Read Maram Naga JON 13 Bible Online

JON 13 - Maram Naga bible

JON 13

¹Aitoinii kaakamaju mah takbai doi tei, Jisunii sazyii pouryii ai toisii tat tutang karam tinglang tei gongtakle katu titakle. Sazyii pouryiito kalei mpoumah sek katu meihang gotei sating kata mpounii lungsyiile sateichii mpounii ahnyiigo nlai katang tei lungsyiile.

²Sateichii Saimon nah sapfii mpou Judas Iskariot lung kikii mpougo schoi choikai tang karam jangpii seitan nii reipii kaipyiisanii,

³tingkhii malot poileibangpii Jisunii, Pfiinii mpou bah kikii kalei kaga pyii aitakle ninado mpounii Saraa dato gongle ninado Saraada tat tutang takle katu tei tiwosanii,

⁴tingkhii malot poileibangpii, gungkhii sat tosii, mpoumah peimani tei kai aisii, mpounii peichetna hangninii poisii kiiki kikii haikang wotakle.

⁵Satei- chii mpounii koklat hangninii kikii dwi ruikai wosii, boumei mah pi katha mateitu takle sateichii mpoumah kiiki kikii haikang kabam peichetna teipiinii ahnyiigo piit matei pyiitu takle.

⁶Aitiisii mpounii Saimon Pitarda gongtakle sateichii Pitarnii mpou dakii tamle, “Bangpii, nangnii gupi katha mateipyii tangpo?”

⁷Jisunii mpougo khekalatle, “Inii tiikalei ai nangnii aitoi timakle, nlenii ntai kananii nang tigong tangle.”

⁸Pitarnii mpou dakii tamle, “Nangnii madou kado gupi katha matei pyiilak tang karamle.” Jisunii mpougo khekalatle, “Inii n-go katha mateipyii suleponii, nangnii gudato mah njai kado gale.”

⁹Saimon Pitarnii mpou dakii tamle, “Bangpii gupi roisupiinii gubahdo, gu phyiido shyiiseilo!”

¹⁰Jisunii mpou dakii tamle, “Dwi shyiikalei ahteinii pi teisupiinii shyiitang karam gale, mpounii kalei kaga mateile sateichii gonyiinii ma- teile, nlenii gonyii meihangnii matei makle.”

¹¹Kadapokii tanii mpougo schoi choikai tangpo katu mpounii tile, teijangpii mpounii, “Gonyii kalei kaganii matei makle” sii tamle.

¹²Mpounii ahnyii pi katha kapyii tei sang aisii mpoumah nat tei kai wosii, mpoubam kitei bamloi wosek- kii, mpounii ahnyii dakii tamle, “Inii gonyii dakii tiikapyii tei gonyii timakpo?

¹³Gonyiinii n-gu madhii- kapyiipii ninado Bangpii latle satei- chii gonyii teitei tiikatu tei kasangle, dapokii teitei I-sekle.

¹⁴Teijangpiinii gonyii mah madhiikapyiipii ninado Bangpii, Inii gonyii pi katapyii leponii, gonyiido hangninanii hang- ninii pi katapyii tang karamle.

¹⁵Kadapokii Inii gonyii dakii tiika- pyii takumpiinii gonyiiniido tiitang karam jangpii Inii gonyii dakii tamleile, kikaleimei teinii ahmah apumpii sung diki makle, sateichii lang magong kabam mpou teinii mpougo lang kamagong ah sung dikimakle.

¹⁶Kasang kasangpii Inii gonyii dakii tamleile, kikaleimei teinii ahmah apumpii sung diki makle, sateichii lang magong kabam mpou teinii mpougo lang kamagong ah sung dikimakle.

¹⁷Gonyiinii ai hang ai tiwosanii, teihang tei tiiwo leponii, gonyii sadoi bile.

¹⁸“Inii gonyii hang mah kaang kito tam makle; nlenii kalai kalumei gotei Inii tile; nlenii gumah tiirok chiikatu ah teinii guphyiiryiikii mpoupi pasui poimatu takle, sii kabi rasam kito katam tei madougong matutang karam jangpiile.

¹⁹Pat kasunakii aitoi ai ai Inii gonyiigo tam leile, katunii teitei patsekchii, I-ai mpoule katu gonyiinii malum matutang karam jangpiile.

²⁰Kasang kasangpii Inii gonyii dakii tam leile, Inii lang kamagongmei kata hangniniigo lukakaimei hangteinii n-gu lukaile sateichii n-gu lukakaimei hangteinii n-gu lang kamagong ahgo lukaile.”

²¹Jisunii ai tamsang aisek-kii, mpou tei lung hangkapii kamage takle sateichii madupii tamle, “Kasang kasangpii Inii gonyii dakii tam leile, gonyii kak kito mei hangninanii n-gu schoi choikai tangle.”

²²Mpounii tapii kaang kito tam leipo katu boumei hangteinii maning rarhiisanii, ahnyiimei hangninanii hangniniigo kajutu takle.

²³Boumei kak kito hangninii, Jisunii lungka- syiipii teinii Jisu doi sekto manangsii bamle.

²⁴Teipiinii Saimon Pitarnii mpou dakii baijaisanii tamle, “Mpounii tapii kaang kito tam leipo mpougo n-nhiile.”

²⁵Teipiinii boumei teipou teinii Jisuda manang wosanii n-nhiile, “Bangpii, teitei tapo?”

²⁶Jisunii khekalatle, “Inii tiirok chengniikii tow wosii pyiitang karam mpou teile.” Teito mpounii tiirok chengniikii poiliit tow wosanii mpounii poisii Saimon Iskariot nah sapfii mpou Judas dakii pyiitakle.

²⁷Sateichii tiirok chengniikii kapyii taito seitan teinii mpou lung liit totakle, teijangpii Jisunii mpou dakii tamle, “Nangnii tiitang karam tei kalangsii tii ailo.”

²⁸Nlenii mpounii ai ai kadapei jangpii mpou dakii tampo katu tei mah kachii nito bam kaleimeihang kak kito mei kado timakle,

²⁹Judasda sana takou tei kalei jangpii “Nyiinii kamarei mah lyiilo;” mak-kii mpounii mah kaga- mei hangdakii mah kata chengniikii pyiitang karamlesii Jisunii mpou dakii tam leilesii ahnyii mei kangkanii maningle.

³⁰Mpounii tiirok chengniikii tei poi wosek-kii; manoisekkii tatpat takle; sateichii teitinglang tei tinghumle.

³¹Judasnii tatpat kaleitai Jisunii tamle, “Aitoi meinah sapfii mpou gotei pumtei kava tiimadi pyiitakle sateichii mpou paikito Saraago pumtei kava tiimadi pyiitakle.

³²Mpou paikito pumtei kava tei mangou takleponii, meinah sapfii mpou mah pumtei kava tei mpouda sekto Saraanii mangoupyii tangle sateichii mpounii teitei kalangsii tiipyii tangle.

³³Nah kachengmei, tinglang shangniikii jangpii Inii gonyiigo kaswisii bam leile, gonyiinii n-gu fiitangle, sateichii Inii Jehu- dimei dakii tam kabam takumpii: Inii katat bam kitei gonyiinii gongpei wolakle, teitakumpiinii aitoi Inii gonyii dakiido tam leile.

³⁴Karanu kakhatsam hangninii Inii gonyii dakii pyii leile, ‘gonyii hangninanii hangniniigo kalungsyiilo.’

³⁵Gonyiida hangninanii hangniniigo lungkasyii tei leileponii, aipiinii meihangnii gonyii ai guboumeile katu tigong tangle.”

³⁶Saimon Pitarnii mpou dakii tamle, “Bangpii, nang kadaki tat tuleziipo?” Jisunii khekalatle, “Inii katat nitei nang aitoi gutai swipei wolakle, nlenii kanakinii nang gutai switangle.”

³⁷Pitarnii mpou dakii tamle, “Bangpii, aitoi Inii kadajangpii gotai swi wolakpo? Inii gumah karing ai gojangpii matoupyii tangle!”

³⁸Ji- sunii khekalatle, “Nang gujangpii gomah karing tei matoupyii tangpo? Kasang kasangpii Inii godakii tam leile, nangnii n-gu hangtum kashang tiisii mazhii kasu tiikasuta ruigang konglakle.