kuwü.

²Fey inaduamniengey ta Jesus ñi tremolpeafiel may ta ürkütun antü mew, femngechi tañi dalluntukuafiel engün.

³Feymew Jesus feypifi ti wentru, lañmalelu ñi kuwü: —Witrange, ka rangi ti pu che witrakünuwnge.

⁴Feymew ka ramtufi ti kakelu pu che: —¿Chem dungu anta feley tañi femael ta che ürkütun antü mew: ñi femael küme dungu kam wesa dungu? ¿Ñi montulmangeael ñi mongen ta kiñe che kam ñi elungeael ñi layael? Welu kisu engün chem pilay rume.

⁵Jesus lladkenkechi adkintufi ti pu che tañi walloñmanieetew, ka weñangküduami ayünolu engün am ñi piwkentukuafiel ti dungu, fey feypifi ta tiyechi wentru: —Norümentunge tami kuwü. Fey ti wentru norümentuy tañi kuwü, fey tremolewetuy.

⁶Welu tripatulu müten tati pu farisew, eluwi engün tañi trürümdunguael Erode tañi kelluntukunieetewchi pu che[17] engün femngechi tañi langümafiel engün ta Jesus.

⁷Jesus amuy tañi pu disipulu engün inaltu pichi lafken, fey inaeyew ta rume fentren che tuwlu ta Galilea.

⁸Fey kimngelu ñi femken afmatufal dungu, fey akuyey tañi pepayaetew fentren che tuwlu ta Judea, tuwlu Jerusalen, ka Idumea, ka fentren che mülelu Jordan tañi tripawe antü püle ka Tiro engu Sidon tañi trokiñ mapu.

⁹Fey tüfachi dungu mew, Jesus feypifi tañi pu disipulu tañi nielpayaetew kiñe farku, femngechi tañi famentuwküleael fey ñi tenfikamekenoaetew ti pu che.

¹⁰Jesus am fentren che tremolfilu, kom tati pu kutran rume fülkonmekepuy ta kisu mew femngechi tañi idapuaetew.

¹¹Fey tati pu weküfü pefilu ta Jesus, lukutunagmekey engün Jesus ñi fül mew ka wirarümekey: —¡Eymi ta Ngünechen tañi Fotüm!

¹²Welu Jesus katrütudunguniefi ti pu weküfü newentu dungun mew ñi feypinoael engün rangi tati pu che ñi ineyngen ta kisu.

¹³Feymew dew rupalu tüfachi dungu, Jesus pürapuy kiñe wingkul mew, fey mütrümyefi kiñeke ti pu che kisu tañi dullitunieel. Fey dew trawüluwkülelu engün,

¹⁴dullintuyey ta kisu engün mew mari epu wentru, tañi kompañaetew engün ka tañi werküafiel ñi kimelael tati küme werken dungu. Fey tüfa engün ta apostol[18] pingey,

¹⁵ka elungey pepiluwün tañi wemünentuafiel tati pu weküfü.

¹⁶Fey tüfa tati mari epu wentru tañi dullintuel: Simon, tati Pedro pintukulel ñi üy,

¹⁷ti epu peñiwen Santiaw ka Juan, Sefedew tañi epu fotüm, fey engu Boanerge pintukulelfi tañi üy (tralkan tañi fotüm piael ürke)

¹⁸Andre, Felipe, Bartolome, Matew, Tomas ka Santiaw, Alfew tañi fotüm Tadew, Simon tati Selote,[19]

¹⁹ka Juda Iskariote, fey tüfa lle tati ellka ngünenmatufilu ta Jesus.

²⁰Feymew ka konpuy ta Jesus kiñe ruka mew. Fey trawülu am ta rume fentren che, pepi ilay rume ta kisu ka tañi pu disipulu no rume.

²¹Fey Jesus tañi pu reñma kimlu engün tañi femngechi dungu ñi femmeken, amuy engün ñi yemetuafiel. “Wedweduwi tati” pirkey engün.

²²Ka femngechi tati pu kimeltukelu ta Moyse ñi ley dungu tuwlu ta Jerusalen akuy engün ka feypipay: “Belsebu,[20] tati rüf longkolelu ti pu weküfü mew, fey ta elueyew pepiluwün ta tüfachi wentru tañi pepi wemünentuafiel tati pu weküfü.”

²³Fey Jesus mütrümfi ti pu kimeltukelu ta Moyse ñi ley dungu, fey kiñe adkünu dungu mew feypifi: “¿Chumngechi anta weküfü wemünentuafuy ta weküfü?

²⁴Kiñe fütra trokiñ mapu mew mülechi pu che wichuke püntükawkülele ka kayñetuwkülele engün turpu kiñewkülelayafuy.

²⁵Ka femngechi kiñe reñmawen pu che wichuke püntükawkülele engün, turpu kiñewkülelayafuy.

²⁶Fey weküfü wichu püntükawkülele, ka kisutu kewatuwle, rumel küme felelayafuy. Puwafuy may kisutu ñi apümkawün.

²⁷“Iney rume ta konpulayafuy kiñe rume newenngechi wentru ñi ruka mew tañi müntuñmayafiel ñi nieelchi chemkün, wünelu mew trarinofile. Welu trarikünufile, fey wülake pepi müntuñmayafuy kom ñi nieel.

²⁸“Rüf dungu ta feypiwayiñ Ngünechen ta feleay tañi wiñoduamatufiel ta pu che, kom tañi yafkan mew ka kom tañi wesa pikeel mew engün.

²⁹Welu tati kayñetudungufilu tati Lif Küme Püllü, chumkawnorume wiñoduamangelayay. Fey ta rumel feleay ñi yafkalen.”

³⁰Fey tüfachi dungu feypi ta Jesus, kisu engün am “konweküfüley” pifilu engün.

³¹Feymew ta akuy Jesus tañi ñuke ka tañi inanke pu peñi, welu wekuntu mülepay engün. Feymew “tripapape” pifalngey.

³²Fey ti pu che, anülelu Jesus tañi inafül püle, feypieyew: —Tami ñuke, ka tami pu peñi[21] wekuntu mülepay. ‘Tripapape’ pieymew engün.

³³Fey Jesus ta llowdunguy: —¿Iney anta iñche ñi ñuke ka tañi pu peñi?

³⁴Feymew müten, adkintufi tati pu che anüleyelu kisu tañi inafül püle, ka amul feypifi: —Tüfa engün ta iñche tañi ñuke, ka tañi pu peñi.

³⁵Fey iney rume ta küdawyefile Ngünechen tañi ayükeelchi dungu, fey iñche tañi peñi, ñi lamngen ka tañi ñuke.