Read Maram Naga MARK 10 Bible Online

MARK 10 - Maram Naga bible

MARK 10

¹Teito Jisunii teibam kiteito tatpat tosii Judiya lungkoi sazyiiki sateichii Jordan karyii lugang tei gong takle. Meimoinii mpou dato gong ndwi wotakle sateichii mpou-jai taiswisii Jisunii ahnyiigo ralipyiitu takle.

²Sateichii Farasismeinii gong mpougo ajai jutang karam jangpii n-nhiile, “Sapfiimeinii mpou nougo n-nou katu ai ajai makpo?”

³Mpounii ahnyiigo khekalatle, “Moses-nii gonyiigo kadalesii tam kakhatpyiipo?”

⁴Ahnyiinii tamle, “Moses-nii larek ryii mati aisii mei kata hangninanii mpou nougo n-nou kalu ai mazhii lesii tampyiile.”

⁵Nlenii Jisunii ahnyiigo tamle, “Gonyii lungtei teiju kalei jangpii Mosesnii kakhatsam tei ryiidekle.

⁶Nlenii tii mpat saroi sekto ‘Saraanii sapfiimei ninado sapwimei ai tiipyii takle.’

⁷‘Teijangpii sapfiimei hangni- nanii mpoupwi mpou pfiigo toisii mpou nougo njasii lungtu tangle.

⁸Sateichii hangna teinii hangninii tiitangle.’ Teijangpii ah nei tei hangna sutakle, nlenii hangniniile.

⁹Teijangpii Saraanii poi njapyii kalei tei mei kaniido poi kapak sulo.”

¹⁰Sateichii ahnyiinii kilung liitsek-kii mpouboumeinii Jisu dato ai kaang kito n-nhiile.

¹¹Mpounii ahnyii dakii tamle, “Pfiimei kata kangkanii mpou nougo n-nou aisii sapwimei kaki manouloi dinchiinii, mpou nou dato mpounii mashung maha aitakle.

¹²Ajai aitakumpii, sapwimei hangninanii mpou naago n-nou aisii naa kaki tiiloi woleponii, mpoupeinii mashung maha aitakle.”

¹³Sateichii abangpiinii dengpyii matu tang karam jangpii ahnyiinii nahmei kachengmei gotei mpouda pang gongle, teito mpou boumeinii ahnyiigo n-gile.

¹⁴Nlenii Jisunii teitei ngou wosii, mpounii rarhiisii mpouboumei dakii tamle, “Ahnyiigo nam sulo; nahmei kachengmei gotei guda liit matulo, dapochiinii Saraa mah sating sazyii teinii ai kakummei lhangle.

¹⁵Kasangpii Inii gonyii dakii tam leile, Mei kata kangkanii nahmei kacheng hangninii takumpii Saraa mah sating sazyii gotei dousuleponii teiki tei liitpei wolakle.”

¹⁶Sateichii Jisunii ahnyiigo gaisii ahnyii mei n-sang n-sang phyiiryiikii mpou bah poikai pyiisii ahnyiigo satoi pyiile.

¹⁷Sateichii mpounii tat kapat tinglangki, mei hangninanii mpou doi pakpi kok-kumsii mpougo n-nhiile, “Kabi Madhiikapyiipii, Kalui kaga karing doutang karam jangpii Inii dapei tiitangpo?”

¹⁸Teito Jisunii mpou dakii tamle, “Nangnii n-gu dajangpii kabipiisii lat leipo? Saraa tei supii mei kado kabi gale.

¹⁹Kakhatsam tei nangnii tile; ‘meigo gisulo, masung maha sulo, kasang kasu sakchyii tei pung sulo, gopwi go pfiigo sadzyii ngariit tiilo.’ ”

²⁰Teito Mpounii Jisuda tamle, “Madhiikapyiipii, aihang ai Inii tiina kalei douto swi wotakle.”

²¹Teito Jisunii mpougo lungsyiisii jule ninado tamle, “Nangnii kaangkii tiitang makle rei; tat tulo, gomah kabam hangtei joilo, sateichii kamage meigo pyii ailo, teito nangnii sating gamto mah nitangle, sateichii patlo, gutai swi wolo.”

²²Mpounii sam ai shii sek-kii, mpouju tei masuk takle, sateichii mpounii swi kamagesii tat tutakle. Kadapokii mpou tei hang- kapii mah kanimei hangniniile.

²³Jisunii mpouboumeigo ju maguisii ahnyii dakii tamle, “Mah kanimeinii Saraa mah sating sazyiiki liit tang karam ai kadaziikapii hungpo!”

²⁴Teito mpou boumeinii mpou sam tei shii wosii sung gatakle, nlenii Jisunii nlailoisii ahnyii dakii tamle, “Gunahmei kani kahii kikii kamalum meinii Saraa mah sating sazyiiki liit tang karam ai daziikapii hungpo!

²⁵Kanimei hangninanii Saraa mah sating sazyiiki liit tang karam sung- nii mahum-mi kachet kito poutungki kounahnii joupat kaluniipou mala buile.”

²⁶Teito ahnyii tei tampei kalak tiisii sung gatakle, ninado mpou dakii tamle, “Teitiileponii tanii kei- kapyii tei dou wobuipo?”

²⁷Jisunii ahnyiigo jusii tamle, “Meinahnanii ai ai tiipei wolakle, nlenii Saraa-nanii mah kado tiipei kalak gale.”

²⁸Teito Pitarnii Jisuda tamle, “Julo, nyiimah kalei hangtei toi aisii nyiinii gutai swi wotakle.”

²⁹Jisunii tamle, “Kasangpii Inii gonyii dakii tam leile, gujangpii ninado kabi rasam jangpii, kihang, taikarhii sungkatingmei, taipwimei, pwi-pfii, taa-nahmei, luhangdo kata kangkanii toi aileponii,

³⁰mpounii toi tinglangki kaset kalak dou katu njasii kihang, tai karhii sungka- tingmei, taipwimei, pwi-pfii ninado luhang njai haikii, sateichii gongtang karam tinglang ki kalui kaga karing tiilung doutangle.

³¹Nlenii aitoi kareimei hangkanii natu tangle sateichii aitoi nasii kalei meihang kanii reitu tangle.”

³²Sateichii Jisu ninado mpou- boumei tei toinii Jerosalem ki pitang karam jangpii pwidito tatlei takle, sateichii Jisunii mpouboumei doirei- sii tat leile; sateichii ahnyii tei hingtakle sateichii tailamto switat kaleimei tei hingtakle; sateichii Jisunii keariisiinakhii gotei sipii pangsii mpou gamto kadapei pat tangpo katu ralipyiitu takle.

³³Mpounii ahnyii dakii tamle, “Julo, nyiinii Jerosalemki tatpi leile; teito meinah sapfii mpou gotei Tingdimei ninado Ajaitingshang kati ojamei bah kikii pyiitoi tang takle, teito ahnyiinii mpougo tam mashyiisii gitoi tangle, sateichii lui kakimei bah kikii pyiitoi tangle;

³⁴teito ahnyiinii mpougo dzyii nuitangle, mpou ju gamkii poktai maswikai tangle, mpougo lak tangle, sateichii mpougo gitangle, sateichii jangtumnii tai mpounii ringkhii tangle.”

³⁵Sateichii Zebedi nah Jems nei Jon nii Jisuda gongsii tamle, “Ma- dhiikapyiipii, neinii kakhang hangtei nangnii neijangpii tiikasei mareile.”

³⁶Teito Jisunii ah neigo tamle, “Gonei jangpii n-gu kadapei tiisei matunyiipo?”

³⁷Teito mpoupiinanii mpou dakii tamle, “Nangnii pumtei kava haisii gomah sagongbam kito kabampiinei nei hangnago gobah ajiilamkii hangninii go bilamkii hangniniigo mbam seilo.”

³⁸Nlenii Jisuniiahnyii dakii tamle, “Gonyiinii kadapei khangleipo katu gonyiinii timakle, Inii kasak peek tei gonyii poisak wobuipo? Sa- teichii Inii dwi mpum kalu takumpii gonyii dwi mpum wobwipo?”

³⁹Sateichii ahnyiinii mpouda tamle, “Nle,” teito Jisunii ahnyii dakii tamle, “Inii kasak peek tei gonyiinii poisak tangle sateichii Inii dwi mpum kalu takumpii gonyiinii dwi mpum tangle;

⁴⁰nlenii gobah ajiilamto ninado gubah abilamto mbam tang karam jangpii kalai tang karam ai gu tei gale; nlenii teiteinii tiida kabam mei jangpiile.”

⁴¹Sateichii mpou boumei kakimei kearii teinii tei shii wosek-kii, ahnyiinii Jems ninado Jon go rarhii takle.

⁴²Teito Jisunii ahnyiigo mpou dakii lat magongsii tamle, “Lui kakimei teinii ahnyii kak kito kadi kathangmei teinii ahnyiigo apum tiile, sateichii ahnyii mah kadimei teinii ahnyiigo apum katiimei tha tei matiile katu ai gonyiinii tile.

⁴³Nlenii gonyii kaktonii aitiilakle, nlenii gonyii kak kito kata kangkanii dinyiileponii, ahnii meihang mah nga-ngatangle.

⁴⁴Sateichii gonyii kak kito mei kata kangka reikanyii mei teinii meihang mah kikaleimei tiitangle.

⁴⁵Kadapokii meinah sapfii mpou teiniido nga-ngasei matutang karam jangpii gongmakle, nlenii nga ngalesii sateichii mpou mah karing tei meihang kago keipyii tang karam jangpii pyiilesii gongle.”

⁴⁶Sateichii ahnyiinii Jeriko ki gongle, sateichii Jeriko kito mpounii mpouboumei ninado meimoigo kaswisii tat kapat tinglangki, Temos nah mik kachetpii Bartimos mah kahapii tei pwidi kuto bamle.

⁴⁷Sateichii mpounii Nazaretki Jisu gong kalei tei shii wosek-kii, mpounii saa mpat takle, “Devit nah sapfii mpou Jisu, n-gu lungsyii pyiilo!”

⁴⁸Teito mei kamoi kanii mpougo malhii sulosii n-gisii tamle, nlenii mpounii kisii lat teisii kisii saa tutakle, “Devit nah sapfii mpou, n-gu lungsyii pyiilo.”

⁴⁹Teito Jisunii sat takle ninado tamle, “Mpougo latlo,” teito ahnyiinii mik kachetpii gotei lat takle, ahnyiinii tamle, “Rangalo, tusat tolo, mpounii n-go lat leile.”

⁵⁰Teito mpounii mpou peimani tei goutoisii ntingtaktu sat totakle ninado Jisuda pile.

⁵¹Sateichii Jisunii mpouda tamle, “Inii gojangpii kadapei tiikapyii mareipo?” Teito mik kachetpii teinii tamle. “Madhiikapyiipii, go-mik ngou matulo.”

⁵²Jisunii mpou dakii tamle, “Tat tulo, gomah kamalum teipiinii n-go tii-mbipyii takle;” teito binasek-kii mpounii mik ngou wotakle sateichii pwidito Jisutai switu takle.