Read Maram Naga MARK 14 Bible Online

MARK 14 - Maram Naga bible

MARK 14

¹Leimik hangnatai tei kaa- kamaju mah takbai ninado ahee kaihai kasu tiirok takbai tei hang-ngi lesii bam takle, sateichii tingdimei ninado ajaitingshang kati ojamei hang teinii mpougo dakum- piinii makumpii jumsii gitangpo katu pwidi tei fiitu takle;

²dapochiinii ahnyiinii tamle, “Hang-ngi tinglang kaknii sulo, kadapokii mei machiinii nrungtu tangle.”

³Sateichii mpounii Betani ki kabam kak, tiigyiira tchiisii kaleipii Simon kilungto mah chiisii kalei tinglang kak, sapwimei hangninanii kairum kabi mai kating thao kui- tubung hangninii poisii gongle; sateichii mpoupeinii thao bung tei tiipaksii mpou phyii gamkii rui- kaipyii takle.

⁴Sateichii ahnyiirang tiisii ahnyii kak kito lung samou supii kalei mei kangkanii tamle, “Kadajangpii aitiisii kamanuk thao ai tiikadak leipo?

⁵Kadapokii thao ai sana haisii rekngii sung kisii joitoisii mah kagameigo pyii wobuile.” Sateichii ahnyiinii mpoupei gotei sampeile.

⁶Nlenii Jisunii tamle, “Mpoupei rang tiimatulo, dajangpii gonyiinii mpoupeigo tiimachang leipo? Mpoupeinii kabi ninado ngoukabi ngam tei gujangpii tiipyii takle.

⁷Kadapokii mah kagamei teinii taksupii gonyiinii kaswisii bamle, teipiinii gonyiinii tiikanyii tinglang hang kito gonyiinii ahnyiigo kabi tiipyii wobuile, nlenii Inii gonyiigo taksupii kaswisii bamhum lakle.

⁸Mpoupeinii tiikabuita tei tiitakle; poigoi tang karam jangpii mpoupeinii gu gamkii reipii thao manukpyii takle.

⁹Sateichii Inii gonyii dakii kasangpii tam leile, sazyii pouryii bamlyii hangki kabi rasam tamsii tat tang karam hangki sapwi mpei ainii tiikabam teido mpoupeigo maningloi tang karam jangpii tam mpat tangle.”

¹⁰Sateichii keariisiinakhii kak kito mei hangninii Judas Iskariot katupii ainii Tingdimei dakii mpougo pyiitoi tang karam jangpii tat tutakle.

¹¹Sateichii teitei ahnyiinii shii wosek-kii, ntasii seh sanah pyiitangle katu tam mpat takle, sateichii mpounii kada takumpii Jisugo schoi-choipyii tangpo katu tinglang tei fiitu takle.

¹²Sateichii ahee kaihai kasu tiirok hang-ngi leimik karei piinei, ahnyiinii kaakamaju malot mah Jaonah kagi piinei, mpouboumeinii mpou dakii tamle, “Kaakamaju mah malot ai chiitang karam jangpii nyiinii kadaki maasii gojangpii tiikada katu mareipo?”

¹³Teito Jisunii mpou boumei hangna go aitiisii tamsii lang matu takle; “Namdi kitei tat liitlo, teito mei hangninii dwikhii pungsii goneigo kadou tangle; mpou tai tei swiwolo,

¹⁴sateichii mpounii tat kaliitki apumpii dateikii tamlo, ‘Madhii- kapyiipiinii tamle, Inii guboumeigo kaswisii kaakamaju mah malot tei chiitang karam ki shang tei kadaki leipo?’

¹⁵Sateichii mpounii mahlyii hang sangsii tiida kabam alangh kasagoi ki shang kadi hangninii goneigo mangou tangle; teiki teikii goneinii nyiijangpii tiikadalo.”

¹⁶Teito mpouboumeinii tat tutakle, sateichii namdi kitei tatliit sek-kii, Abangpiinii ahnyii dakii tam kabam takumpii ngoutakle, sateichii ahnyiinii kaakamaju mah malot tei tiikada wotakle.

¹⁷Sateichii tingkhiilam Jisunii keariisiinakhii gotei kaswisii gongle.

¹⁸Sateichii ahnyiinii mah chiilei- bangpii, Jisunii tamle, “Kasangpii Inii gonyii dakii tam leile, gonyii kak kito n-gu mah chii njoi kalei mei hangninanii n-gu schoi-choichii tangle.”

¹⁹Teito ahnyii tei lung kamagetu takle, sateichii mpou dakii mei nsangnsangpii tamtu takle, “I-de?”

²⁰Mpounii ahnyii dakii tamle, “Kok hangninii lung kikii n-gu kaswisii bah karengkai katupii keariisiinakhii kak kito mei hang- niniile.

²¹Kadapokii meinah sapfii mpou teinii mpou jangpii ryii kabam takumpii tai tangle, nlenii meinah sapfii mpougo schoi-choi kachiipii teinii kadaziikapii kamage tangpo! Mei teipou jangpii manaa m-mang kasunapou mpou jangpii bibwi tangle!”

²²Ahnyiinii mah chii kalei tinglang kak, Jisunii tiirok pangkii poisii riitasii hakalang tamle, tiirak takle, sateichii mpouboumei dakii pyiisii tamle, “Poilo, ai ai gu-tchiile.”

²³Sateichii mpounii peek hang- ninii poitakle, Saraago hakalang tamle, sateichii ahnyii daki pyiitakle sateichii ahnyiihang tei sak wotakle;

²⁴Jisunii tamle, “Ai ai sat tang karam karanu samtam mah, meimoi jangpii majou mang kapyii gu zai teile.

²⁵Inii gonyii dakii tam leile, Saraa sagong mah sazyii kito kasatai sak tang karam leimik tei gong kasuta Inii darkha riiti gamto sakloi lakle.”

²⁶Teito ahnyiinii lhii kangkii tiisii Olip zang gam tat tutakle.

²⁷Jisunii ahnyiida tamle, “Gonyii- hang n-gu toisii pakga tangle, dapokii kabi rasam kikii ryiibam takle, ‘Saraanii jaokakoipii gotei gi aitangle, sateichii Jaonah hangtei marou maruk tutangle.’

²⁸Nlenii Inii ringkhii kalutai, gonyiidoi reisii Galiliki maa tangle.”

²⁹Teito Pitarnii mpouda tamle, “Mei kakimei hangnii n-go toi aikido, Inii n-go toisang toilakle.”

³⁰Teito Jisunii mpouda tamle, “Kasangpii Inii godakii tam leile, tingnei tinghum Ruigangnii kungnakii kasunakii, nangnii n-gu mazhiilak tumkii tangle.”

³¹Nlenii Pitarnii kisii kisii tamle, “Inii n-go kaswisii katai katang gong kido Inii n-go mazhii kasu tei tiisang tiilakle, sateichii ahnyii hangniido tei takumpii tam takle.”

³²Sateichii ahnyiinii Getsama- nisii kalat bam kitei gongle sateichii Mpounii mpouboumei dakii tamle, “Inii riita kalei kak, gonyii aikito bamlo.”

³³Sateichii mpounii Pitar, Jems ninado Jon go pang wotakle sateichii hangkapii kamage katu ninado lungnyii lunghao tutakle.

³⁴Teito mpounii ahnyii dakii tamle, “Gu rangii hangkapii kamage takle, taine takle. Gonyii aikito bamlo sateichii sakai wolo.”

³⁵Sateichii mpounii doilam chengniikii tat patsii mpounii sazyii koumangsii, mazhiileponii tinglang tei mpou dato tat maju matutang karam jangpii riitale.

³⁶Sateichii mpounii tamle, “Pfii-o, gojangpiinii matum madum tiiwo kalak gale; peek ai gudato poitoi pyiilo; nlenii Inii kamaning kamarei tei sulo, nlenii nangnii kamaning kamarei teilo sii mpounii riitale.”

³⁷Teito mpounii nlaigongle, ninado mpouboumei hangtum tei zyiisii kalei tei ngoutakle, teito mpounii Pitar dakii tamle, “Simon, nang zyiitu takpo? Gonyii n-gu kaswisii pungkado mik raksii bampei lak takde?

³⁸Sakailo ninado riitalo, gonyiinii kahemki liit kasu tiisii; rangiinanii tiinyiile, nlenii pumnii suile.”

³⁹Sateichii nlailoisii mpounii tat patsii, nusam hangtei tamloisii rii- tale.

⁴⁰Sateichii mpounii nlaigongloi katu tinglang kak ahnyiinii zyiisii kalei tei mpounii ngoutakle; dapokii ahnyii mah miktei hangkapii masui takle, sateichii ahnyiinii mpougo kadapei khekalat tangpo katu tisu takle.

⁴¹Sateichii mpounii hangtum kashang tiisii gongle ninado ahnyii dakii tamle, “Gonyii aitoi katang zyiisii ntak leipo? Buitakle, tinglang tei gongtakle, julo, meinah sapfii mpou gotei toinii kem katiimei bah kikii pyiitoi aitakle;

⁴²gungkhii wolo, nje, nyiihang tat tule, julo, n-gu schoi-choi kakaipii tei aiki leitakle.”

⁴³Sateichii Jisunii sam tamlei- bangpii teisek-kii keariisiinakhii kak kito Judas tei gongle, sateichii tingdimei, ajaitingshang kati ojamei ninado katingmei dato kagong saryiikhang ninado tingrang baitui kapungmei meimoigo kaswisii gong- takle.

⁴⁴Schoi-choi kachiipii teinii meimoigo tiikamangou hangninii pyiibam takle, “Mei Inii kama- twumpii tei gonyiinii kamareipii teile, mpougo jum wolo ninado mpougo tiigatpii gonyiinii saryii kakoimei kangto pang tat tulo.”

⁴⁵Judas teinii gong sek-kii, mpounii Jiusda tatpi, “Madhiika- pyiipii!” sii tamsii mpougo matwum takle.

⁴⁶Teito ahnyiinii bah liitsii Jisugo jum wotakle.

⁴⁷Nlenii teikito sat kaleimei kak kito mei hang- ninanii mpou khanghe kito saryii khangtei chyii mpatsii Tingditupii ki kaleipii khoi tei tat ndang aitakle.

⁴⁸Teito Jisunii ahnyiigo tamle, “Ka- ragameigo jumtang karam takum- piinii saryiikhang ninado tingrang poisii n-gu jumlesii gonyii gongleipo?

⁴⁹Tingnei tingneikii Inii gonyiigo Kaswisii Saraa kamaning kilungto ralipyiisii leile, ninado gonyiinii n-gu jum makle. Nlenii ai ai kabi rasam tei gong matwi matu tang karam jangpiile.”

⁵⁰Teito ahnyii hangnii Jisugo rat toisii pakga takle.

⁵¹Rahangmeinah hangninii, kou- nah peimani kaisii Jisutai swileile, ahnyiihangnii mpougo jumlesii tiile.

⁵²Nlenii mpounii mpou peimani tei rat toisii pum makungpii pakga takle.

⁵³Sateichii ahnyiinii Jisugo ting- ditupii ki nitei pang gongle, sateichii tingdimei, katingmei ninado ajai- tingshang kati ojamei hangnii mpougo kaswisii gong ndwi takle.

⁵⁴Pitar tei akak dhiihaisii mpou- taito swisii tingditupii ki kajang tei tat liitle, teito mpounii saryii kakoi- meigo kaswisii mi lumsii bamle.

⁵⁵Toinii tingdimei ninado sam katii kating meihang teinii mpougo gitang karam jangpiinii Jisu mah kama tei fiitu takle. Nlenii ahnyiinii kama hangninii kado dousu takle.

⁵⁶Dapokii mei daziikanii Jisu phyiiryiikii kasang kasu sakchyii tei pyiile, sateichii ahnyii mah sakchyii tei njoisang njoisu takle.

⁵⁷Sateichii mei kangkanii tusatsii kasang kasu sakchyii tei mpou phyiiryiikii poikai pyiisii tamle,

⁵⁸Mpounii aitiisii katam nyiinii shiile, “Meinii tiikabam Saraa ki ai Inii tiimaga tangle sateichii jangtum- nii tai meinii tiikasu kaki hangninii Inii tiimakhii tangle.”

⁵⁹Sateichii aitiisii tam kido ahnyii mah sakchyii tei njoisang njoisu takle.

⁶⁰Tingditupii teinii gungkhii ahnyiihang doi satsii Jisugo ka- chyiinhiile, “Nang mah kado khe- lalak takpo? Go phyiiryiikii ahnyiinii pyii kalei sakchyii tei kadapeipo?”

⁶¹Nlenii Jisunii malhiisupii bamsii mah kado khepyii sutakle. Nlailoisii Tingditupii teinii mpougo kachyiinhiile, “Tam makang tang karam nah sapfii mpou Krista tei nangpo?”

⁶²Jisunii tamle, “I-teile,” “Satei- chii meinah sapfii mpou teinii teimaham kaleipii ajiilamto kabam ninado sating gam kamong go kaswisii kahum gonyiinii ngou tangle!”

⁶³Teito tingditupii teinii mpoupei tei hetriitsii tamle, “Aidoito kisii nyiinii fiitang karam sakchyii kada kaang leipo?

⁶⁴Mpounii Saraago tam kamashyii gonyiinii shiitakle, gonyiinii kadapei maningpo?” Teito ahnyiihangpii Jisu go tei mazhiisu takle, mpou ai taijyii lesii tam takle.

⁶⁵Teito mei kangkanii Jisu gam- kii poktai maswijoitu takle sateichii ahnyiinii mpougo mik pei aitakle ninado baijumsii ahnyiinii tamle, “Tiwolo, tanii n-go lakpo?” Sateichii saryii koikalei mei hangteinii mpougo kaphyiisii pangtakle.

⁶⁶Sateichii Pitarnii kajang kamwi kangto bamsii kalei kak, Tingditupii ki kalei sapwimei ralhiimeinah hangninii gongle;

⁶⁷sateichii Pitarnii mi lumsii kalei tei ngou wosanii mpoupeinii mpougo jusii tamle, “Nangdo Nazaret ki Jisugo kaswi kalei meile.”

⁶⁸Nlenii mpounii tei tei mazhii supii tamle, “Nangnii kadapei tam- leipo katu Inii timakle, kadapeipo katu tido timakle” sii mpounii tamsii kagotki tatpat takle, teisek-kii ruigang kongtakle.

⁶⁹Teito ralhiipei teinii mpougo ngou wosii dato kalei mei dakii nlailoisii tamtu takle, “Mei aipou ai ahnyii kakto mei hangniniile.”

⁷⁰Nlenii Pitarnii mazhiisuloi takle, sateichii shangniikii sousek-kii kuto sat kaleimeinii nlailoisii Pitar dakii tamle, “Kasangpiinii nang ahnyii kaktole, kadapokii nang Galili kito kaleimeile.”

⁷¹“Teito gonyiinii karashii kalei meipfii aigo Inii timakle, sii tamsii mpounii mpouroinapii sheengsii rashii rasat tamtu takle.”

⁷²Sateichii tinglang teisek-kii ruigang teinii hangna kashang tiisii kong takle, sateichii “Ruigangnii kongnakii kasunakii nangnii n-gu mazhiisu tumkii tangle,” sii Jisunii mpoudakii tam kapyii sam tei Pitarnii maning gong takle ninado mpounii tei tei maning gong sek-kii hat tutakle.