Read Maram Naga METIU 24 Bible Online

METIU 24 - Maram Naga bible

METIU 24

¹Jisunii Saraa kamaning kilung teito tat patsii tat kalei kak, mpou boumeinii Saraa kama- ning kimah tiikalei hangtei mpou dakii row mangou tang karam jangpii gongtakle.

²Nlenii mpounii ahnyiigo khekalatle, “Gonyiinii aihang ai ngoumakpo? Inii gonyii dakii kasangpii tam leile, aikito kalei kuitu hangninii kagodo ah mah bam kiteikii masaklakle, matum madum gotei toi m-mang tangle.”

³Jisunii Olip zang gamto bam kalei kak, Boumei teinii makumpii gong n-nhiile, “Aihang ai kadadou pat tangpo, sateichii gomah kagong ninado sazyii pouryii kalui mah tiikamangou siiti tei kadapei tangpo?” nyiidakii tam pyiilo.

⁴Jisunii ahnyiigo khekalatle, mei kaniido gonyiigo chyiitatma matu kasu tiisii sakai wolo.

⁵Kadapokii mei hangkanii gu zei kito ‘I kristale sii!’ gong tangle, sateichii ahnyiinii meihangkago masii chyiitat tu- tangle.

⁶Gonyiinii saryii koi sateichii saryii mah sampao shiigong tangle; nlenii gonyii lung kamage sulo, kada- pokii aihang ai pat tang karamle, nlenii kalui tei makle.

⁷Kadapokii Lui hangninanii Lui hangninii phyiiryiikii, sateichii sagong sazyii hangninanii sagong sazyii hangninii phyiiryiikii saryii tiipat tangle; sateichii bam katham katham kito tak kateeng sateichii malyii kachyii tei pat tangle;

⁸nlenii aihang ai kamage kalak mah bang saroi teile.

⁹“Teito ahnyiinii gonyiigo tiika- mage tang karam jangpii pyiitangle sateichii gonyiigo gitangle ninado Lui hangnii gu zei jangpii gonyiigo ngourou tangle.

¹⁰Tei tinglangki mei hangkanii ahnyii mah kamalum tei toi aitangle, sateichii hangninanii hangniniigo schoi choikai tangle sateichii hangninanii hangniniigo kangourou tangle.

¹¹Sateichii ka- sang kasu Lungkakalingmei patsii mei hangka go chyiitatma tangle.

¹²Sateichii kashyii kahong tei moibuibui katu jangpiinii mei hangka mah kalungsyii kalungset katu tei nkhiitu tangle.

¹³Nlenii kalui katang leh kalu meigotei keipyii tangle.

¹⁴Sateichii sagong sazyii mah rasam ai Lui hang dakii sakchyii tiisii sazyii pouryii bamlyii hang kikii tam ralipyii tangle; teito kalui tei gongtangle.

¹⁵“Lungkakalingpii Danielnii ka- tam, ‘Ngoukahing tiisii kamage tang karam,’ gonyiinii ngou tangle, teitei kamatei bam kito satsii lei tangle!” (Kafiimeinii ai ai tiwolo).

¹⁶Tei tinglangki Judiya kito kalei ahnyii teinii zang gamkii pak kai matulo,

¹⁷Ki kapouryii gamto kalei ah teinii ki kalungto kalei mah pot tei poitang karam jangpii humsu matulo;

¹⁸sateichii lubam kito kalei ah teinii ah mah pei-kabapei poitang karam jangpii nlaigong sumatulo.

¹⁹Moi mpung kalei sateichii rana pyiisak kalei sapwimei jangpiinii teiting- langki kadaziikapii kamage tang takpo?

²⁰Sateichii gonyii mah kapak tei sataidou mak-kii bam ntak piinei leimik ki doumatu kasu tiisii Saraago riitalo.

²¹Kadapokii teitinglangki sazyii pouryii saroi sekto aitoi katangdo patsang pat kasu sateichii madou kado patsang patloi lak tang karam hangkapii kadi kamage katu tei tangle.

²²Sateichii tei tinglang leimik tei tiimadui suleponii, meigo kado keipyii wolakle, nlenii kalai kalumei jangpii tinglang leimik tei tiimadui tangle.

²³“Teitinglangki julo, ‘Aiki mak- kii luki Krista leile!’ sii mei kata hangninanii gonyii dakii tamleponii malum sulo.

²⁴Kadapokii kasang kasu Krista ninado kasang kasu Lungkakalingmei gong tangle; satei- chii mazhii leponii Saraanii kalai kalumeigo katangdo hemsii kama pwidi kikii chyiitat tang karam jangpii mei tiikalak tiikamangou siiti kadi hang sateichii sung kaga hang tiimangou tangle.

²⁵Julo Inii gonyii dakii pat kasunakii reipii tam takle.

²⁶“Teipiinii ahnyiinii gonyii dakii ‘Julo, mpounii sazyii kamarongki leilesii tam leponii tat pat sulo,’ sateichii ahnyiinii gonyii dakii, ‘Julo, mpounii ki alungpii shang kito leile,’ sii tamchiido, teitei malum sulo.

²⁷Kadapokii leimik kapat lamto sating kapeek sek-kii leimik kaliit- lam katang vakatu takumpii meinah sapfii mpou tei gong tangle.

²⁸“Katai pum kalei nitei kalhang kamyii kachiipii ruinah tei ndwi tangle.

²⁹“Kamage kalak mah leimik tinglang hangteitai sek leimik myiitu tangle, sakhii teinii ah mah kava tei pyiilakle sageiti hangtei sating gamto takmang tangle, sateichii sating gam mah pumtei hangtei kanuk nlai tangle.

³⁰Teito meinah sapfii mpou mah tiikamangou siiti hangtei sating gamto pat tangle sateichii teimaham nei kadi pumtei kava tei kaswisii meinah sapfii mpou teinii sating gam mah mongjyii phyiiryiito kagong tei ahnyiinii ngoutangle;

³¹Sateichii mpounii mpou mah sating gamlui hang go kachem kong kalei roktei kaswisii lang mpat tangle sateichii ahnyiinii mpoumah kalei kalumei hang go sating nlai hangninii kito nlai hangninii katang saka madaito poi ndwi tangle.

³²“Gonyiinii kadhiitbang kito nda hangninii rali wolo, ah mah boi karanu boisii nhii madek tusek-kii, salum tinglang natakle katu gonyii- nii tile,

³³tei takumpii gonyiinii ai hang ai kangou tinglang kak, mpou ai kamwi kisek nagong takle katu gonyiinii titangle.

³⁴Inii gonyii dakii kasangpii tam leile, ai hang ai pat kasuta aiha ai gatu lakle.

³⁵sating ninado sazyiinii gatu tangle, nlenii gu sam-nii gasang galakle.”

³⁶“Nlenii teimah leimik ninado tinglang teinii Pfii teisupiinii, sating gamluinado, meinah sapfii mpou teiniido meikaniido timakle.

³⁷Ka- dapokii Noha haiki pat kalei takumpiinii, meinah sapfii mpounii kagong tei teitakumpii gong tangle.

³⁸Kadapokii dwidigong kasu leimik doitei, Nohanii malyii lung liit kasu leimik katang tei, ahnyiinii chiisii saksii, sapwimei sapfiimei kanoulot- sii leile.

³⁹Sateichii dwidigongsii ahnyii hang go dwinii taipungtu kasuta katang tei ahnyiinii timakle, meinah sapfii mpounii kagong tei teitakum tangle.

⁴⁰Teito lubam kito mei hangna leitangle, hangniniigo poitat tutangle sateichii hangniniigo kaidek aitangle.

⁴¹Sapwimei hangna tchii-tousii lei tangle, hangniniigo poitat tutangle, sateichii hangniniigo kaidek aitangle.

⁴²“Teijangpiinii sakailo, kadapokii gonyii Bangpiinii kadapiinei gong tangpo katu gonyiinii timakle.

⁴³Nlenii ai ai tiwolo, katunii kara- gamei teinii kadadou gong tangpo katu tei ki bangpiinii tileponii, mpounii mik raksii koisii mpouki tei ram malu wolakle.

⁴⁴Teijangpii gonyiido tiikada tang karamle, kada- pokii gonyiinii maning kasu tinglang ki meinah sapfii mpou tei gong tangle.

⁴⁵“Teitiileponii malum kabui ninado kasakai kikaleimei ai tapo? Mpou ai tinglang tinglangki ahnyiigo kachii kasak pyii matutang karam jangpii mpoumah apumpiinii ki kalung mah julosii tung kaikabampii teile.

⁴⁶Mpou mah apumpiinii kagong kak mpou pumpiinii katam tei tiisii kalei doukalu kikaleipii tei sadoi bile.

⁴⁷Inii gonyii dakii kasangpii tam leile, mpounii mpoumah kabam mahlyiihang pyiiryiito mpougo kaju kashang kaipyii tangle.

⁴⁸Nlenii tei kikaleipii teinii ‘Gu pumpii risii gong tang takle,’ sii mpouroinapii mpougo tamsii,

⁴⁹mpougo njoi katu kikaleimei kakimeigo datsii, jousak kapiinhii meigo kaswisii chiisii sak tuleponii,

⁵⁰kikaleipii teinii maning kasu piinei leimik ninado mpounii tikasu tinglangki apumpii teinii gong tangle;

⁵¹sateichii mpougo lungna tiisii tat ndang aitangle, sateichii kabijai katii mei mah sadoi kashyii njai tei mpougo dou njoi matutangle; teibam kiteito mpounii ghii kagetsii hat tangle.