Read Maram Naga METIU 27 Bible Online

METIU 27 - Maram Naga bible

METIU 27

¹Tingchoi nukii, tingdimei ninado katingmei hangteinii Jisugo gitang karam jangpii sam rashiile;

²sateichii ahnyiinii mpougo reng peisii, pangpatsii Governor Pailat dakii pyii aitakle.

³Schoi-choikakaipii Judasnii Jisugo malesii tam mashyii aitakle, katu tei ngou wosek-kii, mpounii lungkali takle sateichii sanahgyii tamrhii tei tingdimei ninado katingmei dakii poi nlaigongsanii tamle,

⁴“Inii kama kagamei zai gotei schoi-choikakai kito Inii kem tii aitakle.” Ahnyiinii tamle, “Teinii nyii timakle, teinii nangroinapii jumatou wolo.”

⁵Sateichii Saraa kamaning ki niteikii sanahgyii hangtei toikai aisii tat tutakle, sateichii mpounii maasii mpouroinapii siikak-tai takle.

⁶Nlenii tingdimei hangteinii sanahgyii hangtei poisii tamle, ai ai Saraa kamaningki sanah kakai nikii kakai ajai makle, kadapokii ai ai zai mah sanahle.

⁷Sateichii ahnyiinii sam rashii wosii siisangmeigo poigoi tang karam jangpii li-karakimei mah lubam tei sanah teipii lyii wotakle.

⁸Teijangpiinii teimah lubam tei zai mah lubam sii tingnei katangpii lat leile.

⁹Sateichii Isrelmeinah kangkanii mpoumah-mai teimah ret kabam sanahgyii tamrhii tei ahnyiinii poi wotakle.

¹⁰Sateichii Abangpiinii n-gu kakhatsii katam takumpii, ahnyiinii li karakimei mah lubam teijangpii teitei pyii aitakle, sii katam Lungka- kalingpii Jerimaiyanii tam kabam tei kasangpii gong matwi takle.

¹¹Aitoinii Jisunii Governor doi sat-to takle, sateichii Governor teinii mpougo n-nhiile. “Nang Jehudimei mah Sagongde?” Jisunii tamle, “Nangnii tam takle.”

¹²Tingdimei ninado katingmei hangteinii mpougo dzyii nuisii kalet katii tinglang kaktei mpounii samah kado khekalat makle.

¹³Teito Pailatnii mpou dakii tamle, “Ahnyiinii go phyiiryiikii sakchyii kadaziika pyiisii kalei tei nang shii makpo?”

¹⁴Nlenii Jisunii mpougo samkang hangninii kado khela kasu jangpiinii Governor tei hangkapii sung gatakle.

¹⁵Kaakamaju mah hang-ngi ki Governor teinii meihangnii kamarei kabang kilungto bang kabam mei hangniniigo ahnyii jangpii laat mpat kapyii tei mpou-jaile.

¹⁶Sateichii ahnyii mah kabang kilungkii bang kabam “Jisu Barabas” sii zei kalat mei hangninii tei tinglang kak tei leile.

¹⁷Teipiinii ahnyiinii gong ndwi kalu tinglang kak, Pailatnii ahnyii dakii tamle, “Inii gonyii jangpii tapiigo gonyiinii laat mpatsei matu- nyiipo? Barabas gomanii, Krista sii kalat Jisu gopo?”

¹⁸Kadapokii ahnyiinii Barabas go ngou karou jangpiinii pyiitoi takle katu tei mpounii tile.

¹⁹Pailatnii samtak katiibamki bam kalei tinglang kak, mpou-nounii mpou dakii sam tam magongsii tamle, “Kasang kamajyiimei gotei nangnii mah kado tiisulo, kadapokii ndazyii tinghum manglam pangto mpou jangpii I-hangkapii kamage katu kadou takle.”

²⁰Tingdimei ninado katingmei hangteinii Barabas go mpatseilosii khang wosii, Jisugo tiimaga maleilo katupii meihang gotei katwisii tam takle.

²¹Governor teinii ahnyiigo n-nhiiloile, “Ai hangna kak ki aito Inii tapiigo gonyiinii gonyii jangpii laat mpatsei matunyiipo?” Teito ahnyiinii tamle, “Barabas go,”

²²“Teitiileponii Krista sii kalat Jisu aigo Inii kadapei tiitangpo?” Sii Pailatnii ahnyii dakii tamle.

²³Ahnyiihangnii tamle. “Mpougo krosh gamkii dhangsii gi ailo;” Sateichii mpounii tamle, “Ka- dajangpii?” Mpounii kadapei kashyii tiitakpo? “Nlenii mpougo krosh gamkii dhangsii gi ailo sii tamsii ahnyiinii kisii kisii saatu takle.”

²⁴Teipiinii Pailatnii mahkado kabi dousutakle, nlenii meimoi teinii khoi nrung moi kapat tei ngou wosek- kii, mpounii dwi poisii meihang doi- teito bah baitek aisii tamle, “Kasang kamajyii mei aipou zai mah kaang kito gumah kama gale, gonyiinii gonyii roinapii rashii matou wolo!”

²⁵Sateichii meihang teinii kheka- latle, “Mpoumah zai tei nyii phyiiryii sateichii nyii nahmei phyiiryii takliit matulo.”

²⁶Teito mpounii Barabasgo ahnyii jangpiinii laat mpatpyii aitakle, sateichii Jisugo dat datsii kapyii taito krosh gamkii dhangsii gimatu tang karam jangpii pyiitoi aitakle.

²⁷Teito Pailatmah saryiimei teinii Jisugo Governor mah sagongki kalungtei pangliit takle sateichii saryiimei hangtei mpou doito gong ndui wotakle.

²⁸Sateichii ahnyiinii mpou-pei mani tei ratoi pyiisanii, mpou gamkii pei kaghang bakaipyii takle.

²⁹Sateichii ahnyiinii tu-phyii- hung hangninii tiiwosii mpou phyiigamkii choikai pyiisanii, mpou bah ajiilam pangkii koktui hangninii kaipyii takle. Sateichii ahnyiinii mpou doito kok-kumsanii mpougo hoksii nuisii tamle, “Mata leile, he Jehudimei mah Sagong!”

³⁰Sateichii ahnyiinii mpou gamkii poktai maswikai pyiisanii, koktui tei poisii mpou-phyii kikii lak takle.

³¹Satei- chii ahnyiinii mpougo hoksii nuisii, mpougamto pei kaghang tei loktoi pyiisanii mpou mah peimani tei kai- pyiisii Krosh gamkii dhangsii gitang karam jangpii mpougo pangpat takle.

³²Sateichii ahnyiinii aitiisii tat kapat tinglang kak, Saimon sii kalat Sairen mpfii hangniniigo kadou takle, ahnyiinii mpougo pumtei tiisii Jisumah krosh tei pung malu wo- takle.

³³Sateichii ahnyiinii Golgotha sii kalat bam, katunii Phyiibungrou bam kitei gong sek-kii,

³⁴ahnyiinii mpougo kaheng mouka dwi gonei ryii nja katu jou tei saklosii pyiitakle, sateichii mpounii teitei masei kaju kak, mpounii teitei sakmhii takle.

³⁵Sateichii mpougo krosh gamkii dhangsanii kagi kak, ahnyiinii ahnyii kak kito doikabi tei jukama- gasanii mpoumah pei mani tei njai wotakle.

³⁶Sateichii ahnyiinii teikito bamsii mpougo koisii bamle.

³⁷Sateichii mpoumah phyiibung phyiiryiikii mpougo tam kamashyii sam ryiikabam kamati tei ahnyiinii kaipyii takle: “Ai ai Jehudimei mah sagong Jisu teile.”

³⁸Teito Jisugo kaswisii ahnyiinii karagamei hang- nago, hangniniigo abilamkii sateichii hangniniigo ajiilamkii krosh gamkii dhangsii gile.

³⁹Sateichii teiki ku tat kapat tat kaliitmei hangteinii phyii kangumsii, dzyii nuisii tamle,

⁴⁰“Saraa kama- ning ki tiimagasii leimik hangtum lung kikii tiimakhii kabuipii nang, goroinapii n-go kei wolo, nang Saraa nah sapfii mpou lepochiinii, krosh gam teito hum wolo.”

⁴¹Teitakumpii tingdimei hangteinii ajaitingshang kati ojamei ninado katingmei hang go kaswisii, mpougo hoksii nuisii tamle,

⁴²“Kakimei gonii mpounii keipyiile, mpouroinapii mpougonii keipyiipei womakle, mpounii Isrel mei mah sagongle, aitoi mpounii krosh gamto hum matulo, teito nyiinii mpougo malum tangle.

⁴³Mpounii Saraa go malumle, sateichii Saraa nah sapfii mpou lesii tamle, bitakle, teitii leponii Saraanii mpougo aitoi keikapyii nyiinii jude.”

⁴⁴Sateichii mpougo kaswisii krosh gamkii dhangsii kagimei teiniido mpougo teitakumpii dzyiinui takle.

⁴⁵Sateichii pung siiruk sekto pung sokchyii katang tei sazyii pouryii hang kamyii teipii gomnei wotakle.

⁴⁶Sateichii pung sokchyii tinglang doukii Jisunii rok sagoisii saale, “Eli, Eli lama sabachtani?” katunii “Gu Saraa, gu Saraa nang dajangpiinii n-gu toi aitakpo?”

⁴⁷Sateichii dato sat kalei mei kangkanii teitei shii wosii tamle, “mei aipounii Ilaijah go lat leile.”

⁴⁸Sateichii teisek-kii ahnyii kak kito meihangninanii pak pat Sponze hangninii poisii, teitei kaheng dwi kikii sumwosii, koktui hangninii toikikii teitei kaiwosii mpougo sak matutang karam jangpii pyiitakle.

⁴⁹Nlenii kakimei teinii tamle, “Koilo Ilaijahnii mpougo keipyii tang karam jangpii gong gonglakpo nyiinii jude.” Sateichii kakimei hangninanii angii hangninii poisii mpou-kalaat huitakle sateichii dwi nei zai longpat takle.

⁵⁰Sateichii Jisunii nlailoisii rok sagoisii saasanii, mpou chyiingai gatakle.

⁵¹Teito Saraa kamaningki lungkii lam kabam peira tei aphyiito akang katang tei hangna tiisii hetriit ai- takle; sazyiido nlaile, sateichii kuitu kadido pak takle;

⁵²roubam hang teido laat takle sateichii zyiitu kalei kamateimei mah pumrong hang gotei ringkhii malu wotakle,

⁵³sateichii mpoumah ringkakhii-taito ahnyiinii roubam hang kiteito pat tosii kamatei namdiki tei ahnyiinii liitle, mei hangkanii ahnyiigo ngoule.

⁵⁴Sateichii saryiimei mei hai phyiiryii kasatpii nei mpougo kaswisii Jisugo koikalei mei teinii malyii kachyii ninado pat kalei hangtei ngou wosek-kii, hangkapii hingsii tamle, “Kasangpii mpou ai Saraa nah sapfii mpoule!”

⁵⁵Sateichii teiki tei sapwimei hangkado kak dhiihaisii jusii leile, ahnyii teinii mpougo nga ngahasii kalei Galili kito Jisutai swi kagong meile.

⁵⁶Ahnyii kak kitei Meri mekdolen sateichii Jems ninado Joseph pwi Meri sateichii Zebedi-nou haile.

⁵⁷Tingkhii lam liit sek-kii Ari- matiya kito mah kanimei hangninii gongle, sateichii mpoudo Jisu mah boumei hangniniile.

⁵⁸Mpounii Pailatda liitsii Jisumah pumrong tei khangtakle, teito Pailatnii teitei mpougo pyii ailo katupii mwija pyii- takle.

⁵⁹Sateichii Josephnii pumrong tei poisii, kamatei kamajyii kounah mai peipii kajyiisii,

⁶⁰mpounii kuitu kadi kikii biit tosii tiikabam mpoumah roubam kasatai kikii teitei kai aitakle, sateichii teimah roubam mah takam kiteikii kuitu kadi hangninii kok kaisii tat tutakle.

⁶¹Sateichii Meri Mekdolen ninado kaki Meri teinii roubam gotei ju kadousii tei kito bamle.

⁶²Adoi piinei katunii tiikakada piinei leimik taitei tingdimei ninado Farasismei hang teinii Pailat doito gong ndwi wosanii tamle,

⁶³“Oja, kachuipii teinii ringkalei tinglang kak leimik hangtum taito Inii ringkhiiloi tangle sii tam kabam tei nyiinii mangai makle.

⁶⁴Teipiinii leimik hangtum katang roubam ai tiigatpii koi matutang karam jangpii mwija pyiiseilo; suleponii mpoumah boumeinii gongsii mpougo ragasii, mpou ai katai kito ringkhii taklesii, meidakii tamtudo malahle, sateichii chui karei sung chui kana teinii kisii shyiibuitu tangle.”

⁶⁵Pailatnii ahnyii dakii tamle, “Gonyiinii kakoimei poi wolo, tat tulo, gonyiinii tiikabuita teitei tiigatpii koi mbi wolo.”

⁶⁶Teito ahnyiinii tat tutakle sateichii maasanii roubam tei nlai kasu tiisii Seal kai aitakle sateichii kakoimei kaisii tiigatpii koi malu wotakle.