Read Maram Naga LUK 18 Bible Online

LUK 18 - Maram Naga bible

LUK 18

¹Sateichii ahnyiinii taksupiinii riita tang karam ninado lung tailak tang karam jangpii mpounii ahnyii dakii ndasam hangninii tamle.

²Mpounii tamle, “Namdi hangniniiki Saraago hing kasu sateichii meigo sadzyii ngariit tii kasu samtak katiimei hangninii leile.

³Sateichii teinam kitei kamipwimei hangninii leile, sateichii mpoupeinii mpouda gongjat-jatsii, ‘N-gu ngoukaroumeigo samtak tiipyiilo’ sii khangle.

⁴Ting- lang shangniikii katang tei mpounii mazhiipyii sutakle; nlenii tei tainii mpounii mpou lung kito tamle, ‘Inii Saraago hingsu kado sateichii meigo sadzyii ngariit tiimak kado;

⁵Ka- mipwipei ainii n-gu tiimachangsii kalei aijangpiinii, mpoupeinii gong- sang gongsii n-gu tiimachang lak tang karam jangpiinii, Inii mpoupei mah sam tei tiipyii aitang takle.’ ”

⁶Sateichii Abangpiinii tamle, “Kachui samtak katiipii teinii kadapei tam leipo shiilo.

⁷Sateichii Saraa dato tinghum tingna khangsii kaleimei, kalai kalu ahnyii jangpii mpounii shiipyii lakpo? Mpounii ahnyiigo tiiha kalang lakpo?

⁸Inii gonyii dakii tam leile, Mpounii ahnyii jangpii kalangsii tiiha tangle. Nlenii Meinah Sapfii Mpou teinii kagong tinglangki Sazyii pouryiito kamalum tei doutangpo?”

⁹Sateichii nyiinii kasang kamajyii katiimeile ninado mei kaki mei hang teinii samah kado maklesii mpou roinapiinii mpougo kamalum mei kangkii dakii mpounii ndasam aido tamle:

¹⁰“Mei hangna Saraa Kama- ning kilung riita tang karam jangpii tatpile, mei hangninii tei Kabijai katiimeile sateichii mei hangninii poutei ha kahamei hangniniile.

¹¹“Kabijai katiipii teinii tusatsii mpou roinapiinii aitiisii tamle, ‘Oh Saraa, Inii n-go halangle, kadapo- chiinii Inii meimah lunyii leimakle, sachoi saru pung leimakle, mashung maha leimakle; mak-kii aha-hakalei aipou takumdo leimakle.

¹²Inii jang sananii lung kito malotryii nakii leile, Inii dou kalu mahlyii hangtei njai kearii kito njai hangninii tei pyii leile.’

¹³“Nlenii ha kahapii teinii dhiisii satainii, sating gamkii mpou mik katangpii jumatu makle, nlenii mpounii takou byiisii tamle, ‘Oh Saraa, kem kama katiipii n-gu lungsyii pyiilo!’

¹⁴Jisunii tamle, Inii gonyii dakii tam leile, mpounii ki gong katu kak Saraa doito kasang kamajyii katii teinii aha-kahapii tei supiinii kabijai katiipii teimakle. Kadapochiinii mei kata hangninanii mpou roinapii mpougo poi kasagoi meihang gotei tiisanapyii tangle. Sateichii mei kata hangninanii mpou roinapiinii mpougo poi sana lepo- chiinii, poi sagoi pyii tangle.”

¹⁵Teito Jisunii bah poikai pyii matu tang karam jangpii ahnyiinii nahmei kachengmei gotei mpouda pang gongle; sateichii mpou boumeinii teitei ngou- wo sek-kii ahnyiigo n-gile.

¹⁶Nlenii Jisunii lat tosii tamle, “Nahmei kachengmei gotei guda gong matulo; kadapochiinii Saraa mah Sating Sazyii tei ai kakum mei mahle.

¹⁷Inii gonyii dakii tam leile, nahmei kachengmei takumpiinii Saraa mah Sating Sazyii gotei lukai kasumei teinii teiki tei liitsang liitpeiwo lakle.”

¹⁸Sateichii Jihudimei mah Apum katiimei hangninanii Jisu dato n-nhiile, “Kabi Madhiikapyiipii, Kalui kaga karing tiilung doutang karam jangpii Inii kadapei tiitangpo?”

¹⁹Teito Jisunii mpou dakii tamle, “Nangnii n-gu kabipii sii kadajangpii lat leipo? Mei kado bimakle, nlenii Saraa roiniile.

²⁰Saraa mah kakhatsam hangtei nangnii tile, katunii; ‘mashung maha sulo, gopwi go pfii go sadzyii ngariit tiilo.’ ”

²¹Teito mpounii tamle, “Matum madum ai Inii tiina kaleidouto majai takle.”

²²Sateichii Jisunii teitei shii wosii, Jisunii mpou dakii tamle, “Nangnii kaangkii tiitang makle rei. Gomah kalei hangtei joitoilo sateichii mah kagameigo pyii ailo, teito nangnii sating gamto mah kani kahii tei bam tangle; sateichii patlo, gutai swilo.”

²³Nlenii mpounii sam ai shii sek-kii, mpou ai lung kamagetu takle, kadapochiinii mpou ai hangkapii mah kanimeile.

²⁴Jisunii mpougo jusii tamle, “Mah kanimei teinii Saraa mah Sating Sazyiiki liit tang karam tei kadaziikapiinii hungpo!

²⁵Kadapochiinii mah kanimei hangninanii Saraa mah Sating Sazyiiki liit tang karam sungnii poutungki kounah hangninanii mahum mi kachet lung kito joupat kalu niipou mala buile.”

²⁶Sam tei shii kalumei teinii tamle, “Teitii lepochiinii keikapyii tei tanii douwo buipo?”

²⁷Nlenii mpounii tamle, “Meinah nii tiipei wokalak tei Saraananii tiiwo buile.”

²⁸Sateichii Pitarnii tamle, “Julo nyiinii ki hamtei toisii gotai swiwo takle.”

²⁹Sateichii mpounii ahnyii dakii tamle, “Kasangpii Inii gonyii dakii tam leile, Saraamah sating sazyii jangpii, ki mak-kii, nou, mak-kii taikarhiimei, mak-kii pwi pfiimei, mak-kii nahmei hang gotei toi ai-lepochiinii,

³⁰ahnii tinglang aikito njai moikisii sateichii gong tang karam kiteito kalui kaga karing tiilung tei doutangle.”

³¹Sateichii mpounii keariisiinakhii gotei poitaam wosii, ahnyii dakii tamle, “Julo, nyii Jerosalemki tatpi leile, sateichii Meinah sapfii mpou jangpii lungkakalingmeinii ryii kabam hangtei madou gong tang takle.

³²Kadapokii mpou gotei luikakimei dakii pyiitoi aitangle, mpougo hoksii nuitangle, kalet kalou tiitangle sa- teichii mpou gamkii poktai maswijoi tangle;

³³sateichii lak lakpyiisii gitangle, ninado leimik hangtum kashang piinei mpounii ringkhii tangle.”

³⁴Nlenii tam kalei samkang hang ai ahnyiinii hangninii kado tisu takle, tam kalei ai ahnyii dato poi kabai ai takle, sateichii tam kalei tei ahnyiinii tipeiwo lak takle.

³⁵Jisunii Jeriko namdiku tat kaliit tinglang kak, mik kachetmei hangninii mah ha chiisii pwidi kuto bamle.

³⁶Sateichii meimoinii tat kalei khoitei shii wosii, mpounii n-nhiile, pat kalei ai kadapeiposii.

³⁷Ahnyiinii mpougo tamle, “Naza- ret ki Jisu tat gong leile.”

³⁸Teito mpounii rok sagoisii saale, “Devit nah sapfii mpou Jisu, n-gu lungsyii pyiilo!”

³⁹Sateikii doi kareimei teinii malhii sulosii mpougo n-gile; nlenii mpounii kisii rok sagoisii saa tutakle: “Devit nah sapfii mpou, n-gu lungsyii pyiilo!”

⁴⁰Teito Jisunii sat takle, sateichii mpou gotei mpouda pang gonglosii kakhat takle; sateichii mpounii da pimanang sek-kii, mpougo n-nhiile,

⁴¹“Inii gojangpii kadapei tiikapyii maraipo?” Mpounii tamle, “Bangpii, n-gu mik ngou matulo.”

⁴²Teito Jisunii mpou dakii tamle, “Go mik ngou wolo, gomah kamalum teipii n-go tii mbipyii takle.”

⁴³Sateichii binasek-kii mpounii mik ngouwo takle, sateichii Saraa mah pumtei kava tei tamsii Jisutai swiwo takle; sateichii meihangnii ai ngou wosii Saraago tam matoile.