Read Maram Naga MARK 12 Bible Online

MARK 12 - Maram Naga bible

MARK 12

¹Sateichii mpounii ahnyiigo ndasam piinii tamtu takle; “Mei hangninanii darkha toipyiilu hangninii tiisii, toipyiilu tei araangh katbang aitakle, teito mpounii darkhati jou karyii tang karam jangpii ahom hangninii poi wotakle, sateichii kakoiki kasagoi bam hang- ninii tiiwotakle. Sateichii mpounii darkha toipyiilu tei lu liipeimei dakii pyiitoisii sazyii kaki ki tat tu takle.

²Sateichii darkhati tei kare tinglang gong sek-kii, Bangpiinii darkhati lu liipei mei dateito lu liipei mai khang- losii mpouki kalei mei hangniniigo langle.

³Teito ahnyiinii mpougo jumsii datle, sateichii mpougo bah marongpii mpatpyii takle.

⁴Sateichii bangpiinii mpouki kalei mei kaki hangniniigo lang loile, teito ahnyiinii mpougo phyiibung datriitpyii takle sateichii mpougo tiisangampyii takle.

⁵Sateichii mpounii mpouki kaleimei kaki hangniniigo lang loile, teito ahnyiinii mpougo gitakle, sateichii ahnyiinii kaki kakimei daziikago aitiisii tiitakle, kangkago datle sa- teichii kangkago gitoile.

⁶Mpoumah kaki hangninii lei loile, teiteinii mpounii lungsyii kaki mpounah sapfii mpou teile; ahnyiinii gunah sapfii mpou aigonii sadzyii ngariit tiitang manasii maningsii kalui luisang kito mpougo ahnyii dakii langkai takle.

⁷Nlenii lu liipei mei teinii ahnyii rangtiisii karashiitu takle, ‘Ai ai mahtou toutang karampii teile, patlo, nyiinii mpougo gi aileje, teito nyiinii mpou mah kabam hangtei tou wobuile.’

⁸Teito ahnyiinii mpougo jumsii gi aitakle, sateichii darkha toipyiilu kiteito rat toi aitakle.

⁹“Teitii leponii darkha toipyiilu mah Bangpii teinii kadapei tiitangpo? Mpounii gongsii lu liipeimei gotei tiimaga aitangle, sateichii darkha toipyiilu tei mei kakimei dakii pyiitoi aitangle.

¹⁰Gonyiinii kamatei kabi rasam kikii ryiikabam tei fiisutakde: ‘Ki katiimeinii rat toi kalei kuitu tei hang kakto roukatii tiisang aki kaa kuitu tiitakle.

¹¹Ai ai Bangpiinii tiikapyiile sateichii ai ai mik kitonii kamadatle!’ ”

¹²Teito ahnyiinii Jisugo jumlesii tiile, dapochiinii Jisunii ahnyiigo nda tiisii tamziile katu tei ahnyiinii titakle, nlenii ahnyiinii meimoi gotei hingtakle; teipiinii ahnyiinii mpougo toi aisii tat tutakle.

¹³Sateichii ahnyiinii Jisu mah samtam kito jum kabui jangpii maningsii Farasismei ninado Herot- mei kangkago mpou dakii langkaile.

¹⁴Teito ahnyiinii mpouda gongsii tamle, “Madhiikapyiipii, nangnii kasang sam tam leile katu nyiinii tile, sateichii nangnii meigo kado hinglei makle, kadapokii nangnii kasana kasagoi julei makle, nlenii Saraa mah kasang pwidi tei Nangnii tam ralipyiile. Nyiigo tam pyiilo, Sijar-go aha kapyii ai ajai makpo? Nyiigo pyiilo manii pyii sulopo?”

¹⁵Nlenii ahnyii lung kabijai katii tei Jisunii ngou wosii tamle, “Gonyiinii n-gu dajangpii ajai juleipo? Guda sanahgyii hangninii poigonglo, tei tei Inii jule.”

¹⁶Teito ahnyiinii mpouda sanahgyii hang- ninii poigongle, sateichii mpounii ahnyii dato n-nhiile, “Phyiibung ninado zei ai tamahpo?” Ahnyiinii mpouda tamle. “Sijar mahle.”

¹⁷Teito Jisunii ahnyiida tamle, “Sijarmah tei Sijar dakii pyiilo sateichii Saraa mah tei Saraa dakii pyiilo,” teito ahnyiinii mpougo sung gatakle.

¹⁸Sateichii katai kito ringkakhii katu ai galesii tam kalei Sadhumei kangkanii mpouda gongsii n-nhiile,

¹⁹“Madhiikapyiipii, Moses-nii nyii jangpii ryiipyii bamle, ‘Sapfiimei kata hangninanii nah gasii mpounou go taidek leponii, mpoutaikarhiimei teinii mpou nou gotei manousii mpou sanapii jangpii atat-reng tei mbamlo ziile.’

²⁰Tinglang hangniniiki ndou sanamei sana leile, katingpii tei nou tiisii nah gasii taitakle.

²¹Teito mpou-tai karhii hangna kashangpii teinii, sapwi mpei gotei manou wotakle, sateichii mpoudo nah gasii taitakle, hangtum kashangpii teiniido tei takumpii pat takle.

²²Teitiisii sanamei sana tei atat lusupii taitakle, kalui kito sapwi mpei teido taitakle.

²³Ringkakhii piinei sapwi mpei teinii ahnyii kakto tapii noule tangpo? Dapokii ahnyii sanamei sana teinii mpoupeigo manou takle.”

²⁴Jisunii ahnyiida tamle, “Gonyii kabi rasam ninado Saraamah teima- ham tei timakle aijangpii gonyiinii maziimakpo?

²⁵Dapochiinii ahnyiinii kataimei kakto ringkakhii tinglangki tei ahnyiinii kalakna katii teimakchii myiikapang katu tei gale, nlenii ahnyii teinii sating gamlui takum tangle.

²⁶Sateichii kataimeinii ringkakhii mah kaang kito, Moses mah larek kikii ryii kabam, rangum kito mi kashong mah njai tei gonyiinii fiisang fiimakde? Teiki teito aitiisii ryiibamle, katunii, Saraanii Moses go tamle, ‘Inii Abraham, Isak ninado Jakob mah Saraale.’

²⁷Mpounii karing mah Saraale, katai mah makle, gonyiinii hangkapii ma-aitakle.”

²⁸Sateichii ahnyiinii sam nhiipat nhiiliit kalei tei ajaitingshang kati ojamei hangninanii shii wosii, satei- chii mpounii ahnyii dakii tiigatpii khekapyii tei ti wosii, mpouda gongsii mpougo tamle, “Kakhatsam hang kak kito kadapii ainii karei reisangpo?”

²⁹Jisunii mpougo khekalatle, “Kakhat sam hang kak kito karei reisang teinii aile; ‘oh, Isrelmeinah shiipyiilo, nyii Bangpii nyii Saraa teinii Bangpii hangninii roile.

³⁰Sateichii nangnii go Bangpii go Saraa gotei go lung matum ma- dumpii, gorangii matum madumpii, goswi matum madumpii, sateichii gomah teimaham matum madumpii haisii lungsyii tangle.’

³¹Hangna kashang teinii aile, ‘Goki tiinanii- pameigo nangnii goroinapii n-go lungkasyii takumpii lungsyiilo.’ Ai hangnasung dikaki kakhatsam kaki gale.”

³²Teito Ajaitingshang kati ojamei teinii Jisuda tamle, bitakle, Madhii- kapyiipii, Nangnii kasang tei tam takle, Saraa teinii hangninii roile, Ah supiinii kaki gale;

³³sateichii lung matum madumpii, lung-swi matum madumpii, rangii matum madumpii ninado teimaham matum madumpii haisii Saraago lungkasyii, sateichii ki tiinaniipameigo mpounii mpou roinapii mpougo lungkasyii takumpii lungkasyii ainii Saraa dakii kouring mi-rusii pyiikatoi ninado kakarat hang sung kile.

³⁴Mpounii sakaisii tiigatpii khela kapyii samtei ngou wosii Jisunii mpou dakii tamle, “Nang Saraa mah sagong sazyii kito dhiimakle,” tei taitonii mei kaniido mpougo kaka- chyii sam hangninii kado n-nhii hingtakle.

³⁵Jisunii Saraa kamaning kilungto ralipyiisii kalei tinglang kak, mpounii tamle, “Ajaitingshang kati ojameinii, Krista ai Devit nah sapfii mpoule katu kadakumpii tam leipo?

³⁶Rangii kamateinii Devitgo miitkai pyiisii tamle, ‘bangpiinii gu Bangpii dakii tamle, Inii n-go ngou karoumei gotei Inii gopi pazhii kangkii poikai kasuta, gubah jiilam pangto bamlo.’

³⁷Devit sekpiinado Mpougo Bangpii latle; teipiinii mpou ai kada takumpii Devit nah sapfii mpou tangpo?” Sateichii meimoinii mpou sam tei ntasii shiipyiisii leile.

³⁸Sateichii mpounii ralipyiisii kalei kito aitiisii tamle, “Paijou kathang kaisii sali kijangto meinii sadzyii ngariit katii kamareimei,

³⁹Jehudimei mah ndwibamni hang kito bam kabiki bam kanyiimei ninado takbai lyii nito sadzyii ngariit katiibam kamarei mei,

⁴⁰kamipwi- meigo kasatui ninado kamipwimei ki kasoumei, sateichii kabijai tiisii thaangsang riita kaleimei gotei gonyii sakailo. Ahnyiinii mage kaki tei doutangle.”

⁴¹Sateichii mpounii Saraa kama- ning ki sanabung doitei bamsii, meimoinii kada takumpii sana tei toikai leiposii jule, kanimei kadaziikanii hang hang toikaile,

⁴²teito mah kaga kamipwimei hang- ninii gongsii sanaswi hangna toikai takle, teiteinii paisa pumkii takumle,

⁴³teito mpounii mpouboumeigo mpouda lat magongsii ahnyii dakii tamle, “Inii kasangpii gonyii dakii tam leile, Sanahbung aikikii toikaisii kaleimei hang kakto, mah kaga kamipwi mpei ainii toikai kamoipiile.

⁴⁴Kadapokii ahnyiihangnii ahnyii mah kaki ka-nrai ki teito toikaile, nlenii sapwi mpei ainii mpoupei mah mah kaga kiteito mpoupei mah kabam hang, katunii mpoupei mah ring kabui matum madum tei toikai aitakle.”