Read Maram Naga MARK 7 Bible Online

MARK 7 - Maram Naga bible

MARK 7

¹Sateichii Farasismei ninado ajaitingshang kati ojamei kang- kanii Jerosalem kito gongsii Jisu dateito ndwi wotakle.

²Teito Jisu boumei kangkanii matei kasu katunii bah baitek supiinii tiirok chii kalei tei ahnyiinii ngoutakle.

³(Kadapokii Farasismei ninado Jehudimei hangnii ndou katingmei kanat kanhii taiswisii ahnyii bah ai baitek supiinii mah chiilei makle;

⁴sateichii ahnyiinii salikijangto nlai gongchii, reipii dwi n-goi matei kasuta ahnyiinii mah chiilei makle; teiroi supii kaki kaki jai hangkado ahnyiinii swileile, tei teinii: peek, lee, sagyiikok koklat, ninado zyii shyii kamatei aile.

⁵Teijangpii Farasismei ninado ajaitingshang kati ojamei hang teinii Jisugo n-nhiile, “Dajangpii ndou katingmeinii tam kabam ajai gotei go boumeinii swisupii matei kasu bah teipiinii mah chii leipo?”)

⁶Jisunii ahnyiigo khekalatle, “Lungkakalingpii Isaiyanii gonyii kabijai katiimei mah kaang kito reipii saa ka-mpat tei daziikapii- nii kasangpo, aitiisii ryiikabam takumpii: ‘mei aimeinii mwipii n-gu sadzyii ngariit tiile, nlenii ahnyii lung teinii gudato dhiisii leile,

⁷meinii katii jaitingshang teipii Saraa mah ajaitingshang takumpiinii ralipyiisii matapii ahnyiinii n-gu riita leile.’

⁸Saraanii kakhat kapyii sam teinii toi aisii meinii tiikalu ajai- tingshang gotei gonyiinii swisii leile.”

⁹Teiroi supii Jisunii ahnyii dakii tamle, “Saraanii kakhat kapyii samtam gotei mazhii kalak pwidi kabi tei gonyiinii fii leile, ndou katingmei mah jaitingshang gotei gonyiinii switang karam jangpii.”

¹⁰Kadapokii Moses nii tamle, ‘Gopwi go pfiigo sadzyii ngariit tiilo;’ sateichii ‘kata kangkanii mpou-pwi mpou-pfiigo tam kamashyii mei gotei tai matulo.’

¹¹Nlenii gonyiinii tamle, ‘mei kata hangninanii mpou-pwigo mak-kii mpou-pfiigo, nangnii gudato katung doukabui teinii Korbanle,’ (katunii Saraago pyiitoi takle) leponii;

¹²gonyiinii ah gotei mpou- pwi mpou-pfii jangpiinii mah kado tiimatu sutakle;

¹³ai takumpiinii gonyiinii ndou katingmei mah jaitingshang tei ralipyiisanii Saraa mah samtam gotei tiimaga aitakle, sateichii aikakum kaki kakido gonyiinii hangka tiile.”

¹⁴Sateichii Jisunii meimoi gotei nlailoisii mpoudakii lat magongsii tamle, “Meihang khoiking wolo sateichii tiwolo.

¹⁵Siibato kalei pot teipii meinah lung liit tosii meinah go tiimahong tang karam samah kado gale, nlenii meinah lungto kapat pot teipiinii ahgo tiimahongle.”

¹⁷Teito mpounii meimoi gotei toi aisii kilung liit takle, teito mpou boumeinii ndasam mah kaang tei mpou dato n-nhiile.

¹⁸Teito Jisunii ahnyii dakii tamle, “Gonyiiniido rei timakpo? Mah kata kata kido siibato meinah lung liit kalu tei teipiinii meinah go tiimahongpei wolakle,

¹⁹Dapokii ahnii chiikalu tei malungki liit makle, nlenii mphyii- bungki liitle teitiisii doidoi pum kito siiba pat tule katu gonyiinii timakpo?” (Ai tamkalei aipii, chiitak hang ai matei losii Jisunii tampyii takle.)

²⁰Sateichii mpounii tamle, “Mei- nah lungto kapat teipiinii meinah go tiimahongle.

²¹Kadapokii meinah lung, mei mah malungki teito, kashyii swi ai patsii kashyii tha hang; katu- nii, kashyii kahong tha katii, karaga, meigo kagi,

²²mei-nou meinah-go kachyii, lukanyii, kashyii tha hang, meigo satui sadzyii katii, matei kasu, meigo ngoukarou, mikjot kashyii, tam kamashyii, detkatii, swi kaga,

²³ai kashyii hang ai meinah lungto patle ninado tiimahongle.”

²⁴Sateichii mpounii teikito tat pat tosii Tair ninado Sidon sazyiiki liitle, mpounii kilung niniiki liit takle sateichii mpounii teiki leile katu ai matirou takle, teitii kado mpounii makumpii bampei wolak takle.

²⁵Nlenii manoisek-kii sara kashyiinii kaswi kalei nah sapwimei hangninii pwi teinii Jisu gongleile katu tei shii wosek-kii mpoupeinii Jisu pibang gongsii koumang takle,

²⁶Sapwi mpei tei Sirefenik kito kalung Grikmei pwile, mpoupeinii mpou-nah dato kalei sara kashyii gotei baatoipyii losii mpou dato khangle.

²⁷Teito Jisunii khekalatle, “Nahmei gotei reipii pyii-chiilo, dapokii nahmei tak-tei poisii achyii dakii toikai kapyii tei matou makle.”

²⁸Teito mpoupeinii khekalatle, “Ka- sangle, Bangpii, nlenii achyii teiniido, nahmeinii tak chii nrai kalei tei tak kachii bam kangto matamchiile.”

²⁹Teito Jisunii mpoupeigo kheka- latle, “Nangnii khela kapyii sam jang- teipii, go kilam tat tulo, gonah gam teito sara kashyii tei tat tutakle.”

³⁰Mpoupeinii ki gongtakle, sateichii mpou-nah zyii gamto zyii kalei tei mpoupeinii ngoutakle, kasangpiinii sara kashyii tei mpoupei dateito pat totakle.

³¹Jisunii Tair sazyii kiteito tatpatsii Sidon sazyii sum teito tatsii Dekapolis sazyii lungkoi sumteito Galili dwijai kadi kitei gongle.

³²Teito ahnyiinii khoi kapang ninado lat patpei laksii kalei mei hangninii mpouda pang gongle, sateichii ah phyiiryiikii mpou bah poikaiseilosii khangtakle.

³³Sateichii Jisunii mei- moi kak kito mpougo pangsi takle, sateichii bah jungnapii mpou-khoi kikii dengpyiile sateichii poktai ma- swikaisii mpou-malyii tei dengpyii takle;

³⁴ninado sating gamki rajang matu, chyiidi ngaisii, mpouda tamle, “Ephphatha katunii laat pyiilo.”

³⁵Teito mpou-khoi tei laat takle sateichii mpounii tiigatpii samtei tam tutakle.

³⁶Teito mpounii meida kado tamsulosii tam kakhatle, nlenii mpounii tam sulosii kisii kakhat katu kiteito ahnyiinii kisii tam tutakle.

³⁷Sateichii shiikalumei hangteinii hangkapii sung gatakle, “Mpounii mah hangtei tii tii-mbipyiile sii ah- nyiinii tamle, mpounii khoi kapang meigodo shii matule ninado lat kagamei godo lat pat matule.”