Read Maram Naga METIU 15 Bible Online

METIU 15 - Maram Naga bible

METIU 15

¹Sateichii Farasismei ninado ajaitingshang kati ojamei teinii Jerosalem kito Jisuda gongsii tamle,

²“Kadajangpii go boumeinii nyiipei nyiipaomei mah ajai tiipak aipo? Kadapokii ahnyiinii mah chii kasunii bah baitek makle!”

³Teito mpounii ahnyiigo kheka- latle, “Gonyii mah ajai jangteipii gonyiinii kadajangpii Saraa mah kakhatsam tei tiipak aipo?”

⁴Kada- pokii Saraanii tamle, ‘gopwi go pfiigo sadzyii ngariit tiilo’ sateichii ‘pwi pfiigo tam kamashyii ahtei tai matulo.’

⁵“Nlenii gonyiinii tamle, ‘kata hangninanii pwi mak-ki pfii dakii: gudato gonyiinii kabi doukabui tei Saraa dakii pyiitoi aitakle sii tam leponii, ah teinii mpou pfiigo sadzyii ngariit tiimak kido bile!’

⁶Teipiinii gonyiimah ajai jangteipii gonyiinii Saraa mah samtam kiteikii lung pyii makle.

⁷Gonyii kabijai tiikanyiimei! Isaiyanii gonyiimah kaang kito reipiinii saa ka-mpat tinglang kaktei kadaziikapiinii kasangpo?

⁸‘Mei aimei ainii n-gu mwipiinii sadzyii ngariit tiile, nlenii ahnyiimah lung teinii gudato dhiisii leile;

⁹ahnyiinii n-gu matapii mata kadak leile, kadapodinchii meinahnii likalu ajai teipii gumah ajaitingshang tiisii ahnyiinii ralipyiile!’ ”

¹⁰Sateichii mpounii meimoi gotei mpou dakii lat magongsii ahnyii dakii tamle, “Koikinglo sateichii ti wolo!

¹¹Mwi lung liit kalei teinii meinahgo tiimahong makle, nlenii mwikito kapat teinii meinahgo tiimahongle.”

¹²Teito boumei teinii tatpatsii mpou dakii tamle, “Farasismeinii go samtei shii wosii ahnyii lung deng takle katu nang timakpo?”

¹³Mpounii khekalatle, “Sating gamto kalei gu pfiinii ling kasu ruibang hang gotei maa pai mpat tangle.”

¹⁴Ahnyii jangpii lungnaang sulo! Ahnyiinii mik kachet doi majang katatmeile, sateichii mik kachet meinii mik kachet meigo majangtat leponii, hangna-napui sarungki takliit tangle.

¹⁵Teito Pitarnii mpou dakii tamle, “Ndasam tei adoidoi tiisii nyiidakii ralipyiilo.”

¹⁶Sateichii mpounii tamle, “Aitoi katang gonyiido timakde?

¹⁷Mwi kito kaliit hangtei moilung liitsii tat tule katu gonyii timakde?

¹⁸Nlenii mwi kito kapat hangtei lung kito patle sateichii ahnyii teinii meinah go tiimahongle.

¹⁹Kadapokii lungchui kashyii, meigo kagi, meinou meinah- go kashyii katii, kashyii kahong tha katii, kachui, kasang kasu sakchyii katii, meisam tam kamashyii ai lung kito patle.

²⁰Meinahgo tiikamahong hangtei aile, nlenii baitek kasu bah teipiinii kachii teinii meinah go tiimahong makle.”

²¹Sateichii teibam kiteito Jisunii tat pat tosii Tair ninado Sidon sazyii lam pang tat tutakle.

²²Sateichii julo teiki sazyii baang teito Kainan mei pwi hangninii patsii saa takle, “Devit nah sapfii mpou, Oh Bangpii!” “N-gu lungsyii pyiilo; gunah sapwi mpeigo sara kashyiinii jum wosii hangkapii tiikamagesii bam takle.”

²³Nlenii Jisunii mpoupei dakii khekalatpyii makle, sateichii mpou boumeinii patsii “Mpoupei go langtoi ailo! Mpoupeinii nyiitaito saasii saasii bamle sii mpou dato khangsii tam takle!”

²⁴Mpounii khekalatle, “Isrel mah mpung kito maga kalei Jaonah hang dakii roinii n-gu lang magongle.”

²⁵Nlenii mpoupeinii patsii mpou doito kok-kumsii tamle, “Bangpii n-gu tiihalo.”

²⁶Jisunii khekalatle, “Nahmei mah tiirok tei poisii achyiigo toi mpat kapyii ai matou makle.”

²⁷Mpoupeinii tamle, “Kasangle Bangpii, nlenii achyii hangteiniido ahnyii mah apum mei mah tak kachii bam kito tak ka-nrai taksak tei chiile.”

²⁸Teito Jisunii mpoupeigo khe- kalatle, “O kamalum kadi sapwi mpei, nangnii kakhang tei godato pat matulo,” sateichii mpoupei nah sapwi mpei tei teisek-kii tii mbipyii takle.

²⁹Sateichii Jisunii teibam kiteito tat pat tosii Galili dwijai liikuto tat tutakle sateichii mpounii zang gam tuwosii teikito bam wotakle.

³⁰Sateichii meimoi hangka mpouda gong takle, ahnyiigo kaswisii pi katwimei, mik kachet mei, pi-bah luilung kamamei, lat kagamei, sateichii kaki kaki hangka mpou pibang poigong takle; sateichii mpounii ahnyiigo tii mbipyii takle.

³¹Teipiinii lat kaga meinii lat pat kalu, pi katwimeinii tat kalu, mik kachet meinii ngou kalu ai ngou wosii meihangnii sung gasii Isrelmei mah Saraa go tam matoile.

³²Teito Jisunii mpou dakii lat magongsii tamle, “Inii meimoi aigo lungsyii takle, dapodinchii ahnyiinii n-gu kaswisii leimik hangtum bam takle sateichii ahnyii mah chiitang karam samah kado gatakle, sateichii ahnyii pwidilamto set tutang maniisii Inii ahnyiigo moimazyiisii langtoi roule.”

³³Sateichii boumei teinii mpou dakii tamle, “Mei aitiijyii-jyii kamoi mah kamaghii pyiitang karam tiirok ai sazyii kamarong aiki aito nyiinii kada kito dou wotangpo?”

³⁴Jisunii ahnyii dakii tamle, “Gonyii mah tiirok pang kadazii leipo?” Ahnyiinii tamle, “Tiirok pang sana sateichii kaa pak kacheng chengniikii leile.”

³⁵Sateichii mpounii mei moi gotei sazyii bamlo katupii mwija pyiitakpokii,

³⁶tiirok pang sana ninado kaa chengniikii tei poisii Saraago hakalang pyii aitaklepokii, tiirak wosii boumei dateikii pyiitakle sateichii boumei teinii meihang dakii pyiitakle.

³⁷Sateichii ahnyiihang chii maghii wotakle sateichii chii kamasak tei razyii sana katokryii poi ndwi wotakle.

³⁸Sapwimei ninado nahmeigo fiihaisupii chii kalumei tei Sapfiimei thang madaile.

³⁹Sateichii Jisunii meimoi gotei langtoi aisii mpounii malyii lung liit tosii Magadan sazyiiki tat tutakle.