Read Maram Naga LUK 16 Bible Online

LUK 16 - Maram Naga bible

LUK 16

¹Sateichii mpounii mpou boumei dakiido tamle, “Mah kanimei hangninanii mahbam kaju- mei hangninii kaibamle, sateichii mahbam kajupii teinii mpoumah mah hamtei tiikadaktoi taklesii mpou dakii tam takle.

²Teipiinii mpounii mahbam kajupii gotei lat tosii mpou dakii tamle, ‘Inii go-kaang kito shii kalei ai kada takumpo? nangnii mahbam jukalei hangtei gubah lungkii pyiilo, kadapochiinii nang mahbam kajumei tiipeiwo lakle.’

³Sateichii mahbam kajupii teinii mpou roinapii tamle, ‘Gu pumpiinii gudato mahbam kajubam ai poitoi ai-lepochiinii Inii kadapei tiitangpo? Inii sazyii railekii atei gale, khanglekii nrou takle.

⁴N-gu mahbam kajubam aikito poitoi sekchii, ahnyiinii n-gu ahnyii kikii maliit tang karam jangpii Inii kadapei tiitangpo katu Inii maning bam takle.’

⁵Teito mpou pumpii mah pung kaleimei hang gotei mpou dakii lat magong wosii, mpounii kareipii gotei tamle, ‘nangnii gu pumpii mah kadazii pung leipo?’

⁶Mpounii tamle, ‘thao ralek haikii,’ teito mahbam kajupii teinii mpou dakii tamle, ‘nang ntombam kalangsii rekngii ryii wolo.’

⁷Sateikii mpounii mei kaki hang- ninii dakii tamle, ‘nangnii kadazii pung leipo?’ mpounii tamle, ‘Gihu takou haikii,’ mahbam kajupii teinii mpou dakii tamle, ‘gomah ajhii masak kabam tei poisii reksiisat ryii wolo.’

⁸Teijangpiinii kasang kasu mahbam kajupii mah apumpii teinii mpougo tam matoile tei kakum kasang kasu tha katii jangpiinii; kadapochiinii sazyii pouryii meinah ainii ahnyiimah mah kajumhang kito kisii kasang mak buile kava kito kaleimei tei sung.

⁹Inii gonyii dakii tam leile: gonyiinii sazyii pouryii mah seh sana gotei kang tiilo, gonyiinii taisekchii ahnyiinii gonyiigo kalui gasii lung- tang karam bamniki pang gongsei matu tang karam jangpii.

¹⁰“Tha kacheng kito malum kabuimei tei, tha kadi kitodo malum wobuile, sateichii tha kacheng kito lung matei kasumei teinii tha kadi kitodo lung matei makle.

¹¹Gonyiinii sazyii pouryii mah seh sana jum kalei ai malum wolak lepochiinii, kasang ka- majyii mah seh sana tei tanii gonyii dakii julosii pyiitangpo?

¹²Sateichii gonyiigo meiki mah kiteito malum wolak lepochiinii, tanii gonyii mah tei gonyii dakii pyii tangpo?

¹³“Ki kaleimei hangninanii Apumpii hangna nga ngapeiwo lakle; kadapochiinii mpounii hangniniigo ngourou tangle sateichii hangniniigo lungsyii tangle, mak-kii mei hang- ninii jangpii sat siinii mei hangni- niigo saba tangle. Gonyiinii Saraa nei kani kahii mah nga ngapeiwo lakle.”

¹⁴Sanahgo kamarei, Kabijai katiimei teinii tam kalei hangtei shii wosanii, ahnyiinii Jisugo hoksii nuile.

¹⁵Nlenii Jisunii ahnyii dakii tamle, “Gonyiinii sazyii pouryiimei mik doito kasamsang meilesii tiimangou leile, nlenii Saraananii gonyii lungtei tile; kadapokii sazyii pouryiimei doito poi kasagoi tei Saraa mik doito ngou kasaba teile.

¹⁶“Ajaitingshang katimei satei- chii Lungkakalingmei tei Jon dwi mpum kapyiipii mah tinglangdou katang tei leile, teidouto Saraa mah Sating sazyii mah kabi rasam tei tam ralipyiisii leile, sateichii meihangnii mpou mpoumah kamaning kito pumtei tiile.

¹⁷Nlenii Ajaitingshang kiteito ching kaki agek hangninii poitoi kalei sungnii, Sating nei sazyii tiimaga kalei teiniipou mala buile.

¹⁸“Sateichii mei kata kangkanii mpou nougo n-nou aisii kakimeigo manouwo lepochiinii mashung maha takle, sateichii mei kata kangkanii naago n-nou kalei sapwimeigo manouwo lepochiinii mashung maha takle.

¹⁹“Mah kanimei hangninii bamle, mpou ai peimani kabi mai kateeng kateeng kaisii kasamou tiilung lungsii sating kata bam leile.

²⁰Sateichii agam mataksii kalei mah kagamei hangninii Lazarus katupii tei mpouki takam pibang teito bamle.

²¹Sateichii mpounii mah kanipii mah tak kachii bam kang nrai ka- mang teipii chii maghii-nyiisii bamle, sateichii Achyii niido mpou gam kamatakjam tei maneksii bam leile.

²²“Mah kagapii tei taitakle sa- teichii mpougo Abrahamda kasang- kii Sating gamluinii pangkhii kaipyii takle. Mah kanipii teido taitakle sa- teichii poigoi takle;

²³sateichii mpounii tuk kaki sazyii kangto bamsii hangkapii kamagesii ju matukii, dhiisii Abraham go sateikii mpouda kasangkii Lazarus go ngoule.

²⁴Sateichii mpounii latle, ‘He Pfii Abraham, n-gu lungsyii pyiilo, sateichii Lazarus go lang m-mang mpou bah jungna jungrang teipii dwikikii tousii gu malyiigo tiimakung sei matulo; kadapochiinii Inii mishong aiki aito hangkapii kamagesii bam takle.’

²⁵“Nlenii Abrahamnii khekalatle, ‘Nah sapfii mpou, maning gonglo, katunii gotiilung kito nangnii kabi hangtei doutakle, sateichii Lazarus nii tei takumpii kashyii hangtei dou- takle. Nlenii aitoinii mpounii aikito samousii bam takle, sateichii nangnii kamage dousii bam takle.

²⁶Sateichii teiphyiiryiikii bam aikito gonyiida pat kanyiimeinii patpei kalak, sateichii teibam kiteito nyiida mei kaniido kaamaju peiwo kalak; nyii nei gonyii kak ai ahom kadi hangninii bam takle.’

²⁷Sateichii mpounii tamle, ‘teitii leponii Inii godato khang leile gu pfii Abraham, Lazarus go gu pfii kikii lang magong seilo;

²⁸Kadapo- chiinii gusanamei mei mangii bamle, ahnyiiniido kamage bam aiki ai gong kasu tiisii, mpounii ahnyii dakii tiigatpii sakchyii pyiisei matulo.’

²⁹“Nlenii Abraham nii tamle, ‘ahnyiida Moses ninado Lungkaka- lingmei hangkii leile, ahnyii sam shii matulo.’

³⁰Teito mpounii tamle, ‘tei- makle, Pfii Abraham, nlenii kataimei kakto mei kata kangkanii ring nlaipatsii ahnyiida gong lepochiinii, ahnyiinii lung kali tangle.’

³¹Nlenii Abraham nii mpou dakii tamle, ‘ah- nyiinii Moses ninado Lungkakaling- mei sam tei lukai sulepochiinii, kataimei kakto kata kangkanii ring- khii-ado, ahnyiigo malumwo kabui jangpii hempeiwo lakle.’ ”