Read Maram Naga LUK 19 Bible Online

LUK 19 - Maram Naga bible

LUK 19

¹Jisunii Jeriko namdiki liitle, sateichii tei kito tat majupat takle.

²Sateichii julo, zei Zakaiyas sii kalat ha kahamei kakto phyii kasat sapfiimei hangninii leile; sateichii mpou ai mah kanimeile.

³Sateichii mpounii Jisu tei tapo katu jutang karam jangpii tiile, nlenii meimoi beidi kalei jangpiinii mpou tei ngousu takle, dapochiinii mpou ai pu duile.

⁴Teijangpii mpounii doi pakpat reiwosanii, mpougo jutang karam jangpii mviitibang hangniniiki mpottu wotakle; kadapochiinii mpounii teiki pwidi kitei tatpat leziile.

⁵Sateichii Jisunii teibam kitei gong sek-kii, rajang makhiisii mpou dakii tamle, “Zakaiyas kalangsii hum wolo, kadapochiinii tingnei I-goki bam tang karam takle.”

⁶Teito mpounii hum kalang wosa- nii, mpougo nta ntasii lukai wotakle.

⁷Sateikii teitei ngouwo sek-kii, ahnyii meihangnii manam maraang- sii, “Mpounii kem kama katiimei hangniniiki rhiitang karam jangpii tatliit takle sii tamle.”

⁸Teito Zakaiyas nii gungtu sat tosii Bangpii dakii tamle, “Julo Bang- pii, gumah kaleihang kito aphang ai Inii kagameigo pyiile, sateichii Inii mei kata hangninii mah satui sadzyii tiisii poiwo lepochiinii, njai madai ai Inii kalei pyiile.”

⁹Teito Jisunii mpou dakii tamle, “Ki aiki ai tingnei leimik kaleikapyii kasaga tei gong takle, kadapochiinii mpoudo Abraham nah sapfiimei hangniniile.

¹⁰Kadapochiinii meinah sapfii mpou teinii maga kalei gotei fiitang karam jangpii gongle.”

¹¹Teito sam hang ai ahnyiinii shii leibangpii, mpounii ndasam hang- niniido tamle, kadapokii mpounii Jerosalem namdiki manangpi lei- takle, sateichii Saraa mah Sating Sazyii tei kalangsii ngoutu tang taklesii ahnyiinii maningle.

¹²Tei- jangpiinii mpounii tamle, “Apum hangkengmei hangninanii mpou jangpii sagong sazyii hangninii dou wosii nlaigong tang karam jangpii, sazyii kadhii hangniniiki tat tutakle.

¹³Sateichii mpounii mpouki kaleimei keariigo lat tosii, ahnyii dakii sana raguibagyii kearii pyii siinii tamle, ‘Inii nlaigong kasuta aipiinii poisii ali-ala tiilo.’

¹⁴Nlenii mpou sazyii kito kaleimei teinii mpougo ngou karou jangpii, sampao kapungmei hangniniigo mpou taikii langkai pyiisanii, sapfii mpou aipou ainii, ‘nyii phyiiryiito sagong kapung ai nyiinii marai makle’ sii tam takle.

¹⁵“Sateikii mpounii sagong sazyii tei dou wosii nlai kagong kak, mpounii sana pyii kabam mei teinii ali-ala tiisii kadaziikii tiimadi tiimathang takpo katu titang karam jangpii, ahnyiigo mpou dakii lat magong matu tang karam jangpii mwija pyiitakle.

¹⁶Teito kikaleipii kareipii teinii, mpou doi patsanii tamle, ‘Bangpii gomah sana ragui- bagyii teiteipiinii sana raguibagyii kearii doukiwo takle.’

¹⁷Teito mpounii ah dakii tamle, ‘hangkapii bitakle, kikalei kabipii, nangnii mah kacheng go kamalum jangpiinii, Inii n-go namdi keariigo kaju mah teimaham tei kaipyii tangle.’

¹⁸Sateichii hangna kashangpii teinii patsii tamle, ‘Bang- pii gomah sana raguibagyii teipiinii sana raguibagyii mangii douki wo- takle.’

¹⁹Teito mpounii ah dakii tamle, ‘Nangnii namdi mangiigo jutangle.’

²⁰“Sateichii kikalei mei kaki hangninanii patsii tamle, ‘Bangpii, gomah sana raguibagyii tei Inii pei- rapii kajyiisii kaibamle.

²¹Kadapokii Inii n-go hingle, kadapochiinii nangnii rai kashyiimeile, nangnii gomah kasu tei poile sateichii nangnii ralikai kasu teido rachetle.’

²²Mpounii ah dakii tamle, Nang kikalei kashyiipii, gomwi kito kapat teipii Inii n-go samtak tiitangle, ‘I-ai kaikashyii meile, gumah kasu hangtei poi leile katu sateichii Inii ralikai kasu tei rachet leile katu nangnii tidile.

²³Teitii lepochiinii teitei amee njasii Inii poi ndwiwo kabui jangpiinii, datiisii nangnii sana kasapok nikii kai ai makpo?’

²⁴“Teito mpounii da sat kaleimei dakii tamle, ‘Ah dato sana ragui- bagyii tei poisii sana raguibagyii kearii kaleipii gotei pyii ailo.’

²⁵Teito ahnyiinii mpou dakii tamle, ‘Bangpii mpounii sana raguibagyii kearii bamle!’

²⁶‘Inii gonyii dakii tam leile, kabam meihang dakii kisii pyii- tangle, nlenii kagamei dateito mpou mah kabam hang teido poitoi aitangle.

²⁷Nlenii ahnyii phyiiryiito Inii sagong kapung go marai kasu n-gu ngou karoumei hang gotei, aiki pang gongsii gudoito gi ailo.’ ”

²⁸Sateichii mpounii sam ai tam kaleitai, Jerosalem ki pitang karam jangpii ahnyii doi reitakle.

²⁹Olip sii kalat zang gamto kalei Betpage satei- chii Betani namki mpounii pimanang sek-kii, mpounii mpou boumei hang- nago aitiisii tamsii lang mpatle:

³⁰“Gonei doito kalei ranam kitei tat- liitlo; goneinii teiki tei tatliit sekchii, mei kaniido tongsang tongkasu takoinah hangninii reng kuikabam tei ngoutangle; teitei hek wosii aiki baagonglo.

³¹Sateichii mei kata hangninanii ‘goneigo ai kadajangpii reng hek ziikhe?’ sii n-nhii lepochii- nii, goneinii aitiisii tamlo, ‘Abangpiinii aigo maraile.’ ”

³²Teito langkai kabam mei teinii maasii, mpoupiina dakii tam kabam takumpiinii doutakle.

³³Sateichii mpoupiinanii Takoi-nah go tei reng hek leibangpii, takoi mah Apumpii teinii mpoupiina dakii tamle, “Goneinii takoi-nah ai dajangpiinii ring hek mpat leipo?”

³⁴Teito mpoupiinanii tamle, “Abangpiinii aigo maraile”

³⁵Sateikii mpoupiinanii Takoi-nah tei Jisuda baagong takle, Takoi-nah gam teikii ahnyii pei tei kam wosii Jisugo tong malu takle.

³⁶Sateichii mpounii aitiisii tongsii kagong kak, ahnyiinii ahnyii pei tei pwidikii kampyii takle.

³⁷Aitoinii mpounii Jerosalem ki pi manang sek-kii, kalei kaga hangnii mei tiikalak tha kadi hangtei ngou kalu jangpiinii nta tutakle, sateichii rok sagoisii Saraago tam matoisii tamle,

³⁸“Bangpii zei kito gong kalei sagong tei doibile! sating gamto kamajung teilo, sateichii sagoi kaki pumtei kava teilo!”

³⁹Sateichii meimoi kak kiteito Kabijai katiimei kangkanii mpou dakii tamle, “Madhiikapyiipii, go boumeigo n-gilo.”

⁴⁰Teito mpounii khekalatle, “Inii gonyii dakii tamleile, ahnyiihang ainii malhii sulepochiinii, kuitu hang teinii saa mpat tangle.”

⁴¹Sateichii mpounii pi manang sek-kii, namdi tei ngou wosii, teijang teipii hatsii tamle,

⁴²“Nangnii tingnei leimik lungkii nang sekpiinii, kamajung tha tii kalei tei tiwo lepochiinii! Nlenii aitoinii go mikjot kito teitei kabai aisii bamtakle.

⁴³Kadapochiinii ai kakum tinglang leimik hang ai gong tang takle, katunii, n-go ngou karoumei teinii nangnii kabam bang hangtei pwidi makatsii n-go bangneiwo tangle, sateichii ska madaito bang neiwo tangle.

⁴⁴Sateichii n-go ninado godato kalei gonahmei hang gotei sazyiikii tiikou tangle; sateichii go lungto kabam kuitu hangninanii hangninii phyiiryii kashoisii ahnyii- nii kaibam lakle. Kadapochiinii n-go mik hoi jukapyii tinglang tei nangnii tipyii makle.”

⁴⁵Sateichii mpounii Saraa kama- ning ki lungtei liitsii mah joi kaleimei gotei baatoi tutakle.

⁴⁶Ahnyii dakii tamle, Aitiisii ryiibamle, “guki tei kariita ki hangninii tiitangle. Nlenii gonyiinii teitei karagameinii ka-mbei ki hangninii tii aitakle.”

⁴⁷Sateichii mpounii Saraa kama- ning kito sating kata tam ralipyiile. Sateichii kanat kajum tingdimei, ajaitingshang kati ojamei sateichii phyii kasatmeinii mpougo gitang karam pwidi fiitu takle.

⁴⁸Nlenii ahnyiinii tiitang karam pwidi hang- ninii kado gatakle, kadapochiinii mei hang teinii mpougo lung liitsii shiile.