Read Maram Naga LUK 5 Bible Online

LUK 5 - Maram Naga bible

LUK 5

¹Sateichii meihangnii mpougo bam maguisii Saraa mah samtam gotei khoikingsii kalei kak, mpounii Genesaret Dwijai sum satle.

²Sa- teichii dwijai kutei Malyii hangna kuikabam tei ngoutakle, Nlenii kaa kalimei tei Malyii gamto tatpatsii mpoumei mah ralang tei kathasii bamle;

³Teito Jisunii malyii hang- ninii lungtei tatliit takle, teiteinii, Simon mah malyii teile, sateichii dwijai ku kathang kiteito chingniikii hoipat losii mpougo tamle, teito Jisunii malyii lung tatliit bamsii meimoi gotei tam ralipyiile.

⁴Sateichii mpounii tamsang sek- kii, Simon dakii tamle, “Kathok kiteikii rotkaisii kaa num tang karam jangpii gonyii mah ralang hangtei rotkailo.”

⁵Teito Simonnii khekalatle, “Ma- dhiikapyiipii, Nyiinii tinghum matang kaa rotle, Nlenii mahkado doumakle; nlenii gosam swisii Inii ralang ai rotkaile.”

⁶Ahnyiinii ralang hangtei rotkai takle sateichii kaa hangkii rot tosii ralang hangtei hakne takle.

⁷Teipiinii ahnyiinii ahnyii kangmei malyii lungto kalei meigo lat takle, gong ahnyiigo tiiha losii, teito ahnyiinii gongsii malyii hangna tei kaapii kai tokryiisii malyii hangna tei dwikang nlum lesii bam takle.

⁸Sateichii Simon Pitar nii aihang ai ngouwo sek-kii, Jisu doito kok kumsii tamle, “He Bangpii, gudato tat tuseilo, dapochiinii Inii kakui kama meile.”

⁹Dapochiinii ahnyiinii dou kalu kaa hang gotei ngousii teigo tei mpoudo sateichii mpougo kaswi kaleimei hangdo sung gatakle;

¹⁰Sateichii Simon go kaswi kaleimei Zebedi nah sapfii mpou kana Jems nei Jon teiniido sung gatakle. Teito Jisunii Simon dakii tamle, “Hingsulo, tingnei sekpiinii n-go mei kanum mei matii tangle.”

¹¹Teito ahnyiinii dwijaiku katang kikii malyii hangna tei poipat kaisii ahnyiinii matum madum rat toisii mpoutai swi wotakle.

¹²Sateichii Jisunii namdi hang- niniiki kalei kak, mpara katiimei sapfiimei hangninii gongle. Sateichii mpounii Jisugo ngou sek-kii, mpounii mpou doi koumangsii khangle, “He Bangpii nangnii n-gu tii mbipyiinyii lepochiinii, nangnii tii mbipyii wobuile.”

¹³Teito Jisunii bah hampat mpougo dengsii tamle, “Inii mazhii takle, nang bitulo.” Teisek-kii mpara katii tei mpou gamto gatakle.

¹⁴Sateichii Jisunii mpougo kakhat katwumsii tamle, “Meida kado tam mpat sulo, Nlenii maasii gopum ai kanat kajum Atingmei dakii mangoulo, sateichii gora ai bitakle katu meidakii mati tang karam jangpii Moses nii kakhat kabam Saraa go pyiitoi tang karam tei karatlo.”

¹⁵Nlenii Jisu mah nha tei kisii kisii shiitu takle, teito shiitang karam jangpii sateichii ahnyii mah katii kanhii tei tii mbipyii matu tang karam jangpii meimoi kaswisii gongtakle.

¹⁶Nlenii mpounii mpou roipii kamakum bam kitei tat nleksii riitale.

¹⁷Tingneikii Jisunii ralipyiisii kalei kak, Galili sateichii Judiya namdi hang kito sateichii Jerosalem kito kagong kabijai katiimei sateichii ajaitingshang kati ojamei tei kuto bamle. Sateichii katii kanhiimeigo tii mbi kabui Bangpii mah teimaham tei mpougo kaswisii leile.

¹⁸Sateichii julo, mei kangkanii pum pei kataimei hangniniigo azyii gamkii kasi poi- gong, mpougo ki kalung poiliit tang karam jangpii sateichii Jisu doikii poiliit tang karam jangpii pwidi fiitu takle.

¹⁹Nlenii meitei moi beidisii mpougo poiliit tang karam pwidi tei dousupiinii, ahnyiinii ki kapou phyii- ryii tei tusii, ki kapou chingniikii ratoisii mpou zyiigo njasii ki kapou sum teito mpougo Jisu doikii m-mangtakle.

²⁰Teito ahnyii mah kamalum tei Jisunii ngou wosii tamle, “He sapfii mpou, gomah kem hangtei magapyii takle.”

²¹Teito ajaitingshang kati ojamei sateichii kabijai katiimei hangteinii mpoumii karapii karashiitu takle, “Saraago tam mashyii kalei ai tapo? Saraa supiinii kem kama magapyii kabui taleipo?”

²²Sateichii Jisunii ahnyii lungto maning kalei tei tiwosii ahnyii dakii tamle, “Gonyiinii gonyii lung kito dajangpii teitiisii maning leipo?

²³‘go kem hangtei magapyii takle’ katunei ‘Gungtusii tat tulo,’ sii katam ai kadapii mala buipo?

²⁴Nlenii go- nyiinii meinah sapfii Mpou tei sazyii pouryiito kem kama hang magapyii kabui mah teimaham leile katu tei ti kabwi jangpii Inii gonyii dakii tiimangou tanglesii Mpounii Apum pei kataipii gotei tamle: Inii n-go tam leile, Gungtulo, gozyii tei poi matusii goki gongtulo.”

²⁵Teito Mpounii binasek-kii, ahnyii doito gungtu takle, sateichii mpou zyii tei poimatusii, Saraa go tam matoisii mpou kilam tat tutakle.

²⁶Sateichiiahnyii teinii hangkapii sung gasii, Saraago tam matoile, sateichii kahingpii tokryiisii ahnyii- nii tamle, “Tingnei nyiinii kamadat tha tei ngoutakle.”

²⁷Aihang-tai tei Jisunii tatpat siinii, aha kaha nito bam kalei Lebi katupii, Aha hakaleimei hangniniigo ngouwosii mpou dakii tamle, “Gutai swilo.”

²⁸Teito mpounii matum madum rat toisii gungtusii mpoutai swiwo takle.

²⁹Sateichii Lebi teinii Jisu jangpii takbai kadi hangninii mpou kikii tiikada takle, teito ahnyiigo kaswisii ha kahamei sateichii kakimei hang- tei chiitang karam jangpii kaswisii bamtakle.

³⁰Sateichii kabijai katii- mei ninado ajaitingshang kati ojamei hangteinii mpou boumei phyiiryii teikii manam maraangsii ahnyii dakii tamle, “Gonyii dajangpii ha hakaleimei sateichii kem kama katiimeigo kaswisii chii leipo?”

³¹Teito Jisunii ahnyiigo kheka- latle, “Ara kagamei teinii peimhii meigo fiilei makle, nlenii ara kanimei teinii fiile.

³²Inii kasang kama- jyiimei jangpii gong makle, nlenii kem kama katiimei jangpii gongle, ahnyiinii lung kali matu tang karam jangpii.”

³³Mei kangkanii Jisu dakii tamle, “Jon boumeinii malotryii jatjatsii riitale, sateichii Kabijai katii boumei teinado teitiile, nlenii go boumei teinii chiisii saksii bamle.”

³⁴Teito Jisunii khekalatle, “Amyii kapangki gong kaleimei teinii nou katiipii gotei kaswisii leibangpii gonyiinii malotryiiwo buipo? Nou katiipii gotei ahnyiinii kaswisii kabamta tei ahnyiinii malotryiiwo lakle.

³⁵Nlenii tinglang tei gong- tangle, nou katiipii gotei ahnyii kakto poitoi tangle sateichii tei taito ahnyiinii malotryii tangle.”

³⁶Jisunii ahnyiigo ndasam hangninii tiisii tamle, “Mei kaniido pei kasatai kito peira chingniikii het mpatsii pei kaham kikii makotkai leimakle; makotkai leponii pai kasatai teinii pai kaham gotei chyiisii hetriit toitangle, sateichii makot kakai pei kasatai teinii kaham gotei khiijyii lakle.

³⁷Mei kaniido Jou kasatai tei kaham joubung kikii ruikai leimakle; ruikai lepochiinii jou kasatai teinii joubung tei pungpak ai tangle, sateichii jou nei joubung tei kadak ai tangle.

³⁸Nlenii jou kasatai tei bung kasatai kikii ruikai leile.

³⁹Sateichii kaham tei sak kaleitai mei kaniido kasatai tei marai lei- makle, dapochiinii ‘kaham tei sakbi buile tangle.’ ”