Read Maram Naga JON 14 Bible Online

JON 14 - Maram Naga bible

JON 14

¹“Gonyii lung lungnyii lunghao sulo; Saraago malumlo, n-gudo malumlo.

²Gu pfiiki ki shang hangniikii leile, teisuleponii, gonyii jangpii Inii mang bam tiikada tang karam jangpii I tat tutaklesii Inii gonyiida tam tangpo?

³Inii mang- sanii gonyii jangpii tiikada leponii, Inii kalei niteito gonyiido leimatu tang karam jangpii, Inii nlaigongsii gonyiigo gudakii pang gong kai- tangle.

⁴Inii tat kalei pwidi tei gonyiinii tile.”

⁵Thomasnii mpou dakii tamle, “Bangpii, nang kadaki tatleipo katu nyiinii timakle; teipiinii kada ta- kumpii nyiinii pwidi tei tiwo tangpo?”

⁶Jisunii mpougo khekalatle, “Pwi- dido, kasangdo sateichii karingdo I-le, gu paikito supii meikaniido Pfii datei gong womakle.

⁷Gonyiinii n-gu titakleponii, gonyiinii gu Pfii godo titang takle, aitoisekpii gonyiinii mpougo titakle ninado ngoutakle.”

⁸Filipnii mpou dakii tamle, “Bang- pii, Pfii gotei nyii dakii mangoulo, sateichii tei tei nyiinii maraile.”

⁹Jisunii khekalatle, “Tinglang aitiiziika kathang ai Inii gonyiigo kaswisii bam takle, teitii kido nang n-gu timakpo, Filip? N-gu ngou kalumei hangteinii Pfiigo ngoutakle, teitii leponii, nang dajangpii ‘Pfii gotei nyii dakii mangoulo,’ sii tam leipo?

¹⁰Inii Pfii dato leile ninado Pfiinii gudato leile katu nang malum makde, Filip? Jisunii mpou boumei dakii tamle, Gonyii dakii Inii tam kabam samkang hang ai gudato gongmakle, nlenii gudato kalei Pfii- nii mpoumah tha tei tiileile.

¹¹Inii Pfii dato leile ninado Pfiinii gudato leile sii tam kalei gusam aigo malumlo; teisuleponii Inii katii hang jangpiinii malumlo.

¹²Kasang kasangpii Inii gonyii dakii tam leile, N-gu kamalum mei hang teinii, Inii katiihang tei tiitangle. Nle, ahnii teisung dikaki tha tei tiitangle, dapodinchii Inii Pfiida tat tutakle.

¹³Sateichii nah sapfii mpou paikito Pfii mah pumtei kava tei ngoumatu tang karam jangpii, gonyiinii gu zei kito kakhang hangtei Inii tiipyii tangle.

¹⁴Gu zei kito gonyiinii mah katalyii khang leponii, teitei Inii tiipyii tangle.

¹⁵“Gonyiinii n-gu lungsyii leponii, gonyiinii gumah kakhatsam hangtei switangle.

¹⁶Inii Pfii dato khang tangle sateichii mpounii gonyiigo tiikaha kaki hangninii pyiitangle, kalui gasii ahnii gonyiigo kaswisii bam tangle.

¹⁷Mpou ainii Saraa mah kaang kito kasang mangou kapyii rangii teile. Sazyii pouryiimeinii ahgo doupei wolakle, dapodinchii sazyii pouryiinii ahgo ngoupei wolakle ninado tipei wolakle. Nlenii gonyiinii ahgo tile, dapodinchii ahnii gonyiigo kaswisii bamle ninado gonyii lung kito leile.

¹⁸“Inii tat tusekchii, gonyii roiniigo toidek lakle; Inii gonyiida nlaigong tangle.

¹⁹Tinglang shang- niikii sousekchii sazyii pouryiinii n-gu ngouloilak takle, nlenii gonyii- nii n-gu ngoutangle, sateichii Inii ringkalei jangpii gonyiido ringtangle.

²⁰Teipiinei leimik tei gongsekchii, Inii gonyii dato kalei takumpii, Inii Pfii dato leile sateichii gonyiinii gudato leile katu tei gonyiinii tigong tangle.

²¹“Gumah kakhatsam hang gotei lukai wosanii tei hang gotei swikalu mei hang teinii n-gu lungkasyii meile. N-gu lungkasyiimei hang go gu Pfiinii lungsyii tangle, Iniido ahgo lungsyii tangle sateichii ah dakii n-gu mangoupyii tangle.”

²²Judas (katunii Judas Iskariot kasupii) nii tamle, “Bangpii sazyii pouryii dakii supii nyii dakii go pum sek tei nangnii kadakumpii mangou tangpo?”

²³Jisunii mpougo khekalatle, “N-gu lungkasyiimei hangnii gumah karali tei switangle. Gu Pfiinii ahgo lungsyii tangle, sateichii Gu Pfiinii ninado Inii ahda gongsii ahgo kaswisii lungtangle.

²⁴N-gu lungsyii kasumei hangteinii gumah karali hang gotei swimakle, sateichii gonyiinii shiikalu ralikapyii ainii gumah makle, nlenii n-gu lang kama- gong Pfii dato gongle.

²⁵“Inii gonyiigo kaswisii leibang- piinii ai ai Inii gonyii dakii tam takle.

²⁶Gu zei kito Pfiinii lang magong tang karam tiikahapii, rangii kamatei teinii gonyiigo mahlyii hang ralipyii tangle ninado Inii gonyii dakii tam kabam hangtei maning gongloi matu tangle.

²⁷“Kamajung ai Inii gonyii dakii kaidek leile, ai ai Inii gonyii dakii pyiikalei, gumah kamajung teisekle. Sazyii pouryiinii pyii kalei takumpii Inii gonyii dakii pyiimakle. Gonyii lungnaangsii lungnyii lunghao sulo, hingsulo.

²⁸I-tat tutang lesii Inii tam kalei tei gonyiinii n-gu shiitakle, nlenii Inii gonyiida nlaigong tangle. Gonyiinii n-gu lungsyii leponii, Inii Pfiida tat tutang karam ai gonyiinii nta tang karamle, kadapokii mpounii gusung dibuile.

²⁹Ai ai kapat tinglang kak, gonyiinii malum kabui tiisii, ai hang ai aitoi pat kasunakii Inii gonyii dakii tam takle.

³⁰Inii gonyiigo kaswisii karashii mathang wolak takle, dapodinchii sazyii pouryii mah apum katiipii tei gonglei takle, sateichii ahnii guphyiiryiito teimaham samah kado gale.

³¹Nlenii Inii Pfiigo lungsyiile katu ai sazyii pouryiinii titang karamle, teijangpii ahnii n-gu kakhatsii tam kabam takumpii Inii mahlyii hang tiileile. Patlo, nje nyiinii bam aiki aito tat tule.