Read Maram Naga LUK 17 Bible Online

LUK 17 - Maram Naga bible

LUK 17

¹Sateichii mpounii mpou bou- mei dakii tamle, “Meinahgo kem kama tiimatu tang karam kahem tei gongling tangle, nlenii kahem tiikakaimei tei kadaziikapii kamage tangpo!

²Mpounii nahmei kacheng aikak kito hangniniigo kem kama kikii chyiikai kalei sungnii, mpou kagung kikii kakaryii kuitu kadi hangninii kuikaisii dwijai kikii toikai kalei teinapou bibwile.

³Gonyii roinapii sakai wolo. “Go sanapiinii kem kama tiile- pochiinii mpougo n-gilo, sateikii mpounii lung kali lepochiinii, mpou- go magapyiilo.

⁴Sateichii mpounii tingnei kakii godato kem kama tii sanakii tiikalei kito, goda gong sanakii gong siinii ‘I-lung kali takle’ sii tam lepochiinii mpougo maga- pyiilo.”

⁵Sateichii Tiilamlwi kapyiimeinii Bangpii dakii tamle, “Nyiimah kamalum tei dibui matulo!”

⁶Teito Abangpiinii tamle, “Gonyii- nii njang gaiti lwirou hangninii langkii kamalum tei lei lepochiinii gonyiinii ruibang aigo ‘maa pai mpat tosii dwijai phyiiryiito lungtulo’ sii tamchii, teiteinii gonyii sam switangle.

⁷“Sateichii goki kaleipii teinii lu raksii mak-kii Jao koikaleipii teinii lu kito nlai kagong kak, ‘kalangsii liitlo, bamsii chiitulo, sii mpou dakii tamtang karam mei gonyii kakto ta leipo’?

⁸Tei tungpii, Inii chii tang karam jangpii nang tiikadalo; ‘Inii chii sang sak sang kasuta gu nga ngalo, tei tainii chii sak losii mpou dakii tam lakpo’?

⁹Mpounii kakhatsii katam tei kikaleipii teinii katii kapung jangpii mpougo hakalang tam leipo?

¹⁰Tei takumpiinii gonyii dakii kakhat kabam hangtei tiisang takle sekchii, ‘nyiinii samah kado kasu kikaleimeile; nyiimah tii kamajyii tha tei nyiinii tiitakle sii gonyiinii tamlo.’ ”

¹¹Jisunii Jerosalem tat kaliit tinglang kak, mpounii Samariya sateichii Galili kak tat liitle.

¹²Sateichii mpounii nam hangniniiki tat kaliit kak, mpara tiisii kaleimei kearii akak dhiisii kasat tei mpounii kadou takle.

¹³Sateichii ahnyiinii lat sagoisii tamle, “He Pumpii Jisu, nyiigo lungsyii pyiilo!”

¹⁴Mpounii ahnyiigo ngouwo sek-kii, mpounii ahnyii dakii tamle, “Gonyiinii maasii kanat kajum Atingmeigo mangoulo.” Teito ahnyii- nii pwidi lamto tat leibangpii, ahnyii mah ra katii tei biwo takle.

¹⁵Sateichii ahnyii kak kito mei hangninanii mpou gamtei biwo takle katu tei ngouwo sek-kii, mpounii nlaigong rok sagoisii Saraago toile.

¹⁶Mpounii Jisu pibangto koumangsii Jisugo hakalang tamle, sateichii mpounii Samariyameile.

¹⁷Teito Jisunii tamle, “Inii keariigo tii mbi- pyii makde? sokchyii teinii kadaki leipo?

¹⁸Kaki lui aipou supiinii nlaigong Saraago tam matoi tang karam dousu takpo?”

¹⁹Teito Jisunii mpou dakii tamle, “Tusat tosii tat tulo, gomah kamalum teipiinii n-go tii mbipyii takle.”

²⁰Kabijai katiimei kangkanii Saraamah Sating sazyii tei kadadou gong tangpo sii Jisu dato n-nhiile. Mpounii ahnyiigo khekalatle, “Sa- raamah Sating sazyii teinii tikabui tiisii kasiiti tiisii gong lakle.

²¹Sateichii ‘julo, aiki leile!’ mak-kii ‘teiki leile!’ sii ahnyiinii tam lakle, kadapochiinii Saraa mah Sating sazyii teinii gonyii lungki teito leile.”

²²Teito Jisunii mpou boumei dakii tamle, “Tinglang hangtei gong leitakle gonyiinii meinah Sapfii mpoumah leimik hang kito tingneikii leimik ngoukainyii tang karam tei, nlenii gonyiinii ngoulakle.”

²³Sa- teichii ahnyiinii gonyiigo tam tangle, ‘julo, aiki!’ mak-kii ‘julo, teiki leile!’ nlenii maado maa sulo, ahnyii taido swisulo.

²⁴Kadapochiinii sating kapeek sek-kii bam hangninii kito kakilam va katu takumpiinii gong tangle.

²⁵Nlenii mpounii kamage kalak hangkapii pung tangle satei- chii mei ai-ha ainii mpougo mazhii lakle.

²⁶Noha mah tinglang kak ki takumpii nii, Meinah Sapfii mpou mah tinglang kak kitei tei takum tangle.

²⁷Noha nii Malyii lung tat kaliit piinei katang tei, meihangnii chiisii saksii sapwimei sapfiimei kanoulotsii bamle; sateichii dwidi gongsii ahnyiihang go tiimaga aile.

²⁸Tei takumpii Lot mah tinglang kak kitei, ahnyiinii chiile, sakle, ahnyiinii lyiile, ahnyiinii joile, sateichii tiimakhiile.

²⁹Nlenii Lotnii Sodom kito tat kapatpiinei leimik sating gamto mipii sateichii tingtang katii- pii tingryii takumpii ryii m-mangpyii siinii kalei kagago tiimaga aile.

³⁰Meinah Sapfii Mpougo kamangou piinei leimik teitakum tangle.

³¹“Teipiinei leimik, kangkanii ki kapouryii gam kalei sateichii mpou pot teinii ki kalung kalei tei hum poi matu sulo; sateichii lu kito kalei ah teiniido tei takumpiinii nlaigong matu sulo.

³²Lot nou gotei maning gonglo!

³³Kata kangkanii mpou karing dounyiisii fii kaleimei teinii teitei maga tangle, nlenii mei kata kangkanii mpou mah karing tei maga ai-lepochiinii karing tei doutangle.

³⁴Inii gonyiigo tam leile, teipiinei tinghum mei hangna zyii- gam zyii tangle, hangniniigo poiwo tangle, sateichii hangniniigo kaibam tangle.

³⁵Sapwimei hangna kaswisii atii toutangle; hangniniigo poiwo tangle, sateichii hangniniigo kaibam tangle.

³⁶Lubam kito mei hangna tha tiisii leitangle: hangniniigo poisii tutangle, hangniniigo masakdek tangle.”

³⁷Teito ahnyiinii mpou dato n-nhiile, “Bangpii kada kipo?” mpou- nii ahnyii dakii tamle, “Katai pum kalei nitei, kalaangdo ndwisii leitangle.”