Read Maram Naga METIU 10 Bible Online

METIU 10 - Maram Naga bible

METIU 10

¹Sateichii mpounii mpou boumei keariisiinakhii gotei mpouda lat magongsii, “Matei kasu rangii go baatoi matutang karam sateichii ra kashyii hang go tii mbipyii matutang karam jangpii mpounii ahnyii dakii teimaham pyiitakle.”

²Tiilamlwi kapyii mei keariisiinakhii zei tei aile: Karei reisang kito Pitar sii kalat Simon, sateichii mpoutai karhiipii Andru, Zebedi nah sapfii mpou Jems ninado mpou taikarhiipii Jon,

³Filip ninado Bartholomio; Thomas ninado aha kahapii Metiu; Alfaiyas nah sapfii mpou Jems ninado Tadios;

⁴Kainan mpfii Simon sateichii ngoukarou mei bah kikii mpougo pyii katoipii Judas Iskariot.

⁵Keariisiinakhii aigo Jisunii aitiisii tam kakhatsii lang mpat takle: “Jehudimei kasu Lui kakimei mah sazyiiki mak-kii, Samariyamei mah namdi kitei liit sulo,

⁶nlenii Isrelmei mah maga kalei Jaonah mei datei tat tulo.

⁷Sateichii gonyiinii katat kak ‘Sating gam sazyii tei natakle’ sii tam ralipyiilo,

⁸sateichii katchii kanhiimeigo tii-mbipyiilo, kataimeigo tiimaringpyiilo, mpara tchiisii kalei meigo tiimatei pyiilo, sara kashyii hang go baatoi pyiilo. Gonyiinii matapii doutakle matapii pyiilo.

⁹Sona kado, sanah raguiba kado, sanah-gyii kado gonyii mah haikak kikii pung sulo;

¹⁰sateichii gonyii mah mbui tiitat jangpiinii takou paitu mak-kii, peijou hangna mak-kii pichot, mak-kii koktui kado pung sulo. Kadapokii tha katiimeinii ahmah chiitak tei doukajyiile.

¹¹“Sateichii gonyiinii namki mak-kii namdi hangninii ki gongchii, gonyiinii tatliitsii gonyiigo lukainyii- sii kaleimei gotei fii wolo sateichii teibam kiteito gonyiinii tatpat kasuta teikito bamlo.

¹²Sateichii gonyiinii ki lung tat kaliit kak, ‘kamajung tei n-go kaswi matulo’ sii tamlo.

¹³Sateichii ki teinii gonyiigo lukai pyii leponii, gonyii mah kamajung tei ki teikito bam matulo; nlenii ki teinii gonyiigo lukai pyii suleponii, gonyiii mah kamajung tei gonyiida nlaigong matulo.

¹⁴Satei- chii mei kata kangkanii gonyiigo lukaipyii suleponii mak-kii gonyii samtei shiisei suleponii, teiki ki kiteito mak-kii namdi kiteito tat kapat kak, gonyii pi-pazhii ki buinei tei patamtoi ailo.

¹⁵Inii gonyii dakii kasangpii tam leile, samtak katii piinei namdi teigo teisungnii Sodom ninado Gomara go Saraanii kisii lungkasyii tei mangou tangle.

¹⁶“Julo, Inii gonyiigo Sanyii kak kikii Jaonah takumpii lang mpat leile. Teijangpii gonyiinii Sanhii takumpii sakailo, sateichii mahou takumpiinii lung manoilo.

¹⁷Mei dateito sakai wolo, kadapokii ahnyii- nii gonyiigo samtak katii kikii pyiitoi tangle sateichii ahnyii mah ndwibam hang kiteito gonyiigo dat tangle;

¹⁸sateichii ahnyii doito ninado Lui kakimei doito sakchyii pyiimatu tang karam jangpii Governor mei ninado sagongmei hang doito gujangpiinii gonyiigo chyii karhiitat tangle.

¹⁹Ahnyiinii gonyiigo pyiikatoi kak kada takumpii mak-kii kadapei tam tangposii gonyii lungnaang sulo, kadapokii kadapei tam tangpo katu tei teitinglang kinii gonyii dakii pyiitangle;

²⁰kadapokii tam kalei tei gonyiinii makle, nlenii gonyii lung kito kalei go pfii mah rangii teinii tam leile.

²¹“Asanapiinii sanapiigo sateichii Pfiinii Nahgo taimatu tang karam jangpii pyiitoi tangle, sateichii nahmeinii Pwi Pfii pyiiryiikii mazhii supiinii ahnyiigo gimatu tangle.

²²Sateichii gu zei jangpii gonyiigo meihangnii ngourou tangle, nlenii kalui katang tei leh kalumeigo keipyii tangle.

²³Ahnyiinii gonyiigo namdi aikito kaset kalak kapyii tinglang kak; kaki hangniniiki pak galo; kadapokii Inii gonyii dakii kasangpii tam leile, meinah sapfii mpou teinii gong kasunakii gonyiinii Isrel mah nam hang kitei gong mashangpei wolakle.

²⁴“Taikaswimei hangninanii ahgo Madhiikapyiipii sung dibui makle, sateichii ki kalei mei hangninanii Mpou-pumpii sung dibui makle.

²⁵Taikaswimei hangninanii mpougo Madhiikapyiipii sateichii ki kaleimei hangninanii mpou mah ki pumpii takum takle leponii lung mangtang karamle. Ki pumgpii gotei Belzabul sii lat takleponii, mpouki kalung teito kaleimei hang goteinii teisung kisii zei kashyii kashyii tei lat tangle!

²⁶“Teijangpii ahnyiigo hinguslo; kadapokii mati mangoulak tang karam gomnei kabam samah kado gale; sateichii tilak tang karam kamakum samah kado gale.

²⁷Inii gonyii dakii kamyii kito katam tei gonyiinii kava kito tam mpatlo sateichii gonyiinii gonyii khoi kito makumpii shiikalu tei ki kapouryii gam tu wosii saa mpatlo.

²⁸Sateichii pumpotgo gi wosii rangiigo gipei wokalak ahnyii gotei hing sulo; nlenii rakot godo pumpot godo mibam kito tiimaga wokabui Ahgotei hinglo.

²⁹Nkinah hangnago peisa hangninii jangpii joimakpo? Sateichii ahnyii hang kak kito hangninii kado gonyii Pfii mah kamaning kamazhii tei haisupiinanii sazyii takmang lakle.

³⁰Nlenii go phyiitaam hang katang- piido pak fiibam takle.

³¹Teijangpii hingsulo, gonyiinii Nkinah hang sungdo mai-ting kile.

³²“Teijangpii meihang doito n-gu mazhii katumei hang gotei Iniido sating gamto kalei Gu pfii doito ahgo mazhiipyii tangle.

³³Nlenii meihang doito n-gu mazhii kasumei gotei Iniido sating gamto kalei gu Pfii doito mazhiipyii lakle.

³⁴“Inii sazyii pouryiikii kamajung pung gongziilesii maning sulo; Inii kamajung pung gonglesii gong makle, nlenii saryiikhang hangninii pung gong leile.

³⁵Kadapokii nah sapfiimei teinii ahnyii Pfiimeigo, nah sapwimei teinii ahnyii Pwimeigo, sateichii nah-noumei teinii ahnyii hneimeigo mazhii matulak tang ka- ram jangpii Inii gongle.

³⁶Sateichii mei hangninii mah ngou karoumei teinii mpouki kalung mpung mah mei tei tangle.

³⁷“N-gu sung Pfiigo mak-kii pwigo kisii lungkasyii ah teinii gutai kaswimei tiitang karam akajyii- makle, sateichii n-gu sung nah sapfii mpougo mak-kii nah sapwi mpeigo kisii lungkasyii ah teinii gutai kaswimei tiitang karam akajyii- makle.

³⁸Sateichii Ah-mah krosh poimatusii gutai swikasu ah teinii gutai kaswimei tiitang karam akajyiimakle.

³⁹Karing dousii kalei ah teinii teitei maga tangle sateichii gujangpiinii karing maga kalei ah teinii teitei doutangle.

⁴⁰“Gonyiigo lukakai mei teinii n-gu lukaile, sateichii n-gu lukakai mei teinii n-gu lang kamagong ah go lukaile.

⁴¹Lungkakalingmei hangni- niigo Lungkakalingmei lesii lukakai mei teinii lungkakalingmei hangninii mah alangh tei doutangle; sateichii kasang kamajyiimei hangniniigo kasang kamajyiimei lesii lukakaimei teinii kasang kamajyiimei hangninii mah alhang tei doutangle.

⁴²Satei- chii kacheng aihang kak kito mei hangninii dakii gu boumei hangninii katii jangpii mei kata kangkanii dwikung peek-kii katangdo pyiile- ponii, Inii gonyii dakii tam leile, Ahmah lhang tei gasang galakle.”