Read Maram Naga LUK 13 Bible Online

LUK 13 - Maram Naga bible

LUK 13

¹Sateichii Galili kito kaleimei- nii Saraago mah kat leibang- pii, Pailatnii ahnyiigo gi kalei kaang kito Jisu dakii tam kaleimei kangkii teitinglang ki sektei leile.

²Sateichii mpounii ahnyiigo khekalatle, “Galili kito kaleimei ainii kamage ai dou kalei aijangpiinii, Galili kito kaleimei hang doito ahnyiinii kisii kem kama katiimei lesii gonyiinii maning leipo?

³Inii gonyii dakii tam leile, makle, nlenii gonyiinii lung kali sulepo- chiinii, tei takumpiinii gonyii hangdo gatu tangle.

⁴Sateichii Silom sazyii kito kalei alaangki teinii koumangsii gi kalei mei keariisiisiisat nkhii tei Jerosalem kito kalei meihang doito kisii kashyii jangpiinii lesii gonyiinii maning leipo?

⁵Inii gonyii dakii tam lei le, makle, nlenii gonyiinii lung kalisu lepochiinii, tei takumpiinii gonyii hangdo gatu tangle.”

⁶Sateichii mpounii ndasam ai tamle, “Mei hangninii mah Darkhati luki kadiitbang hangninii lingkai bamle, sateichii mpounii teiki tei riiti fiigongkii dousu takle.

⁷Teito mpounii riiti lu kajupii dakii tamle, ‘Julo, tingkum tum katang Inii kadiitbang aiki ai ti fiigongkii doumakle, ai bikoulo, ainii dajangpii sazyii tiimagasii mbam tangpo?’

⁸Teito ahnii mpou dakii khekalatle, Madhiikapyiipii, ‘ai ai tingkumdo mbam bamlo, Inii pibang tiimateisii riiba kaijule,

⁹kadiitbang ainii nchoi- kum ti matitu lepochiinii bitakle; nlenii ti mati sulepochiinii, nangnii bitoilo.’ ”

¹⁰Aitoinii Jisunii Jehudimei mah ndwiki hangninii kito ntak piinei leimik ralipyiitu takle.

¹¹Sateichii julo, tingkum keariisiisiisat nkhii kashyii rangiinii tii kamagesii pum n-guisii mpoupei roinapii ntaapeiwo kalak sapwimei hangninii leile.

¹²Sateichii Jisunii mpoupeigo ngouwo sek-kii, mpoupeigo lat tosii tamle, “Sapwi mpei, gomah mage kiteito n-go mpatpyii takle.”

¹³Sateichii mpounii mpoupei phyiiryiikii mpou bah poi- kai pyii sek-kii, tei tinglang sek-kii mpoupeinii ntaa majyiitok wotakle, teito mpoupeinii Saraago toile.

¹⁴Nlenii Jehudimei mah ndwiki teito kadipii teinii Jisunii ntak piinei leimik ra kani tii mbi kapyii jang- teipii samou supiinii meimoi dakii tamle, “Meinahnii tha tiitang karam leimik saruk leile, teijangpiinii teitinglang hang kikii rakani meigo ra tii mbitang karam jangpii gonglo, ntak piinei leimik kitei gong sulo.”

¹⁵Nlenii Abangpiinii mpougo khekalatle, “Kabijai katiimei, gonyii hangnii ntak piinei leimik ki mpou mpou mah twom mak-kii mpou mpou mah takoi tei kakui nito hek mpat tosii, chyiipat dwi pyiisak leimakpo?

¹⁶Julo, sara kashyiinii tingkum keariisiisiisat nkhii peinei kabam Abraham nah sapwi mpei aigonii, ntak piinei leimik kito laat mpatpyii kajyii makpo?”

¹⁷Sateichii samhang ai tamsanii, mpougo mazhii kasumei hang go tii-nroupyii takle; sateikii mpounii tiikapyii kamadat tha kadi hang jangpii meihangnii nta takle.

¹⁸Teijangpiinii mpounii tamle, “Saraamah Sating Sazyii tei kadago reipo? Sateikii Inii kadapeipii poi ka-nda tangpo?

¹⁹Mei hangninanii, njang gaiti lwirou poisii mpou toipyii kikii maroukai kabam njang gaiti lwirou hangninii takumle; sateichii teitei pokpat tosii ruibang takumpii dipat takle, sateichii mpou kha hangkikii sating gam ruinah hangnii mathiit chyiile.”

²⁰Sateichii nlailoisii mpounii tamle, “Saraamah sating sazyii gotei Inii kadapeipii tam ka-nda tangpo?

²¹Teiteinii, sapwimei hangninanii ahee chingniikii poisii atoknui koktok rekdai kikii ryii njasii toupat mbi kasuta poisii kai kalei ahee tei takumle.”

²²Sateichii mpounii nam namki sateichii namdi namdiki tatgong rali- pyiisii mpounii Jerosalem lampang tat tutakle;

²³tei tinglang kak mei hangninanii mpou dakii tamle, “Bangpii keikapyii doutang karam ai mei chingniikii roitangpo?” Teito mpounii ahnyii dakii tamle,

²⁴“Ki takam kamarumki teito tatliit tang karam jangpii tiigat tolo, kadapochiinii Inii gonyii dakii tam leile, mei hangkanii teiki tatliit tang karam jangpii tiitangle, nlenii liitpei lakle.

²⁵Ki Apumpiinii gungtusii ki tei takam sekchii, gonyiinii ki kajangto satsanii ki takam kakhiisii aitiisii tam tangle, ‘Bangpii nyiigo takam laatpyiilo.’ Sateichii mpounii gonyiigo khekalat tangle, ‘kada kito gong leipo Inii gonyiigo timakle.’

²⁶Tei tinglang kak gonyiinii tam tangle, ‘nyiinii godoito chiisii saksii leile sateichii nangnii nyiimah pwidi pwidito ralipyiile.’

²⁷Mpounii tam tangle, ‘Inii gonyii dakii tam leile, gonyii kada tuitopo I-timakle; gudato tat tulo, kashyii tha katii meihang!’

²⁸Gonyiinii Abraham, Isak, Jakob sateichii Saraamah Lungkakalingmei hang go Saraamah sating sazyiiki kabam, sateichii gonyii gonii sabakii rat katoi tei ngou wosekchii, teibam kiteito hatsii ghii kagetrum rumsii bam tangle.

²⁹Sateichii meihang tei leimik kapat lamto, leimik kaliit lamto, longryii lamto ninado lamka lamto gongsii Saraa mah sating sazyii bam kitei bam tangle.

³⁰Sateichii julo, aitoi kanamei teinii reitu tangle, sateichii aitoi kareimei teinii natu tangle.”

³¹Teiki tinglang sek-kii Kabijai katiimei kangkii Jisuda gongsii mpougo tamle, “Bam aikito tatpat tosii tat tulo, kadapochiinii Herotnii n-go ginyiisii bam takle.”

³²Jisunii ahnyii dakii tamle, “Gonyiinii maasii saramii kounah dateikii tamlo, ‘julo, tingneido supou- neido Inii sara kashyii hang go baatoile, sateichii ra kanimei hang go tii mbipyiile; sateichii leimik hang- tum piinei Inii gutha tiimashang tangle.

³³Teitii kido tingneido supouneido sateichii ndoupouneido, Lungkakalingpii goteinii Jerosalem kito supii sabato tiimagatoi kajyii makle.’

³⁴“Lungkakalingmeigo kagi satei- chii gonyii dakii langkai kapyiimeigo kuitupii karot, Oh Jerosalem! Rui- pwinii mpou nahgo kashii kangkii gom kalei takumpiinii, Inii gonah meigo Kadaziikapii gompyii nyiisii leikido gonyiinii mazhii pyii makle.

³⁵Julo, gonyii mah Saraa kamaning ki tei tiimarong takle, sateichii Inii gonyii dakii tam leile, ‘Bangpii zei kito kagongpii tei doibilesii tam kasuta gonyiinii n-gu ngou lakle!’ ”