Read Maram Naga MARK 6 Bible Online

MARK 6 - Maram Naga bible

MARK 6

¹Teibam kiteito Jisunii tatpat takle sateichii mpou sazyiiki gong takle sateichii mpou-boumeido mpoutai swileile.

²Sateichii bam ntak piinei leimik tei mpounii Jehu- dimei mah ndwibamni kito ralipyii tutakle; mpougo shiikalu meihang teinii sung gasii tamle, “Mei aipounii aihang ai kada kito dou wopo? Mpougo pyii kabam swirek kabi ai dapeipo? Kamadat tha hang ai mpou-bahpiinii kada takumpiinii tiiwopo?

³Aipou ai tingchem kachempii Meri-nah sateichii Jems, Joses sateichii Simon sung katingpii tei makde? Sateichii mpou-taipwimei hangdo nyiigo kaswisii lunglei makde?” Aitiisii ahnyiinii Jisugo mazhii sutakle.

⁴Sateichii Jisunii ahnyii dakii tamle, “Lungkakalingmei hangninii gotei mpou sazyii kito sateichii mpouki kalungmei ninado mpouki kalungto supii bamlyii hang kito sadzyii ngariit tiile.”

⁵Katchii kanhii mei chengniikii phyiiryiikii mpounii bah poikai pyiisii tii-mbikapyii tei supii teikito mpounii tha kadi hangninii kado tiiwo-lak kiile.

⁶Sateichii ahnyiinii malum kasu tei ngou wosii mpounii hangkapii sung gatakle, sateichii Jisunii nam namki tat maguisii ralipyiile.

⁷Sateichii Jisunii mpou-boumei keariisiinakhiigo lat tosii mei hangna-napii lang mpatle, sateichii sara kashyiigo ngam kabui mah tei- mahamdo ahnyii phyiiryiikii kaipyii takle.

⁸Sateichii koktui hangninii roisupiinii kachii pot, sanah tiikou, sanah tiikou kikii sanah, mah hangninii kado tiibui jangpii pung sulo;

⁹sateichii pi kikii pichot choilo, sateichii paijou hangna njou sulosii Abangpiinii ahnyii dakii kakhat- pyiile.

¹⁰Sateichii mpounii ahnyii dakii tamle, “Gonyiinii tatliit rhiika- lupii ki teito tei nam kito tat-tu kasuta bamlo.

¹¹Sateichii bam kata hangninii kito gonyiigo lukaipyii sudinchiinii mak-kii shiipyii sudin- chiinii gonyiinii bam teiki teito tat kapat tinglang kak, ahnyiigo sakchyii tiikabui jangpii gonyii pi ki buinei tei padumtoi ailo.”

¹²Sateichii ahnyiinii tatpatsii meinii kem kito lungkali kabui kabi rasam tei tam ralipyii takle.

¹³Sateichii ahnyiinii sara kashyii hangkago baatoipyiile ninado katchii kanhiimei hangkago thao manuk pyiisii tii-mbipyiile.

¹⁴Herot sagongnii aihang ai shiitakle, dapokii mei kangkanii tamle, Jon dwi mpumkapyiipii katai kito ringkhii takle, teijangpiinii mpouda ai meinii tiipei kalak tha tiikabui mah teimaham tei leile.

¹⁵Nlenii mei kangkanii tamle, “Ai ai Ilaijahle.” Sateichii mei kakimei teinii tamle, “Ndou ndou karei mah lungkaklingmei hang kak kito, mpou ai Lungkaklingmei hangninii takumle.”

¹⁶Nlenii Herotnii ai ai shiiwo sek-kii mpounii tamle, “Inii Phyiibaa kaleipii, Jon tei ringkhii takle.”

¹⁷Kadapokii Herotnii mei langkai- pyiisii Jon gotei jum wotakle, sateichii kabang kikii rengpeisii kai aitakle, mpou sanapii Philip-nou Herodias jangpii, dapochiinii mpou- nii mpoupeigo manou kalu jangpii.

¹⁸Kadapokii Jon-nii Herot dakii tamle, “Go taikarhiipii nougo manou kalu ai ajai makle.”

¹⁹Teijangpii Herodias teinii mpougo ngoudo ngouroutu takle, gido ginyii takle, nlenii mpoupeinii tiipei wolak takle.

²⁰Dapokii Herot- nii Jon ai mei kabi meile sateichii kamatei meile katu tisii, mpougo hingle ninado keipyiile sateichii mpou-sam shii wosii mpou lung ai lungnyii lunghao kido mpou-sam ai ntasii shiile.

²¹Herodiasnii tinglang kabi ninii doule, Herotnii mpou kangto kalei kadimei ninado Galili kito kadi kathangmeigo lat tosii mpougo kamanaa piinei leimik mah tak baile.

²²Tei tinglangki Herodias nah sapwi mpei teinii tat liitsii takoi tiile, teito Herot ninado mpounii tak-baisii kalei meihang go lung tiisamou pyii takle, teipiinii Sagong Herotnii nah sapwi mpei dateikii tamle, “Nangnii gudato kamarei tei khanglo; Inii n-go pyiitangle.”

²³Sateichii mpounii nah sapwi mpei dakii riishii tiisii tamle, “Nangnii kakhang kata kado Inii n-go pyiitangle, gumah sagong mah sazyii aphang katangdo pyiitangle.”

²⁴Teito nah sapwi mpei teinii tatpatsii mpou-pwi dato n-nhiitakle, “Inii dapei khang tangpo?” teito pwi teinii, “Jon dwi mpum kapyiipii mah phyiibung khanglosii tampyii takle.”

²⁵Nah sapwi mpei teinii kalangsii sagongda nlailiit, “Nangnii Jon dwi mpumkapyiipii mah phyiibung tei kok hangninii kikii kai wosii toisek n-gu kapyii tei Inii mareilesii” khangsii tam takle.

²⁶Teito sagong teinii hangkapii lung kamage takle; nlenii mpoumah riishii jangpii ninado mpounii lat magongsii kabam mei doi teito mpoumah riishii tei tiipakrou takle.

²⁷Manoisek-kii sagong teinii kikalei saryiimei niniigo Jon dwi mpumka- pyiipii mah phyiibung tei baapoi patlosii mwija laatpyiisii lang matu takle; koikalei saryiimei hangninii teinii kabang kilung tei liitsii Jon dwi mpum kapyiipii mah Phyiibung tei baa ndang takle;

²⁸sateichii mpounii kok hangninii kikii poipatsii nah napei gotei pyiitakle, teito nah napei teinii mpou-pwigo pyiitakle.

²⁹Jon dwi mpum kapyiipii mah boumei teinii sam tei shii wosek-kii, ahnyiinii gongsii mpoupum tei poisii rou kikii tiigoi aitakle.

³⁰Sateichii Tiilamlwi kapyiimei teinii Jisuda nlaigongsii ahnyiinii tiikaluhang ninado ralikapyii hang- tei mpou dakii tam takle.

³¹Teito Jisunii ahnyiida tamle, “Patlo, gonyii rangtiisii kamakum bamnito shangniikii ntaklo; dapokii teiki tei meihangka pisii-humsanii ahnyii kachii kasak tinglang katangdo dousu takle.”

³²Sateichii ahnyii tei malyii gam tongsii kamakum bamni tat tutakle.

³³Nlenii meimoinii ahnyiinii tat katu tei ngoule sateichii ta-tapo katu teido titakle; sateichii ahnyiinii namdi kiteito bam teiki katang tei pipii pak gongsii ahnyiinii gongrei wotakle.

³⁴Jisunii malyiilungto pat sek-kii, mpounii meimoi tei ngoutakle, sateichii mpou-lungtei ahnyiigo lungkasyii piinii tokryii takle, dapokii ahnyii tei pum kaga Jaonah takum takle; teito mpounii sam hangka ralipyiitu takle.

³⁵Sateichii leimik riliit sek-kii, mpou-boumeinii mpouda gongsii tamle, “Ai ai kama- kum bamle, toinii tinglang ritakle,

³⁶Pungbang aikito kalei ram ninado namdi ki ahnyiinii maasii kachii pot lyii kabui jangpii ahnyiigo lang matat ailo, sii tam takle.”

³⁷Nlenii Jisunii ahnyiigo kheka- latle, “Gonyiinii ahnyiigo kachii kasak tei pyiilo.” Teito ahnyiinii Jisugo tamle, “Nyiinii maasii sana raguiba haina mai tiirok lyiisii ahnyiigo pyiichiilopo?”

³⁸Teito mpounii ahnyii dakii tamle, “Gonyiida tiirok pang kadazii leipo? maasii julo,” teito ahnyiinii Jisuda tamle, “Tiirok pang mangii sateichii kaa pakna leile.”

³⁹Teito Jisunii ahnyiihang go tamle, ndwi-ndwi tiisii-tampyii ka- madek phyiiryii tei meihang bam matulo;

⁴⁰teito ahnyii tei ndwi ndwi tiisii mei hai haipii, rekngii-ngiipii bam wotakle.

⁴¹Sateichii Jisunii tiirok pang mangii ninado kaa pakna tei poi wosii sating gamkii rajang makhiisii, satoi pyiitakle sateichii tiirok tei tiiraksii mpou-boumei dakii jailosii pyiitakle, sateichii mpounii kaa pakna tei meihang go njaipyii takle.

⁴²Teito ahnyiihang chiisii maghii takle

⁴³sateichii chii kama- sak piinii razyii keariisiinakhii mpou-boumeinii poi nkom wole.

⁴⁴Sateichii teikito chii kalumei tei mei thang mangiile.

⁴⁵Meimoi gotei Jisunii toisii manoisek-kii Jisunii mpouboumeigo malyiiki liit malu wosii Bethsaida lugang mpou-doi reisii tat matutakle.

⁴⁶Meimoi gotei Jisunii tat n-nousii mpounii riita tang karam jangpii zang hangniniiki tat tutakle.

⁴⁷Teito tingkhiilam gong sek-kii, malyii tei dwijai sumto leile, Jisudo sazyii katangki teito mpou roinapii bamle.

⁴⁸Sateichii tingkainii ahnyii doito gwi kagong jang teipiinii ahnyiinii kamage gatsii malyii hoi kalei tei mpounii ngoutakle, tinghum pung madai tinglang doukii mpounii dwijai kadi phyiiryiito pipii tatsii ahnyiida gongle; mpounii ahnyiigo tat maju aine lei takle;

⁴⁹nlenii ahnyiinii mpougo dwijai phyiiryiito pipii tat kalei tei ngousii, “Ai ai mei maa-le” sii maning takle sateichii saale;

⁵⁰dapokii ahnyiinii mpougo ngousii saram takle, nlenii mpounii teisek-kii ahnyiigo tamle, “Lungdilo, I-le, hingsulo,”

⁵¹teito mpounii ahnyiigo kaswisii malyiilung tei tatliit tosek-kii, tingkai tei gwisutakle; teito mpou-boumei teinii khiipat takle.

⁵²Dapochiinii mei thang mangiigo bai kalu mah kasang kaang tei tikasu jangpii, ahnyii swipii tipei wolak takle.

⁵³Ahnyiinii dwijai tei kaa maju- pat tosii Genesaret katu sazyiiki gongle, teito ahnyii mah malyii tei matou aitakle,

⁵⁴Teito ahnyiinii malyii lungto pat sek-kii, meimoinii mpougo titakle,

⁵⁵teipiinii ahnyiinii teiki pungbang hang kito paksii, mpounii kalei bamlyii hang kito katchii kanhiimeigo zyiigamkii peisii mpouda poigongle.

⁵⁶Sateichii mpou- nii katat bamlyii hangki, namdiki todosa, abung kitodosa mak-kii ram kitodosa, ahnyiinii katchii kanhiimei gotei salikijang hang kikii mazyii takle, sateichii ahnyiinii mpoupeikaa katangpiinado deng matu losii khangle, sateichii deng kalumei hangteiniido biwo takle.