Read Maram Naga METIU 23 Bible Online

METIU 23 - Maram Naga bible

METIU 23

¹Teitinglangki Jisunii meimoida ninado mpou boumei hang- dakii tamle,

²“Ajaitingshang kati ojamei ninado Farasismei hangnii Moses mah bam kitei bamle;

³tei- jangpii ahnyiinii kata kara katam hangtei gonyiinii tiilo ninado ryiilo, nlenii ahnyii mah tha taiswisii tiisulo, kadapokii ahnyiinii tamle, sateichii tiimakle.

⁴Nle, ahnyiinii poisii meiki kachyii gamkii toikaipyiile, nlenii ahnyiinii ahnyii bah jungna piinado tii nlai-hanyii makle.

⁵Ahnyiinii ahnyiimah tha katii hangtei meinii ngou matutang karam jangpii tiile, ahnyiimah saiphang ninado baitiikang gamkii kabi rasam mah gek ryiibamsii kaipoi kalei tiigyiireng tei julo, sateichii ahnyii hangtei kadaziikapii dipo! Sateichii pei kari tiimathangle,

⁶Sateichii ahnyiinii takbai hang kito ninado ndwibam hang kito sadzyii ngariit katiibam tei mareile,

⁷Sa- teichii salikijangto meinii salam kapyii ninado meinii ‘Rabbi’ sii kalat tei mareile.

⁸Nlenii Rabbi lat lak tang karamle, kadapokii gonyii mah madhiikapyiipiinii hangninii roiniile, sateichii gonyiihangnii sanameile.

⁹Sateichii sazyii pouryii aito meigo kado Pfii lat sulo; kadapokii gonyii pfiinii sating gamto kalei Ah tei roinale.

¹⁰Gonyii gonii Pumpii lat matu sulo, kadapokii gonyii mah Pumpii teinii Krista tei roinale.

¹¹Gonyii kak kito kadi disangpii teinii gonyii mah kikalei tiitangle.

¹²Sateichii mpouroinapii mpougo tiimadi kalei mei gotei tiisanapyii tangle, sateichii mpouroinapii mpougo tiisana kalei meigotei tiimadi pyii tangle.

¹³“Nlenii Kabijai katii, ajaiting- shang kati ojamei ninado Farasismei gonyii, kadaziikapii kamage tangpo! Dapodinchii sating gam sazyii mah kikam tei mei liit kalak tiisii gonyiinii takam takle; kadapokii gonyii roinapii gonyiido liit-to makle, sateichii liit lesii tiikalei ahnyii goteido maliit sutakle.

¹⁴(Kabijai katiimei, ajaitingshang kati ojamei ninado Farasismei gonyii kadazii- kapii kamage tangpo! Kadapokii gonyiinii katiijai tiitang karam jangpii gonyiinii thaangsang riitasii, kamipwimei ki ramle; teijangpii malesii kisii tam kamashyii tei gonyiinii doutangle.)

¹⁵“Kabijai katiimei, Ajai ting- shang kati ojamei ninado Farasismei gonyii, kadaziikapii kamage tangpo! Kadapokii gonyiinii dwijai ninado sazyii katang hangki tatsii tatsanii meihangninii go gonyii kak ki hai matutang karam jangpii hemle, sateichii gonyiinii ah go ngam wosek-kii gonyiinii ahgo gonyii takumpii mibam ki liit kamajyiimei tiipyiile.

¹⁶“Mik kachet doimajang katat- mei gonyii, kadaziikapiinii kamage tangpo! Gonyiinii tamle, ‘mei kata hangninanii Saraa kamaningki zei latsii riishii tiileponii, teinii makado makle, nlenii mei kata hangninanii Saraa kamaningki lungto kalei sona zei latsii rashii tiileponii, mpougo mpou mah rashii teinii jum bamle.’

¹⁷Swikaga ninado mik kachetmei! Sona mak-kii sana raguibago tiika- matei Saraa kamaning ki ai kadapii teinii dibuipo?

¹⁸‘Sateichii mei kata hangninanii pyii katoibam zei latsii riishii katii teinii mah kado makle, nlenii tei-phyiiryiikii pyiitoi kalei pot zei latsii rashii katii teinii mpou mah rashii teinii mpougo jum bamle.’

¹⁹Mik kachetmei gonyii! Pyiitoi kalei pot teinii pyiitoi kalei potgo tiimatei kalei pyii-katoibam tei kadapii teinii dibuipo?

²⁰Teijangpii pyii katoibam zei latsii riishii tiikalei ah teinii tei gotei ninado tei phyiiryiito kalei pot hang gotei latsii rashii tii aitakle.

²¹Sateichii Saraa kamaningki zei latsii riishii tiikalei ah teinii tei gotei ninado tei lungto kalei mpougo latsii rashii tii aitakle.

²²Sateichii Sara zei latsii rasat kalei ah teinii Saraa sagong bam ninado tei phyiiryiito bam kalei mpougo latsii riishii tii aitakle.

²³“Ajaitingshang kati ojamei ninado Farasismei, gonyii kabijai katiimei! Gonyii jangpiinii kadazii- kapii kamage tang takpo! Kadapokii gonyiinii kabihiilii, siilou-lousang ninado nchyiikom mah njai kearii kito njaikii Saraago pyiitakpokii, ajaitingshang mah kasangpii masui kaki hang katunii, kasang lungsyii lungset kati ninado kamalum ai gonyiinii rat toi aitakle, kaki hangtei toi supiinii, aihang ai gonyiinii tiitang karamle.

²⁴Mik kachet chyii katatmei gonyii, gonyii mah kasak dwi kito tom-maina hangniniigo ka- tangdo gonyiinii peira kaisii matwum mpatle, nlenii poutungki kounah go majongle!

²⁵“Ajaitingshang kati ojamei ninado Farasismei hang gonyii jangpiinii kadaziikapii kamage tang takpo! kadapokii gonyiinii peek-kok poulam tei tiimateile, nlenii lung- tonii meigo satui sadzyii katii ninado mpouroinapii mpou-pumgo jum majyiipei kalak teipiinii tokryiile.

²⁶Mik kachet Farasismei gonyii! peek kok mah poulam teido matei kabui jangpii, karei reisang kito lung lamtei tiimatei ailo.

²⁷“Ajaitingshang kati ojamei ninado Farasismei hang! Gonyii jangpiinii kadaziikapii kamage tang takpo! Kadapokii gonyiinii pou- sabaju ngou kabi nlenii lungnii kataimei mah aroupii sateichii matei kasu hangteipii tokryii kalei kaha taikabam roubam takumle.

²⁸Teita- kumpiinii gonyiido poutonii meihang dakii kasang kamajyii tiitsii mangoule, nlenii lungto kabijai katii ninado kem teipiinii tokryiisii leile.

²⁹“Ajaitingshang kati ojamei sateichii Farasismei gonyii jangpiinii kadaziikapii kamage tang takpo! Kadapokii gonyiinii lungkakalingmei mah roubam tiile, sateichii kasang kamajyiimei mah roubam kikii kakai kuitu teido riikile sateichii tamle,

³⁰‘nyiinii nyii-pei nyii-paomei ting- lang kak kitei ringlei leponii Lungkakalingmeigo zai tii ka-mpat kitei nyiinii ahnyiigo kaswisii njai poihai lak takle.’

³¹Teitiisii gonyiinii Lungkakalingmeigo gitat kaleimei mah taa-nahmeile katu tei gonyii roinapii gonyiinii sakchyii pyii leile.

³²Teileponii gonyiipei gonyii pao- meinii tiibang kabam tei tiimashang ailo!

³³Gonyii Sanhii ninado sanhii taa-nahmei hang! Gonyiinii kada takumpii mibam kiteito nlek wotangpo?

³⁴Teijangpii Inii gonyii dakii tam leile, Inii gonyii dakii Lungkakalingmei, kati kangoumei ninado ajaitingshang kati ojameigo lang magong tangle, ahnyii mei kangkago gonyiinii gitangle, sateichii Krosh gamkii dhangsii gitangle sateichii kangkagonii gonyii mah ndwibam hang kito kache chesii pyiitangle, sateichii namdi hangninii kito hangninii kikii baakai tangle.

³⁵Katunii gonyiinii kamatei bam ninado pyiikatoibam kak kito gitat kalei kama kaga Abel mah zai sekto Barakiya mah sapfii mpou Zakaria mah zai katang, sazyii pouryiikii joumang kalei kasang kamajyiimei zai hangtei gonyii phyiiryii gong matutang karam jangpiile.

³⁶Inii gonyii dakii kasangpii tam leile, Ai hang ai ha aiha phyiiryii gong tangle.

³⁷“Lungkakalingmeigo kagi satei- chii godakii lang kamagongmei hang go kuitupii karot, he Jerosalem, Jerosalem! ruipwinii mpou nahmeigo mpoupei mah kashii kangkii gom kalei takumpii Inii gonahmeigo kadaziikapii gompyii nyiisii leipo? Nlenii gonyiinanii mazhiinyii makle.

³⁸Teipiinii julo, gonyii mah saraa kamaning ki tei toi aitangle ninado marong tang takle.

³⁹Kadapokii Inii gonyii dakii tam leile, ‘Bangpii zei kito gong kalei mpou ai doibile, sii tam kasuta aitoisekpii gonyiinii n-gu ngousang ngouloi lakle.’ ”