Read Maram Naga LUK 4 Bible Online

LUK 4 - Maram Naga bible

LUK 4

¹Jisu Rangii kamateipii tokryiisii Jordan karyii kito nlaipatle, Sateichii Rangiinii mpougo Sazyii Kamarong ki pang gongle.

²Teito mpougo sara kashyiinii leimik rekdai hemle, teitinglang hangki tei mpou- nii mah kado chiimakle, teipiinii teitei, sang sek-kii mpou moi mazyii takle.

³Teito sara kashyii teinii mpou dakii tamle, “Nang Saraa nah lepochiinii, kuitu aigo tiirok ndatlosii mwija pyiilo.”

⁴Teito Jisunii mpougo khekalatle, aitiisii ryiibamle, “Tiirok roipiinii meinah ringwo lakle.”

⁵Sateichii sara kashyii teinii mpougo kasagoi gam pangkhii, sazyii pouryii sagong hang mah sazyii hangtei mpougo mik hiitkii kikii mangou takle.

⁶Sateichii sara kashyii teinii mpouda tamle, “Inii aihang mah teimaham sateichii ahnyii hang mah pumtei kava tei godakii pyiitangle; dapochiinii aihang ai gudakii pyiibam takle, Inii pyii kanyii mei dakii pyiiwo buile.

⁷Teipiinii nangnii n-gu mata lepo- chiinii, aihang ai gomah tangle.”

⁸Teito Jisunii mpou dakii khe- kalatle, “Nangnii Go Saraa Bangpii go riita tangle, sateichii nangnii mpougo roinii mata tangle,” katu ai ryiibamle.

⁹Sateichii mpounii Jisugo Jero- salemki pangliit, Saraa kamaning ki kasagoi goisang gamkii masatsii mpou dakii tamle, “Nang Saraa nah lepochiinii, Nang aikito sok malo;

¹⁰Kadapochiinii aitiisii ryiibamle, ‘Saraa nii gojangpii Mpou mah Sating gamluigo tampyiisii, Sating gamluinii n-go jupyii tangle,’

¹¹sateichii gopi tei kuitu kikii deng kasu tiisii n-go ahnyiinii bahpii chyii makhiipyii tangle.”

¹²Teito Jisunii mpougo kheka- latle, “Aitiisii tam bamle, ‘Nangnii Go Saraa Bangpii go jai kaju ai tiilakle.’ ”

¹³Mpounii aitiisii kadat karyiisii hemsang kaleitai, akai kabi tinglang tei dou kasu kathang tei sara kashyii teinii mpou dato tat tutakle.

¹⁴Sateichii Jisunii Galili ki nlaigongle ninado Rangii kamatei mah teimaham tei mpougo kaswi leile, sateichii mpou mah tingha tei teiki sazyii bam hang kito tam kahitu takle.

¹⁵Mpounii Jehudimei mah Ndwiki lyiito tam ralipyiile, sateichii meihangnii mpougo tam makhangle.

¹⁶Sateichii mpougo makot kamakhii bam Nazaret kitei mpounii gongle, sateichii bam ntak piinei leimik Mpou jai taiswisii Jehudimei mah Ndwibam kitei mpounii liitsii kabi rasam tei fiitang karam jangpii gungtu sat takle;

¹⁷sateichii Lung- kakalingpii Isaiya mah Larekbung tei mpougo pyiitakle, teito mpounii Larek tei laatle, sateichii ryiikabam sam ai doutakle.

¹⁸“Bangpiimah rangii tei Guphyiiryii leile, Dapochiinii mpounii kagamei dakii kabi rasam tam matu tang karam jangpii n-gu thao manukpyii takle. Maringpouchyiimei hang go mpou rangra tiimatu katu sateichii mik kachet meigo nlailoisii mik ngou matu tang karam sam ai saa mpatpyii matu tang Karam jangpii, sateichii kamage kamarhii meigo laat mpatpyii tang karam jangpii,

¹⁹sateichii Bangpii mah kamajyii tingkum tinglang tei saa mpat matu tang karam jangpii n-gu lang m-mangle.”

²⁰Sateichii mpounii Tiighii bung tei kajyiisii anga kangamei dakii pyii aisii bamwo takle; sateichii meihang mah Mik hoi tei hangninii tiisii mpougo jule.

²¹Teito mpounii ahnyii dakii tamtu takle, “Tingnei gonyiinii shii kalu kito kabi rasam ai madougong takle.”

²²Sateichii ahnyiihangnii mpou kaang kito kabi tei karashiile satei- chii mpou mwi kito kapat lungkasyii sam gotei shii sii sung gasii tamle, “Ai-ai Joseph nah sapfii mpou tei makpo?”

²³Mpounii ahnyii dakii tamle, “Madousupii gonyiinii samtam ai gudakii tam tangle, ‘Peimhiipii, goroipii tii mbiwolo, Kaiparnam kito tiikaluhang nyiinii shii kalu tei, go nam aikitodo tiilo.’”

²⁴sateichii mpounii tamle, “Inii kasangpii gonyii dakii tam leile, Lungkakalingmei hangninii kagodo mpou mah Sazyii kito lukaipyii makle.

²⁵“Nlenii kasang kito Inii go- nyiigo tam leile, Ilaijah haki tingkum hangtum sakhii saruk ai tingryii supii sazyii hangki hangkasii taak kateeng kaktei Isrel ki Kamipwimei hangninakii leile.

²⁶sateichii ahnyii- hang kak kito mei hangninii dakiido Ilaijahgo lang m-mangpyii makle, Nlenii Sidon mah Zarephat kito Ka- mipwipei dakii lang m-mangpyiile.

²⁷sateichii Lungkakaling Ilaijah mah tinglang kitei Isrel ki Tiigyiira tiisii kalei mei hangkii leile; sateichii ahnyii kak kito mei hangninii kagodo tiimateipyii makle, nlenii Sairiya mpfii Naman go roiniile.”

²⁸Teito Jehudimei mah ndwibam kito bam kalei mei hangnii, sam hang ai shii sek-kii, rakarhiipii tokryii takle;

²⁹Teito ahnyiinii gungtu sat tosii, mpougo namdi kiteito chyiipat takle, zang gam tu-taghii kiteito toi m-mangtang karam jangpii ahnyii mah namdi tiikabam zangtoi kitei pangpi takle;

³⁰Nlenii mpounii meimoi sum teito tatpat tosii mpou pwidiki tat tutakle.

³¹Sateichii Jisunii Galili kito kalei Kaiparnam namdi kitei liitle, sateichii bam ntak piinei leimik mpounii ahnyiigo tam ralipyiile.

³²Teito mpounii ralikapyii tei ahnyiinii sung gatakle, dapochiinii mpounii teimaham haisii ralipyiile.

³³Jehudimei mah ndwiki lung tei sara kashyii kaswi kaleimei hang- ninii leile.

³⁴“Oh! Nazaret ki Jisu, nangnii nyiigo kadapei tiileziipo? Nang nyiigo tiikamage tang karam jangpii gong leipo? Nang tapo katu tei Inii tile, Nang Saraa mah kamatei sam katam meile.”

³⁵Jisunii matei kasu Rangii gotei mwija pyiisii tamle, “Malhii sulo, sateichii mei dato tatpat tolo,” teito sara kashyii teinii mpougo meimoi doikii toi m-mangpyii takle, sateichii mpou dato tatpat totakle mahkado tiimashyii supii.

³⁶Meimoi teinii sung gasii hangninanii hangninii dakii tamle, “Ai kadapei sampo dapochiinii mpounii tei mahampii matei kasu rangii hang gotei kakhatle, sateichii ahnyiinii tatpat tole.”

³⁷Sateichii teiki bamhang ki teito Jisu mah kaang kito tam roitu takle.

³⁸Sateichii mpounii Jehudimei mah ndwi ki teito tatpat tosii Simon ki kalung tei liit takle, sateichii Simon hnei tei riirhii mahungsii bamle, teito ahnyiinii mpoupei jangpii Jisudakii tamle,

³⁹teito Mpounii mpoupei kutei satto takle, sateichii mpounii kariirhii gotei kakhatsii namtakle; teito mpoupeinii kariirhii tei bitakle, sateichii mpoupeinii gungtusii ahnyiigo anga ngatu takle.

⁴⁰Sateichii leimik liit kaleitai ahnyiinii ra kataam kataam tiisii kaleimei gotei mpouda pang gong takle; teito mpounii mei nsang nsang phyiiryiikii bah poikai pyiisii ahnyiihang go tii-mbipyii takle.

⁴¹Sara kashyii hangtei niido, “Nang Saraa nah sapfii mpou teilesii saasii meihangkii dato tatpat totakle.” Sateichii Jisunii ahnyiigo mwija pyiisii malhii matu sutakle, dapochiinii mpou ai Kristale katu tei ahnyiinii tile.

⁴²Sateichii tingva liit sek-kii, mpounii tatpat tosii kamakum bam hangniniiki tat tutakle. Sateichii meimoinii mpougo fiisii fiisii Abangpiinii kalei nitei gong sek-kii, ahnyii dato mpougo tat mpat sutakle.

⁴³Nlenii mpounii ahnyii dakii tamle, “Inii Saraa mah Sating Sazyii mah kabi rasam tei kaki nam meigodo tam ralipyii tangle, dapochiinii n-gu aijangpii lang m-mangpyiile.”

⁴⁴Aitiisii Jisunii Judiya sazyii ki Jehudimei mah ndwi ki hangki tei liitsii kabi rasam tam ralipyiile.