Read Maram Naga METIU 6 Bible Online

METIU 6 - Maram Naga bible

METIU 6

¹“Meigo mangoutang karam jangpii gonyii mah kasang kamajyii tha tei tiikasu tiisii sakai wolo, teisuleponii sating gamto kalei gonyii Pfii dato gonyii lhang doulakle.

²“Teipiinii gonyiinii mah kaga- meigo tiikaha tinglang kak, kabijai katiimeinii Ndwibam hangkito sateichii pwidi kadi hang kito meinii tam matoi matu tang karam jangpii katii takumpii gonyiinii meihang kasiiti tiisii tiisulo. Inii kasangpii gonyii dakii tamleile, ahnyiinii ahnyii mah lhang tei doutakle.

³Nlenii gonyiinii mah kagamei go tiikaha tinglang kak, gobah ajiilam teinii kadapei tiiziipo katu tei gobah abilam teinii timatu sulo,

⁴teitiisii gonyiinii mah kagamei go tiikaha tinglang kak tei makumpii pyiilo; teidinchii makumpii ngoukalei go Pfiinii n-go lhang pyiitangle.

⁵“Sateichii gonyiinii kariita tinglang kak kabijai katiimei takum sulo, kadapokii ahnyiinii meinii ngoumatu tang karam jangpii, Saraa kamaning kito sateichii pwidi kadi akaahang kito ahnyiinii kariita tei mareile. Inii gonyii dakii kasangpii tam leile, ahnyiinii ahnyii mah lhang tei doutakle.

⁶Nlenii nangnii kariita tinglang kak kamakum goki kalung tei liitsii, goki takam kakam aisii, mikpii ngoukasu go Pfii dakii riitalo; sateichii makumpii ngoukalei go Pfiinii n-go lhang pyiitangle.

⁷“Sateichii kariita tinglang kak Jehudimei kasu lui kakimei takum- pii kaang kaga samkang hangtei tamsulo; kadapokii ahnyii mah samkang hangkii katam jangpii ahnyiigo shiipyii tanglesii ahnyiinii maningle.

⁸Ahnyii takum sulo, kadapokii gonyiinii khang kasuniito gonyiinii kamarei hangtei go nyii Pfiinii tile.

⁹“Teipiinii gonyiinii aitiisii riitalo: ‘Sating gamto kalei nyii Pfii, Go zei kamatei tei matulo;

¹⁰Go mah sating sazyii gong matulo; Sating gamto nangnii kamaning kamazhii katii takumpii sazyii pouryiito tiimatulo.

¹¹Tingnei tingneikii mah chiitak tei nyiigo tingnei pyiiseilo,

¹²sateichii nyiiniido nyiidakii kama katiimeigo kaleikapyii takumpii, nyiinii tiikama hangtei kaleipyiilo.

¹³Sateichii nyiigo kahemki maliitsei sulo, nlenii kashyii kiteito nyiigo keipyiilo. (Kadapokii sagong sazyii, teimaham ninado pumtei kava tei kalui kaga gomahle. Amen.)

¹⁴“Kadapokii gonyiinii mei mah kakui kama kaleipyii leponii, sating gam gonyii Pfiinii gonyii godo kaleipyii tangle.

¹⁵Nlenii gonyiinii mei mah kakui kama tei kaleipyii suleponii, gonyii Pfiiniido gonyii mah kakui kama tei kaleipyii lakle.

¹⁶“Sateichii gonyiinii malot karyii tinglang kak kabijai katiimei takumpiinii ju kashyii tei mangou sulo, kadapokii ahnyiinii malot ryii leile katu tei meinii ngou matutang karam jangpii ahnyiinii kamage mah ju tei mangou leile, ahnyiinii ahnyii mah lhang tei dou wotakle.

¹⁷Nlenii nangnii malot karyii tinglang kak nangnii malot ryiileile katu tei mei- dakii mangou supii, makumpii kalei go Pfiinii ngou kabui tiisii go phyii gamkii thao manuk wosii, ju kaphyii ailo;

¹⁸sateichii makumpii ngoukalei go Pfiinii n-go lhang pyiitangle.

¹⁹“Kharak ninado dwihetnii tiikamaga sateichii karagameinii ki ramsii karaga sazyii aikikii gonyii jangpii kani kahii tei poi nkom sulo;

²⁰nlenii kharak ninado dwihetnii tiimagapei kalak sateichii karaga- meinii ki ramsii ragapei kalak sating gamkii gonyii jangpii kani kahii tei poi nkomlo.

²¹Kadapokii gomah kani kahii kalei nitei gomah lung teido leitangle.

²²“Pumpot mah kava teinii mikle, teipiinii go mik hoi tei matou leponii, go pumpot hangtei kavapii tokryii tangle;

²³nlenii gomik hoi matou suleponii, go pumpot hang tei ka- myiipii tokryii tangle. Teipiinii godato kalei kava teinii myii-leponii kamyii tei kadaziikapii myiitangpo?

²⁴“Mei hangninanii apum mei hangnaki leipei wolakle, kadapokii ahnii hangniniigo ngourou tangle sateichii hangniniigo lungsyii tangle, sateichii ahnii hangniniigo dzyiirou tangle ninado hangninii go maning majang tangle. Gonyiinii Saraa nei kani kahii nga ngapei wolakle

²⁵Teijangpiinii Inii gonyii dakii tamleile, gonyiinii ringtang karam jangpii kadapei chiitang, kadapei saktang sateichii gonyii mah pumpot jangpii kadapei kaitangposii lung- naang sulo. Karing ainii kachii kasak sung maitingki makpo? Sateichii pumpot ainii peimani sung kisii maitingki makpo?

²⁶Sating gam ruinah hang gotei julo; ahnyiinii lwido ralimakle rachetdo rachet makle sateichii poido poi nkom makle; teitiikido sating gam gonyii Pfiinii ahnyii go pyiichii pyiisakle. Gonyiinii ahnyii sung kisii mai teengki makpo?

²⁷Sateichii gonyii tanii lungnaang katupiinii ahmah tiilung tei cheng- nakado tiimathangki wobuipo?

²⁸“Sateichii peimani jangpii datiisii lungnaang leipo? Lu kito kalei saram hiipa hangteinii kada takumpii lungleipo tiigatpii swi mashaklo; ahnyiinii thado tha makle; lhangdo tiilei makle,

²⁹Nlenii Inii gonyii dakii tam leile, katunii sagong Solomon katangpiinado mpoumah kani kahii hangtei piinii ngoukabi hiipa aihang kak kito hangninii takumpii ngoukabi peimani tei kai womakle.

³⁰Nlenii tingnei ringsii kalei supouneinii tukok kikii toikaisii rutoi kalei luki hiinhii gotei Saraanii aidzyii kapiinii bisii peimani pyii leponii, oh kamalum kagamei, Mpounii gonyiigo kisii peimani pyiilakpo?

³¹“Teijangpii nyiinii kadapei chiitang? kadapei sak tang? mak-kii kadapeiki peimani kaitangpo? sii gonyiinii lungnaang sulo.

³²Kada- pokii Jehudimei kasu Lui kakimeinii pot aihang ai fiile, sateichii sating gam gonyii Pfiinii aihang ai gonyiinii dousu shyiile katu tile.

³³Nlenii gonyiinii mpoumah Sating Sazyii ninado Mpoumah kasang kamajyii tei reipii fiilo sateichii mahlyii hang ai gonyii dakii kai mpampyii tangle.

³⁴Teijangpii supounei jangpii lungnaang sulo, kadapokii supounei tei ah-jangpiinii lungnang tang karam hangkii leitangle. Tingneikii mah mage teiroinii teipiinii teileimik mah tei bui matulo.