Read Maram Naga LUK 8 Bible Online

LUK 8 - Maram Naga bible

LUK 8

¹Tinglang shangniikii sou kaleitai Jisunii Namdi ninado nam kacheng hangki maasii, Saraa mah Sating Sazyii mah kabi rasam tei tam ralipyiitu takle; Mpou boumei keariisiinakhii tei mpoutai switakle.

²Sateichii sapwimei kangkii sara kashyii kaswi kalei kito, sateichii ra kataam kataam tiisii kalei kito tii-mbi kalu ahnyii teinii: (Mekdolen sii kalat pei) mpoupei dato sara kashyii sana baatoi kalupei Meri,

³Herot mah Srat kito kadi pung kaleipii Chuza nou Joanna, Susana sateichii sapwimei kaki hangkii swi leile; ahnyiinii seh sana hangpii haisii ahnyiigo tiihale.

⁴Sateichii namdi hangki teito mpouda gongsii meihangkii ndwiwo sek-kii, mpounii ndasam ai tamle.

⁵“Lwi karalimei hangninanii lwi ralitang karam jangpii tatpat takle. Sateichii mpounii aitiisii lwi rali kapi kito, lwirou kangkanii pwidi kuki takliit takle, sateichii teitei pipiiniido kutakle; sating gam ruinah niido chiitoi aitakle.

⁶Sateichii kangkanii kuitu phyiiryii takliit takle, sateikii teitei pokpat sek-kii, rangrhii moi kasu jangpiinii khitu takle.

⁷Sateichii kangkanii tiirat kak takliit takle, tiirat teinii lwikai gotei kaswisii lungpat siinii ghiitrang aitakle.

⁸Sateichii kangkanii sazyii kabiki takliit takle; sateichii pokpat siinii ati hai haipii matitu takle.” Mpounii ai tamsanii, mpounii saa mpatle, “Shiitang karam jangpii khoi kapungmei hangnii shii matulo.”

⁹Tam ka-ndasam ai kadagokhe sii mpou boumeinii Jisu dato n-nhiile.

¹⁰Teito mpounii khekalatle, “Saraa mah Sating Sazyii mah kamakum sam hangtei tiwo kabui mah tei gonyii dakii pyii bam takle; nlenii kakimei dakiinii ahnyiinii ngousii ngousii ngoukasu, sateichii shiisii shiisii tikasu ndasam tiisii tamziile.

¹¹“Ndasam tiisii tam kalei sam teinii aile: Lwirou teinii Saraa mah samtam teile.

¹²Pwidi kuki tak kaliit lwirou teinii, shii kalumei teile, nlenii sara kashyiinii gongsii kabi rasam tei ahnyii lung kito poitoi wole; ahnyiinii malum wosii keika- pyii tei doumatuwo kalak jangpii.

¹³Kuitu phyiiryii tak kaliit teinii, ahnyiinii kabi rasam tei shiitakle, sateichii ntasii lukaiwo takle. Nlenii maa kaga jangpiinii tinglang shangniikii malumkai takpokii, ajai kaju tinglang gong sek-kii, ahnyii tei koutakle.

¹⁴Sateichii tiirat kak tak kaliit lwirou teinii, ahnyiinii shiiwo takpokii, Sazyii pouryii mah swi kito pusii naangsii sateikii kani kahii, sateikii kasamou aihang aipii moijusii ahnyiigo ghiitmai aitakle, sateichii ahnyii mah riiti teinii mwisang mwi leimakle.

¹⁵Sazyii kabiki tak kaliit lwirou hangteinii, samtei shiiwo takpokii, katam kaswi ninado kabi lung kikii lukai wosii leh katipanii ati kamati ahnyii aile.”

¹⁶“Mei kaniido Thaomi maseisii razyiipii gom ai leimakle, mak-kii, zyii kangkii kai leimakle. Nlenii tat kaliit meihang teinii kava tei ngouwo kabui jangpii Thaomi tei kadungnikii kai leile.

¹⁷“Kadaponii tam mpat lak tang karam kamakum samah kado gale; sateichii tilak tang karam sateichii tam mpat lak tang karam samah kado gale.

¹⁸“Teijangpiinii gonyiinii kada takumpii shii leipo, sakailo: kada- ponii kaleimei dakii pyiitangle, satei- chii kagapii dateito mpounii bamlesii maning kalei tei katangpii poitoi tangle.”

¹⁹Jisu pwi ninado mpou sanamei teinii mpouda gongle, nlenii meimoi kalei jangteipiinii ahnyiinii mpougo kadouwo lak kiile.

²⁰Sateichii mpou pwi sateichii mpou sanamei teinii ki kajangto satsii mpougo kadou lesii mpou dakii sam tam maliit takle.

²¹Nlenii mpounii ahnyii dakii khekalatle, “Saraa mah samtam tei shiiwosii swi kalumei hangtei gu pwile ninado gu sanameile.”

²²Tingneikii mpounii mpou bou- meigo kaswisii malyii lungtei tatliit takle. Mpounii ahnyiigo tamle, “Nje nyiinii dwijai lugang kaapatle,” teito ahnyiinii tatpat takle.

²³Ahnyiinii malyii hoipat kalei kiteito, Jisu tei ziit tutakle; teito tingkai tingrot katei tei dwijai phyiiryii gongsanii Malyiilung tei dwipii tokryiipi ziitakle, sateichii ahnyii tei sadoi kashyii kadoutang karamki leitakle.

²⁴Teito ahnyiinii mpouda gong mpougo makengsii tamle, “Pumpii, Pumpii, nyiinii tailezii takle!” Teito mpounii gungtusii tingkai ninado tingrot gotei mwija pyiisii nam sek- kii, tingkai ninado tingrot hangtei matou takle sateichii manoisii majung takle.

²⁵Sateichii mpounii mpou boumei dakii tamle, “Gonyii mah kamalum tei kadaki leipo?” Nlenii ahnyii tei khiikapat ninado kahingpii, hangninanii hangninii dakii tamle, “Tingkai ninado tingrot go katangpii mwija pyii sek-kii, swikalei mpou ai tapo?”

²⁶Jisu ninado mpou boumei teinii Galili dwijai lugamto kalei Gerasani sazyii kitei Malyii hoipatle.

²⁷Jisunii Sazyii katangki pat sek-kii, sara kashyii kaswi kaleimei hangninanii namdi kiteito tatpatsii mpougo kadou takle. Mpounii tinglang ka- thangkii peimanido kaisu takle, sateichii kitodo bamsu takle; Nlenii roubam hang kiteito bam leile.

²⁸Mpounii Jisugo ngou sek-kii, saasanii mpou doi koumang lat sagoisii tamle, “He kasagoi goisang Saraa nah sapfii Mpou Jisu! Nangnii n-gu dapei tiimatu nyiipo? Inii n-go khang leile, n-gu tii kamage seisulo.”

²⁹Mpounii ai-ai tamle, dapokii Jisunii kashyii rangii gotei mpou dato pat tolosii mwija pyiile. Dapochiinii tinglang kaleita kashyii rangii teinii mpougo jumle, mpougo pi bah sagyiirengpii peisii bah sagyii rangkatpii kaisii meigo koibam matule. Nlenii mpounii sagyii reng ninado sagyii rangkat hang teido tiitak wole, sateichii kashyii rangii teinii mpougo sazyii kamarong kikii baa baatoile.

³⁰Sateichii Jisunii mpougo n-nhiile, “Go zei tapo?” Teito mpounii tamle, “Amoi;” kadapokii sara kashyii hangkii mpouda liit takle.

³¹Teito sara kashyii hangteinii, Nyiigo nlai kaga kathok sazyii kang liit tang karam jangpii kakhat seisulo, sii mpou dato khangle.

³²Nlenii zang ku teito bak koi hangninii tok chiisii bamle; sateichii ahnyiinii ahnyiigo bak hang dateikii maliit seilosii mpou dato khang takle, teito mpounii ahnyiigo mazhii- pyii takle.

³³Sateichii sara kashyii hangteinii mei teipou dateito pat tosii bak hangda tei liit taklepokii, bak koi teinii pangshok kiteito kachot liitsii dwijai kiteito nlum takle.

³⁴Pat kaleihang tei bak kakoimei hangteinii ngou wosii namdi kito sateichii teiki sazyii kito kaleimei hang go ahnyiinii pak mang tampyii takle.

³⁵Teito pat kalei hangtei jutang karam jangpii meimoinii tat- pat takle. Sateichii ahnyiinii Jisuda gong wosii, sara kashyii hang pat kalupii teinii peimanido kaisii swido swilingsii Jisu pibang kabam tei ngou wosii hingtakle.

³⁶Sateichii ngou kalumei hang teinii sara kashyii kaswi kaleipii gotei kada takumpii tii mbiwopo katu tei ahnyii dakii tam takle.

³⁷Sateichii Gerasani sazyii baang kiteito kaleimei hangteinii ahnyii dato tat tuseilosii mpou dato khangle. Dapochiinii ahnyii hangtei hangkapii hingtakle; teipiinii mpou- nii Malyii lung liit takle ninado nlaitu takle.

³⁸Sateichii sara kashyii pat kalupii teinii mpougo kaswisii tat lesii mpou dato khangle.

³⁹Nlenii Jisunii mpougo aitiisii tamsii langtoi aitakle: “Go kilam nlai tulo, sateichii Saraanii gojangpii kadaziikii tha kadi tiipyii takpo katu tampyiilo.” Teito mpou jangpii Jisunii kadaziikii tha kadi tiipyiipo katu tei namdi hang kito tamtat tutakle.

⁴⁰Jisunii dwijai lugamto nlaipat sek-kii, meimoinii mpougo bisii lu- keipyiile, dapochiinii ahnyii hangtei mpougo koisii bamle.

⁴¹Sateichii Jairus katupii sapfii mpou tei gongle. Mpou ai Jehudimei mah ndwi kito kadimei hangniniile. Mpounii Jisu pibang koumang kok kumsii Jisugo mpouki gong seilosii khangle.

⁴²Dapochiinii mpou nah sapwimei hangniniisang hangninii roinii kalei tingkum keariisiinakhii kashang pei tei tailesii bamtakle. Jisunii pwidi tatsii kalei kak, meimoi teinii mpougo bangbing takle.

⁴³Meimoi kaktei sapwimei hangninii tingkum keariisiinakhii zai humsii kaleipei tei swileile. Mpoupeinii mpoupei mah kabam hangtei Peimhii meida maasii ra juleibangpii tiimaga aitakle. Nlenii mei kaniido mpoupei mah ra tei tii mbiwo lak kiile.

⁴⁴Sateichii meimoi kak teito mpoupeinii Jisutai tatpi takle, sateichii mpoumah peika tei dengtakle; teito mpoupei gamto zai humsii kalei tei binasek-kii bitakle.

⁴⁵Teito Jisunii n-nhiile, “Tanii n-gu dengpo?” Teito meimoinii dengmak lesii katam kak, Pitarnii tamle, “Pumpii meimoinii n-go bang maguisii katok leile.”

⁴⁶Nlenii Jisunii tamle, “Mei kanii n-gu dengtakle, dapochiinii gugamto teimaham kapat tei Inii titakle.”

⁴⁷Sateichii sapwi mpei teinii kabaipei wolak takle katu tiwo sek-kii, mpoupeinii nchyiidung dung- sii tatpat takle, sateichii mpoupeinii Jisu pibang koumang takle, teiki meimoi doi teito; Sateichii mpougo dajangpii dengpo, ninado kada takumpiinii mpoupeinii binasek-kii biwopo katu tei tam takle.

⁴⁸Jisunii mpoupeigo tamle, “Gunah sapwi mpei, gomah kamalum teipiinii n-go tii mbipyii takle, majungsii tat tulo!”

⁴⁹Jisunii ai tam leibangpii, Jehu- dimei mah Ndwi kito Kadipii kito sampao kapungmei gongsii tamle, “Gonah sapwi mpei tei taitakle” sii mpounii Jairus go tamle, “Madhii- kapyiipiigo tii kamage loisulo.”

⁵⁰Nlenii Jisunii teitei shii sii Mpounii Jairus dakii tamle, “Hing- sulo, malumpao malumlo, sateichii mpoupei biwo buile.”

⁵¹Mpounii ki gong sek-kii, Mpounii Pitar, Jon, Jems sateichii nahnapei pwi nei pfii teisupiinii, mei hangninii kagodo ki kalung maliit sutakle.

⁵²Teikito kaleimei hangteinii mageesii hatsii bamle, Teito Jisunii tamle, “Hatsulo, dapochiinii mpou- peinii taimakle, nlenii zyiileile!”

⁵³Teito meihang teinii mpougo hoksii nuile, kadapokii nah tei taitakle katu ahnyiinii tile.

⁵⁴Nlenii Jisunii mpoupeigo bahto jumsii latle, “Gunah tulo.”

⁵⁵Teito mpoupei mah rangii tei nlaigong takle; sateichii mpoupeinii binasek-kii gungtu wotakle, mpoupeigo mah kachiipii pyiichiilo sii Jisunii ahnyiigo mwija pyiitakle.

⁵⁶Teito mpoupei pwi nei pfii teinii hangkapii sung gatakle, nlenii pat kalei hangtei meida kado tam sulosii mpounii ahnyiigo teisii kakhatle.