Read Maram Naga METIU 12 Bible Online

METIU 12 - Maram Naga bible

METIU 12

¹Teitinglang kak Jisunii bam ntak piinei leimik lu sumto tat patle, sateichii mpou boumei teinii moi mazyiisii arhiibwi tei kek wosii chiitu takle.

²Farasismei teinii teitei ngou wosii mpou dakii tamle, “Julo, go boumeinii bam ntak piinei leimik ajai kasu tha tei tii leile.”

³Teito mpounii ahnyii dakii tamle, “Devit ninado mpougo kaswi kalei mei hangteinii moi kamazyii tinglang kak kadapei tiipo?

⁴Katunii mpounii Saraa kamaning ki lungtei kada takumpii liitsii mpou ninado mpougo kaswi kalei mei hangteinii ajaiting- shang taiswisii chiipei kalak, nlenii Atingmei roinanii chii tang karam Saraadakii pyiitoi kalei tiirok tei ahnyiinii chii wopo katu tei gonyiinii fiimakde?

⁵Mak-kii bam ntak piinei leimik Atingmei teinii Saraa kamaning ki lungto ntak piinei leimik gotei tiipak aikido kama gale katu ai gonyii ajaitingshang kiteito fiimakde?

⁶Inii gonyii dakii tam leile, Saraa kamaning ki sung kisii dikaki hangninii aiki leile.

⁷‘Sateichii Inii lungsyii kati gotei mareile, kakarat gotei marei makle’ katu ai kadapeigo tam leipo katu gonyiinii tileponii, kama kagameigo malesii tam mashyii lakle.

⁸Kadapokii Meinah Sapfii mpou teinii bam ntak piinei leimik mah Abangpiile.”

⁹Sateichii mpounii teibam kiteito tatpatsii ahnyii mah Ndwibam kitei tatliit takle.

¹⁰Sateichii julo, bah lamkii kataimei hangninii leile, sateichii ahnyiinii mpougo malesii tam mashyii kabui tiisii, “Bam ntak piinei leimik ra tii mbikatu ajaimakpo?” Sii mpou dato n-nhii- takle.

¹¹Sateichii mpounii ahnyii dakii tamle, “Gonyii kak kito mei hangninanii Jaonah hangninii bam leponii sateichii bam ntak piinei leimik ahom kathok ki takliit aileponii, ahnii teigotei jumsii poi mpat lakpo?

¹²Sateichii meinahnii Jaonah sung mai tingsang teeng kile! Teipiinii bam ntak piinei leimik tha kabi katii ajaile.”

¹³Teito mpounii bah lamkii taisii kaleipii dateikii “Go bah ntaa patlo” sii tamle, teito mpounii bah ntaapat takle, sateichii teitei bah kaki lam takumpiinii biwo takle.

¹⁴Nlenii Farasismei hangteinii tatpat tosii mpougo kada takumpiinii tiimaga tangpo sii sam rashiitu takle.

¹⁵Sateichii Jisunii ai tiwosii tei kiteito tat tutakle, sateichii mei hangkanii mpou-tai swiwo takle, sateichii mpounii ahnyii hang go ra katchii tii mbipyiile.

¹⁶Sateichii n-gu meidakii mati sulo sii mpounii ahnyii dakii mwija pyiitakle.

¹⁷Ai ai Lungkakalingpii Isaiya go tam matu katu tei gong matwi matutang karam jangpiile, teiteinii,

¹⁸“Julo, Inii kalai kalu guki kaleipii, gu rangiinii hang- kapii lung kamang, gumah lung- kasyii, mpou phyiiryiikii Inii gumah rangii kaipyii tangle; sateichii mpounii Lui kakimei hangdakii gumah samtak tei tam matipyii tangle.

¹⁹Mpounii ka n-gi kazyii lakle, mak-kii kasaa lakle, mak-kii pwidi kadi hang kito mei kaniido mpou rok shiilakle.

²⁰Mpounii lung teisii kalei mei dakii lung manoi pyii tangle sateichii kasuimei dakii lungsyii pyii tangle. Kasang teinii ngam kasuta mpounii tiijou tangle;

²¹Sateichii mpou zei kito lui kakimei hangnii maning malum tangle.”

²²Teito sara kashyiinii kaswi kalei, mik kachet ninado lat kaga mei hangniniigo mpouda pang gong takle, Sateichii Jisunii mpougo tii mbipyii takle, lat kagapii teinii lat pat takle sateichii mik ngou wotakle.

²³Teito meihang teinii sung gasii tamle, “Ai ai Devit nah sapfii mpou teichii makde?”

²⁴Nlenii Farasismei teinii ai ai shii wosek-kii, “Sara kashyii hang mah sagong mah Beelzabul mah paikito supiinii, mei aipou ainii sara kashyii hang go baatoi mak lesii tam takle.”

²⁵Sateichii mpounii ahnyii mah lungswi tei tiwosii ahnyii dakii tamle, “Sagong sazyii kata hangninii lung kito hangninanii hangniniigo saryii tiisii njaipak kalei tei kagale sateichii namdi mak-kii ki kalung mpung kito hangninanii hangniniigo saryii tiisii njaipak kalei teinii sat lakle.

²⁶Sateichii seitan nii seitan go baatoi leponii, mpounii mpouroinapii njaipak aitakle; teitiileponii mpou- mah sagong sazyii tei kada takum- piinii sat-to tangpo?

²⁷Sateichii Inii Beelzabul mah tiikaha kito sara kashyiigo baatoi leponii, gonyii nah sapfiimei hangteinii tamah tiikaha kito ahnyiigo baatoipo? Teijangpii ahnyiinii gonyii mah samtak katiimei tei tiitangle.

²⁸Nlenii Saraa mah rangii teipii Inii sara kashyiigo baatoi leponii, Saraa mah sating sazyii tei gonyii phyiiryii gong takle.

²⁹“Tei mak-kii mei kata hangninanii katei mei hangniniigo ki kalung liitsii ahgo reipii reng pei kasuta, ahmah pot hang tei kada kumpiinii soupei wotangpo? Ahgo reng pei kaleitainii ah kitei ram wobuilo.

³⁰“N-gu kaswi kasumei hangtei- nii n-gu mazhii kasumeile, sateichii n-gu kaswisii poi nkom kasumei hangteinii marou maruk tule.

³¹Teijangpii Inii gonyii dakii tam leile, meinah mah kem ninado tam kamashyii hangtei kaleipyii tangle, nlenii rangiigo tam kamashyii teinii kaleipyii lakle.

³²Sateichii meinah sapfii mpougo mazhii kasu sam katam meihang gotei kaleipyii tangle, nlenii rangii kamatei go mazhii kasu sam katam meihang gonii sazyii pouryii kitodo gongtang karam kiteitodo kaleipyii lakle.

³³“Ruibang teinii bileponii ahmah ti tei bitangle, ruibang teinii shyiileponii ti tei shyii tangle. Kadapokii ruibang tei ah mah ti teipiinii ti wobuile.

³⁴Gonyii sanhii taa-nahmei, gonyiinii kashyii teichii kada takumpii kabi tam mpat-to tangpo? Kadapokii lungki kashyiipii tokryiisii kalei tei mwi kito tam mpat leile.

³⁵Kabi meinii poi ndwi kabam kiteito kabi tei poi mpatle, sateichii kashyii meinii poi ndwi kabam kiteito kashyii tei poi mpatle.

³⁶“Inii gonyii dakii tam leile, Meinahnii tam mpat kalei kakadak samkang hangtei dajangpii ahnii tampo katu kaang tei samtak katii piinei leimik pyii tangle.

³⁷Kada- pokii gomah samkang hangteinii n-go kasanglesii sateichii gomah samkang hangteipii n-go malesii tam mashyii tangle.”

³⁸Teito ajaitingshang kati ojamei ninado Farasismei kangkanii “Ma- dhiikapyiipii, nyiinii godato tiika- mangou siiti hangninii ngounyiile,” sii tamle.

³⁹Nlenii mpounii ahnyiigo kekha- latle, “Kashyii kahong ninado meinou meinah go kashyii katiimei ha ainii tiikamangou siiti go fiile, nlenii Lungkakalingpii Jonah mah tiika- mangou siiti teisupiinii tiikamangou siiti tei pyiilakle.

⁴⁰Kadapokii Jo- nahnii tinghum tingna leimik hang- tum kaa moilungto kabam takumpii meinah sapfii mpou teiniido tinghum tingna leimik hangtum sazyii kangto bam tangle.

⁴¹Niniva meinii samtak katii piinei leimik ai ha aigo kaswisii tusatsii gonyii malesii tam mashyii tangle; kadapokii Jonahnii tam ralikapyii kito ahnyiinii lung kali wotakle, sateichii julo, Jonah sung dikaki hangninii aiki leile.

⁴²Lam- kalam pang mah sagongnou teinii samtak katiipiinei leimik tusatsii mei aiha aigo maalesii tam tangle; kadapochiinii mpoupeinii sazyii nlaito tatpatsii sagong Solomon mah swirek kabi gotei shiilesii gongle, sateichii julo, Solomon sung dikaki hangninii aiki leile.

⁴³“Sara kashyii teinii mei hangninii dato tatpat-to sek-kii, ntakbam fiisii dwikaga bam hangki roitatsii bamle, nlenii ahnii meigo kado dousutakle.

⁴⁴Teito ahnii tamle, ‘Inii tat Kapat guki tei I nlailiit loikai tang takle.’ Sateichii ahnii kagong kak teitei marongsii, bek matei sageisii ninado adoidoi tiisii kai matou kabam tei ngoutakle.

⁴⁵Teitinglangki ahnii maasii mpou sung kisii kashyii rangii kaki sana pang gong sanii liit tosii teikito bam takle; sateichii mei teipou tei nukareiki sung shyiibui takle. Kashyii kahong aiha datodo teigo njoisii pat tangle.”

⁴⁶Mpounii meihang dakii tam leibangpii, Julo, mpou pwi ninado mpou sanameinii mpougo sam rashii lesii kajangto sat takle.

⁴⁷Teipiinii ahnyii kak kito mei hangninanii mpou dakii tamle, “Julo, go pwi ninado gosanameinii n-go sam rashii nyiisii ki kajangto sat leile.”

⁴⁸Nlenii Mpougo katampii gotei Jisunii khekalatle, “Gu pwi tapo? Ninado gu sanamei hangtei ta tapo?”

⁴⁹Sateichii mpounii mpou boumei lamkii bah ntaapatsii tamle, “Julo, gu pwi ninado gu sanamei hangtei aiki leile!

⁵⁰Kadapokiisating gamto kalei gu pfiinii kamaning kamazhii katiimei hangtei gu sanamei, gu taipwimei ninado gu pwile.”