Read Maram Naga METIU 8 Bible Online

METIU 8 - Maram Naga bible

METIU 8

¹Mpounii zang gam teito tat hum sek-kii, meimoinii mpou-tai swi wotakle;

²sateichii Julo, Mpara katiimei hangninanii Mpouda gong kok-kumsii tamle, “Bangpii nangnii mazhiisei leponii n-gu tiimatei wobuile.”

³Teito mpounii bah ntaapat mpougo dengsii tamle, “Inii mazhii takle, matei wolo.” Sateichii teisek-kii mpounii Mpara tiisii kalei tei matei wotakle.

⁴Teito Jisunii mpou dakii tamle, “Nang meidakado tam mpat sulo; nlenii tat tulo Atingmei dakii maasii gopum tei mangou ailo, sateichii ahnyii dakii sakchyii pyiitang karam jangpii, Moses mah ajaitingshang taiswisii karat tang karam pot tei pyiitoi ailo.”

⁵Sateichii Mpounii Kaiparnam ki liit kalutai, saryiimei mei-hai phyii- ryii kasatmei hangninanii Mpouda gong matasii tamle,

⁶“Bangpii, guki kaleipii tei pum-pei taisii zyii gamto zyiisii hangkapii kamagesii bam takle.”

⁷Jisunii mpou dakii tamle, “Inii gong mpougo tii mbipyii tangle.”

⁸Nlenii saryiimei mei hai phyiiryii kasatpii teinii Mpougo khekalatle, “Bangpii, Inii n-go guki kalung gong- matu kajyii makle; nlenii samkang tei roinii tamsei leponii, guki kaleipii tei biwo buile.

⁹Kadapokii I-do teimaham kajum mei kangto kalei mei hangniniile sateichii gu kangto saryiimei leile, sateichii Inii mei hangninii dakii, ‘tat tulo’ sek-kii mpounii tatle; kakimei hangninii dakii ‘patlo’, sek-kii, patle; sateichii guki kaleimei dakii, ‘ai tiilo,’ sek-kii tiile.”

¹⁰Jisunii teitei shii wosek-kii mpounii sung gasii, Mpou tai swikalei mei hangdakii tamle, “Inii gonyii dakii kasangpii tam leile, Isrelmei kak kitodo ai takumpiinii kamalum mei hangninii kado Inii ngoumakle.

¹¹Inii gonyii dakii tamleile, leimik kapat lamto sateichii leimik kaliit lamto mei hangkii gongsii Abraham, Isak ninado Jakob go kaswisii takbai kitei bam tangle sating gam sazyii kito;

¹²Nlenii Sagong sazyiiki gongliit kajyiimeigo saba mah kamyii kiteikii toikai aitangle, teibam kiteito hatsii, ghii kagetsii bam tangle.”

¹³Sateichii saryiimei mei hai phyiiryii kasatpii dakii Jisunii tamle, “Tat tulo, nangnii kamalum taiswisii gojangpiinii tiipyii tangle.” Teisek-kii mpouki kaleipii tei biwo takle.

¹⁴Jisunii Pitar ki kagong kak, mpou-hnei riirhiisii zyiikalei tei ngou wosii,

¹⁵Mpounii mpoupei bah tei deng sek-kii, kariirhii tei gatakle; sateichii mpoupeinii gungtu wosii Mpougo nga ngatu takle.

¹⁶Sateichii tingkhiilam liit sek-kii, sara kashyii kaswi kaleimei hang- kago ahnyiinii mpouda pang gong takle sateichii samkang hangninii piinii sara kashyii hang gotei baatoi pyiisii rakanimei hang gotei tii mbipyii takle.

¹⁷Lungkakalingpii Isaiyago tam matu katu, “Mpounii nyii mah katchii kanhii poitoi pyiile ninado nyiimah rakashyii hang kito mpatpyiile” katu ai gong matwi matu tang karam jangpiile.

¹⁸Aitoinii Jisunii mpougo magui kalei meimoi tei ngou wosii, mpounii mpou-bou meigo dwijai lugang kaa majupat matutang karam jangpii mwija pyiitakle.

¹⁹Sateichii Ajaiting- shang kati ojamei hangninanii mpouda gongsii tamle, “Madhii kapyiipii, Nangnii katat lyii hangki Inii gotai switangle.”

²⁰Jisunii mpou dakii tamle, “Sa- ramii kounah mah ki kachet bamle, sateichii sating gam ruinah hang mah mathiit leile; nlenii meinah sapfii mpou mah phyii nkum tang karamni gale.”

²¹Sateichii boumei kak kiteito kaki hangninanii mpou dakii tamle, “Bangpii, n-gu maasii gu pfiigo tiigoi rei maleilo.”

²²Nlenii Jisunii mpou dakii tamle, “Gutai swi wolo, sateichii kataimei teinii ahnyiimah katai gotei tiigoi matulo.”

²³Jisunii malyii lung liit-to takle, sateichii mpou boumeinii mpougo kaswisii tat tutakle.

²⁴Sateichii julo, dwijai kitei tingkai tingrot gongsii, malyii tei tingkaigo kaswisii n-now kapi dwi teipiinii gomnei wotakle; nlenii Jisunii zyiisii bamle.

²⁵Teito ahnyiinii patsii mpougo makeng matusii tamle, “Bangpii, nyiinii gane leitakle.”

²⁶Teito mpounii ahnyii dakii tamle, “He kamalum kagamei, gonyii dajangpii hing leipo?” Teito Mpounii gungtu tingkai ninado dwijai gotei ntak tulo sii kakhat takle; teito manoi majung takle.

²⁷Sateichii meihang teinii sung gasii tamle, “Tingkai ninado dwijai katangpiinado mpougo katam swikalei ai kada kakum meipo?”

²⁸Sateichii mpounii Gadara sa- zyiiki dwijai lugang tei gong sek-kii, roubam kito kapat sara kashyiinii chyiitat kalei mei hangnanii mpougo kadou wotakle. Ai mei hangna aigo hangkapiinii ngoukahing jangpii teiki pwidi tei mei kaniido tat hing takle.

²⁹Sateichii julo, ahnyiinii saa mpatle, “He Saraa nah Sapfii mpou, nangnii nyiigo kaswisii kadapei tiitang karam leipo? Tinglang tei gong kasunakii nangnii nyiigo tiimagapyii lesii aiki gonglei takpo?”

³⁰Ahnyii dato chengniikii dhii- haisii Bak koi hangninii thok-chiisii leile,

³¹sateichii sara kashyii hang- teinii mpou dato khangle, “Nangnii nyiigo baa mpat leponii, bak koi dateikii nyiigo lang maliit seilo.”

³²Sateichii mpounii ahnyii dakii tamle, “Tat tulo,” teipiinii ahnyiinii pat tosii bak koi datei liit to-takle. Sateichii julo, bak hangtei pangchot kiteito dwijai kitei kachot liitsii dwi kito tai takle.

³³Sateichii bak kakoimei teinii pakmaa namdi kitei liitsii, pat kalei hang ninado sara kashyiinii chyii- tatsii kalei mei mah kaang kito tam mangou takle.

³⁴Teito julo, namdi kito kalei mei hangteinii Jisugo ka- doutang karam jangpii tatpat takle; sateichii ahnyiinii mpougo ngou wosek-kii, ahnyiinii mpougo ahnyii mah sazyii kiteito tat tuseilosii khang takle.