Read Maram Naga LUK 2 Bible Online

LUK 2 - Maram Naga bible

LUK 2

¹Teitinglang dou aitiisii pat takle; sazyii pouryiimei hangmah meilui fiilosii sagong Kaisor Agastas dato mwija pat takle.

²Ai Meilui fii karei tinglang kaktei Koirinees katupiinii Sairiyia sazyii kito Gover- nor pung leile.

³Sateichii meihang teinii zei pyiitang karam jangpii mpou mpou namki gongtu takle.

⁴Sateichii Joseph teido Galili kito kalei Nazaret namdi kiteito, Judiya sazyii lungto kalei, Devit nam namdi Bethlehem sii kalat nitei tat pile, kadapochiinii mpou ai Devit mah atat areng sateichii kalungmei patle.

⁵Mpou kikii n-nhiitak kaleipei, moi mpung kaleipei Merigo kaswisii zei kaitang karam jangpii tat tutakle.

⁶Teito ahnei hangnanii Bethlehem kito kalei kak-kii, nah kamanaa ting- lang tei mpoupei jangpii gongtakle.

⁷Sateichii mpoupeinii nah narei sapfiimei hangninii manaa takle, sateichii mpougo peirapii kajyiisii, twom kokchyii kikii mazyii takle; dapochiinii siisang karhiini tei ahnyii jangpii bam gatakle.

⁸Sateichii teiki pungbang ki teito, Jao kakoimei hangkii lu kiteito zyiipii ahnyii Jao gotei koisii bamle.

⁹Sateichii Bangpii mah pumtei kava teipii ahnyii phyiiryiikii vapyii takle; teito ahnyiinii hangkapii hingtakle.

¹⁰Nlenii sating gamlui teinii ahnyii dakii tamle, “Gonyii hingsulo, dapochiinii julo, sazyii pouryiimei hang jangpii gong tang karam hangkapii ka-nta kabi rasam tei Inii gonyii dakii pung gong leile.

¹¹Kadapochiinii tingnei leimik Devit namdi kiteito gonyiigo Keikapyiipii Bangpii Krista tei manaa takle.

¹²Sateichii gonyiigo tiikamangou siiti tei aipiinii tiimangou tangle: nah gotei peirapii kajyiisii kokchyii lungkii mazyii kabam tei gonyiinii ngoutangle.”

¹³Sateichii binasek-kii sating gamluimah saryiimei hangteinii humsii Sating gamlui gotei kaswisii, lhii tiisii Saraa go tam matoile. Sagoi kaki Sating gamto kalei Saraa go toile:

¹⁴“Sagoi kaki kiteito Saraago toilo, sateichii Sazyii pouryiito bangpiinii lungkasyii meihang teinii kamajung tei doulo!”

¹⁵Sating gamlui teinii ahnyiigo toisii Sating gam pitu sek-kii, Jao kakoimei teinii hangni hangninii dakii tamtu takle, “Nje, nyiinii Bethlehem ki maasii, nyii dakii bangpiinii mati mangou kapyii, pat kalei sam ai jule.”

¹⁶Sateichii ahnyii tei kalangsii tat tutakle, sateichii Meri nei Joseph sateichii nah tei kokchyii lungkii mazyii kabam tei ahnyiinii ngou- takle.

¹⁷Teito Jao kakoimei teinii mpougo ngouwo sek-kii, Rangii Kamateinii Nah mah kaang kito tam kapyii sam hangtei ahnyiigo tam mangou takle.

¹⁸Jao kakoimeinii katam samtei shii kalumei hang teinii sung gatakle.

¹⁹Merinii aihang ai maning gongle sateichii teihang tei mpoupeinii lungto hungsii maningle,

²⁰Jao kakoimei teinii lhii tiisii Saraa go tam matoisii kilampang nlaitu takle, dapochiinii sating gamluinii ahnyiigo tam kapyii takumpii ahnyiinii shiitakle sateichii ngoutakle.

²¹Sateichii jang sananiitai Jihu- dimei kanat taiswisii Nah gotei tiigyii malem takle sateichii mpougo mpung kasunato sating gamluinii zei tak kapyii takumpii, Mpougo JISU sii zei tak ai takle.

²²Moses mah kakhat kapyii samtam taiswisii Joseph nei Meri jangpii Tiimatei tang karam tinglang tei gong takle, teipiinii ahneinii nah gotei Bangpii dakii pyiitoi tang karam jangpii Jerosalem ki pangpile.

²³Bangpii mah Ajaitingshang kikii ryii kabam takumpii: “Nah sapfiimei lung karei hangtei Bangpii mah tiimatu tangle.”

²⁴sateichii Bangpii mah ajaitingshang kikii ryii kabam taiswisii “Mahao ahwi-arangh hang- ninii mak-kii sararuinah anah hang- nado poigongsii karatle”

²⁵Teitinglang kak mei hangninii Simion katupii ai Jerosalem ki lung leile; mpou ai Isrelmei lung tei tiisamoupyii tang karam go koisii, Saraa go kati, kasang kamajyii tiisii kalei mei hangniniile, sateichii rangii kamateinii mpougo kaswi leile.

²⁶Sateichii mei teipou teinii Bangpii mah Kristago mpou mikpii ngou kasuta mpounii katai katu tei ngoulak lesii Rangii Kamateinii mati mangoupyii takle.

²⁷Sateichii rangii kamateinii chyiitat pyiisii, Simion ai Saraa kamaning kilung liit takle, sateichii Apwi nei Apfii teinii, Ajaitingshang taiswisii Nah gotei Saraa Kamaning Kilung pangliitle.

²⁸Sateichii Simion teinii nah gotei mpoubah lungkii poisii Saraa go hakalang tamle:

²⁹“Bangpii, nangnii riishii tiikadek tei madou gong kalu taiswisii, aitoinii, goki kaleipiigo majungsii tat matulo.

³⁰kadapochiinii luihang doi kikii nangnii tiida kapyii,

³¹Gomah kalei kapyii kasaga tei Inii gu mik sekpiinii ngoutakle:

³²Nangnii lui kakimei hang dakii gomah kamaning kamarei tei mangoutang karam jangpii, kava hangninii sateichii Gomei Isrelmei lui mah pumtei kava tei tiipyiile.”

³³Sateichii mpou pwi nei mpou pfiinii nah kaang kito Simionnii katam samtei shiisii sung gatakle.

³⁴Simion nii ahnyiigo satoi pyiile sateichii mpou pwi Meri dakii tamle, “Julo, ai nah ai, Isrel kito kalei mei hangkii jangpii tiikakou sateichii tiikamatu jangpii Saraanii kalaibam takle, sateichii mpou ai Bangpii dato kagong siiti tiikamangou hangninii meihangkanii tam kamashyii tei tangle.

³⁵Sateichii saryiikhang teipii go malung sek-kii, hui tangle; teipiinii mei hangkii mah lung kito kamaning swi hangtei tam mpat tangle.”

³⁶Sateichii Aser ki kalungmei, Anna sii lat katu Fanual nah sapwimei lungkakaling hangninii leile, Mpoupei ai hangkapii tingtakle, Mpoupei kalak tiisii naago kaswisii tingkum sana lungle;

³⁷sateichii tingkum reksiisatsii madai nkhii katang ai kamipwimei hangninii tiisii mpoupeinii Saraa kamaning kitei toimakle, tinghum tingna malo- tryiisii riitasii bam leile.

³⁸Sateichii teitinglang sek-kii, Mpoupeinii gong- sii Saraago hakalang tamle, sateichii Jerosalem go lat mpatpyii tang karam jangpii koisii kaleimei hang- dakii nah mah kaang kito mpoupeinii tam takle.

³⁹Sateichii Joseph nei Meri teinii Bangpiimah ajaitingshang taiswisii tiitang karam hangtei tiisang sii, Galili kito kalei Nazaret, Mpoupiina mah Namdi kitei nlaitu takle.

⁴⁰Nah tei ditusii sangting tutakle, Mpou tei Swirek kabipii tokryiile sateichii Saraa mah satoi tei mpou phyiiryii leile.

⁴¹Tingkum satui Jisu pwi ninado pfii teinii Jihudimei mah kaakamaju mah hang-ngi jangpii Jerosalem ki liit leile.

⁴²Jisunii tingkum kearii- siinakhii kashang kak, Jihudimei jai taiswisii ahnyiinii kaakamaju mah Hang-ngi jangpii maale.

⁴³sateichii hang-ngi tei sang sek-kii, ahnyii tei kilam nlaitu takle, Nlenii nah Jisu teinii Jerosalemki bamtu takle, mpou pwi nei mpou pfiinii ai-ai timakle,

⁴⁴Mpou ai meimoi kak kito tat lei lesii ahnyiinii maningsii ahnyiinii tingneikii mah pwidi tat-tii tei tat toitakle, teito ahnyii ki kalungmei sateichii kangmei hang dato ah- nyiinii mpougo fiitu takle.

⁴⁵Nlenii ahnyiinii mpougo dousu takle, teipiinii ahnyiinii Jerosalem ki nlaipi mpougo fiile.

⁴⁶Jangtumnii tainii ahnyiinii mpougo Saraa kamaning kilungto Jehudimeiki ojamei sam koikingsii sateichii ahnyii dato sam kachyiinhiisii ahnyii sumto bam kalei tei ngoutakle.

⁴⁷Mpougo shii kalumei hangteinii sung gatakle, mpounii sakaisii khela kapyii kito.

⁴⁸Sateichii ahnyiinii mpougo ngou- wo sek-kii, sung gasanii pwinii mpou dakii tamle, “Gunah nangnii nyii dakii aitii kalei ai dajangpiipo! julo, Go Pfii neinii swi kamagesii n-gu fii leile.”

⁴⁹Teito mpounii ahnyii dakii tamle, “Dajangpii gonyiinii n-gu fii leipo? Inii Gu Pfii kito bam tang karam sekle katu tei gonyiinii timakde?”

⁵⁰Nlenii mpounii khela kapyii samtei ahnyiinii tisutakle.

⁵¹Sateichii mpounii ahnyiigo kaswisii Nazaret ki gongle, sateichii ahnyiikang nkangsii lungle; sateichii mpou pwinii tam katu matum ma- dum ai mpoupei lung kikii tiigatpii lukai bamle.

⁵²Sateichii Jisu pum zai lamto, swirek kabi lamto Saraa dato sateichii mei dato lungset dousii dikhii tule.