Read Maram Naga LUK 24 Bible Online

LUK 24 - Maram Naga bible

LUK 24

¹Nlenii hapta kito leimik karei piinei tingchoi nukii tiikada kabam kairum kabi pot tei poisii sapwimei teinii roubam kitei gong takle.

²Sateichii roubam kiteito kuitu tei koktoi kabam tei ahnyiinii ngoutakle.

³Nlenii ahnyiinii rou lung tei tat liitkii Jisu pum tei ngousu takle.

⁴Sateichii ahnyiinii teijangpii sung gasii sat leibangpii, julo, pei hakamating basii mei hangna binasek-kii ahnyiida gong sat takle.

⁵Sateichii ahnyiinii hingbeidiju aisii, sazyii nkwimang katu kak, sapfiimei hangna teinii ahnyii dakii tamle, “Katai kakto karing go gonyiinii kadajangpii fiileipo?

⁶Mpounii aiki gatakle, nlenii mpounii ringkhii takle. Mpounii Galili kito kalei tinglang kak gonyiigo tam kabam tei maning gonglo.

⁷Katunii meinah sapfii mpou gotei kem kama katiimei bah kikii pyiitoi aisii krosh gamkii dhangsii gitangle sateichii mpounii jangtumnii kashang piinei ringkhii tanglesii tam kabam tei.”

⁸Teito ahnyiinii mpou samtam hangtei maning nlaigong takle.

⁹Sateichii ahnyiinii roubam kito nlaigong siinii aihang ai keariisii- nakhii dakiido kakimei hang dakiido tam takle;

¹⁰ahnyii teinii: Meri Mekdolen, Jonah sateichii Jems pwi Meri teile, ahnyiinii kaswi katu sapwimei kakimei niido aihang ai Tiilamlwi kapyiimei dakii tampyii takle.

¹¹Nlenii samkang hang ai ahnyii mikjot kito rasam tam kajyiigo reitakle; teipiinii ahnyiinii ahnyiigo malum sutakle.

¹²Nlenii Pitarnii gungtu sat siinii roubam kitei pakmaa takle, sateichii mpounii nkuimang jukii, kamajyiipei tei roinii ngoule; sateichii pat kalei aigo ngou wosii sung gasii mpounii ki pak nlaigong takle.

¹³Sateichii julo, tei piinei leimik sek-kii ahnyii kakto mei hangna ai Jerosalem kito mail sanakii dhiisii kalei Immos sii kalat nam hang- niniiki tat leile.

¹⁴Teito pat kalei hang mah kaang kito mpoupiinanii karashii leibangpii,

¹⁵Jisu pum sekpiinii manang gong siinii, mpoupiinago kaswisii tat tutakle;

¹⁶nlenii mpoupiinanii mpougo tikasu mah tiisii mpoupiina mik tei tiiram- pou ai takle.

¹⁷Sateichii mpounii mpoupiina dakii tamle, “Goneinii tatsii tatsii hangninanii hangniniigo karashii kalei tei kadapeipo?” Teito mpoupiinanii swi kamage katu jutei pungsii sat takle.

¹⁸Mpou- piina kakto zei Kaleopas katupii teinii n-nhiile, “Jerosalemki mbui maasii teikito tingneisang pat kalei hang gotei tikasu tei nang roinii takpo?”

¹⁹Teito mpounii mpoupiina dakii tamle, “Kada dapei pat tak khe?” Teito mpoupiinanii mpou dakii tamle, “Saraa doito meihang doito tha katii sateichii sam katam hang kito teimaham kabam, Lungkaka- lingmei hangninii tiisii kabam, Nazaret ki Jisumah kaang kitole;

²⁰katunii kanat kajum tingdimei sateichii nyii phyiiryiito apum ka- tiimeinii kada takumpiinii mpougo gitang karam jangpii pyiitoi aisii Krosh gamkii gi aipo siile.

²¹Nlenii Isrelmeigo keipyii tang karam teinii mpou tei sek lesii nyiinii maningle. Nle, aihang phyiiryiikii, aitoinii tha aihang pat kalei ai tingnei jangtumnii takle.

²²Tei phyiiryiikii nyii kakto sapwimei kangkanii nyiigo sung tiimaga wole: ahnyiinii tingchoi nukii roubamni maale;

²³teito ahnyiinii mpoupum tei ngousu takle; sateichii mpounii ringkhii tak lesii sating gamluinii madhang kapyii tei ngoutak lesii nlaikai gong ahnyiinii tamle,

²⁴Sateichii nyiigo kaswi katumei kangkanii roubam kitei maa siinii, sapwimei hang teinii tam kabam takumpiinii doutakle, nlenii ahnyiinii mpou pum gonii ngoumakle.”

²⁵Teito mpounii mpoupiina dakii tamle, “Oh kapangmei, ninado lungkakalingmeinii katam sam gotei malum kalang kasumei!

²⁶Krista teinii kamage kalak hang ai lehsanii, mpou mah pumtei kava kitei liit kajyii makpo?”

²⁷Sateikii Moses dato sateichii Lungkakalingmei hang dato haosii mpou kaang kito kabi rasam hang kito kalei tei mpounii ahnyii dakii laat mpatpyii takle.

²⁸Sateichii ahnyiinii gong tang karam nam kitei manang gong sek-kii, mpounii tat madhiiloi tang karamgok tiitakle.

²⁹Teipiinii mpou- piinanii mpougo hai katwumsii tamle, “Neigo kaswisii bam tulo, da- pochiinii tingkhiilam takle sateichii leimikdo ritakle.” teipiinii mpounii mpoupiinago kaswisii tei kito bam takle.

³⁰Sateichii mpounii ahnyiigo kaswisii chiitang karam jangpii bam leibangpii, mpounii tiirok tei poiwosii satoi pyiitakle, sateikii tiirok tei tiirak wosii ahnyiigo pyiitakle.

³¹Sateichii ahnyii mik tei ngou malu takle, sateichii ahnyiinii mpougo tigong takle; teito mpounii ahnyii kak kito gatu takle.

³²Sateichii mpoupiinanii hangninanii hangni- niigo tamle, “Mpounii pwidi lamto neigo kaswisii karashii katu kaktei sateichii nei dakii kabi rasam laat mpatpyii katu tinglang kaktei nyii malung tei mipii ru kajyii takum makpo?”

³³Sateichii ahnyiinii teitinglang sek-kii gungtusii Jerosalemki nlai- gong takle, sateichii Boumei kearii- siinakhii tei nei ahnyiigo kaswisii kaleimei hang tei kaswisii ndwisanii,

³⁴“Kasangpiinii Bangpii ringkhii takle, sateichii Simon dakii mangou- pyii takle!” sii rashiisii kalei tei ahnyiinii doutakle.

³⁵Sateichii pwidito pat kalei ninado tiirok tiirak leibangpiinii mpoupiinanii mpougo kada takum- piinii tigong wopo katu tei mpoupiinanii tam takle.

³⁶Sateichii ahnyiinii sam ai tam leibangpii, mpou pum sek piinii ahnyii sumtei sat tosii, ahnyii dakii tamle, “Gonyiinii kamajung tei doulo!”

³⁷Sateichii ahnyiinii hingbeidiju aisii rangii hangninii ngouwo tak lesii maningwo takle.

³⁸Sateichii mpounii ahnyii dakii tamle, “Kadajangpiinii gonyii hing leipo? gonyii kada tiisii maning kariirhii leipo?

³⁹Gupi, gubah tei julo, I-sekle, n-gu deng julo; kadapokii rangii teinii Inii kabam ai gonyiinii ngou kajyii takumpiinii akang arou gale.”

⁴⁰Sateichii mpounii ai tam siinii, mpounii mpoupi mpou bah tei ahnyii dakii mangou takle.

⁴¹Sateichii ahnyiinii ka-nta piinii malum supii sateichii sung ga leibangpii mpounii ahnyii dakii tamle, “Aiki gonyii mah mah kachii pot mah kado leigapo?”

⁴²Teito ahnyiinii mpougo lang kabam kaa pakkii pyiile.

⁴³Sateichii mpounii teitei poisii ahnyii doito chii wotakle.

⁴⁴Sateichii mpounii ahnyii dakii tamle, “Inii gonyiigo kaswisii lung kalei kak, Inii gonyiigo kaswisii karashii kalu samkang hangtei aile, katunii, gu kaang kito Moses mah ajaitingshang kito, Lungkakalingmei sateichii tam kamatoi lhiibung kikii ryii kabam matum madum hangtei madou gong matu tangle.”

⁴⁵Teito ahnyiinii kabi rasam tiwo kabwi jangpii mpounii ahnyii swi tei laatpyii takle.

⁴⁶Teito mpounii ahnyii dakii tamle, aitiisii ryiibam takle, “Krista teinii kamage kalak leh tangle, sateichii jangtumnii ka- shang piinei kataimei kakto ringkhii tangle.

⁴⁷Sateichii Jerosalem sekto haosii Lui kaki hang dakii mpou zei kito lung kakali ninado kem kama maga kapyii tei tamroi tang karamle;

⁴⁸Gonyiinii aihang mah sakchyii teile.

⁴⁹Sateichii julo, Gu pfiinii riishii tiikabam tei Inii gonyii phyiiryiikii lang m-mangpyii tangle, nlenii kasagoi gamto teimaham teipiinii pei takumpii bakaipyii ka- suta, gonyiinii namdi kiteito bamlo.”

⁵⁰Sateichii mpounii ahnyiigo Be- tani ku katang tei chyiipat pyiisanii, mpoubah poi matusii ahnyiigo satoi pyiitakle.

⁵¹Sateichii mpounii ah- nyiigo satoi pyii leibangpii, mpounii ahnyii dato n-nou aisii, mpougo sating gam pangkhiitu takle.

⁵²Teito ahnyiinii mpougo matasii hangkapii ntasii Jerosalem ki nlaigong takle.

⁵³Sateichii ahnyiinii Saraa kama- ning kilungto taksupiinii Saraago tam matoisii bamle.