Read Ngünechen ñi Küme Dungu Mapudungun Juan 13 Bible Online

Juan 13 - Ngünechen ñi Küme Dungu Mapudungun bible

Juan 13

¹Kiñe antülewelu ñi akuam tati pu judiu che ñi Paskua kawiñ, Jesus kimnierkey ñi püllelepan dewma kisu ñi medin antü, fey ñi amutuael ka ñi müleputuael ta kisu ñi Chaw engu. Kisu rumel piwkeyepafi tañi elungeel tati mülelu mapu mew, fey femngechi kisu kom piwke mew piwkeyefi ka rumel ñi piwkeyenieafiel.

²Fey weküfü dew konürkey Juda ñi piwke mew, Simon Iskariote tañi fotüm, tañi rakiduamkülen mew ñi ellka wültukuafiel ta Jesus.

³Jesus kimnierkey ñi küpan ta Ngünechen mew ka ñi wiñotuael ta Ngünechen mew ka femngechi ta Chaw ñi eluetew ta kom pepiluwün.

⁴Feymew petu imekelu engün, witratripay ti mesa mew, fey nentukünuy ñi wente tukunieelchi takuwün, fey püramkünuy kiñe toalla ñi topel mew.

⁵Ka pürüm wütruntukuy ko kiñe lafatorio mew, fey eluwi ñi küchanamunafiel ñi pu disipulu ka angkümeltufi ti toalla mew.

⁶Fey küchanamunafilu ta Simon Pedro, fey Pedro feypieyew: —Ñidol, ¿chumngelu am küchanamunaen ta iñche?

⁷Jesus llowdungufi ta Pedro: —Fewla eymi kimlaymi tañi chumpen ta iñche, welu ka antü wüla küme kimaymi.

⁸Pedro feypieyew: —¡Chumkawnorume eluwlayan tami küchanamunafiel! Jesus llowdungufi ta Pedro: —Fey küchanamunnoeliyu, koneltulayaymi iñche mew ka iñche ñi trokiñche mew.

⁹Simon Pedro feypieyew: —¡Femalmi Ñidol, namun müten küchañmalayaen, welu ñi kuwü ka ñi longko!

¹⁰Welu Jesus llowdungufi ta Pedro: —Tati we müñetulelu duamtukey ñi küchayael ñi namun müten fey am ñi kuerpu kom lifkülelu. Fey eymün dew lifküleymün, welu kom eymün no.

¹¹Jesus feypi: “Kom eymün lifkülelaymün”, kimnielu am iney tañi ellka wültukuaetew.

¹²Fey dew küchañmangelu ñi namun engün Jesus, wiñome tukutuy ñi wente tukukeelchi takuwün, fey ka wiñome anükünuwtuy ti mesa mew ka feypifi ñi pu disipulu: —¿Ngüneduamimün kay eymün iñche tañi fempeelchi dungu?

¹³Eymün ta kimeltufe ka Ñidol pimuken, fey küme feypikeymün feyngelu am.

¹⁴Fey iñche tamün kimeltufengeli ka Ñidolngeli, fey küchañmawiyiñ tamün namun, ka femngechi feley tamün welukonkechi küchañmawael tamün namun.

¹⁵Iñche ta eluwiyiñ kiñe küme inayentufalchi dungu, fey eymün tamün ka femngechi piwkeyewael chumngechi femün ta iñche.

¹⁶Rüf dungu feypiwayiñ ta chem kona no rume doykülelay kisu ñi ñidol mew, ka chem werken rume doykülelay ñi werkükeetew mew, feymew eymün müley tamün femael iñche reke.

¹⁷Fewla longkontukufilmün tüfachi dungu, welukonke piwkeyewülmün, rume sakinngeaymün.

¹⁸“Itrokom eymün ta feypiwpelayiñ: iñche kimnien iney engün tañi dulliel. Welu müley ñi mupiael tañi chem pilen tati Wirin Chillka: ‘Tati petu ilu iñche iñchiw, fey ta kayñetutuenew.’[35]

¹⁹Tüfachi dungu wüne feypikünuwayiñ, fey feychi felele, eymün ta feyentuaymün ta iñche mew tañi Iñchengen.

²⁰Rüf dungu feypiwayiñ tati llowfilu iñche ñi werküel, fey ta llowenew ta iñche, fey tañi llowetew ta iñche, llowkefi tüfey tañi werküetew.”

²¹Fey dew feypilu tüfachi dungu, Jesus rume weñangküy ñi piwke mew, feymew küme nor dungun mew feypi: —Rüf dungu mew feypiwayiñ kiñe ta eymün ellka wültukuaenew.

²²Fey ti pu disipulu eluwingün welukonke ñi leliwüluwael fey ñi kimnon engün iney ñi feypipefiel.

²³Fey kiñe ñi pu disipulu tati rume piwkeyenieel, mülerkey Jesus ñi inafül mew, fey Juan ürke.

²⁴Fey Simon Pedro maychülfi ta Juan tañi ramtuafiel ta Jesus iney ñi feypipefiel.

²⁵Fey Juan doy fülpuy Jesus mew, fey ramtufi: —Ñidol ¿iney anta wültukuaeymew?

²⁶Jesus llowdungueyew: —Küchukünuan kiñe wükan kofke, fey tüfey tañi eluael, fey tati. Fey pürümkachi küchumi kiñe wükan kofke, fey elufi ta Juda, Simon Iskariote ñi fotüm.

²⁷Fey pürümka müten Juda, llowfilu ti kofke, weküfü konürkey kisu ñi piwke mew, fey Jesus feypieyew: —Tami femaelchi dungu, pürüm femnge.

²⁸Welu kiñe no rume tati petu imekelu mesa mew kimüñmalaeyew chumngelu ñi feypingen ta Juda.

²⁹Juda ürke tati niekefulu ti kütrüng pülata, fey kiñekentu rakiduamingün ta Jesus ñi werküetew tañi ngillameael tati duamtuel ti kawiñngealu kam tañi eluafiel chem rume tati pu pofre.

³⁰Fey Juda, dew llowfilu ti kofke, tripay. Punürkey dewma.

³¹Fey dew tripalu Juda, Jesus feypi: —Puwi ñi püramyengeael tati Wentrukünuwpalu ka Ngünechen ñi püramyengeael ta kisu mew.

³²Fey tati Wentrukünuwpalu pengelniey Ngünechen ñi fütra küme püramyengen, Ngünechen ka pengelay kisu mew ti fütra küme püramyengen, fey pürümka müten femay.[36]

³³Iñche ñi sakin pu weni, iñche mülewean eymün iñchiñ kiñe mufün ora müten tüfachi mapu mew. Eymün ta kintumuan, welu chumngechi tañi feypifiel tati pu judiu, fey fewla ka femngechi feypiwayiñ ta eymün: Pepi amulayaymün chew tañi amuael ta iñche.

³⁴“Feymew eluwayiñ ta tüfachi we werkün dungu: Tamün welukonke piwkeyewael chumngechi ta iñche piwkeyewiyiñ ta eymün. Femngechi feley tamün welukonkechi piwkeyewael.

³⁵Fey welukonkechi piwkeyewülmün, kom mapu mew mülechi pu che kimayngün iñche tañi disipulungen ta eymün.”

³⁶Fey Simon Pedro ramtufi ta Jesus: —Ñidol ¿chew anta amuaymi? Fey Jesus llowdunguy: —Chew ñi amuael ta iñche, pepi inalayaymi ta fewla. Ka antü wüla amuaymi.

³⁷Feymew Pedro feypi: —Ñidol, ¿chumngelu am pepi inalayaeyu ta fewla? ¡Dew eluwkülen ñi lakonael rume ta eymi iñchiw!

³⁸Jesus llowdungueyew: —¿Rüfngey am tami layael iñche mew? Rüf dungu feypiaeyu petu ñi kakaranon ta alka, küla rupachi ta “kimlafiñ” piaymi.