Read Maram Naga METIU 4 Bible Online

METIU 4 - Maram Naga bible

METIU 4

¹Teito sara kashyiinii hemtang karam jangpii Jisugo rangiinii sazyii kamarong kikii pangsii tat tutakle.

²Sateichii leimik rekdai tinghum tingna mpounii malotryii kaleitaito mpou moi majyii takle.

³Teito Seitan teinii mpouda gongsii “Nang Saraa nah Sapfii mpou lepochiinii, kuitu hang ai tiirok ndat tolosii kakhatlo,” sii tamtakle.

⁴Teito mpounii khekalatle, “Aitii- sii ryiibamle, ‘tiirok roinapiinii mei ringlakle, nlenii Saraa mah mwi kito kapat samkang hang teipiinii ringtangle.’ ”

⁵Sateichii seitan teinii mpougo Jerosalem kamatei namdiki pang- pisanii Saraa kamaning ki atoi toisangkii masatsanii,

⁶mpoudakii tamle, “Nang Saraa nah sapfii mpou lepochiinii, goroinapii saimanglo; kadapokii aitiisii ryiibamle, ‘Saraanii mpoumah sating gamluigo gojangpii lang m-mang pyiisii,’ kuitu gamkii gopi deng matulak tang karam jangpii ahnyiinii n-go ahnyii bahpiinii jum matupyii tangle.”

⁷Jisunii mpoudakii tamle, “Aitii- sii ryii bamloile, ‘Nangnii Bangpii go Saraa go ajai julakle.’ ”

⁸Nlailoisii seitan teinii mpougo hangkapiinii kasagoi zang hangni- niiki pangpisii Sazyii pouryii mah sagong sazyii hang ninado ahnyii mah pumtei kava tei mpoudakii mangousii,

⁹seitan teinii mpou dakii tamle, “Nangnii koumangsii n-gu mata lepochiinii, aihang ai Inii n-go pyiitangle.”

¹⁰Teito Jisunii mpou dakii tamle, “Tat tulo, Seitan; daponii aitiisii ryiibamle, ‘Nangnii Bangpii go Saraa gotei mata tang karamle, sateichii nangnii mpougo roinii nga-ngatangle!’ ”

¹¹Teito seitan teinii mpougo toi aitakle, sateichii julo, sating gamlui- hangnii humsii mpougo tiihale.

¹²Jon go jum wotakle katu Jisunii shii wosek-kii, mpounii Galili ki tat tutakle.

¹³Sateichii Nazaret kito ntaksupii Zebulun ninado Naptali mah sating sazyii, dwijai kuto kalei Kaiparnam ki lung tang karam jangpii tat tutakle,

¹⁴katunii Lung- kakalingpii Isaiyanii tam kabam:

¹⁵“Zebulun sazyii ninado Naptali sazyii, dwijai lam pangto kalei Jordan majusii, Jehudimei kasu lui kakimei mah sazyii, Galili!

¹⁶Kamyii kito lungkaleimei teinii kava kadi tei ngoutangle. Katai mah kamyii sazyii kito lungsii kalei ahnyii phyiiryiito vaipyii tangle katu sam ai kasangpii gong matwi matutang karam jangpiile.

¹⁷“Lungkali wolo, Kadaponii sating gam sazyii tei natakle.” Sii tamsii Jisunii tei tinglang sekpii tam ralipyiihou tutakle.

¹⁸Sateichii mpounii Galili dwijai liikuto tat kapi kak, Pitar sii kalat Simon ninado mpoutai-karhiipii Andru, ahnei sana hangna ai dwijai kito ralang rotsii kalei tei ngoutakle, kadapokii mpoupiina tei kaa ka- limeile.

¹⁹Sateichii mpounii ahnyii dakii tamle, “Patlo, gutai swi wolo, Inii gonyiigo mei kanum mei tiimatu tangle.”

²⁰Teisek-kii mpoupiinanii ralang rat toi aisii mpou-tai swiwo takle.

²¹Sateichii bam teiki teito aitiisii tatjou pikii, mpounii kaki asanamei hangna, Zebedi nah sapfii mpou Jems sateichii mpou taikarhiipii Jon, ahnei hangna mpou pfii Zebedigo kaswisii malyii hangninii kito ahnyiimah ralang potsii kalei tei ngoutakle. Teito mpounii ahnyiigo lat takle.

²²Teisek-kii ahnyiinii malyii ninado ahnei pfii go toimaraisii mpou-tai swi wotakle.

²³Sateichii mpounii ahnyii mah ndwibam hang kito ralipyiisii, sateichii sating gam sazyii mah kabi rasam tam ralipyiisii sateichii ahnyii meihang kak kito arahang ninado katchiihang tei tii mbi pyiisii Galili sazyii hangki tatgong takle.

²⁴Sateichii mpoumah zei katat tei Sairiya bamlyii hangki kahitu takle; sateichii ahnyiinii mpouda rakani- mei hang, ra katham kathampii goisii ninado tchiisii kalei, sara kashyiinii jum kalu, tai taipi katu, pumpei katai meihang go pang gong takle, sateichii mpounii ahnyiigo tii mbipyii takle.

²⁵Sateichii Galili, Dekapolis, Jerosalem, Judiya ninado Jordan majusii doito meimoi moisang nii mpou-tai swiwotakle.