Read Ngünechen ñi Küme Dungu Mapudungun Apokalipsi 5 Bible Online

Apokalipsi 5 - Ngünechen ñi Küme Dungu Mapudungun bible

Apokalipsi 5

¹Tati anülelu ti ülmen wangku mew ñi man püle pefiñ kiñe chümpotuelchi lifru epuñpüle wirilelu, ka rakümkülelu regle sellu mew.

²Ka pefiñ kiñe pepiluwünngechi werken püllü ramtumekelu newentu dungun mew: “¿Iney anta dulliley tañi nülayafiel tati wirin chümpotuelchi lifru ka ñi wichafüñmayafiel tañi sellu?”

³Welu wenu mapu mew no rume ka nag mapu mew no rume ka miñche mapu mew no rume ngelay ta iney no rume tati pepi nülayafulu ti chümpotuelchi lifru, tañi adkintuafiel rume.

⁴Fey iñche fütra ngüman, ñi pengenon mew ta iney no rume ti dullilelu ñi nülayafel ti chümpotuelchi lifru, ñi adkintuafiel no rume.

⁵Welu kiñe tati putrem fütache feypienew: “Ngümawekilnge, fey tati trapial reke felelu, tati mülelu Juda tañi reñma trokiñche mew, tati longko ülmen David tañi tuwünngelu, fey ta wewi ka pepi nülayafuy tati chümpotuelchi lifru ka wecharafuy tati regle sellu.”

⁶Feymew, tati fütra ülmen wangku ñi rangiñ mew ka tati pu meli mongelechi püllü, ka tati putrem fütakeche ñi rangiñ mew, pefiñ kiñe Korderu. Witralelu, welu langümkefel reke felewey. Regle müta niey ka regle nge, fey ta Ngünechen ñi regle püllü werküngelu ta kom mapu püle.

⁷Fey tati anülelu ti longko ülmen wangku mew ñi man kuwü mew nüniey tiyechi wirin chümpotuelchi lifru, fey ti Korderu yemefi tiyechi chümpotuelchi lifru,

⁸fey nüfilu müten, tati meli mongelechi püllü ka tati pu epu mari meli putrem fütakeche lukutuy engün, kake kiñeke niey engün ta arpa, ka niey engün fütra oro kopa apolelu ta insienso mew, fey tüfachi apolechi fütra kopa adentuley tati pu koneltulelu Ngünechen ñi trokiñche mew ñi ngillatun.

⁹Fey ülkantuy engün fey tüfachi we ül: “Eymi ta dullintuleymi tami nüafiel ti chümpotuelchi lifru ka tami wecharafiel tañi sellu, eymi am ta langümngelu, fey wütrulün mew tami mollfüñ. Ngillafimi reke ta che Ngünechenngealu itrokom kakerume trokiñche, dungun, waria ka trokiñche mülelu ta mapu mew.

¹⁰Itrokom kisu engün mew femkünuymi ñi müleael kiñe longko ülmen. Kom mapu mew mülechi pu che tami müngeltuetew saserdotekünufimi ñi poyeafiel ta Ngünechen, fey longko ülmenküleay ta tüfachi mapu mew.”

¹¹Feymew müten adkintun, fey allkün rume fentren warangka werken püllü ñi dungun müleyelu ta inafül tati ülmen mülewe mew, chew müley ti pu mongelechi püllü ka ti putrem fütakeche.

¹²Fey feypimekey engün newentu dungun mew: “¡Tati langümfelchi Korderu fey ta koneltuley tañi llowael ti pepiluwün ka tati fütra küme felen, tati kimün ka tati newen, tati yamfalngen, tati llümllüm mülewe ka tati püramyen!”

¹³Ka femngechi allkün Ngünechen tañi itrokom dewmael wenu mapu mew ka nag mapu mew, miñche mapu mew ka lafken mew, fey feypi engün: “¡Tati anülelu ti longko ülmen ñi wangku mew ka ti Korderu, püramyengepe tañi fütra pepiluwünngen mew ka ñi ülmenkülen mew, ka tañi fütra kimün mew ka ñi fütra newen mew rumel rupaleyechi tripantu mew!”

¹⁴Fey tati meli mongelechi püllü llowdungukey engün: ¡Felepe may! Ka tati pu epu mari meli putrem fütakeche lukutuy engün ka llellipukey ngillatun mew.