Read Maram Naga LUK 21 Bible Online

LUK 21 - Maram Naga bible

LUK 21

¹Jisunii jumakhii, mah kanimei hangteinii ahnyii mah pyiika- toi tei sanahbung kikii toikai kalei tei ngoutakle.

²Sateichii kamipwimei hangninanii sanahsui hangna sana- bung kikii toi kakai tei mpounii ngoutakle.

³Teito mpounii tamle, “Inii gonyii dakii kasangpii tam leile, mah kaga Kamipwipei ainii ahnyiihang kak kito kai ka m-moi moisang peile.

⁴Kadapochii ahnyii- nii ahnyii mah kaki ka-nrai kiteito toikaile, Nlenii mpoupei ainii mpou mah ring kabui kabam matum madum tei toikai takle.”

⁵Sateichii ngou kabi kuitu ninado pyiitoi kalei pot hangteipii poisii kadaziikapii ngoubisii Saraa kama- ning ki ai tiibam takpo, sii mei kangkanii karashiisii leibangpiinii, mpounii tamle,

⁶“Gonyiinii ju kalei hangtei, aikito kuitu hangniniido aibam nito mashak supiinii kalai kaga tei tiikou tang karam tinglang tei gong tangle.”

⁷Teito ahnyiinii mpou dato n-nhiile, “Madhiikapyiipii, ai-ai ka- dadou gong tangpo sateichii ai ai pat tuna tii kamangou tei kadapei tangpo?”

⁸Mpounii tamle, “Gonyiigo chyii- tatma matulak tang karam jangpii sakai wolo, kadapochiinii ‘I-Ahle!’ sateichii tinglang tei nagong leitak lesii, mei kamoi kanii gu zei kito gong tangle, gonyiinii ahnyiitai swisulo.

⁹Sateichii gonyiinii satii saryii ninado khoi ara kamoi khoi shii gongchii hing sulo; kadaponii aihang ai reipiinii pat tangle, Nlenii kalui tinglang tei teitinglang sektei makle.”

¹⁰Teito Jisunii ahnyii dakii tamle, “Lui hangninanii hangninii phyii- ryiikii, sateichii Sagong Sazyii hangninanii Sagong Sazyii hangninii phyiiryiikii saryii tiitangle;

¹¹Sa- teichii katei katei malyii kachyii bam kadaziikii kito tak kateeng sateichii riihum kataam kataam hangkii pat tangle; sateichii ngou kahing ninado tii kamangou siiti sating gamto hang- kapii pat tangle.

¹²Nlenii matum madum ai pat kasunakii, ahnyiinii gonyiigo jumtangle, sateichii tiika- mage tangle, ahnyiinii gonyiigo Jehudimei Ndwiki nikii sateichii kabang kikii kaisii, gu zei jangpiinii Sagongmei ninado Governor doikii pangkhii tangle.

¹³Sakchyii pyii matutang karam jangpii gonyii dato ai-ai pat tangle.

¹⁴Teijangpiinii gonyiinii khetang karam ai reipii swi tiilak lesii gonyii lungto satlo.

¹⁵Kadapochiinii gonyiigo ngou karoumei hangnii gonyii phyiiryiito nryiipei kalak mak-kii malhiipei kalak samtam ninado swirek kabi tei Inii gonyii dakii pyiitangle.

¹⁶Sa- teichii gonyii pwi gonyii pfiimeinii, gosanameinii, goki kalungmeinii, kanghe niido gonyiigo pyiitoi tangle; sateichii gonyii mei kangkii gonii ahnyiinii gitoi tangle;

¹⁷Sateichii meihangnii gonyiigo gu zei jangpii ngou routangle;

¹⁸Nlenii go phyii- taam pakkado maga lakle.

¹⁹Gonyii mah leh kati teipiinii gonyiinii gonyii mah karing tei doutangle.

²⁰“Nlenii Jerosalem namdigo Saryiimeinii gong bangmai kalu gonyiinii kangou kak, ah go tiimaga tang karam tinglang tei gong leitakle katu tei tiwolo.

²¹Teito Judyia kito kaleimei hangteinii zang kikii pak kai matulo, namdi lungto kaleimei hangteinii teikito tat matulo, sateichii namdi kito kabam mei saba pat katumei hangtei tei kitei nlai liit matu sulo.

²²Kadapochiinii ryii kabam hangtei madou gong matu tang karam jangpii, pow karui tinglang tei aile.

²³Moi mpung kaleimei pwi sateichii nahgo rana pyiisaksii kaleimei pwi teinii tei- tinglang ki kamagele! Kadapochiinii sazyii pouryii tampei kalak tiisii ka- mage kalak tei gong tangle, sateichii aimei phyiiryiikii ra karhii tei gong tangle.

²⁴Ahnyii mei kangkagonii sa- ryiikhangpii gitangle, sateichii ahnyii mei kangkagonii Maringpouchyii jumsii lui hang kikii poi tat tutangle. Sateichii lui kakimei mah tinglang tei luikasuta Jerosalem aigo luika- kimeinii pipii kumatu tangle.

²⁵“Sateichii leimik, sakhii, sageiti hang dato tiikamangou siiti tei pat tangle; sateichii sazyii pouryiito tingkai tingrot kashyii sam shiigong katupii lui hangnii lungnyii lunghao tangle.

²⁶Kahing jangpii sateichii sazyii pouryiito pat tang karam hang gotei maning wosii kahingpii tai tangle, kadapokii sating gam mah tei maham hangtei tii-nlai tangle.

²⁷Tei tinglangki meinah sapfii mpou teinii mpou mah pumtei kava ninado tei maham kadigo kaswisii mongjyii kito kagong tei ahnyiinii ngoutangle.

²⁸Sateichii ai kakum hang pat tusekchii, gonyii phyii ngang matusii lou gamkii julo, kadapochiinii gonyiigo keipyii tang karam tinglang tei nagong takle.”

²⁹Teito mpounii ahnyii dakii nda- sam hangninii tamle, “Kadiitbang sateichii ruibang hang gotei julo,

³⁰ruibang hangteinii anhii karanu boipat katu tei ngou sek-kii, salum tinglang tei gong leitakle katu tei gonyiinii tile.

³¹Tei takumpiinii go- nyiido ai kakum hang ai pat katu tei ngou sekchii, Saraamah sating sazyii tei nagong leitakle katu tei tiwolo.

³²Inii gonyii dakii kasangpii tam leile, “Ai kakum hang ai pat kasutanii ai-ha ai gatu lakle.

³³Sating nei sazyiinii gatu tangle, nlenii gusamtam hang teinii gasang gatu lakle.

³⁴“Nlenii tak chii kamaju, jou sak kapiinhii sateichii sazyii pouryii meimah swi teipiinii gonyii lung tii kamage matu kasu tiisii sateichii teipiinei leimik tei mphee takum- piinii gonyii phyiiryiikii tisupiinii gong matu kasu tiisii, gonyii roinapii gonyii sakai wolo.

³⁵Kadapochiinii leimik tei Sazyii pouryii bamlyii hang kito lung kalei matum madum phyiiryii mphee takumpiinii gong tangle.

³⁶Nlenii pat tang karam matum madum hang kito gonyiinii nlek kabui mah teimaham dou kabui ninado meinah sapfii mpou doi tei gonyiinii satto kabui jangpiinii tinglang kaleita leh wolo.”

³⁷Sateichii mpounii Saraa kamaning kito sating kata tingna tei rali pyiile. Nlenii tingkhiilam liit sek-kii, mpounii tatpatsii Olip zang gamto nsung leile.

³⁸Sateichii tingchoi nukii meihang teinii mpou sam shiitang karam jangpii Saraa kamaning ki mpouda gong gong leile.