Read Maram Naga METIU 13 Bible Online

METIU 13 - Maram Naga bible

METIU 13

¹Teipiinei leimik sek tei Jisu ki kiteito tatpat tosii dwijai kuto bam wotakle.

²Sateichii meimoinii mpouda gong ndwi wotakle, teipiinii mpounii malyii hangniniiki tatliit tosii bam wotakle; sateichii meimoi teinii dwijai kuto sat takle.

³Sateichii mpounii ahnyii dakii ndasam tamsii mpounii ahnyiigo hangka tamle, teiteinii, “Julo, lwirou karalimei hangninanii lwi rali tang karam jangpii tat pat takle.

⁴Sateichii mpounii aitiisii lwirou rali kapikak, lwirou kangkanii pwidikuki takliitsii, ruinahnii gongsii chii wotakle.

⁵Sateichii kangkanii tu tiirou kak ki takliit takle, sateichii sazyii rangrhii tei tok kasu taiswisii pokpat sek takle.

⁶Nlenii leimik teitu sek-kii, teitei raguitu takle, sateichii maa kaga taiswisii raguido raguipitu takle.

⁷Sateichii kangkanii tu tiirat kak ki takliit takle, sateichii tu tiirat tei pokpatsii tei gotei giitrang aitakle.

⁸Nlenii kaki hangteinii sazyii kabiki takliitsii, kangkanii njai hai, kangkanii reksarok, sateichii kangkanii tamrhii ti mati takle.”

⁹“Khoi pung kalei mei hangnii shii matulo!”

¹⁰Teito boumei teinii mpouda gongsii “Kadajangpii nangnii ahnyii dakii ndasam piinii tampo?” sii n-nhiitakle.

¹¹Sateichii mpounii ahnyiigo khekalatle, “Sating gam sazyii mah kamakum samtei timatu tang karam jangpii gonyii dakii pyiibam takle, nlenii ahnyii dakiinii pyiimakle.

¹²Kadapokii kaleimei dakii kisii pyii tangle, sateichii mpounii hangka leitangle, nlenii kagamei datonii mpoumah kalei katang teido poitoi aitangle.

¹³Aijangpii Inii gonyii dakii ndasam piinii tamle, kadapokii ahnyiinii jule, nlenii ngoumakle; khoikingle nlenii shii makle; mak-kii timakle.

¹⁴Lungkakalingpii Isai- yanii aitiisii katam tei ahnyii gamto gong matwi takle: ‘Gonyiinii khoiking tangle, nlenii tisang tilakle; sateichii gonyiinii jutangle, nlenii ngousang ngoulakle.

¹⁵Kadapokii ahnyiinii mikpii kangou, khoipii kashii, ahnyii lungpii kati, nrek nlai kagong, sateichii Inii ahnyiigo tii-mbi katu tei mazhiilak tang karam jangpii mei aimei mah lung tei tiimahat aitakle; ahnyii khoi makat wotakle sateichii ahnyii mik tei mikchyii wotakle.’

¹⁶“Nlenii gonyii mik sadoi bile, kadapokii gonyiinii mik ngoule, sateichii gonyii khoi sadoi bile, kadapokii gonyiinii shiile.

¹⁷Inii kasangpii gonyii dakii tamleile, Lungkakalingmei ninado kasang kamajyiimei hangkanii gonyiinii kangou tei ngounyiisii bamle, nlenii ngoumakle, sateichii gonyiinii kashii tei shiinyiisii bamle, nlenii shiimakle.

¹⁸“Teipiinii lwirou karali mah ndasam ai shiilo.

¹⁹Mei kata hangninanii sating gam sazyii mah samtam tei shii wosii, teigotei tikasu teinii kashyii teinii gongsii ah lungkikii maroukai kabam tei poitoi takle; pwidiku kikii rali kakei ahtei aile.

²⁰Sateichii tu tiirou gamkii ralikai kabam ahnyii teinii samtam tei shii wosii, kalangsii ntasii lukai wole;

²¹nlenii ahnyiinii maa gale, sateichii ahnyiinii malum mathang makle; sateichii samtam aijangpiinii kamage kalak mak-kii kaset kalak kadou katu tinglang kagong kak, ahnyiinii binasek-kii kougale.

²²Sateichii tu tiirat kak kikii ralikai kabam ahnyii teinii samtam tei shii wosii, sazyii pouryii swi kamaning ninado kani kahii kamarei teinii samtam gotei giitnei wosii ti mati leimakle.

²³Sateichii sazyii kabi kikii ralikai kabam ahnyii teinii samtam tei shii wosii teigotei tiwole; ahnyiinii kasangpii ti matile: kangkanii njai hai, kangkanii reksiirok, sateichii kangkanii tamrhii matile.”

²⁴Mpounii ahnyii dakii ndasam kaki hangninii tamle, “Sating gam sazyii teinii ai takumle, mei hang- ninanii mpou-lu kikii lwirou kabi ralikai bam takle;

²⁵nlenii tinghum hangninii, meihang zyii kalei tinglang kak, ngoukarou mei hang- ninanii gongsii arhii kak ki teikii rhiimah tei ralikai pyiisii tat tutakle.

²⁶Arhiibang tei pokpat tosii rhiibui khiihaotu sek-kii, teito rhiimah teido ngoutakle.

²⁷Sateichii teipouki kalei- meinii gongsii mpou dakii tamle, ‘Madhiikapyiipii, nangnii golu kikii lwirou kabi ralikaibam makde?’ Teitiileponii rhiimah ai kada kito gong wopo?

²⁸Teito mpounii ahnyii dakii tamle, ‘ngoukaroumei hangni- nanii ai ai tiibam takle.’ Kikalei mei teinii mpou dakii tamle, ‘teitiileponii nyiinii maasii teitei paitoi wolopo?’

²⁹Nlenii mpounii tamle, ‘Paitoi sulo, suleponii, gonyiinii rhiimah paitoi leibangpii tei gotei kaswisii arhiigodo paitoi aitangle.’

³⁰Rachet kasuta katang tei rhiimah ninado rhii hangna gotei kaswisii lung matulo, sateichii karachet tinglang ki Inii lu karachet mei dakii, ‘Rhiimah tei reipii poi ndwi wosii mi kikii rutoi tang karam jangpii akhei khai tiisii pai ailo, nlenii rhii teinii gubou kikii poi ndwi ailosii tam tangle.’ ”

³¹Mpounii ndasam kaki hang- ninii ahnyii dakii tamle, “Sating gam sazyii teinii, mei hangninanii njang gaiti lwirou hangninii poisii mpou-lu kikii ralikai kabam takumle.

³²Lwirou hang mangto teiteinii kacheng chengsangle, nlenii teiteinii pokpat tosii diwosek-kii, gainhii bang hang kak kito teiteinii kadi disangle, teiteinii ruibang hangninii mi wotakle; teipiinii sating gam ruinah hangnii jung gongsii ahmah ruibang kha hang kikii matiit chyiile.”

³³Mpounii ahnyii dakii ndasam kaki hangninii tamle, “Sating gam sazyii teinii sapwimei hangninanii thokui ajhii hangtum kikii pungtu kasuta, poisii kai kalei ahee aitakumle.”

³⁴Jisunii aihang ai ndasam tiisii meimoi dakii tamle, sateichii ndasam haisupii mpounii samah kado tam makle;

³⁵Ai ai Lungkakalingmei nii tam kabam tei gong matwi matutang karam jangpiile, katunii, “Inii gu mwi n-gapatsii ndasampii tam tangle, sazyii pouryii tii-mpat kalu sekto kabai kabam hangtei Inii tam mpat tangle.”

³⁶Jisunii meimoi dateito tatpat tosii ki lung tat kaliit kak, mpou boumeinii mpouda gongsii mpougo tamle, “Lu kiteito kalei rhiimah mah ndasam kaangtei kadapeipo katu nyii dakii adoi doi tiisii tam pyiilo.”

³⁷Teito mpounii ahnyiigo kheka- latle, “Lwirou kabi rali kalei, ahtei Meinah sapfii mpou teile.

³⁸Lubam teinii sazyii pouryiile, Lwirou kabi tei sagong sazyii mah nah sapfiimei hang teile; rhiimah teinii kashyii mah nah sapfiimei hangteile;

³⁹ahnyiigo ralikai kapyii ngou karoumei teinii sara kashyii teile, karachet tinglang teinii, sazyii pouryii mah kalui teile, sateichii lu karachet mei teinii sating gamlui hang teile.

⁴⁰Rhiimah tei poi ndwisii mi kikii toi kakai takumpii, sazyii pouryii kaluiki tei takum tangle.

⁴¹Meinah sapfii mpou teinii mpou mah Sating gamlui lang m- mangsii meigo kem kikii chyiikakai mei sateichii kashyii kahong tha katiimei hang go mpoumah sagong sazyii kito poi ndwi wosii ahnyiigo mibam kikii toikai tangle.

⁴²Teibam kito ahnyiinii ghii kagetsii hat tangle.

⁴³Tei tinglangki kasang kamajyiimei hang teinii ahnyii Pfii mah sagong sazyii kito leimik sei takumpiinii vatangle. Khoi pung kalei mei hangnii shii matulo.

⁴⁴“Sating gam sazyii teinii Lu hangninii kikii kabai kabam mai kateeng pot mei hangninanii ngou kalu takumle, mpounii teitei kapou- tum aisii, ntasii mpounii nlaigong mpoumah kabam hangtei joi aisii lu tei lyii kalu takumle.

⁴⁵“Nlailoisii Sating gam sazyii teinii li-laa katiimei hangninanii ngou kabi mai kateeng kuitu hang- ninii fiikalei;

⁴⁶sateichii mpounii sajek kaga mai kateeng kuitu hang- ninii ngoukalu tinglang kak, mpounii maasii mpoumah kabam hangtei joisii mai kateeng kuitu tei lyiikalu takumle.

⁴⁷“Nlailoisii Sating gam sazyii teinii dwijai kikii ralang hangninii toikaisii kaa jat katham katham num kalu takumle;

⁴⁸ralang teinii katokryii tinglang kak, ahnyiinii dwijai laku chyii mpat takle sateichii ntombamsii kabi hangtei kabhaang lungkii matam ndwitakle, nlenii kashyii hangteinii rat toi aitakle.

⁴⁹Sazyii pouryii kalui tinglang ki tei takum tangle. Sating gamlui hangnii gongsii kasang kamajyiimei kak kito kashyii kahongmeigo poitaam tangle.

⁵⁰Sateichii ahnyiigo mibam kikii toikai aitangle, tei kito ahnyiinii ghii kagetsii hat tangle.

⁵¹“Aihang ai gonyiinii titakpo?” Ahnyiinii mpou dakii tamle. “Nle.”

⁵²Teito mpounii ahnyii dakii tamle, “Teijangpiinii sating gam sazyii jangpii ralikapyii doukalu ajaitingshang kati ojamei hangteinii mpoumah poi ka-ndwi ki shang kiteito pot kasatai ninado kaham poi mpatsii kalei ki apumpii hangninii takumle.”

⁵³Sateichii ndasam hang ai Jisunii tamsang sek-kii, mpounii teibam kiteito tat tutakle,

⁵⁴Satei- chii mpounii mpou-namki sektei gongsii, ahnyiimah ndwibam hang kiteito aitiisii ahnyiigo ralipyiile, teito ahnyiinii sung gasii tamle, “Sapfii mpou ainii swirek kabi ninado mei tiikalak tha kadihang ai kada kito dou wopo?

⁵⁵Ai-ai ating mah chem mara tiisii kaleipii nah sapfii mpou chiimakde? Mpou-pwitei Meri sii lat makde? Sateichii mpou sanamei tei Jems, Joseph, Simon ninado Judas tei makde?

⁵⁶Sateichii mpou taipwimei hangtei nyiigo kaswisii lung leimakde? Teitiileponii sapfii mpou ainii aihang ai kada kito dou wopo?”

⁵⁷Sateichii ahnyiinii mpougo mazhii sutakle, nlenii Jisunii ahnyii dakii tamle, “Lungka- kalingmei hangniniigo mpou nam ninado mpouki kalung mpungnii polenii bamlyiihang kito sadzyii ngariit tiikasu gale.”

⁵⁸Sateichii ahnyiinii kamalum tei kaga jangpii teikito mpounii mei tiikalak tha kadi hangka tiimakle.