Read Maram Naga LUK 14 Bible Online

LUK 14 - Maram Naga bible

LUK 14

¹Ntak piinei leimik hangniniiki kabijai katiimei kak kito Apum katiimei hangniniiki kikalungto Jisunii mah chiitang karam jangpii gongle, teito meimoinii mpougo shoisii jule.

²Julo, pi bah mabung bungsii kalei mei hangninii Jisuda gongle;

³teito Jisunii kabijai katiimei sateichii ajaitingshang kati ojamei hang dato n-nhiile, “Nyiimah ajaitingshangnii ntak piinei leimik ra kani meigo tii mbi katu ai mazhii mazhii makpo?”

⁴Nlenii ahnyiinii mah kado khepyii sutakle, Jisunii rakanipii gotei jumsii mpougo tii-mbipyii takle, sateichii mpougo langtoi aitakle.

⁵Teito mpounii ahnyiigo tamle, “Gonyii kakto, nah sapfiimei mak-kii twom madang hangninii ntak piinei leimik ahomki takliit takle pochiinii, gonyiinii ntak piinei leimik sek teikii ahgo chyii mpat lakpo?”

⁶Nlenii ahnyiinii mpougo aikaang kito khekalatpyii peiwo lak takle.

⁷Sateichii sabato kagong siisang- mei teinii bam kabi kasagoi kapai kalei tei Jisunii ngoutakle, teipiinii mpounii meihang dakii ndasam ai tamle,

⁸“Mei kata hangninanii gonyiigo myii kapangmah takbai ki hailosii latchii, bam kabi kasagoi kitei bam sulo, gosung kisii adzyii ka-nroumei hangniniigo mpounii latbam lei kado malahle;

⁹Sateichii n-godo ahgodo kalatpii teinii gong- sanii godakii tam tangle, ‘mei aipougo bam aiki bam matulo,’ teitinglang kak nangnii nrou katupii njasii kasana nasang bam kitei nangnii bamtu tangle.

¹⁰Nlenii n-go meinii latchii, Nangnii kasana nasang bam kitei bamlo teipiinii n-go kalatpii teinii gongchii, ‘kangpo-o! kisii kasagoi bamki tei piseilo;’ sii tam tangle, aipiinii n-go lat magongsii bam kalei mei hang doito adzyii ka-nrou tei tiitangle.

¹¹Kadapo- chiinii mpou roinapiinii mpougo poi sagoisii kalei mei gotei tiisana pyii tangle, sateichii mpou roinapiinii mpougo tiisana sii kaleimei gotei tiimadi pyii tangle.”

¹²Sateichii Jisu godo gonglosii kalatpii goteido Jisunii tamle, “Nangnii tingchoi malot mak-kii tingna nchek pyii kachii kak, go kangmei go taikarhiimei, goki sadung go sateichii ki katiinaniipa kanimeigo latsulo; dapochiinii ahnyiiniido n-go latloi wosii nangnii katii tei rui kalatloi tangle.

¹³Nlenii nangnii takbai kapyii kak, kaga- meigo, kasuimeigo, pi katwimeigo ninado mik kachetmeigo latlo;

¹⁴teitii lepochiinii nangnii doibi tangle, dapochiinii ahnyiinii n-go rui kaleipyii peiwo lakle, Saraa nii n-go rui kaleipyii tangle, mei kabimei hangnii katai kito ring kakhii piinei leimik.”

¹⁵Sateichii mpougo kaswisii mah kachii bam kito kaswisii bam kaleimei hangninanii tam kalei ai shii wosii, mpounii Jisudakii tamle, “Saraa mah Sating Sazyii kito takbai kitei gong chii haitang karam mei tei sadoibile!”

¹⁶Nlenii Jisunii mpou dakii tamle, “Mei kata hangninanii takbai kadi hangninii tiiwosii, mei hangkiigo lat takle.

¹⁷Takbai mah tinglang tei gong sek-kii, mpounii mpou ki kaleimeigo lang mpatsii mpounii lat kabam mei hang gotei tam matule: ‘gonglo; mahlyiihang tiikada bam takle.’

¹⁸Nlenii ahnyii hangteinii adoidoi tiisii maga seilosii khangtu takle, hai kareipii teinii kikaleipii dateikii tamle, ‘Inii lu hangninii lyiibamle, teitei Inii maasii jutu tangle; lungsyiisii n-gu mpat seilo.’

¹⁹Meikaki hangninanii tamle, ‘Inii tha katha twom madang apara-rapii mangii lyiibamle, teitei Inii maa kabi kashyii jumaa tangle, teipiinii n-gu mpat seilo.’

²⁰Mei kaki hangninanii tamle, ‘Inii sapwimei hangninii manou takle; teipiinii Inii gongwo lak takle.’

²¹“Teito Kikaleipii teinii nlai- gongsii, mpou pumpii dateikii sam ai tampyii takle. Teito apumpii teinii rakarhii teipii njasii ki kaleipii dakii tamle, ‘namdi mah pwidi pwidi hangki maasiinii mah kagamei, kasuimei, mik kachetmei sateichii pi bah katwimei hang go tei aiki kalangsii pang gonglo.’

²²Kikaleipii teinii tamle, ‘Bangpii, gomah kakhatsam taiswisii tiitakle, nlenii teitii kido, aitoido-rei bam bamle.’

²³Sateichii Apumpii teinii ki kaleipii dateikii tamle, ‘namdi mah pwidi kadi kadi kito, sateichii pwidi kacheng kacheng kitei maasiinii guki ai tokryii kabui tiisii ahnyiigo gong matulo.

²⁴Kadapokii Inii gonyii dakii tam leile, hai kalumei hangninii kaniido gumah takbai ai masei lakle.’”

²⁵Aitoinii mei hangkanii mpougo kaswisii tat leile, sateichii mpounii nryiigongsii ahnyii dakii tamle,

²⁶“Mei kata hangninanii guda gong takpokii, ah pwi, pfii, nou, nahmei, sanamei, taipwimei sateichii nle, mpou pumgo katangdo nraang sulepochiinii, ahnii gutai kaswimei tiipeiwo lakle.

²⁷Ah mah krosh pung kasu ninado gutai swikasu ah teinii guboumei tiipeiwo lakle.

²⁸“Kadapochiinii gonyii kak kito mei hangninanii ki kasagoi hangninii tiitang karam jangpii raangsii lei lepochiinii, mpounii tiimashangwo kabui jangpiinii sana tei leigapo sii bamsanii amai tei fiiju lakpo?”

²⁹Ahnii teitii sulepochiinii, ahnii ki bangmaa tei tiimatu bam kido ki tei tiimashangpei wolakle; sateichii teitei kangoumei hangnii mpougo hoksii nuitangle.

³⁰Ahnyiinii tam tangle, ‘Mei aipounii tiinii tiimatu tutakle, nlenii tiimashang sule.’

³¹Sagong hangninanii kaki hangniniigo saryii tiitang karam jangpii saryiimei tang kearii pangsii tatpat lepochiinii, mpougo saryii tiitang karam jangpii sagong kaki hangniniipou teinii saryiimei mei tang makai pangsii gong kalai aigo saryii tii tiipeiwo lakpo katu mpounii bampii masak rei lakpo?

³²Saryii tiipeiwo lakle lepochiinii, sagong kakipii mah saryiimei teinii akak dhiileibangpiinii, sampao kapung- meigo langkai siinii hangna kak-kii kamajung tei mbam matu tang karam jangpii khang matu tangle.

³³Tei takumpiinii mei hangninii kaniido gutai kaswimei tiipeiwo lakle, mpou mah kalei hangtei pyiitoi lahok kasuta tei.

³⁴“Athai ai bile, nlenii thai teinii mpoumah kum kabi tei maga aitak lepochiinii, mpou mah kumkabi tei kada takumpiinii douloiwo tangpo?

³⁵Teitei sazyii ranghrii jangpiiniido riiba jangpiiniido kabi mah kado gale; teitei rat toi leile. Shiitang karam jangpii khoi pungsii kaleimei hangteinii shii matulo.”