Read Maram Naga LUK 6 Bible Online

LUK 6 - Maram Naga bible

LUK 6

¹Bam ntak piinei leimik Jisunii lu sumto tatpatle, teito mpou bou- mei teinii rhiibui tei keksii bah lungkii manuisii chiitu takle.

²Teito kabijai katiimei kangkanii tamle, “Bam ntak piinei leimik nyii jaiting- shangnii tiisulo katu ai gonyiinii kadajangpii tiileipo?”

³Jisunii ahnyiigo khekalatle, “Devit ninado mpoumah mei teinii, moi mazyii kalei kak kadapei tiipo katu gonyiinii fiimakde?

⁴Mpounii Saraa kilung tei liitsii Saraa go pyiitoi kalei tiirok tei poisii chiile sateichii mpoumah mei hang goteido pyiile, nlenii teimah tiirok tei chii katu ai nyiimah Ajaitingshangnii mazhii makle.”

⁵Sateichii Mpounii ahnyii dakii tamle, “Meinah Sapfii Mpou teinii bam ntak piinei leimik mah Bangpiile.”

⁶Sateichii kaki bam ntak piinei leimik hangniniiki aitiisii pat takle, katunii mpounii Jehudimei mah Ndwiki lung tei liitsii ralipyiile, sateichii teito bah ajiilam pang tai kaleimei hangninii leile.

⁷Sateichii ajaitingshang kati ojamei ninado kabijai katiimei teinii mpoumah kama fiisii, bam ntak piinei leimik mpounii katii kanhiimeigo tii tii mbipyii lakposii mbeisii jusii leile.

⁸Sateichii mpounii ahnyii mah lungswi tei tiwosii, bah hangninii tai kaleipii gotei tamle, “Gungkhii sat tolo, sateichii aiki sumto satlo,” teito mpounii gungtu satto takle.

⁹Teito Jisunii ahnyii dakii tamle, “Inii gonyiigo n-nhii leile, Bam ntak piinei leimik kabi katii mak-kii tiikamaga ai kadapii katii teinii bipo?”

¹⁰Sateichii mpounii ahnyiihang-go ju maguisii mpou dakii tamle, “Go-bah ntaalo” teito mpounii bah ntaapat sek-kii, mpou bah tei bitakle.

¹¹Nlenii ahnyiinii rakarhiipii tokryiisii Jisu gamkii dapei tiichii bitangposii karashiitu takle.

¹²Teitinglangki Jisunii riita tang karam jangpii zang hangniniiki tatpi takle, sateichii mpounii tinghum matang Saraa go riitale.

¹³Sateichii tingtang sek-kii Jisunii mpou bou- meigo mpouda lat magongsii, ahnyii kakto keariisiinakhii go kalai mpat takle, sateichii ahnyiigo tiilamlwi kapyiimei sii zeido takpyii takle;

¹⁴ahnyii teinii: (mpounii Pitarsii kalat) Simon, sateichii mpoutai karhiipii Andru, Jems sateichii Jon, Filip sateichii Bartholomio,

¹⁵Metiu sateichii Thomas, Alfaiyas nah sapfii mpou Jems sateichii (Pwi sazyii jang- pii saryii katiipii sii kalat) Simon,

¹⁶Jems nah sapfii mpou Judas ninado ngoukaroumei bah kikii schoi choikai kapyiipii Judas Iskariot teile.

¹⁷Sateichii mpounii ahnyiigo kaswisii zang gamto tat humsii sazyii kathamkhang kito sat takle. Satei- chii Judiya kito, Jerosalem kito, Tair ninado Sidon dwijai kuto kalei Namdi hang kito mpou sam shiitang karam jangpii sateichii ahnyii mah katii kanhii hangtei tii mbipyii matu tang karam jangpii, meihangkii gong- takle.

¹⁸Sateichii sara kashyiinii kaswi kalei mei hang go tii mbipyii takle.

¹⁹Sateichii meihang teinii mpougo denglesii fiile, dapochiinii mpou dato teimaham patsii meihang mah ra katii kanhii hangtei tii mbipyiile.

²⁰Sateichii Jisunii Mpou boumei dakii rajang matusii tamle: “Mah kagamei doibile; dapochiinii Saraa mah Sating Sazyii tei gonyii mahle.

²¹“Aitoi moi mazyiisii kaleimei, gonyii doibile; dapochiinii gonyiigo tiitokryii pyiitangle. “Aitoi hatsii kalei mei, doibile; dapochiinii gonyiinii nuitangle.

²²“Meinah sapfii mpou jangpii gonyiigo ngou karou, pak katoi, chyii ka n-gi sateichii gonyii jai shyiilesii pak ka-mpat tinglang kak, gonyii doibile!

²³Teitinglang kak ntasii soklo, dapochiinii julo, sating gamto gonyii lhang dile; dapochiinii ai takumpii ahnyii peipao meinii Lungkakalingmei dakii tiitakle.

²⁴“Nlenii mah kanimei gonyii kadaziikapii kamage tangpo! Kadapochiinii gonyiinii kasamou hangtei doutakle.

²⁵“Aitoi tokryiisii kaleimei gonyii kadaziikapii kamage tangpo! Dapochiinii gonyiinii moi mazyii tangle. “Aitoi nuisii kalei mei gonyii kadaziikapii kamage tangpo! Dapochiinii gonyiinii madaksii hat tangle.

²⁶“Meihangnii tam mbisii kaleimei gonyii kadaziikapii kamage tangpo! Dapochiinii ai takumpiinii ahnyii peipao meinii kasang kasu lungkakaling meigo tiibamle.

²⁷“Nlenii shiisii kalei gonyii dakii Inii tam leile, Gonyiigo ngou karou- meigo lungsyiilo; gonyiigo mashyii makasii kalei meigo kabi tha tii- pyiilo.

²⁸Gonyiigo sheengsii kaleimei go satoi pyiilo, sateichii gonyiigo adjyiirou kasumei jangpii riita kai- pyiilo.

²⁹N-go mei kata hangninanii beeng lamkii kaphyii leponii, beeng lamkii teido ahgo leh pyiilo. Sateichii mei kata hangninanii gopeiba sao lepochiinii, go peijou katang piiniido ahgo poi malulo.

³⁰Godato mah kata kakhangmei hang gotei pyiilo. Sateichii godato poi kalu mah tei nangnii khang kalei sulo.

³¹Sateichii mei kakimeinii gonyii dakii tiisei matu kanyii takumpii gonyiiniido ahnyii dakii teitakumpii tiipyiilo.

³²“Gonyiigo lungkasyii meigo roinii gonyiinii lungsyii lepochiinii, gonyiinii dajangpii satoi doutangpo? Kadapochiinii kem kama katiimei teiniido ahnyiigo lungkasyiimei gotei lungsyiile.

³³Sateichii gonyiigo kabi katiimei dakii roinii gonyiinii kabi tei tiipyii lepochiinii, gonyiinii kada- jangpii satoi doutangpo? Kadapo- chiinii kem kama katiimei teiniido teiteinii tiileile.

³⁴Sateichii gonyiinii poi kaleiwo builesii maning kamalum meigo roinii mah matii lepochiinii, Kadajangpii gonyiinii satoi dou- tangpo? Kadapochiinii kem kama katiimei katangpii kem kama katiimeigo mah matii leile mai njoisii poi kaleiwo kabui jangpii.

³⁵Nlenii gonyiigo ngou karoumei hang go lungsyiilo, sateichii kabi tiilo, sateichii matiilo, douloi tang karam jangpii maning sulo. Kadaponii gonyii lhang tei ditangle, sateichii sagoi kaki Saraa nah tei gonyiinii tiitangle; kadapochiinii tiikapyii mai tikasu kashyiimei godo mpounii lukai pyiile.

³⁶Gonyii pfiinii lungsyii kati takumpii gonyiido lungsyii tilo.

³⁷“Meigo samtak tiisulo, sateichii Saraanii gonyii go samtak tiilakle. Meigo kama kikii lwikai sulo; sateichii Saraanii gonyiigo kama kikii lwikai pyii lakle. Kaleipyiilo, sateichii Saraanii gonyiigo kaleipyii tangle.

³⁸Pyiilo sateichii gonyiigo pyiitangle, katokryii, kamadhii katha katumsii, ka-nlem teipii golakang gamkii kaipyii tangle; dapochiinii nangnii mei jangpii madhii kapyii bah teipiinii n-godo Saraanii madhii- pyii loikai tangle.”

³⁹Sateichii mpounii ahnyii dakii ndasam hangninii aitiisii tamle, “Mik kachetmei hangninanii mik kachetmei hangniniigo majangtat-to buipo? Ahnei hangna siirungki takliit lakpo?

⁴⁰boumei hangninanii Madhiikapyiipii sung dibui makle, nlenii nahmei hangteinii madhiisang takle sekchii Madiikapyiipii takum tangle.

⁴¹Sateichii gomik ki kahong kara kabam tei tisupiinii, gosanapii mik ki kara kabam tei kadatiisii nangnii juleipo?

⁴²Go mik ki kahong kara kabam tei ngousupiinii, kada takumpiinii gosanapiigo, gusanapii, go mik kito kalei kara tei poitoi pyii lesii tamwo tangpo? He Kabijai katii- mei, Nangnii karei reisangki gomik kito kalei kahong kara tei poitoilo, teitii lepochiinii nangnii gosanapii mik kito kalei kara tei poitoi pyiitang karam jangpii mateisii ngou tangle.

⁴³“Kadapochiinii riitibang kabi teinii riiti kashyii mati leimakle, sateichii riitibang kashyii teinii riiti kabi mati leimakle.

⁴⁴Riitibang hang gotei kamati ati teipiinii tiwo leile. Dapochiinii Tiiratbang gamto gonyii- nii kadiit-ti rikai leimakle; sateichii atu kapung riingumbang kito gonyiinii Darkhati rikai leimakle.

⁴⁵Mei kabimei teinii kabi tei poi mpatle, mpou lung kito kalei kabi tei, sateichii kashyiimei teinii kashyii poi mpatle, mpou lung kito kalei kashyii tei, kadapokii lungto tokryiisii kalei hangtei mwinii tam mpat leile.

⁴⁶“Inii gonyiigo katam tei tiisupiinii kadajangpii gonyiinii n-gu Bangpii, Bangpii sii lat leipo?

⁴⁷Mei kata hangninanii guda gong wosii sateichii gusamtam shii kalu sateichii teihang gotei majai kalumei ai kadago reipo katu Inii gonyiigo mangou tangle.

⁴⁸Mpou teinii sazyii rai mathoksii kuitu kadi hangninii phyiiryiikii bangmaa sumsii ki tii kalumei hangninii takumle. Sateichii dwidi gongle, sateichii ki gotei dwi kadi teinii rot takle. Nlenii ki tei nlaipei lakle, dapochiinii ki tei tiigatpii tiibamle.

⁴⁹Nlenii mei kata hangninanii gu samtei shii wosii teigotei majai kasumei teinii bang- maa tiisupii rangrhii phyiiryiikii ki tiimatu kabam mei hangninii takumle. Kadaponii karyii dwi kadi teinii ki gotei rot sek-kii binasek-kii koutakle; sateichii ki tei mah kakou tei kadaziikapii tiimashyii takle.”