Read Maram Naga MARK 5 Bible Online

MARK 5 - Maram Naga bible

MARK 5

¹Jisu ninado mpou-boumei teinii dwijai lugang kaapatle, Gerasa sazyiiki.

²Jisunii malyii gamto patsek-kii, sara kashyii kapungmei hangninii roubam kito patsii mpougo kadou takle, mei aipou ai sara ka- shyiinii kaswi kaleimeile.

³Mpounii roubam kiteito lungleile sateichii mei kaniido mpougo jumsii sagyii reng- piiniido peiwo lak takle.

⁴Kadapokii mpougo taksupii sagyii rengpii, sagyii rangkatpii pi-bah peile, nlenii mpounii sagyii rangkat tei karek rumrum toi wole, sagyii reng teido paitak wole, meinah kaniido mpougo peiwo kabui tei gatakle.

⁵Mpounii tinghum tingna roubam kito ninado zang gamto hatsii bamle sateichii mpou roinapii mpougo kuitupii kakhiisii bamle.

⁶Sateichii mpounii Jisugo kak dhiihaisii ngoutakle, teito mpounii bapi Jisugo riitale.

⁷Sateichii mpou- nii rok sagoisii saasii tamle, “Kasagoi goisang Saraa nah sapfii mpou, Jisu! Nang n-gu dapei tiileziipo? Saraa zei kito Inii n-go khangleile, n-gu tiikamage seisulo.”

⁸Ahnii ai tamle, dapokii Jisunii tamle, “Kashyii rangii” mei aipou gamto nang tat pat tolo.

⁹Sateichii Jisunii mpougo ka- chyiinhiile, “Gozei tapo?” Mpounii khekalatle, “Gu zeinii Legion (katunii amoi) teitiile.” Dapo- chiinii nyii amoile.

¹⁰Sateichii teiki sazyii pungbang kiteito ahnyiigo baatoisei sulosii mpounii Jisu dato khangle.

¹¹Teiki pungbang teito bak koi hangninii tok-chiisii bamle,

¹²Sa- teichii ahnyiinii mpou dato khangle, “Nyiigo bak dateikii langkai pyiilo sateichii nyiigo bak lungtei maliit seilo.”

¹³Teisek-kii Jisunii ahnyiigo mazhiipyii takle, sateichii bak lungtei liit takle sateichii bak koi thangna kakum teinii taghii kiteito dwijaiki pakliit takle, sateichii dwijai ki teito ngalum takle.

¹⁴Bak kakoipii teinii pak gongsii teiki sazyiikito kalei namdi kitei khiipat kalei nhatei tam takle, sateichii mei moinii pat kalei tei gongsii jule.

¹⁵Sateichii ahnyiinii Jisuda gong sek-kii, sara kashyii kaswi kalei sapfii mpou tei peimani kaiwosii mpou swiki gongsii Jisugo kaswisii kabam tei ngou wotakle; teito ahnyiihang tei hingtakle.

¹⁶Sateichii ngou kalumei hangteinii kashyii rangii ninado bak koi dato pat kalei nha tei meimoida tam takle.

¹⁷Teijangpiinii ahnyiiki pungbang kiteito tat tulosii ahnyiinii Jisu dato khangle.

¹⁸Sateichii Jisunii malyii lung tat kaliit tinglangki, ndou sara kashyii kaswi katupii teinii “N-gudo gotai swimatulosii Jisu dato khangle.”

¹⁹Nlenii Jisunii mazhiipyii su- takle, ninado ahgo tamle, “Go kilam go hemeida nang tat tulo, ninado abangpiinii n-go daziika ngam kadi tiipyii takpo, sateichii dakumpii n-go mpounii lungsyiipyii takpo katu tei ahnyii dakii tam pyiilo.”

²⁰Teito mpounii Dekapoliski maa- sii Jisunii mpou gamkii ngam kadi daziika tiikapyii tei tamle; ninado shiikalu meihangnii madat takle.

²¹Jisunii malyii hoisii dwijai lugang kaapat loile, teiki dwijaiku teito meimoinii mpougo gong bang magui wotakle.

²²Teito Jehudimei mah ndwibamnito apum tiisii kalei mei hangninii Jairus katupii teido gongle; sateichii mpounii Jisugo ngou sek-kii, mpou pibang koumang takle.

²³Sateichii mpou dato lung liit gatsii khangle, mpounii tamle, “Gunah sapwi mpei tei tailesii bam takle. Gong seilo ninado mpoupei phyii- ryiikii go-bah tei kaiseilo mpoupeinii biwo kabui jangpii sateichii ring- kabui jangpii.”

²⁴Teito Jisunii mpougo kaswisii tat tutakle, sateichii meimoi moisang mpou-tai switakle ninado bangbung takle.

²⁵Teito tingkum keariisiinakhii zai humsii kalei lakpwimei hangninii leile,

²⁶peimhii daziika dato jusii kalei kito mpoupei mah kalei hangdo tiimaga aitakle, sateichii bikisupii hungbwi bwitule.

²⁷Mpoupeinii Jisu mah nha tei shiile, sateichii mpoupeinii meimoi kakto Jisutai tatpi mpou-peikaa tei dengtakle.

²⁸Dapokii mpou roinapiinii mpou- peigo tamle, “Inii mpou-peimani tei deng woleponii, Inii biwo buile.”

²⁹Mpoupeinii Jisu mah peikaa tei deng sek-kii, binasek-kii zai tei humsutakle, mpoupei mah pum kito katchii tei bitakle katu tei mpou- peinii tigong takle.

³⁰Sateichii Jisunii mpou gamto teimaham kapat tei tiwosii binasek-kii meimoida n- ryiigongsii tamle, “Tanii gu peimani dengpo?”

³¹Teito mpou-tai kaswimeinii tamle, “Meimoinii n-go bangbungsii kabam tei nangnii ngoule, nlenii tanii n-go dengpo katu nang kadajai takumpii tam leipo?”

³²Teito Jisunii n-nok nryiisii jule tanii dengpo katupii,

³³Nlenii sapwi mpei teinii mpoupei dato pat kalei tei tiwosii mpoupeinii hingsii nchyiidung dungsii pat Jisu doito koumang takle, sateichii kasang matum madum tei tam mpat takle.

³⁴Teito Jisunii mpoupei dakii tamle, “Gunah sapwi mpei, gomah kamalum teipiinii n-go tii mbipyiitakle; ma- jungsii tat tulo, ninado gomah katchii tei bimatulo.”

³⁵Jisunii ai tamleibangpii, Jairus kito sam kapungmei gongsii tamle, “Gonah sapwi mpei tei taitakle. Dajangpii Madhiikapyiipiigo tiika- mageloi tangpo?”

³⁶Nlenii ahnyiinii katam tei tikasu jaitiisii, Jisunii Jehudimei ki kadipii gotei tamle, “Hing sulo, malumpao malumlo.”

³⁷Teito Pitar, Jems sateichii Jems sanapii Jon ahnyii supiinii meikagodo mpou-tai swi matu makle.

³⁸Ahnyiinii Jehu- dimei mah apum tiisii kaleipiiki tei gong sek-kii, swi tiidoulaksii meimoi- nii rok sagusii hat nrungsii mageesii kalei tei ngoutakle.

³⁹Mpounii ki kalung tatliitsii tamle, “Gonyiinii dajangpii swi tiidoulaksii leipo? Da- jangpii hat leipo? Nah ainii taimakle, nlenii zyii ziile.”

⁴⁰Teito ahnyiinii mpougo hoksii nuile, nlenii mpounii meihang go ki kajangkii lang mpat aitakle sateichii nah sapwi mpei-pwi nei Pfii ninado mpou-tai swikaleimeigo kaswisii nah sapwi mpeigo kaikabam nitei tatliit takle.

⁴¹Mpounii nah sapwi mpei bah tei jumsii mpoupei dakii tamle, “Talitha kumi” katunii “Nah sapwi mpei, Inii n-go tam leile, tusat tolo.”

⁴²Teito binasek-kii nah sapwi mpei tei tusat tosii tat tutakle, (mpoupei tei tingkum keariisiinakhiile) teisek- kii ahnyii tei hangkapii sung gatakle.

⁴³Nlenii Jisunii ahnyii dakii hungsii kakhatle, meikukado aisam ai tam sulo, sateichii ahnyii dakii tamle, “Nah sapwi-mpei gotei mah kachiipii pyiichiilo.”