Read Maram Naga METIU 28 Bible Online

METIU 28 - Maram Naga bible

METIU 28

¹Bam ntak piinei leimik-tai, hapta kito leimik karei piinei tingchoi varangkii Meri Mekdolen ninado kaki Meri teinii roubam tei jutang karam jangpii maale.

²Sateichii julo, hangkapiinii malyii chyii takle, kadapokii Bangpii mah sating gamlui hangninii teinii sating gamto humsii kuitu tei koktoi aitakle sateichii tei phyiiryiito bam wotakle.

³Ahmah jailui teinii sating kapeek kalei takumle sateichii ahmah peimani tei sabui takumpii hale.

⁴Sateichii kakoimei teinii ahgo hangkapiinii hingsii nchyiikok koksii kataimei takum takle.

⁵Nlenii sating gamlui teinii sapwi mpei kana dateikii tamle, “Gonei hing sulo; kadapokii krosh gamkii dhangsii gi kalei Jisu gotei goneinii fiileile katu Inii tile.

⁶Mpounii aiki gatakle kadapokii mpounii tam kabam takumpiinii, mpounii ringkhii takle; patlo, mpougo kakaini tei julo.”

⁷Sateichii kalangsii maasii mpou- mah boumei dakii tampyiilo, mpounii katai kito ringkhii takle; sateichii julo, mpounii gonyiidoi reisii Galiliki tat lei takle; gonyiinii mpougo teikito ngoutangle, julo, Inii goneigo tampyii takle.

⁸Teipiinii ah neinii kahing ninado hangkapii ka-nta tei njasii roubam tei kalangsii toi aisii, mpoumah boumei dakii kalangsii tam tang karam jangpii pak tutakle.

⁹Sateichii julo, Jisunii mpou- peinago kadousii tamle, “Kamajung tei goneigo kaswi matulo.” Sateichii mpoupeinanii mpouda tat manang pisii, mpou-pi tei jumsii mpougo mata takle.

¹⁰Teito Jisunii mpoupeina dakii tamle, “Hingsulo, tat tulo, gukang sanameigo Galiliki tat tulosii tampyiilo, teito ahnyiinii n-gu ngoutangle.”

¹¹Sapwi mpei kananii tat lei- bangpii, julo, kakoimei kak kito mei kangkanii namdi kitei liitsii, pat kalei hangtei Tingdimei hang dakii tampyii takle.

¹²Sateichii ahnyiinii katingmeigo kaswisii gong ndwisanii sam rashii wosii, saryiimei dateikii sanah hangka pyiisanii tamle,

¹³“Mpoumah boumeinii tinghumkii gongsii, nyiinii zyiikatu taikii mpougo raga wotakle katupii gonyiinii tamlo.

¹⁴Sateichii ai ai Governornii shiigong woleponii, nyiinii mpougo hemsii, gonyiigo mah kado tiimatu lakle.”

¹⁵Teipiinii ahnyiinii sanah tei poisii, ahnyiigo ralikapyii takum- piinii tiitakle, sateichii rasam ai Jehudimei kak kito tingneishang katangpii tam kahi leile.

¹⁶Boumei keariisiikankhii tei, Jisunii ahnyiigo tam kapyii Galili kito kalei zang gam kitei tat tutakle.

¹⁷Sateichii ahnyiinii mpougo ngou wosek-kii, ahnyiinii mpougo mata takle, nlenii mei kangkanii maning riirhii takle.

¹⁸Jisunii ahnyiida manang gongsii tamle, “Sating ninado sazyii pouryii lungto kalei teimaham hangtei gudakii pyiibam takle.

¹⁹Teijangpii gonyiinii maasii, lui hang go gutai kaswimei tiipyiilo, Apfii, anah ninado rangii kamatei zei kito dwi mpum pyiilo;

²⁰Inii gonyii dakii pyii kabam kakhatsam hangtei switang karam jangpii ahnyiigo ralipyiilo, sateichii julo, sazyii pouryii nlai katang tei Inii gonyiigo taksupii kaswi leile.”