Read Maram Naga JON 1 Bible Online

JON 1 - Maram Naga bible

JON 1

¹Karei reisang kito samtam tei leile, samtam tei Saraago kaswisii leile, sateichii samtam tei Saraale.

²Karei reisang kito mpounii Saraago kaswisii leile;

³mahlyii hangtei mpou paikito tiile sateichii tii mpat kabam kito mpou haisupiinii mah hangninii kado tii mpat makle.

⁴Mpou dato karing tei leile, sateichii karing tei meinah mah kava teile.

⁵Kava teinii kamyii kito vasii leile, sateichii kamyii teinii teigotei ngam womakle.

⁶Mpoumah sampao kapung sapfii mpou Jon go Saraanii lang magongle.

⁷Mpounii teimah kava mah kaang kito sakchyii pyiitang karam jangpii, kalei kaga hangnii mpou paikito malum matutang karam jangpii, mpounii sakchyii pungtang karam jangpii gongle.

⁸Mpounii kava tei makle, nlenii kava gotei sakchyii tiitang karam jangpii gongle.

⁹Meihang go tii-mva kapyii kasang kava tei sazyii pouryii gong leile.

¹⁰Mpounii sazyii pouryiito leile sateichii sazyii pouryii tei mpou paikito tii-mpat takle, nlenii sazyii pouryii meinii mpougo timakle.

¹¹Mpounii lungkalei mpou sazyiiki mpounii gongle, nlenii mpou sazyii kito lungkalei mpoumeinii mpougo lukaipyii makle.

¹²Nlenii mpougo lukakaimei hang go, mpou zei kito malum kalumei hang go, Saraamah nahmei tiimatu tang karam mah teimaham tei mpounii pyiitakle;

¹³ahnyii teinii zai mah kito, mak-kii pumzai mah kito mak-kii meinah mah kamaning kamazhii kito manaamakle, nlenii Saraa datole.

¹⁴Samtam teinii pumzai ndat totakle, sateichii jumage kapyii ninado kasang teipii tokryiisii nyiikak kito lungle, Pfii mah nah sapfiimei hangniniisang hangninii roinii tiisii kalei pumtei kava takumpii nyiinii mpoumah pumtei kava tei ngoutakle.

¹⁵Jon-nii mpoumah kaang kito sakchyii tiisii saasii tamle, “Inii tam kabam ‘Ah tei aile, gutaito gongkalei mei Mpou teinii gusung dibuile; dapokii mpounii gudoi reile.’ ”

¹⁶Sateichii mpoumah katokryii kito jumage kapyii phyiiryiito jumage kapyii teido nyiihangnii doutakle.

¹⁷Kadapokii ajaitingshang tei Moses paito pyiitakle; nlenii jumage kapyii ninado kasang tei Jisu Krista paito gongle.

¹⁸Saraago mei kaniido ngousang ngoumakle, Saraago njoisii kalei, Pfii dato kalei, nah sapfii mpou teinii mpougo mati mangou pyiile.

¹⁹“Nang tapo?” sii n-nhii matu tang karam jangpii Jehudimeinii Jerosalem kito Atingmei sateichii Lebiameigo lang kamagong kak,

²⁰Jon nii khekasu tiimakle, nlenii madupii sateichii matei sagaisii “Inii Krista teimakle” sii mpounii tam mpatle.

²¹Teito ahnyiinii nhiile, “Teitiile- ponii, nang tapo?” “Nang Ilaijahpo?” Mpounii kheka- latle, “I-teimakle.” “Nang lungkakaling- meipo?” sii ahnyiinii n-nhiile. Teito mpounii khekalatle, “I-tei makle.”

²²Teijangpii ahnyiinii mpou dakii tamle, nyiigo lang kamagongmei dakii nyiinii khekalat tang karam jangpii, “Nang tapo? Nangnii go-kaang kito kadapeileziipo?”

²³Mpounii tamle, Lungkakalingpii Isaiyanii tam kabam takumpii: “Bangpii mah pwidi tiimajyiilo, sii sazyii kamarong kito saa kalei rok hangninii tei I-le!”

²⁴Farasismeinii lang kamagong sampao kapungmei teinii

²⁵teito mpougo nhiile, “Teitiileponii nang Kristado mak, Ilaijahdo mak lungka- kalingmeido makleponii, nang dajangpiinii dwi mpumpyii leipo?”

²⁶Jon-nii ahnyiigo khekalatle, “Inanii dwipii mpumpyiile; gutaito gongkalei gonyiinii tikasu Ah tei gonyii kak kito satsii leile;

²⁷Mpoumah pichot ring tei Inii loktoi tang karam Inii kajyii makle.”

²⁸Aihang ai Jon-nii dwi mpum pyiisii kalei, leimik kapatlam mah Jordan karyii Betani kito pat takle.

²⁹Adoipiinei tei Jisunii mpoulam pang gongkalei tei ngouwosii mpounii tamle, “Julo, Saraa mah Jaonah, sazyii pouryiimei mah kem kama hang poitoi kapyii tei!

³⁰Inii tam kalei Mpou tei aile, ‘gusung dikaki mei hangninii gutaito gong leile, nlenii mpounii gusung dikile, dapokii n-gu lung kasunato mpounii leitakle,’ sii Inii tam kalei mpou tei aile.

³¹Inanii mpougo timakle, nlenii mpougo Isrelmeinah dakii mati ma- ngou tang karam jangpii Inii dwipii mpum pyiisii gongle.”

³²Sateichii Jon-nii sakchyii tiisii tamle, “Rangii teinii sating gamto mahou takumpii hum kapyii tei Inii ngoutakle sateichii teiteinii mpou phyiiryiito bampyiile.

³³Iniido mpougo timakle, nlenii dwi kito mpum pyiilosii n-gu lang kamagong mpounii n-gu tamle, rangiinii hum kapyii sateichii bam kapyii nangnii kangou mpou ai rangii kamateipii mpum pyiisii kalei mpou teile.

³⁴Inii ngoutakle ninado Saraa nah sapfii mpou teilesii Inii sakchyii pyii takle.”

³⁵Adoi piinei leimik tei nlailoisii Jon nii mpou boumei hangnago kaswisii satle;

³⁶Teito Jisunii tat kalei tei jusii mpounii tamle, “Julo, Saraa mah Jaonah tei!”

³⁷Mpou-boumei hangna teinii mpounii tam kalei tei shiiwosek-kii, Jisu-tai swi wotakle.

³⁸Teito Jisunii nryiigongsii, ahnyiinii taiswi kalei tei ngou wosek-kii ahnyii dakii tamle, “Gonyiinii dapei fiileipo?” Teito ahnyiinii mpou dakii tamle, “Rabbi” (katunii Madhiikapyiipii) “Nang daki lungleipo?”

³⁹Mpounii ahnyii dakii tamle, “Patlo ninado julo.” Ahnyiinii patsii mpounii kalungni tei ngoutakle; sateichii ahnyiinii teipiinei leimik tei mpougo kaswisii bam takle, daponii tei tinglang tei pung keariikii ki kak kiile.

⁴⁰Jon-nii katam tei shii wosii, mpoutai swikatu hangna kak kito hangninii tei Saimon Pitar taika- rhiipii Andru teile,

⁴¹Mpounii karei kito mpou sung katingpii Saimon go douwosii mpou dakii tamle, “Nyiinii Messaiya (katunii Krista) go doutakle.”

⁴²Mpounii Saimon go Jisu dakii pang gongtakle. Jisunii mpougo jusii tamle, “Nangnii Jon nah sapfii mpou Saimonle, nlenii n-go Kaifas sii lat tangle.” (Kaifas katu ai kadat mpat sekkii Pitar teitiile dapeigo- pokii kuitu kadigole.)

⁴³Adoi piinei leimik tei Jisunii Galili ki gongtangle katupii sat totakle, sateichii mpounii Filip go dou wosii, Jisunii mpou dakii tamle, “Gutai swi wolo.”

⁴⁴Filipnii Andru nei Pitar mah namdi Bethsaida kitole.

⁴⁵Filipnii Nathanel go ngou wosii mpou dakii tamle, “Mosesnii ajaitingshang kikii ryii kabam Mpou gotei nyiinii dou wotakle teinii Joseph nah sapfii mpou Nazaret ki Jisu teile.”

⁴⁶Teito Nathanelnii mpou dakii tamle, “Nazaret kito mah kata kabi patto buipo?” Filipnii mpou dakii tamle, “Gongsii julo.”

⁴⁷Nathanelnii mpouda gong kalei tei Jisunii ngou wosii mpoumah kaang kito tamle, “Julo, kasang Isrelmeinah tei aiki leitakle, mpou dato samah kado tiikama gale!”

⁴⁸Nathanelnii mpou dakii tamle, “Nangnii n-gu kada takumpiinii tiwopo? Jisunii mpougo khekalatle, Filipnii n-go lat kasunato nangnii kadiitbang kangto kalei tei Inii ngoutakle.”

⁴⁹Nathanelnii mpougo khekalatle, “Rabbi,” (katunii Madhiikapyiipii) “Nangnii Saraa nah sapfii mpou teile, Nang Isrelmeinah mah Sagongle.”

⁵⁰Jisunii mpou dakii khekalatle, “Inii n-go kadiitbang kangkii ngoulesii katam jangpii nangnii n-gu malum leipo? Aidoito kisii tha kadi kadi tei nangnii ngoutangle.”

⁵¹Sateichii mpounii ahnyii dakii tamle, “Inii go- nyii dakii kasangpii tam leile, katunii sating gam laat kabam sateichii Saraa mah sating gamlui hangnii meinah sapfii mpou phyiiryiito pisii humsii kabam tei gonyiinii ngoutangle.”