Read Ngünechen ñi Küme Dungu Mapudungun Ebrew 1 Bible Online

Ebrew 1 - Ngünechen ñi Küme Dungu Mapudungun bible

Ebrew 1

¹Fütra kuyfi mew Ngünechen dungufi iñchiñ taiñ kuyfike tuwün em[1] rume fentreke rupa ka fill pepikawün mew tati pu pelon wentru mew.

²Welu fantepu amulechi tripantu mew, dungueiñmew kisu ñi Fotüm mew. Ka femngechi kisu mew adkünufi itrokom müleyechi dungu, fey ka femngechi femkünufi ñi ngünenieael itrokom müleyechi mapu mew.

³Ngünechen elueyew kom ñi fütra pepiluwün, kisu mew kimfali ñi chumngen ta Ngünechen ka ngüneniefi itrokom dungu Ngünechen ñi eluetewchi pepiluwün mew. Fey dew wiñoduamatuetew iñchiñ taiñ yafkan mew, fey püratuy ñi müleputuael ta wenu mapu ülmen mülewe mew Ngünechen ñi man ad püle.[2]

⁴Fey ta famngechi Ngünechen ñi Fotüm doy fütra wünenküley tati pu werken püllü mew, fey koneltulelu am doy fütra pepiluwün mew kisu engün tañi nieel mew.

⁵Fey Ngünechen am feypinofilu ta kiñe werken püllü no rume: “Eymi ta iñche ñi Fotüm: Iñche dullieyu ta fachantü.”[3] Ka femngechi feypilafi kiñe werken püllü no rume: “Iñche chawyeenew ta kisu, fey iñche kay fotümyefiñ ta kisu.”[4]

⁶Welu kangelu lifru mew, kisu ñi wünenkülechi Fotüm chalintukufilu ta chüf mapu mew, feypi: “Ngünechen ñi pu werken püllü püramyeaeyew ngillatun mew ta kisu.”[5]

⁷Ti pu werken püllü mew kay Ngünechen feypi: “Femkünufi ñi pu werken püllü ñi feleael kürüf reke. Ka fütra lewlewkülechi kütral reke feley kisu ñi pu püramyekeetew.”[6]

⁸Welu kisu ñi Fotüm mew kay, feypi: “Ngünechen tami longko ülmenngen rumel felekey, fey eymi ta kiñe nor piwke küme longko ülmen.

⁹Rume piwkeyefimi ta nor dungu ka üdefimi ta wesake dungu. Feymew Ngünechen, eymi tami Ngünechen, dullieymew ka elueymew fentren ayüwün, doy nieymi ayüwün tami pu kompañ mew.”[7]

¹⁰Ka femngechi feypi: “Eymi, Ñidol Ngünechen, llituka mew müten dewmafimi ta mapu. Eymi ka müten dewmafimi ta wenu mapu.

¹¹Eymi rumel müleaymi, welu kom tami dewmael feley ñi aftuael. Itrokom kisu engün aftuay kiñe takuwün reke.

¹²¡Müchamngetuay chumngechi müchamngekey ta kiñe takuwün. Mudawngetuay chumngechi ta iney rume mudawkey ñi takuwün! Welu eymi feleaymi müten. Eymi tami mongen chumkawnorume aflayay.”[8]

¹³Ngünechen turpu feypikelafi kiñe no rume tati pu werken püllü: “Anünge iñche ñi man püle. Tami pünotuwe namun mew elkünufili wüla tami pu kayñe.”[9]

¹⁴Fey kom ti pu werken püllü am werken püllüngelu tañi poyeafiel ta Ngünechen, werküngekelu tañi kelluafiel tüfeychi pu che llowalu ti montuluwün.