Read Maram Naga METIU 18 Bible Online

METIU 18 - Maram Naga bible

METIU 18

¹Teitinglang ki boumei teinii Jisuda gongsii n-nhiile, “Sating gam sazyii kito tapiinii kadi disangpiipo?”

²Teito mpounii nahmei kacheng hangniniigo lat tosii, ahgo ahnyii sumkii masatsanii tamle,

³Inii gonyii dakii kasangpii tam leile, “Gonyiinii tiikalisii nahmei ka- chengmei takum kasutanii, gonyiinii sating gam sazyii kitei liitsang liit lakle.

⁴Nahmei kacheng aitakum- piinii mpouroinapii mpougo poi sagoi supii poisanasii kalei mei teinii sating gam sazyii kito kadi disang- piile.

⁵Sateichii ai kakum nahmei kacheng hangniniigo guzei kito lukaipyiisii kalei meitei n-gu lukaiziile.

⁶“Nlenii n-gu malum kalei nahmei kachengmei aihang kak kito hangniniigo mei kata kangkanii tiikou aileponii, mpou kagung kikii kakaryii kuitu kuikaisii dwijai katuk ki takliitsii dwikito ngalum kalei teiniipou mpoujangpii bibwi tangle.

⁷Kem tiimatu tang karam kahem jangpiinii sazyii pouryii kadaziikapii kamage tangpo! Kadapokii kahem teinii gongling tangle, nlenii kahem tiikakaimei tei kadaziikapii kamage tangpo!

⁸“Sateichii gopi mak-kii go-bahnii n-go kem tiimatusii leileponii, teitei tat ndangsii godato rat toi ailo; gobah hangna mak-kii gopi hangna pungsii kalui kaga mibam kikii toikai kalei sungnii, gobah hangninii mak-kii gopi hangninii gasii karing bamki kaliit teinii gojangpii bibwile.

⁹Sateichii go miknii n-go kem tii- matusii leileponii, teitei lat mpatsii godato rat toi ailo, gomik hangna pungsii mibam kikii toikai kalei sungnii mik lamkii chetsii karing bamki kaliit teinii gojangpii bibwile.

¹⁰“Gonyiinii ai kacheng hang kak kito hangninii godo maning kamala tiikasu tiisii tiigat tolo; kadapokii Inii gonyii dakii tam leile, Sating gamto ahnyii mah sating gamlui hangnii sating gamto kalei gu pfii jutei taksupii ngou leile.

¹¹Kadapokii meinah sapfii mpou teinii maga kalei gotei keipyii tang karam jangpii gongtakle.

¹²“Gonyii kada takumpii ma- ningpo? Mei hangninanii Jaonah hai kalei teikak kito Jaonah hangninii maga aileponii, mpounii reksok- chyiisii sokchyii nkhii gotei zang gamkii kaibamsanii maga kalei gotei maa fiilakpo?

¹³Sateichii mpounii teitei dou woleponii, Inii gonyii dakii kasangpii tam leile, mpounii gatu kasu reksokchyiisii sokchyiinkhii gotei sung ai hangninii jangpii kisii ntabuile.

¹⁴Teijangpii ai kacheng hang kak kito hangninii kagodo maga matutang karam ai sating gamto kalei gu pfiinii kamaning kamarei teimakle.

¹⁵“Gosanapiinii go phyiiryiito tiima aileponii mpouda maasanii mpoumah tiikama tei mangoulo, nlenii gonei hangna roina kalei kak kito makumpii tiilo, nangnii katam tei mpounii shiileponii, nangnii gosa- napii gotei douloi wotakle.

¹⁶Nlenii nangnii katam tei mpounii shiisu leponii, sakchyii hangna hangtum mah mwi kito samkang hangtei sat matutang karam jangpii, mei hangninii mak-kii mei hangna n-go kaswisii hai wolo.

¹⁷Sateichii ahnyiinii katam tei mpounii shiisei suleponii, Charsh dakii tamlo; sateichii mpounii charsh samteido shiiseisu leponii, nangnii mpougo Lui kakimei ninado aha kahamei hangninii takumpii poi wolo.

¹⁸“Inii gonyii dakii kasangpii tam leile, sazyii pouryiito gonyiinii ma- zhii kasu tei sating gamtodo mazhii lakle, sateichii sazyii pouryiito kamazhii tei sating gamtodo mazhii tangle.

¹⁹“Nlailoisii Inii gonyii dakii tam leile: Sazyii pouryiito gonyii kak kito mei hangnanii mah kata hangninii khang tang karam teimah kaang kito lungswi nja woleponii, sating gamto kalei gu pfiinii ahnyiigo teitei tiipyii tangle.

²⁰Kadapokii gu zei kito hangna mak-kii hangtumnii ndwi kalei kitei Inii ahnyiigo kaswisii leile.”

²¹Teito Pitar-nii tatpi mpougo n-nhiile, “Bangpii, gusanapiinii gu- phyiiryiikii tiimasii leihum leponii, kadaziika katang tei Inii ahgo kama kaleipyii tangpo? Kaleipyii sanakii katangpo?”

²²Jisunii mpou dakii tamle, “Ka- leipyii sanakii katangsii Inii godakii tam makle,” nlenii reksana-sana

²³Teijangpii sating gam sazyii tei mpouki kalei meigo kaswisii ajhii kamasak katu mareisii kalei sagong hangninii go poi ka-nda leile.

²⁴Sateichii mpounii fiihaotu sek-kii talent thang kearii pung ka- lei mei hangninii mpouda pang gong takle,

²⁵sateichii mpounii ruipei kalak jangpii mpoumah Abangpiinii mpougo mpou-nou, mpou nahmei hang go sateichii mpoumah kabam hangtei sana tei ruitang karam jang- pii joitoi ailosii mwija pyii aitakle.

²⁶Teipiinii ki kaleipii teinii sagong doitei koumang kok kumsii mpounii khang takle, ‘n-gu shang- niikii koi seilo sateichii Inii n-go mahlyii hang ruikai pyii tangle.’

²⁷Teito ki kalei- piimah bangpii teinii mpougo lung- syiisii mpatpyii takle sateichii sanah pungkalei teido magapyii takle.

²⁸Nlenii kikaleipii teinii tat kapat tinglang kak, mpoumah dinar haikii pungkalei mpougo njoisii kikaleimei hangniniigo kadou takle, sateichii mpounii jumsii mpougo karokto tuinei wosii tam takle, ‘nangnii pow pungkalei tei rui ailo.’

²⁹Teipiinii mpougo njoisii kikaleipii teinii koumangsii mpou dato khang takle, ‘n-gu tinglang shangniikii koiseilo’ sateichii ‘Inii godakii pow tei ruikai pyii tangle.’

³⁰Teito mpounii mazhii- sei sutakle, nlenii mpounii pow tei rui kasutatei mpougo kabang kikii kai aitakle.

³¹Mpougo njoisii kikalei mei hang teinii pat kalei tei ngou wosii hangkapii lung kamagesii, pat kalei hangtei ahnyii mah Bangpii dakii gong tam takle.

³²Teito mpou mah Bangpii teinii mpougo lat magongsii mpou dakii tamle, “Nang kikalei kaikashyiipii! Nangnii gudato kakhang taiswisii Inii gomah pow hangtei magapyii takle;

³³Inii n-go lungsyii kapyii takumpii nangdo n-go njoisii kikalei ahgo lungsyiipyii kajyii makde?

³⁴Sateichii mpoumah Abangpii teinii rarhiisii mpounii pungkalei hangtei rui matei kasuta tiikamage matutang karam jangpii mpougo kabang kikii pyiitoi ai takle.

³⁵“Gonyiinii gonyii sanapiigo gonyii lung kito kaleipyii suleponii, sating gamto kalei gu pfiiniido gonyii dakii tei tiitangle.”