Read Ngünechen ñi Küme Dungu Mapudungun Apokalipsi 18 Bible Online

Apokalipsi 18 - Ngünechen ñi Küme Dungu Mapudungun bible

Apokalipsi 18

¹Fey rupalu kom tüfachi dungu, pefiñ ta ka kiñe werken püllü petu nagpalu ta wenu mapu. Niey fentren pepiluwün, fey mapu ta pelonmalewey kisu tañi alofün mew.

²Newentu dungun mew wirarkümekey: “¡Dew tranarupay, dew tranarupay tati Babilonia fütra waria! ¡Weküfü tañi mülewengetuy! Itrokom wesake weküfü tañi ellkawkülemum. ¡Ka itrofill üdekeelchi wesake üñüm ñi dañe reke feletuy!

³Itrokom fütrake trokiñ mapu mülechi pu che ngollikay reke engün, tañi femael kisu ñi femkeelchi wesake dungu pulku reke. Itrokom mapu müleyechi pu longko ülmen ngünenkaeyew ta tüfeychi fütra waria femi kiñe küri domo reke ñi wüdamentungeael engün Ngünechen mew ñi püramyeafiel epe fill adentun. Ka kom mapu müleyechi pu neosiante rumeñma rikuy engün kisu engün tañi fentre adelkawelchi fill kümeke chemkün mew.”

⁴Ka kiñe dungun allkün ta wenu mapu, feypilu: “Tripamün ta tüfachi waria mew, eymün ta iñche ñi trokiñchengelu, tamün koneltunoael kisu engün tañi yafkan mew tamün ka femngechi dinoaetew rume kisu engün tañi wesake kutrankangen:

⁵Kisu engün tañi yafkan rume ngülpüray, fey puwi reke ta wenu mapu, fey Ngünechen tukulpay kisu engün tañi wesa femel.

⁶Chem tañi elukefiel ta kakelu, kisu ka femngelu elungepe. Epuchi kullingetupe tañi femkeel mew. Deyümelfimün doy fürechi pulku chumngechi ñi deyümelfiel ta kisu kakelungealu.

⁷Elufimün tañi rume kutrankawael chumngechi ta kisu mallmawi ka ayüwi ñi femael ti wesa wimtun. Feypiwkey tañi piwke mew: ‘Anülen ta tüfa mew kiñe longko ülmen domo reke. Lantu domo no ta iñche, ka kutrankawlayan rume.’

⁸Feymew, kiñe antü mew akuay ñi lan ka ñi lalkawün ka ñi nien ngüñün, ka lüpümngeay ta kütral mew, pepiluwün nielu am ta Ngünechen, tati Ñidol fey tañi kondenaetew.

⁹“Tüfachi mapu mew mülechi pu longko ülmen epuñpüle ka welukonke ñiwaluwi ta kisu mew ka chalintukuwi engün tati wesa fill femmeken mew, feymew ngümayengeay engün ka etüngün mew kutranduamyengeay ta kisu. Peñmanagle engün tañi pitrun tañi lüfkonün mew.

¹⁰Alü kamapu müleweay engün ñi llükafiel mew tati kutrankangen, fey feypiay engün: “ ‘¡Awngeymi, awngeymi, fütra waria, Babilonia, tati pepiluwünngechi waria! ¡Kiñe lelen mew müten am akulu tami kutrankangen!’

¹¹“Itrokom mapu müleyechi pu neosiante ka femngechi ngümayay engün ka rume weñangküyeafi ta tüfeychi waria, ngewenoalu am iney tañi ngillañmayaetew engün tañi fendekeelchi chemkün:

¹²tañi fentren oro, pülata, ayüfalchi kura, llümllümchi perla, linu kümeke dewman takuwün, seya pañu, purpura pañu, ka itrokom mamüll kümeke nümünngelu, ka kümeke foro kulliñ, kümeke trafla, fronse chemkün, pañillwe chemkün, marmol,

¹³fentreken kanela, küme nümünngechi chemkün, insienso, mira, perfume, pulku, aseyte, kümeke rüngo ka kachilla, fentreken kulliñ yekelu chemkün, ufisa, kawellu, kareta, kenü püresukona, che tañi mongen kütu.

¹⁴“Fey feypiafi engün tati waria che: ‘Dew niewelaymi tati ipeelchi kümeke fün anümka tami rume illutukefel. Chumkawnorume ta pewetulayaymi tami rumeñma adelkaniekefetew ka tami rikungekefel.’

¹⁵Tati pu fendekefulu ta tüfeychi chemkün rikuy engün tati waria che tañi duam, fütra kamapu müleweay engün tañi llükafiel mew, fey tati kutrankangen, ngümalen ka etüngkülen.

¹⁶Ka feypiay engün: “ ‘¡Awngey, awngey tati fütra waria! Kiñe domo küme tukutuwkülelu kümeke linu takuwün mew kechilekefuy, purpurangelu ka kelüngelu, ka adelkaley ta oro mew, rume adchi kura ka wilüfchi perla mew

¹⁷¡Fey kiñe lelen mew müten ta aftuy ñi rume fentren chemkün!’ “Itrokom tati pu kapitankülelu ta farku mew ka tati pu miyawülkelu farku tati lafken mew, tati pu marineru ka itrokom tati pu wewkelu ta pülata lafken mew tañi mongeluwküleam, alü kamapu mülewey engün.

¹⁸Fey ka, pefilu engün ti pitrun ñi petu lüfün tati wirari engün: “ ‘¿Ka chuchi kangelu waria mew trürümngeafuy ta tüfachi fütra waria?’

¹⁹Fey widpütuy engün ñi longko trufür mapu mew, ngümalen ka etüngkülen ka wirarkülen: ‘¡Awngey, awngey tati fütra waria! Kisu tañi fütra kümeke felen mew ta rikuy engün itrokom tati pu niekelu ta farku lafken mew. ¡Fey kiñe lelen mew müten ta apümkangey!

²⁰Eymi, kallfü wenu, ayüwnge ta tüfachi waria tañi duam. Ka ayüwmün ta eymün, tati pu koneltulelu Ngünechen tañi pu trokiñche mew ka tati pu apostol ka tati pu pelon wentru, kondenaetew am ta Ngünechen femngechi ta nor dungu femi ta Ngünechen eymün mew.’ ”

²¹Feymew kiñe pepiluwünngechi werken püllü witrañpürami kiñe kura, kiñe fütra molinu kura femngelu, fey ütrüftukufilu ta lafken mew, feypi: “Femngechi ütrüftukungeaymi, eymi Babilonia, tati fütra waria, fey chumkawnorume ta pengewelayaymi.

²²Chumkawnorume allküngewelayay tami kalle mew arpa musika, flawta ka trompeta. Ngewelayay rume küdawfe eymi mew chem küdawkelu no rume, allküngelayay rume ta eymi mew ñi kayngülün tati molinu mew mülechi kura.

²³Chumkawnorume ta wilüfwelayay ta eymi mew chem küde pelontuwe no rume, ka allküngewelayay rume ta eymi mew wakeñkülechi pu che tati mafün kawiñ mew, tunte tami pu fendekelu rume fütra ülmenngekefuy engün kom mapu mew ka ngünenkafimi ta kom trokiñke mapu tami kalku dungu mew.

²⁴Fey tüfeychi waria mew wütrulngey tati pu pelon wentru tañi mollfüñ ka tati pu koneltuleyelu Ngünechen tañi pu trokiñche mew, ka femngechi itrokom mapu mew langümelchi pu che tüfachi mapu mew.”