Read Maram Naga MARK 3 Bible Online

MARK 3 - Maram Naga bible

MARK 3

¹Teito mpounii Jehudimei mah ndwibamni nlailiit loile, teiki tei bah lamkii katai mei hangninii leile

²Sateichii mpougo kashyii lwikai pyiitang karam jangpiinii ahnyiinii mpougo shoisii jule, mpounii ntak piinei leimik mpougo tii-tii mbipyii lakposii.

³Jisunii bah lamkii tai kaleipii gotei tamle, “Aiki doi patlo,”

⁴sateichii mpounii ahnyii dakii tamle, “Ntak piinei leimik kabi katii mak-kii kashyii katii, mei rangii go keikapyii mak-kii kagi ai ajaipo?” Nlenii ahnyiinii mah kado khesu takle.

⁵Sateichii mpounii ahnyiigo ra-karhii tei njasii ju magui sanii, ahnyii lung katei jangpii swi kamagesii mpou dakii tamle, “Gobah ntaapatlo,” teito mpounii bah ntaa pat takle, ninado mpou-bah tei bitakle, tchii kasulam takum takle.

⁶Teipiinii Farasismei teinii Jehu- dimei mah ndwibamni teito tatpat takle ninado Herotgo manoisek-kii kadousii ahnyiinii Jisugo kada takumpii gitangposii karashiitu takle.

⁷Nlenii Jisunii mpou boumeigo pangsii Galili dwijai kutei tat liit takle, sateichii meimoinii mpou-tai swi wotakle, ahnyiinii Galili kito ninado Judiya kitole,

⁸Jerosalem kito, Idimiya sazyii kito, Jordan sazyii leimik kapatlam tuito ninado Tair nei Sidon namdi longkoi hangkito gongle. Ai meihang ainii Jisuda gongle, kadapokii Jisunii katii hangtei ahnyiinii shiitakle.

⁹Sateichii mei tei moibeidisii Jisunii mpou boumei dakii malyii kacheng hangninii mpou jangpii tiikadalosii tamle, meimoinii mpougo katoklak tang karam jangpii.

¹⁰Kadapokii mpounii mei hangkago tii mbipyii takle, sateichii ranisii kalei meihang teinii mpougo deng tang karam jangpii kabaa leile.

¹¹Sateichii matei kasu rangii kaswi kaleimei hangnii mpougo ngou wosek-kii, mpou doito kouhumsii saale, “Nang Saraa nah sapfii mpou teile.”

¹²Nlenii Jisunii ahnyii dakii teisii kakhatle, “I-tapo katu meida kado tam mati sulo.”

¹³Sateichii Jisunii zang gam khiisii mpounii kamarei mei gotei lat magongle, sateichii ahnyiinii abang- piida gongle.

¹⁴Sateichii mpounii keariisiinakhiigo kalai wole, Abang- piinii ahnyii dakii tamle, “N-gu kaswitang karam jangpii gonyiigo kalai wotakle.” “Inii gonyiigo kabi rasam tam tat matutang karam jangpii lang mpat tangle.

¹⁵Sateichii ara kanimeigo tii ka-mbi ninado sara kashyiigo baatoi katu mah teimaham tei gonyiinii doutangle.”

¹⁶Keariisiinakhii kalai kalumei tei: Simon, (Jisunii mpougo Pitar sii latle,)

¹⁷Zebedi nah sapfii mpou Jems ninado Jon Bonargis, (Sating katwimeinah sii latle)

¹⁸Andru, Filip, Bartholomio, Metiu, Thomas, Alfaiyas nah sapfii mpou Jems, Tadios, Kainan mpfii Simon,

¹⁹ninado mpougo ngou karoumei bah kikii schoi-choikai kapyiipii Judas Iskariotle.

²⁰Sateichii Jisunii ki gongtakle ninado meimoi tei ndwiloi kalu kito Jisu ninado mpou-boumei tei tiigatpii kachii kasak tinglang dousutakle.

²¹Nlenii mpouki kalungmeinii sam- tei shii wosek-kii, ahnyiinii mpougo jumtang karam jangpii tatpat takle, “Dapochiinii mpou ai swibisu taklesii ahnyiinii poi takle.”

²²Jerosalem kito kagongmei ajaitingshang kati ojamei teinii tamle, “Ahnii Beelzabul sarago doutakle, ninado sara kashyii mah aphyii kasatpii mah teimahampii mpounii sara kashyii go baatoile.”

²³Teipiinii ahnyiigo mpouda lat magongsii nda tiisii ahnyii dakii tamle, kada takumpii seitan-nii sei- tan go baatoipei wotangpo?

²⁴Sagong sazyii hangninii ai mpou roinapii njairiit-riit aileponii, tei sazyii tei lungpei lakle.

²⁵Mpung hangninii ai njairiit-riit aileponii, tei mpung tei lungpei lakle,

²⁶teipiinii seitan mah sazyii ai njairiit-riit aileponii, lungpei lakle, nlenii gatu tangle.

²⁷Mei kaniido mei katei kamaham mei ki lung liitsii mpouki mah pot tei soupoitu wolakle mpounii mei kateipii gotei reipii reng peirei kasunii, pei aitaklepokii mpounii ki tei ram wobuile.

²⁸“Inii kasangpii gonyii dakii tam leile, Meinah mah kem hangtei ninado ahnyii mah kama hangteinii kaleipyii wobuile,

²⁹nlenii mei kata kangkanii rangii kamatei go tam kamashyii teinii magasang magapyii lakle; dapokii ahnyiinii kalui tiikasu kem tei tiibam takle.”

³⁰Jisunii ai tamle, dapokii ahnyii mei kangkanii tamle, “Ahnii matei kasu rangiigo kaswi leile.”

³¹Sateichii Jisu pwi ninado mpou sanamei gongle; ahnyii tei ki ka- jangto satsii patlo katupii kilungkii samtei tam maliit takle.

³²Meimoipii Jisugo maguisii bamle, ninado ahnyiinii mpoudakii tamle, “Julo, gopwi ninado gosanameinii n-go ki kajangto fiileile.”

³³Sateichii Jisunii ahnyii dakii khekalatle, “Gu pwi ninado gusa- namei tei tapo?”

³⁴Mpou ku kabam meigo tei ju maguisii mpounii tamle, “Julo, aiki kalei meihang ai gu pwile ninado gusanameile.

³⁵Dapokii Sa- raanii kamaning kamazhii tiisii kalei meihang tei gusanameile ninado gutaipwi meile ninado gu pwile.”